Read fon 2 Axɔ́sú 11 Bible Online

2 Axɔ́sú 11 - fon bible

2 Axɔ́sú 11

¹Ée Atalíi, axɔ́sú Akaziasi sín nɔ se ɖɔ vǐ émítɔn kú é ɔ́, é jɛ mɛ e ko jɔ ɖo axɔ́sú kún mɛ lɛ́ɛ bǐ hu jí.

²Lo ɔ́, cóbónú é ná hu mɛ lɛ́ɛ ɔ́, Yexocɛ́va axɔ́sú Yexolámu sín vǐ nyɔ̌nu e nyí Akaziasi nɔví ɔ́ zé Joasi Akaziasi ví ɔ́ sín axɔ́sú ví lɛ́ɛ mɛ, lobo zé e hwlá hwenu e è ɖo mɛ lɛ́ɛ hu wɛ é. É zé vǐ ɔ́ kpó nyɔ̌nu e ɖo vǐ ɔ́ hɛn wɛ ɔ́ kpó yi ɖó xɔ e mɛ è nɔ dɔ́ ɖo Mawu Mavɔmavɔ xwé gbe ɔ́ ɖokpó mɛ. Lě e é gló Atalíi bó má kú ǎ gbɔn é nɛ́.

³Vǐ ɔ́ kpó nyɔ̌nu e nɔ hɛn ɔ́ kpó nɔ hwlǎhwlá ɖo Mawu Mavɔmavɔ xwé gbe káká nú xwe ayizɛ́n. Atalíi ɔ́ ká ɖo axɔ́sú ɖu ɖo to ɔ́ nu wɛ hwenɛ́nu.

⁴Atalíi yi zinkpo jí ɔ́, xwe tɔn tɛ́nwegɔ́ ɔ́ mɛ ɔ́, Yexoyada sɛ́ wɛn dó sɔ́ja kanwekogán Kali lɛ́ɛ kpó sɔ́ja ɖěvo e nɔ kplá axɔ́sú ɔ́ lɛ́ɛ kpó, bɔ yě wá gɔ̌n tɔn ɖo Mawu Mavɔmavɔ xwé gbe. É jɛ akɔ xá yě, bó ɖɔ yě ní xwlé nǔ d'é jí ɖo Mawu Mavɔmavɔ nukɔn. Énɛ́ ɔ́ gúdo ɔ́, é zé axɔ́sú ví ɔ́ xlɛ́ yě,

⁵lobo ɖɔ nú yě ɖɔ: “Nǔ e mi ná wa lɛ́ɛ ɖíe: mi ɖótó. Mi mɛ e ɖo azɔ̌ ná wa wɛ gbɔjɛzán gbe lɛ́ɛ ɔ́, mi ná má miɖée ɖó atɔn. Atɔnvlɔ́ɖó ɖó ná cɔ́ hɔn e mɛ axɔ́sú ɔ́ nɔ́ nɔ é.

⁶Atɔnvlɔ́ɖó ná cí Súu sín hɔntogbó ɔ́ jí, bɔ atɔnvlɔ́ɖó e kpo ɔ́ ná nɔ hɔntogbó e ɖo sɔ́ja e nɔ kplá axɔ́sú ɔ́ lɛ́ɛ gúdo ɔ́ jí. Lě e mi ná cɔ́ xwé ɔ́ mɛ ɖě jɛ mɛ ɖě gúdo gbɔn ɔ́ nɛ́, bó ná lɔn nú mɛɖé ná byɔ́ mɛ ǎ.

⁷Gbɛ̌ta mitɔn we ɖě lɛ́ɛ e jɛ te sín azɔ̌mɛ gbɔjɛzán gbe lɛ́ɛ ɔ́, yědɛɛ lɛ́ɛ ná wá cɔ́ Mawu Mavɔmavɔ xwé ɔ́ ɖo fí e axɔ́sú ɔ́ ɖe é.

⁸Mi mɛ bǐ ná lɛ́ lɛ̌ dó axɔ́sú ɔ́, bɔ mɛ ɖokpó ɖokpó ná hɛn ahwanfunnú tɔn alɔ mɛ. Mɛ ɖěbǔ dó ta mi mɛ hǔn, mi hu mɛ ɔ́. Axɔ́sú ɔ́ sɛ afɔ hǔn, mi nɔ sɛ afɔ.”

⁹Sɔ́ja kanwekogán lɛ́ɛ bló nǔ lɛ́ɛ lě e vɔ̌sánú-xwlémawutɔ́ Yexoyada ɖɔ gbɔn nú yě é. Yě sɛ sɔ́ja yětɔn yětɔn kplé. Mɛ e wá azɔ̌mɛ gbɔjɛzán gbe lɛ́ɛ, kpó mɛ e tɔ́n sín azɔ̌mɛ gbɔjɛzán gbe lɛ́ɛ kpó kplé, bɔ yě bǐ zɔn, bó ɖidó vɔ̌sánú-xwlémawutɔ́ Yexoyada gɔ́n.

¹⁰Yexoyada fɔ axɔ́sú Davídi sín hwǎn kpó gǎglónú kpó e ɖo Mawu Mavɔmavɔ xwé gbe lɛ́ɛ jó nú sɔ́ja kanwekogán lɛ́ɛ.

¹¹Sɔ́ja e nɔ kplá axɔ́sú ɔ́ lɛ́ɛ hɛn ahwanfunnú yětɔn yětɔn alɔ mɛ, bó to lɛ́ lɛ̌ dó axɔ́sú ɔ́. Yě to yěɖée bɛ́ sín sinsɛnxɔ ɔ́ sín ɖisíxwé káká yi amyɔxwé, ɖo vɔ̌sákpe ɔ́ kpá, bó ná cɔ́ axɔ́sú ɔ́.

¹²Yexoyada ɖe axɔ́súví ɔ́ dó nukɔn, lobo zé tablá ɖokpó kpó sɛ́nwéma ɔ́ kpó jó n'i, bɔ yě kɔn ami dó ta nú Joasi, bó sɔ́ ɛ axɔ́sú, bó jɛ alɔ xo n'i jí, bó nɔ ɖɔ: “Susu nú axɔ́sú ɔ́!”

¹³Ée Atalíi se xó e sú wɛ togun ɔ́ kpó sɔ́ja lɛ́ɛ kpó ɖe ɔ́, é wá mɔ yě ɖo Mawu Mavɔmavɔ xwé gbe.

¹⁴ Ée é wá ɔ́, é mɔ axɔ́sú yɔ̌yɔ́ e è sɔ́ ɔ́ ɖo te Mawu Mavɔmavɔ xwé ɔ́ sín dotín lɛ́ɛ ɖokpó kpá, lě e è ko nɔ bló gbɔn é, bɔ ahwangán lɛ́ɛ kpó kpɛnkúntɔ́ lɛ́ɛ kpó ɖo te akpá tɔn. Togun ɔ́ bǐ ɖo awǎ jɛ wɛ, kpɛnkúntɔ́ lɛ́ɛ ɖo kpɛn kún wɛ. Ée Atalíi mɔ mɔ̌ é ɔ́, é vún awu dó kɔ nú éɖée, bó ɖɔ: “Ahizi nɛ́! Ahizi nɛ́!”

¹⁵Ée é ɖɔ mɔ̌ ɔ́, vɔ̌sánú-xwlémawutɔ́ Yexoyada ɖɔ nú sɔ́ja kanwekogán e ɖo ahwangɔnu ɔ́ nu lɛ́ɛ ɖɔ: “Mi ɖe nyɔ̌nu nɛ́ tɔ́n sín mɛ mɛ; mɛɖé xwedó e hǔn, mi hu mɛ ɔ́.” Yexoyada ɖɔ mɔ̌, ɖó é ba ɖɔ è nǐ hu i ɖo Mawu Mavɔmavɔ xwé gbe ǎ.

¹⁶Ée é ɖɔ mɔ̌ ɔ́, yě dɔn ɛ gbɔn Sɔ́ lɛ́ɛ sín Hɔntogbó nu byɔ́ hɔn ɔ́ mɛ, bó hu i ɖo fínɛ́.

¹⁷Yexoyada dɔn axɔ́sú ɔ́ kpó togun ɔ́ kpó, bɔ yě jɛ akɔ xá Mawu Mavɔmavɔ, bó ná nyí togun Mawu Mavɔmavɔ tɔn. Yexoyada lɛ́ dɔn axɔ́sú ɔ́ kpó togun tɔn kpó, bɔ yě jɛ akɔ xá yěɖée.

¹⁸Bɔ togun ɔ́ bǐ sɔ́ nǔ bó yi kíjá vodún Baalu xwé ɔ́ bǐ. Yě gba vɔ̌sákpe lɛ́ɛ kpó bǒcyɔ lɛ́ɛ kpó, bó lɛ́ hu Matáni; nya énɛ́ wɛ nyí vodún Baalunɔ. Yě hu i nyi vɔ̌sákpe lɛ́ɛ nukɔn. Ée nǔ énɛ́ lɛ́ɛ jɛ fó é ɔ́, Yexoyada ɖe mɛ bɔ yě nɔ́ cɔ́ Mawu Mavɔmavɔ xwé ɔ́.

¹⁹Yexoyada lɛ́ kplé sɔ́ja kanwekogán Kali lɛ́ɛ kpó sɔ́ja ɖěvo e nɔ kplá axɔ́sú ɔ́ lɛ́ɛ kpó, kpó togun ɔ́ bǐ kpó, bɔ yě ɖe axɔ́sú ɔ́ tɔ́n sín Mawu Mavɔmavɔ xwé. Énɛ́ ɔ́ gúdo ɔ́, yě gbɔn sɔ́ja e nɔ kplá axɔ́sú ɔ́ lɛ́ɛ sín hɔntogbó ɔ́ nu, bó byɔ́ hɔn ɔ́ mɛ. Énɛ́ ɔ́, Joasi jínjɔ́n axɔ́súzinkpo ɔ́ jí.

²⁰Togun ɔ́ bǐ j'awǎ jɛ jí. Ée è hu Atalíi ɖo hɔnmɛ é ɔ́, toxo ɔ́ vo.