Read fon 2 Axɔ́sú 14 Bible Online

2 Axɔ́sú 14 - fon bible

2 Axɔ́sú 14

¹Hwenu e Izlayɛ́li xɔ́sú Yexoázi Yoakázi ví ɔ́ ɖo xwe we bló wɛ ɖo zinkpo jí ɔ́, Amasiyasi Joasi Judáa xɔ́sú ví ɔ́ yi axɔ́súzinkpo Judáa tɔn jí.

²Xwe koatɔ́n (25) wɛ é ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe koatɔ́n-nukún-ɛnɛ (29). Nɔ tɔn ɔ́, Jeluzalɛ́munu wɛ, bɔ è nɔ ylɔ́ ɛ ɖɔ Yexoadini.

³É nɔ wa nǔ e nyɔ́ Mawu Mavɔmavɔ nukún mɛ é. Amɔ̌, é wa nǔ sɔ tɔ́gbó tɔn Davídi ǎ. Lě e tɔ́ tɔn Joasi wa nǔ gbɔn ɔ́ wɛ é bló gbɔn pɛ́pɛ́pɛ́.

⁴Nǔ ka ɖo mɔ̌ có vɔ̌sákpe e gbɔn só jí só jí lɛ́ɛ kpo ɖo te. Togun ɔ́ lɛ́ kpo ɖo vɔ̌ sá wɛ bó ɖo zǎlínkpɔ́n dó zo wɛ gbɔn fí énɛ́ lɛ́ɛ.

⁵Ée Amasiyasi sín acɛkpikpa jínjɔ́n ayǐ bǐ é ɔ́, é hu azaglɔ́gán e hu tɔ́ tɔn lɛ́ɛ é.

⁶ Amɔ̌, é ɖó alɔ vǐ yětɔn lɛ́ɛ ɖěbǔ wú ǎ. É bló lě e é ɖe gbɔn ɖo Mɔyízi sín sɛ́nwéma mɛ ɔ́, ɖó Mawu Mavɔmavɔ ɖɔ dó wěma ɔ́ mɛ ɖɔ: “È nǎ hu tɔ́ ɖó vǐ tɔn nu ǎ. È nǎ hu vǐ ɖó tɔ́ tɔn nu ǎ. Mɛ e wa nǔ nyi do é wɛ è nǎ hu, ɖó nǔ e é wa ɔ́ nu.”

⁷Amasiyasi wɛ lɛ́ hu Edɔ́munu děgba we afɔwó (10.000) ɖo Jɛtɔdo ɔ́ mɛ, bó yí Sɛla toxo ɔ́ hwenu e yě ɖo ahwan ɔ́ fun wɛ é, bó sun nyǐ toxo ɔ́ ɖɔ Yokiteɛ́li; nyǐkɔ énɛ́ kpo ɖo te káká jɛ égbé.

⁸Énɛ́ ɔ́ gúdo ɔ́, Amasiyasi sɛ́ mɛ dó Yexoázi Yoakázi ví, Jehu vívú Izlayɛ́li xɔ́sú ɔ́ ɖɔ yě nǐ yi ɖɔ n'i ɖɔ: “Wǎ nú mǐ nǎ fun ahwan.”

⁹Bɔ Yexoázi ɖɔ sɛ́ dó Amasiyasi ɖɔ: “Wunkan byɔ́ vǐ sɛ́dlutín ɖo Libáan só jí, bó ná da nú vǐ tɔn; gběkanlin ɖokpó ká gbɔn wunkan ɔ́ jí bó gbídí.

¹⁰Ée a ɖu ɖo Edɔ́munu lɛ́ɛ jí é ɔ́, a jɛ afɔ tɛ ayǐ jí. Susu énɛ́ e a xɔ ɔ́ ní kpé we bónú a nɔ fí e a ɖe ɔ́. Étɛ́wú a jlǒ ná dó ta ahwan e mɛ hwi kpó Judáanu lɛ́ɛ kpó bǐ ná yi dɔn ɖe ɔ́ mɛ?”

¹¹Lo ɔ́, Amasiyasi wlí tó xó énɛ́ wú ǎ. Bɔ axɔ́sú Izlayɛ́li tɔn Yexoázi kpódó Amasiyasi kpó fun ahwan ɖo Bɛti-Cɛmɛ́ci ɖo Judáa yíkúngban jí.

¹²Izlayɛ́linu lɛ́ɛ ɖu ɖo Judáanu lɛ́ɛ jí, bɔ Judáanu lɛ́ɛ ɖokpó ɖokpó hɔn yi xwé.

¹³Izlayɛ́li xɔ́sú Yexoázi wlí Judáa xɔ́sú Amasiyasi Joasi ví, Akaziasi vívú ɔ́ ɖo Bɛti-Cɛmɛ́ci bó kplá ɛ yi Jeluzalɛ́mu. Ée é kplá ɛ yi Jeluzalɛ́mu é ɔ́, é mu Jeluzalɛ́mu sín ahohó ɔ́ sín Eflayímu hɔntogbó ɔ́ jí káká wá jɛ Zwemɛhɔntogbó ɔ́ jí. Fí e é mu dǒ ɔ́ gbɔn ɔ́ yi mɛ̌tlu afɔɖé (200) mɔ̌.

¹⁴É bɛ́ siká kpó kpatágan kpó, kpó nǔ xɔ akwɛ́ tɛnmɛ tɛnmɛ kpó e ɖo Mawu Mavɔmavɔ xwé gbe lɛ́ɛ, kpó ée ɖo dɔkunxɔ axɔ́sú ɔ́ tɔn mɛ lɛ́ɛ kpó. É bɛ́ mɛ e è wlǐ ɖó gbanu lɛ́ɛ lɔmɔ̌, bó lɛ́ kɔ ɖidó Samalíi.

¹⁵È wlǎn axɔ́sú Yexoázi sín tan e kpo lɛ́ɛ, nǔ e é wa lɛ́ɛ, akɔ́nkpinkpan e é ɖó ɔ́, kpó ahwan e é fun xá axɔ́sú Judáa tɔn Amasiyasi ɔ́ kpó dó “Izlayɛ́li xɔ́sú lɛ́ɛ sín Tan wéma” mɛ.

¹⁶Axɔ́sú Yexoázi zán wá kú bɔ è sɔ́ ɛ yi ɖó Samalíi ɖo axɔ́sú Izlayɛ́li tɔn lɛ́ɛ sín yɔdo mɛ, bɔ vǐ tɔn Jelobowámu ɖu axɔ́sú ɖó tɛn tɔn mɛ.

¹⁷Ée Izlayɛ́li xɔ́sú Yexoázi zán kú é ɔ́, Judáa xɔ́sú Amasiyasi nɔ gbɛ xɔ xwe afɔtɔn.

¹⁸È wlǎn axɔ́sú Amasiyasi sín tan e kpo lɛ́ɛ dó “Judáa xɔ́sú lɛ́ɛ sín Tan wéma” mɛ.

¹⁹Lě e Amasiyasi kú gbɔn ɔ́ ɖíe: È blǎ gbě tɔn ɖo Jeluzalɛ́mu. É wá su gbe ɖokpó bɔ é hɔn yi cí Lakíci toxo mɛ, amɔ̌, è tɔ́n gbě tɔn káká yi Lakíci dɔ̌n bo hu i.

²⁰È sɔ́ cyɔ tɔn ɖó kɛkɛ́ví mɛ, bɔ sɔ́ gěgé dɔn, bɔ è wǎ ɖi i ɖo Jeluzalɛ́mu ɖo tɔ́gbó tɔn lɛ́ɛ sín yɔdo mɛ ɖo Davídi Toxo mɛ.

²¹Judáa to ɔ́ bǐ zě Oziyási ɖó tɔ́ tɔn Amasiyasi tɛn mɛ. Xwe afɔtɔn-nukún-ɖokpó ɖó wɛ é ɖe hwenɛ́nu.

²²Ée Oziyási tɔ́ kú ɔ́, é wɛ lɛ́ vɔ́ Eyilati toxo ɔ́ yí bó blóɖó.

²³Hwenu e axɔ́sú Judáa tɔn Amasiyasi, Joasi ví ɔ́ ɖo xwe afɔtɔn bló wɛ ɖo axɔ́súzinkpo Judáa tɔn jí ɔ́, Jelobowámu axɔ́sú Izlayɛ́li tɔn Yexoázi ví ɔ́ yi axɔ́súzinkpo Izlayɛ́li tɔn jí ɖo Samalíi. É ɖu axɔ́sú káká nú xwe kanɖé-nukún-ɖokpó (41).

²⁴É nɔ wa nǔ e má nyɔ́ Mawu Mavɔmavɔ nukún mɛ ǎ é. É lɛ́ kɔ sín hwɛ e Jelobowámu Nɛvati ví ɔ́ hu bó dɔn Izlayɛ́li to ɔ́ d'é mɛ lɛ́ɛ gúdo ǎ.

²⁵ É lɛ́ vɔ́ ayǐkúngban Izlayɛ́li tɔn lɛ́ɛ yí sín Lɛbo-Hamáti toxo mɛ ɖo totaligbé káká yi Xu Kúkú ɔ́ kɔn ɖo tofɔligbé. Nǔ énɛ́ e Jelobowámu bló ɔ́ sɔgbe xá xó e Mawu Mavɔmavɔ, Mawu Izlayɛ́li tɔn ɖɔ gbɔn gbeyíɖɔ tɔn Jonási jí é. Jonási ɔ́, Amitayi Gati-Hefɛ́ɛnu ɔ́ ví wɛ.

²⁶Nǔ cí mɔ̌, ɖó Mawu Mavɔmavɔ mɔ lě do e Izlayɛ́linu lɛ́ɛ sín nǔ blǎ wǔ sɔ é. Mɛ ɖěbǔ ɖe bó ná hwlɛ́n Izlayɛ́linu lɛ́ɛ gán ǎ, xɛ ɖe bó ná wá hwlɛ́n yě gán ǎ.

²⁷Lo ɔ́, Mawu Mavɔmavɔ ɖɔ émí kún ná vívá Izlayɛ́linu lɛ́ɛ kún sín hwe glɔ́ fí ó. Énɛ́ ɔ́ wú wɛ é hwlɛ́n Izlayɛ́li gán gbɔn Jelobowámu Yexoázi ví ɔ́ jí.

²⁸È wlǎn axɔ́sú Jelobowámu sín tan e kpo lɛ́ɛ dó “Izlayɛ́li xɔ́sú lɛ́ɛ sín Tan wéma” mɛ: nǔ e é wa lɛ́ɛ, akɔ́nkpinkpan e é ɖó ɖo ahwangbénu ɔ́, kpó lě e é zé Damási toxo ɔ́ kpó Hamáti toxo ɔ́ kpó jó nú Izlayɛ́li gbɔn ɔ́ kpó ɔ́, è wlǎn bǐ d'é mɛ; Damási toxo ɔ́ kpó Hamáti toxo ɔ́ kpó ɔ́, Judáa tɔn wɛ yě nyí ɖ'ayǐ.

²⁹Jelobowámu zán wá kú bɔ è sɔ́ ɛ ɖó Izlayɛ́li xɔ́sú lɛ́ɛ sín yɔdo mɛ ɖo Samalíi, bɔ vǐ tɔn Zakalíi ɖu axɔ́sú ɖó tɛn tɔn mɛ.