Read fon 2 Axɔ́sú 18 Bible Online

2 Axɔ́sú 18 - fon bible

2 Axɔ́sú 18

¹Hwenu e Ozée Ela ví ɔ́ ɖo xwe atɔn bló wɛ ɖo zinkpo jí ɖo Izlayɛ́li ɔ́, Ezekiyási Akázi ví ɔ́ ɖu axɔ́sú ɖo Judáa.

²Xwe koatɔ́n (25) wɛ é ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe koatɔ́n-nukún-ɛnɛ (29). Nɔ tɔn nɔ nyí Avi, bó nyí Zekaliya ví.

³É nɔ́ wa nǔ e nyɔ́ Mawu Mavɔmavɔ nukún mɛ ɔ́ tɔ́gbó tɔn Davídi ɖɔhun pɛ́pɛ́pɛ́.

⁴ É gba vɔ̌sákpe e gbɔn só jí só jí lɛ́ɛ bǐ, bó gba awǐnnya e yě tun te bo nɔ sɛn lɛ́ɛ, bó sɛ́n vodún Acela. Dan e Mɔyízi sɔ́ ganvɔ dó bló ná ɔ́, é gba hánnyá, ɖó káká wá jɛ hwenɛ́nu ɔ́, Izlayɛ́li ví lɛ́ɛ kpo ɖo zǎlínkpɔ́n dó zo nú dan énɛ́ ɔ́ wɛ. È nɔ ylɔ́ dan ɔ́ ɖɔ Nɛxucitáni.

⁵Ezekiyási ɖeji dó Mawu Mavɔmavɔ, Mawu Izlayɛ́li tɔn wú. Axɔ́sú e jɛ nukɔn n'i ɖo Judáa lɛ́ɛ kpó ée wá jɛ gǔdo tɔn lɛ́ɛ kpó ɖě wa nǔ é ɖɔhun ǎ.

⁶É zunfán Mawu Mavɔmavɔ syɛ́nsyɛ́n, é jó e dó kpɛɖé ǎ, é nɔ nyi sɛ́n e Mawu Mavɔmavɔ dó nú Mɔyízi lɛ́ɛ é bǐ.

⁷Mawu Mavɔmavɔ ɖo kpɔ́ xá Ezekiyási, bɔ é sɔ́ nǔɖé bó wa ɔ́, é nɔ mɔ nu tɔn. É fɔ́n gǔ dó axɔ́sú Asilíi tɔn jí, bó gosín acɛ tɔn mɛ.

⁸É gba Filisitɛ́ɛn lɛ́ɛ, bó nya yě káká yi Gaza. É yí to yětɔn, bɛ́ sín gletoxo kpɛví kpɛví lɛ́ɛ jí káká yi toxo e è mɛ ahohó lɛ́ lɛ̌ dó lɛ́ɛ jí.

⁹Hwenu e Ezekiyási ɖo xwe ɛnɛ bló wɛ ɖo zinkpo jí ɖo Judáa, bɔ Ozée Ela ví ɔ́ ká ɖo xwe tɛ́nwe bló wɛ ɖo zinkpo jí ɖo Izlayɛ́li ɔ́, Salumanasáa Asilíi xɔ́sú ɔ́ wá tɔ́n ahwan Samalíi toxo ɔ́, bó xá.

¹⁰Xwe atɔn wɛ é sɔ́ ɖó te bo dó yí toxo ɔ́; hwenɛ́nu ɔ́, Ezekiyási Judáa xɔ́sú ɔ́ ɖo xwe ayizɛ́n bló wɛ ɖo zinkpo jí, bɔ Ozée Izlayɛ́li xɔ́sú ɔ́ ɖo xwe tɛ́nnɛ bló wɛ.

¹¹Asilíi xɔ́sú ɔ́ wlí Izlayɛ́linu lɛ́ɛ hɛn yi Asilíi. É bɛ́ mɛ ɖě ɖó Halaxi gbé jí, bó bɛ́ ɖě ɖó Gozáni gbé jí, fí e Habɔ́ɔ tɔ ɔ́ ɖe é, bó bɛ́ mɛ ɖě ɖó Mɛdi toxo lɛ́ɛ mɛ.

¹²Nǔ énɛ́ ɔ́ gbo Izlayɛ́linu lɛ́ɛ, ɖó yě ɖótó Mawu Mavɔmavɔ, Mawu yětɔn sín xó ǎ, yě nɔ gbejí nú akɔ e yě kpó Mawu yětɔn kpó jɛ é ǎ; sɛ́n e mɛsɛntɔ́ Mawu Mavɔmavɔ tɔn Mɔyízi ná yě lɛ́ɛ ɔ́, yě nyi ɖě ǎ.

¹³Hwenu e Ezekiyási ɖo xwe wǒ-ɛnɛ bló wɛ ɖo zinkpo jí ɔ́, Senakelíbu Asilíi xɔ́sú ɔ́ wá tɔ́n ahwan Judáa toxo e è mɛ ahohó lɛ́ lɛ̌ dó lɛ́ɛ bǐ, bó yí.

¹⁴Énɛ́ ɔ́, Ezekiyási Judáa xɔ́sú ɔ́ ɖɔ sɛ́ dó Asilíi xɔ́sú ɔ́ ɖo Lakíci ɖɔ: “Un wa nǔ ɖokpó nyi do, ka kɛnklɛ́n bó jó mì dó. Énɛ́ ɔ́, a byɔ́ nǔ ɖěbǔ mì ɔ́, un ná ná.” Ée Asilíi xɔ́sú ɔ́ se mɔ̌ ɔ́, é ɖɔ sɛ́ dó Ezekiyási ɖɔ é ɖó ná ná kpatágan kilóo děgba we afatɔ́n (9.000), kpó siká kilóo afɛnɛ kanwe ko (900) kpó émí.

¹⁵Énɛ́ ɔ́, Ezekiyási bɛ́ kpatágan e ɖo Mawu Mavɔmavɔ xwé gbe é bǐ kpódó ée ɖo dɔkun e ɖo hɔnmɛ lɛ́ɛ mɛ é kpó jó.

¹⁶Hwenɛ́nu wɛ Ezekiyási kɔ́n siká e ɖo Mawu Mavɔmavɔ xwé ɔ́ sín hɔn lɛ́ɛ wú é kpó éé ɖo hɔnkpo lɛ́ɛ wú é kpó, bó bɛ́ sɛ́ dó Asilíi xɔ́sú ɔ́.

¹⁷Asilíi xɔ́sú ɔ́ nɔ Lakíci, bó sɛ́ mɛ dó axɔ́sú Ezekiyási ɖo Jeluzalɛ́mu. Mɛ e é sɛ́ dó lɛ́ɛ ɖíe: ahwangán ɖaxó bǐ ɔ́, ahwangán e kpa acɛ dó ahwangɔnu ɔ́ nu é kpó ahwangán e nɔ kplá axɔ́sú ɔ́ é kpó. Ahwangɔnu ɖaxó ɖé nu wɛ yě zɔn bó wá Jeluzalɛ́mu. Ée yě wá ɔ́, yě nɔ te ɖo ali e è nɔ gbɔn yi Avɔnyatɔ́ lɛ́ɛ gle mɛ ɔ́ jí ɖo fí e sindo e ɖo só ta ɔ́ sín sin nɔ gbɔn é kpá.

¹⁸Yě ylɔ́ axɔ́sú ɔ́, bɔ Eliyakímu Ilukyahu ví hɔnmɛgán ɔ́ yi, bɔ Cevúna wěgbójínɔtɔ́ ɔ́ kpó Yoáxi Asáfu ví wěgbóhɛntɔ́ ɔ́ kpó xwedó e.

¹⁹Énɛ́ ɔ́, ahwangán e nɔ kplá Asilíi xɔ́sú ɔ́ ɖɔ nú yě ɖɔ: “Mi ɖɔ nú Ezekiyási ɖɔ: ‘Nǔ e axɔ́sú ɖaxó Asilíi tɔn ɖɔ ɔ́ ɖíe: Étɛ́wú gán jɛ wɛ a ka ɖe tawun?

²⁰È ja ahwan fun gbé ɔ́, wě tɔn wɛ è nɔ ɖe, bó nɔ́ ɖó akɔ́nkpinkpan. Hwɛ ka vɛdó ɖɔ xó kpowun wɛ nɔ fun ahwan sín. Mɛ̌ wú a ka ɖeji dó tawun bo fɔ́n gǔ dó jǐ ce?

²¹É ma nyí Ejípu wú wɛ a ɖeji dó a? Ejípu e nyí fántín lúlɔ́, bɔ mɛɖé gán jɛ wǔ tɔn ɔ́, é nɔ gbo alɔ nú mɛ ɔ́, bó nɔ́ byɔ́ lan tɔn mɛ ɔ́, é wú wɛ hwɛ ɖeji dó a? Mɔ̌ wɛ Ejípu xɔ́sú ɔ́ cí gbɔn nú mɛ e nɔ gán jɛ wǔ tɔn lɛ́ɛ bǐ.

²²Mi ná ɖɔ nú mì din ɖɔ Mawu Mavɔmavɔ, Mawu émítɔn wú wɛ émí gán jɛ. É ma ká nyí hwi ɖésú Ezekiyási ɔ́ wɛ gba vɔ̌sákpe e gbɔn só jí só jí lɛ́ɛ, bó gba vɔ̌sákpe lɛ́ɛ, bó ɖɔ nú Judáanu lɛ́ɛ kpó Jeluzalɛ́munu lɛ́ɛ kpó ɖɔ yě ma sɔ́ jɛ kpo ɖo vɔ̌sákpe ɖěvo nukɔn zɛ Jeluzalɛ́mu tɔn wú ó a?

²³Din ɔ́, nú a mɔ ɖɔ émí ná kpé nǔɖé wú hǔn, wǎ gbo gbě xá gǎn ce Asilíi xɔ́sú ɔ́. Nú a nǎ mɔ sɔ́xátɔ́ ɔ́, un ɖo gbesisɔ mɛ, bó ná ná we sɔ́ afɔwó (2.000).

²⁴A ka sixú kpé gǎn ce sín ahwangán lɛ́ɛ ɖěbǔ wú ǎ; mɛ gǔdo gúdo tɔn e ɖo yě mɛ ɔ́, a sixú kpé wǔ tɔn ǎ. A ɖo ji ɖe ɖó dó Ejípu wú wɛ ɖɔ émí ná mɔ ahwankɛkɛ́ví kpó sɔ́xátɔ́ kpó.

²⁵Nǔ e un ka ná kanbyɔ́ we lɔ ɔ́, Mawu Mavɔmavɔ mɛ vo wɛ un tɔ́n ahwan to élɔ́, bó ná gba wɛ a vɛdó a? Gbeɖé! Mawu Mavɔmavɔ ɖésú wɛ ɖɔ nú mì ɖɔ nyɛ ní wá tɔ́n ahwan to élɔ́ bó gba.’ ”

²⁶Eliyakímu Ilukyahu ví ɔ́ kpó Cevúna kpó, kpó Yoáxi kpó ɖɔ nú ahwangán ɔ́ ɖɔ: “Kɛnklɛ́n, dǒ alamugbe nú mǐ, mǐ se gbe énɛ́ ɔ́ ganjí. Ma sɔ́ dó Ebléegbe ɖě nú mǐ ó, é má nyí mɔ̌ ǎ ɔ́, mɛ e ɖo ahohó ɔ́ ta lɛ́ɛ bǐ ɖo tó ɖó mǐ wɛ.”

²⁷Ahwangán ɔ́ yí gbe nú yě ɖɔ: “Axɔ́sú mitɔn kpó midɛɛ lɛ́ɛ kpó kɛ́ɖɛ́ wú wɛ gǎn ce ɖɔ xó énɛ́ lɛ́ɛ sɛ́ dó wɛ mi vɛdó a? É má nyí mɛ énɛ́ lɛ́ɛ e ɖo ahohó ɔ́ ta fínɛ́ bɔ zaanɖé din ɔ́, yě ná jɛ mǐ nyɛ bó sɔ́ ɖu jí, bó jɛ aɖɔ̌ ɖɔ́ bó sɔ́ nu jí ɔ́ wɛ gǎn ce ɖɔ xó énɛ́ lɛ́ɛ sɛ́ dó a?”

²⁸Ée ahwangán ɔ́ ɖɔ mɔ̌ ɔ́, é jlɔ́ bó sú xó, bó ɖɔ dó Ebléegbe mɛ ɖɔ: “Mi ɖótó xó e axɔ́sú ɖaxó, axɔ́sú Asilíi tɔn ɔ́ ɖɔ é.

²⁹É ɖɔ: ‘Mi ma nú Ezekiyási flú mi ó, ɖó é sixú hwlɛ́n mi sín fɛn ce mɛ ǎ.

³⁰É nɔ ɖɔ mi ní ɖeji dó Mawu Mavɔmavɔ wú, ɖɔ é ná hwlɛ́n mi dandan; é kún ná lɔn nú nyɛ Asilíi xɔ́sú ɔ́ ná yí to mitɔn ó, mi ma ɖótó xó tɔn ó.

³¹Mi ma ɖótó Ezekiyási ó, xó e nyɛ axɔ́sú Asilíi tɔn ɖɔ é wɛ mi ná ɖótó; Asilíi xɔ́sú ɔ́ ɖɔ: Mi gɔn nǔ xwe, bó wá jó ta nú mì, énɛ́ ɔ́, mɛ ɖokpó ɖokpó ná ɖu vǐwun tɔn, bó ná ɖu fígi tɔn, bó ná nu sin e ɖo tɔ tɔn mɛ é.

³²Mi ná ɖ'é wú mɔ̌ káká bɔ un ná wá kplá mi yi to e cí to mitɔn ɖɔhun é mɛ; to e mɛ blěe kpó vɛ̌ɛn kpó ɖe é. To e mɛ wɔ̌xúxú kpó vǐwun kpó ɖe, bɔ olívu e nɔ ná ami ganjí ɔ́ ɖe, bɔ wǐin ɖe é mɛ. Énɛ́ ɔ́, mi ná nɔ gbɛ bó ná kú ǎ. Hǔn mi bo ma ɖótó Ezekiyási gbeɖé ó, ɖó é hɛn ɔ́, é ná blɛ́ mi bó ná ɖɔ Mawu Mavɔmavɔ ná hwlɛ́n mi gán.

³³Akɔta ɖě lɛ́ɛ ɖě sín nǔmɛsɛn gbɛ́ nú nyɛ axɔ́sú Asilíi tɔn ɖɔ nyɛ ní má yí to yětɔn lɛ́ɛ ɖě ó a?

³⁴Fítɛ́ vodún Hamáti tɔn kpó Aapadu tɔn ɔ́ kpó ká yi? Fítɛ́ vodún Sefáawayímu tɔn, Hena tɔn, kpó Iwa tɔn kpó ká yi? Fítɛ́ yě yi bɔ un yí to yětɔn? Yě kpé wú bó gbɛ́ nú mì bɔ un gɔn Samalíi to ɔ́ yí a?

³⁵Vodún to énɛ́ lɛ́ɛ tɔn ɖě tɛ́ ká gbɛ́ nú mì ɖɔ nyɛ ní má yí to yětɔn ó, bɔ é ná nyí Mawu Mavɔmavɔ wɛ ná wá gbɛ́ nú mì ɖɔ nyɛ ní má yí Jeluzalɛ́mu toxo ɔ́ ó?’ ”

³⁶Togun ɔ́ bǐ ká nɔ tóó; yě ɖɔ xó ɖokpó géé lě ǎ, ɖó axɔ́sú ɔ́ kó ɖɔ nú yě ɖɔ: “Mi ma kɛ nu d'é mɛ n'i ó.”

³⁷Eliyakímu Ilukyahu ví hɔnmɛgán ɔ́ kpó Cevúna wěgbójínɔtɔ́ ɔ́ kpó, kpó Yoáxi Asáfu ví wěgbóhɛntɔ́ ɔ́ kpó ká vún awu dó kɔ nú yěɖée, bó wá Ezekiyási gɔ́n, bó ɖɔ xó e ahwangán Asilíi xɔ́sú ɔ́ tɔn ɖɔ lɛ́ɛ n'i.