Read fon 2 Axɔ́sú 19 Bible Online

2 Axɔ́sú 19 - fon bible

2 Axɔ́sú 19

¹Ée axɔ́sú Ezekiyási se xó e ahwangán Asilíi xɔ́sú ɔ́ tɔn ɖɔ sɛ́ dó e ɔ́, é vún awu dó kɔ nú éɖée, bó sɔ́ caki dó, bó ɖidó Mawu Mavɔmavɔ xwé gbe.

²É sɛ́ Eliyakímu hɔnmɛgán ɔ́ kpó Cevúna wěgbójínɔtɔ́ ɔ́ kpó, kpódó mɛ e kó nyí vɔ̌sánú-xwlémawutɔ́ jɛ nukɔn ɖo yě mɛ e nyí vɔ̌sánú-xwlémawutɔ́ lɛ́ɛ kpó dó, bɔ yě dó ati, bó ɖidó gbeyíɖɔ Mawu tɔn Ezayíi Amɔ̌si ví ɔ́ gɔ́n,

³bónú yě jɛ dɔ̌n ɔ́, yě ná ɖɔ n'i ɖɔ: “Wɛn e axɔ́sú ɔ́ dó sɛ́ dó we é ɖíe: Azǎn égbé tɔn ɔ́, aluwɛzán ɖé wɛ, tódɔnnúmɛzán ɖé wɛ, bó nyí hɛ̌nzán. Mǐ cí nyɔ̌nu e jɛ flú mɛ, bó má ká ɖó hlɔ̌nhlɔ́n bó ná zɛn ǎ é ɖɔhun.

⁴Asilíi xɔ́sú ɔ́ sɛ́ ahwangán e nɔ kplá ɛ ɔ́ dó bɔ é wá zun Mawu gbɛɖe ɔ́. Kóóyi nya! Ényí Mawu Mavɔmavɔ, Mawu towe se zun énɛ́ lɛ́ɛ din bó dɔn tó n'i ɔ́, é ná nyɔ́ mɛ nya! Hwɛ ɔ́, bo xo ɖɛ nú mɛ e kpo ɖo togun ɔ́ mɛ lɛ́ɛ.”

⁵Mɛ e axɔ́sú Ezekiyási sɛ́ dó lɛ́ɛ yi dó wɛn ɔ́ Ezayíi,

⁶bɔ Ezayíi ɖɔ nú yě ɖɔ: “Mi yi ɖɔ nú gǎn mitɔn ɖɔ Mawu Mavɔmavɔ ɖɔ: ‘Xó énɛ́ lɛ́ɛ e a se ɔ́ ní ma dó xɛsi nú we ó. Xó énɛ́ lɛ́ɛ e azaglɔ́gán axɔ́sú Asilíi tɔn lɛ́ɛ ɖɔ dó ɖɔ slǎmɛ wǔ ce ɔ́, ní má dó xɛsi nú we ó.

⁷Axɔ́sú ɔ́ ná se xó ɖé, bɔ un ka ná ɖɔ dó ayi tɔn mɛ ɖɔ ní lɛ́ kɔ yi to tɔn mɛ. É jɛ dɔ̌n ɔ́, un ná zɔ́n bɔ è nǎ hu i.’ ”

⁸Ahwangán e nɔ kplá axɔ́sú ɔ́ se ɖɔ axɔ́sú Asilíi tɔn ko gosín Lakíci bo yi tɔ́n ahwan Livuna. Énɛ́ ɔ́, é yi mɔ ɛ ɖo dɔ̌n.

⁹Axɔ́sú Asilíi tɔn se xó ɖé dó Tilaka Etiopíi xɔ́sú ɔ́ wú. É se ɖɔ axɔ́sú énɛ́ ɔ́ sɔ́ nǔ, bó ná wá fun ahwan xá émí. Énɛ́ ɔ́, Asilíi xɔ́sú ɔ́ lɛ́ sɛ́ wɛn ɖěvo dó Ezekiyási,

¹⁰Judáa xɔ́sú ɔ́ ɖɔ: “A nɔ gán jɛ Mawu towe wú dín, ɖɔ é kún ná lɔn nú un ná yí Jeluzalɛ́mu ó, ma lɔn nú é blɛ́ we ó.

¹¹A se lě e Asilíi xɔ́sú lɛ́ɛ wa to ɖě lɛ́ɛ bǐ sín nǔ gbɔn é, yě vívá kún yětɔn bǐ, bɔ hwɛ ka ná gán ɖ'é mɛ a?

¹²Hwenu e tɔ́gbó ce lɛ́ɛ gba Gozáni, Haláani, Hlɛsɛ́fu, kpó Telasáa tota Edɛ́ninu lɛ́ɛ tɔn kpó ɔ́, fí ɖě wɛ nǔmɛsɛn yětɔn lɛ́ɛ yi a?

¹³Fítɛ́ axɔ́sú Hamáti tɔn, axɔ́sú Aapadu tɔn, axɔ́sú Layíi tɔn, axɔ́sú Sefáawayímu tɔn, axɔ́sú Hena tɔn kpódó Iwa tɔn kpó ka ɖe égbé din?”

¹⁴Ezekiyási yí wěma ɔ́ ɖo mɛ e Asilíi xɔ́sú ɔ́ sɛ́ dó e lɛ́ɛ sí, bó xa, bó yi Mawu Mavɔmavɔ xwé gbe, bó vlɔ́n wěma ɔ́ ɖo nukɔn tɔn.

¹⁵ Énɛ́ ɔ́ gúdo ɔ́, é jɛ ɖɛ xo jí ɖɔ: “Mawu Mavɔmavɔ, Mawu Izlayɛ́li tɔn e, hwi mɛ e ɖo ayǐjínjɔ́n ɖo akɔjijɛgbá ɔ́ jí, ɖo axɔ́súzinkpo towe jí é ɔ́, hwi ɖokpó géé wɛ nyí Mawu; hwi ɖokpó géé wɛ kpa acɛ nú axɔ́súɖuto e ɖo ayǐkúngban jí lɛ́ɛ bǐ. Hwi wɛ bló jǐ kpó do kpó.

¹⁶Mawu Mavɔmavɔ, ɖǒtó ganjí; kpɔ́n ganjí. Hwi Mawu gbɛɖe ɔ́, kpɔ́n lě do e mɛ e Senakelíbu sɛ́ dó lɛ́ɛ zun we sɔ é.

¹⁷Mawu Mavɔmavɔ, axɔ́sú Asilíi tɔn lɛ́ɛ vívá kún nú akɔta ɖě lɛ́ɛ, bó gba to yětɔn lɛ́ɛ,

¹⁸bó bɛ́ nǔmɛsɛn yětɔn lɛ́ɛ dó myɔ mɛ nǔgbó. Amɔ̌, nǔmɛsɛn yětɔn énɛ́ lɛ́ɛ cí hwi ɖɔhun ǎ. Nǔdówá gbɛtɔ́ lɛ́ɛ tɔn wɛ; atín kpó awǐnnya kpó wɛ bɔ yě vívá kún ná.

¹⁹Din ɔ́, Mawu Mavɔmavɔ, Mawu mǐtɔn, hwlɛ́n mǐ sín Senakelíbu sí, bónú axɔ́súɖuto e ɖo gbɛ ɔ́ mɛ lɛ́ɛ bǐ ná tunwun ɖɔ hwi Mawu Mavɔmavɔ ɔ́, hwi ɖokpó géé wɛ nyí Mawu.”

²⁰Énɛ́ ɔ́, Ezayíi Amɔ̌si ví ɔ́ ɖɔ sɛ́ dó Ezekiyási ɖɔ: “Mawu Mavɔmavɔ, Mawu Izlayɛ́li tɔn ɔ́ ɖɔ: ‘Un se xó e a ɖɔ dó Asilíi xɔ́sú Senakelíbu wú dó ɖɛ mɛ é.

²¹Xó e nyɛ Mawu Mavɔmavɔ ɖɔ dó Senakelíbu wú ɔ́ ɖíe: Senakelíbu, ɖyɔ̌vǐ nyɔ̌nu ɖo alɔ jí Jeluzalɛ́mu ɖo tɛ́ hu nú we wɛ; é ɖo cícá we ko wɛ. Đyɔ̌vǐ Jeluzalɛ́mu nɔ kpɔ́n we bó nɔ́ húnhún ta.

²²Senakelíbu, mɛ̌ a ka zun? Mɛ̌ a ka ba hǎ? Mɛ̌ ta a ka wa adǎn dó? Mɛ̌ a kpɔ́n wunvɔ? Nyɛ Mawu mímɛ́ Izlayɛ́li tɔn ɔ́ wɛ a?

²³A sɛ́ mɛsɛntɔ́ towe lɛ́ɛ dó nyɛ Mawu Mavɔmavɔ ɔ́, bó zun mì sɛ́ dó ɖɔ: Nyɛ Senakelíbu byɔ́ ahwankɛkɛ́ví ce mɛ, un xá Libáan só lɛ́ɛ jí káká yi Libáan só e vɛ́ xá lɛ́ɛ bǐ jí, un gbo sɛ́dlutín tɔn e yi jǐ hú ɖě lɛ́ɛ bǐ é, un gbo siplɛ́tín tɔn e nyɔ́ ɖɛkpɛ hú ɖě lɛ́ɛ bǐ é. Un hun káká yi só tɔn gǔdo gúdo tɔn lɛ́ɛ jí, un yi zungbó tɔn e dó ganjí lɛ́ɛ mɛ.

²⁴Un kun tɔ, bó nu to ɖěvo mɛ sin, un tɛ afɔ Ejípu to ɔ́ mɛ kpowun ɔ́, tɔsisa e ɖo to ɔ́ mɛ lɛ́ɛ bǐ ná xú.’

²⁵A tunwun ɖɔ nyɛ Mawu Mavɔmavɔ ɔ́, nyi wɛ ko to nǔ énɛ́ lɛ́ɛ bǐ ɖ'ayǐ sín do ǎ cé? Un kó tunwun sín do ɖɔ nǔ énɛ́ lɛ́ɛ ná jɛ. Din ɔ́, un jló ɖɔ nǔ énɛ́ lɛ́ɛ ní jɛ, bónú a nǐ gba toxo e è mɛ ahohó lɛ́ lɛ̌ dó lɛ́ɛ hánnyá.

²⁶Mɛ e ɖo to énɛ́ lɛ́ɛ mɛ lɛ́ɛ kpé nǔɖé wú ǎ. Xɛsi jɛ yě jí. Winnyá hu yě. Yě cí gběhan e ɖo gle mɛ lɛ́ɛ ɖɔhun, yě cí gběhan e wú tlóló lɛ́ɛ ɖɔhun, yě cí gběhan wlɛ́wlɛ́ e nɔ wú ɖo xɔ ta é ɖɔhun, yě cí nǔkún e ma wú zinzin ǎ bó fyɔ́ é ɖɔhun.

²⁷Amɔ̌, un tunwun hwenu e a nɔ jínjɔ́n ayǐ é. Un tunwun hwenu e a nɔ tɔ́n é. Un tunwun hwenu e a nɔ wá xwé gbe é. Un tunwun hwenu e a nɔ sin xomɛ dó mì é.

²⁸A sin xomɛ dó mì, bó dó jimakplɔ́n gbe, bɔ é wá káká gɔ̌n ce. Énɛ́ ɔ́ wútu ɔ́, un nǎ dó gan awɔntín mɛ nú we, bó ná dó aja nu nú we, bó ná lɛ́ kɔ nú we gbɔn ali e a gbɔn wá é.

²⁹“Amɔ̌, hwɛ ɔ́, Ezekiyási, nǔ e ná nyí xlɛ̌ nú we ɔ́ ɖíe: Xwe élɔ́ mɛ ɔ́, nǔkún flá lɛ́ɛ wɛ è nǎ ɖu; xwe wegɔ́ ɔ́ mɛ ɔ́, è nǎ ɖu nǔ ɖokpó ɔ́, amɔ̌, xwe atɔngɔ́ ɔ́ mɛ ɔ́, nǔ e mi ɖésúnɔ ná dó é wɛ mi ná ɖu. Mi ná dó nǔkún bó ná ya, mi ná tun vǐwun, bɔ é ná sɛ́n, bɔ mi ná ɖu.

³⁰Mɛ e ná kpo ɖo gbɛ ɖo axɔ́súɖuto Judáa tɔn ɔ́ mɛ lɛ́ɛ ná dó ɖɔ do atín ɖɔhun, bó ná sɛ́n.

³¹Đó mɛɖé lɛ́ɛ ná kpo ɖo gbɛ, gbɛtɔ́ ná kpo ɖo gbɛ ɖo Jeluzalɛ́mu, Sinyɔ́ɔ só ɔ́ jí. “Nǔ e Mawu Mavɔmavɔ ná bló ɖo wǎn yíyí ɖaxó e é ɖó ɔ́ mɛ é nɛ́.

³²Nǔ énɛ́ lɛ́ɛ wú wɛ Mawu Mavɔmavɔ ɖɔ xó élɔ́ dó axɔ́sú Asilíi tɔn wú: ‘É nǎ byɔ́ toxo élɔ́ mɛ ǎ; é ná da gǎ ɖo toxo ɔ́ mɛ ǎ; é ná zán gǎglónú tɔn ɖo toxo élɔ́ mɛ ǎ; é ná kplé kɔ́ bó nɔ gǔdo tɔn, bó tɔ́n ahwan toxo élɔ́ ǎ.

³³Ali e é gbɔn bó wá é wɛ é ná gbɔn bó lɛ́ kɔ. É ná byɔ́ toxo élɔ́ mɛ ǎ. Nyɛ Mawu Mavɔmavɔ wɛ ɖɔ mɔ̌.

³⁴Un ná cyɔ́n alɔ toxo élɔ́ jí, bó ná hwlɛ́n ɛ gán, ɖó Mawu wɛ un nyí; un ná bló mɔ̌, ɖó akpá e un dó nú mɛsɛntɔ́ ce Davídi é wú.’ ”

³⁵Zǎn énɛ́ ɔ́ mɛ ɔ́, wɛnsagun Mawu Mavɔmavɔ tɔn ɖokpó tɔ́n, bó hu gbɛtɔ́ adɔ̌kpo tɛ́nnɛ děgba ɖě afatɔ́n (185.000) ɖo Asilíinu lɛ́ɛ sín ahwankpá mɛ. Ée ayǐ hɔ́n zǎnzǎn ɔ́, mɛ e kpo ɖo gbɛ lɛ́ɛ ná mɔ nǔɖé kpowun ɔ́, cyɔ yětɔn jɛ́n yě mɔ.

³⁶Énɛ́ ɔ́, Senakelíbu Asilíi xɔ́sú ɔ́ sɔ́ nǔ kpó ahwangɔnu tɔn kpó, bó lɛ́ kɔ, bó yi cí Ninívu.

³⁷Gbe ɖokpó tíin, bɔ Senakelíbu ɖo kɔ́ ɖe nú vodún tɔn Nislɔki ɔ́ wɛ, bɔ vǐ tɔn Adlamɛlɛ́ki kpó Salɛsɛ́ɛ kpó sɔ́ hwǐ i, bó hu i, bó hɔn yi Alaláti; ée é kú ɔ́, vǐ tɔn Asaaxadɔ́ɔn ɖu axɔ́sú ɖó tɛn tɔn mɛ.