Read fon 2 Axɔ́sú 20 Bible Online

2 Axɔ́sú 20 - fon bible

2 Axɔ́sú 20

¹Hwenɛ́nu ɔ́, Ezekiyási wlí azɔn, bó ko ɖo kú lixo, bɔ gbeyíɖɔ Mawu tɔn Ezayíi Amɔ̌si ví ɔ́ wá gɔ̌n tɔn, bó ɖɔ n'i ɖɔ: “Xó e Mawu Mavɔmavɔ ɖɔ ɔ́ ɖíe: Nǔ ná nɔ́ gbɔn ɖě hǔn, ɖɔ nú mɛ towe lɛ́ɛ, ɖó azɔn élɔ́ e a wlǐ din ɔ́, a sɔ́ ná gán ɖ'é mɛ ǎ.”

²Ée é ɖɔ mɔ̌ n'i ɔ́, Ezekiyási húzú kpan nukɔn dǒ, bó xo ɖɛ ɖɔ:

³“Óo! Mawu Mavɔmavɔ, flín ɖɔ un nɔ gbejí ɖo nukɔn towe, bó wa azɔ̌ kpó ayijlɔ́jlɔ́ kpó, bó bló nǔ e nɔ nyɔ́ nukún towe mɛ lɛ́ɛ.” Ée é ɖɔ mɔ̌ ɔ́, é wlí avǐ bó ya ɖasin hoho.

⁴Ezayíi tɔ́n bó ɖidó. É ká ko yi kɔ́xota e ɖo hɔnmɛ ɔ́ tɛ́ntin é jí ǎ, bɔ Mawu Mavɔmavɔ ɖɔ n'i ɖɔ:

⁵“Lɛ̌ kɔ bo yi Ezekiyási e ɖo togun ce nu ɔ́ gɔ́n, bó ɖɔ n'i ɖɔ nyɛ Mawu Mavɔmavɔ, Mawu tɔ́gbó tɔn Davídi tɔn ɖɔ: ‘Un se ɖɛ towe, bó mɔ avǐ e ya wɛ a ɖe é. Kpɔ́n, un ná gbɔ azɔn nú we. Azǎn atɔn gbe ɔ́, a nǎ yi xwé ce gbe.

⁶Un ná dó xwe afɔtɔn xwe towe jí; un ná hwlɛ́n hwi kpó toxo élɔ́ kpó gán ɖo axɔ́sú Asilíi tɔn sí; un ná cyɔ́n alɔ toxo élɔ́ jí, ɖó Mawu wɛ un nyí; un ná bló mɔ̌, ɖó akpá e un dó nú mɛsɛntɔ́ ce Davídi é wú.’ ”

⁷Énɛ́ ɔ́, Ezayíi ɖɔ: “Mi li fígi bó mlí, bó ɖó akpa ɔ́ mɛ n'i.” È blǒ mɔ̌ bónú Ezekiyási sín azɔn ná gbɔ.

⁸Ée è blǒ mɔ̌ ɔ́, Ezekiyási kanbyɔ́ Ezayíi ɖɔ: “Étɛ́ ka ná xlɛ́ mì ɖɔ Mawu Mavɔmavɔ ná gbɔ azɔn nú mì, bɔ azǎn atɔn gbe ɔ́, un ná yi xwé tɔn gbe?”

⁹Ezayíi ɖɔ n'i ɖɔ: “Nǔ e ná ɖe xlɛ́ we ɖɔ Mawu Mavɔmavɔ ná gbɔ azɔn nú we ɔ́ ɖíe: yɛtɛn e nɔ jɛ Akázi sín kpekán jí ɔ́ ná sɛ tɛn afɔɖiɖe wǒ. A jlǒ ɖɔ é ní yi nukɔn a, abǐ é ní yi gǔdo?”

¹⁰Ezekiyási ka yí gbe n'i ɖɔ: “Yɛtɛn ná yi nukɔn ɔ́ vɛ́ wǔ ǎ, énɛ́ ɔ́ wú wɛ nyɛ ba ɖɔ ní yi gǔdo.”

¹¹Ée é ɖɔ mɔ̌ ɔ́, Ezayíi xo ɖɛ bo byɔ́ Mawu Mavɔmavɔ bɔ Mawu Mavɔmavɔ dɔn yɛtɛn ɔ́ wá yi gǔdo afɔɖiɖe wǒ ɖo Akázi sín kpekán jí.

¹²Hwe énɛ́ nu ɖokpó ɔ́, Mɛlodaki-Baladáni, Baladáni ví, Babilɔ́nu xɔ́sú ɔ́ sɛ́ wěma dó Ezekiyási bo lɛ́ ná ɛ nǔ d'é jí, ɖó é se ɖɔ é jɛ azɔn.

¹³Ezekiyási yí mɛ e hɛn nǔ lɛ́ɛ wá lɛ́ɛ, bó kplá yě yi fí e nǔ xɔ akwɛ́ tɔn lɛ́ɛ ɖe é: kpatágan, siká, nǔhwɛ́nkún lɛ́ɛ, ami ɖagbe ɖagbe lɛ́ɛ, ahwanfunnú tɔn lɛ́ɛ; é xlɛ́ dɔkun tɔn lɛ́ɛ bǐ yě. É kpo nǔ ɖěbǔ ɖo xwé tɔn gbe abǐ axɔ́súɖuto tɔn mɛ, bɔ é má xlɛ́ yě ǎ.

¹⁴Énɛ́ ɔ́ gúdo ɔ́, gbeyíɖɔ Mawu tɔn Ezayíi wá axɔ́sú Ezekiyási gɔ́n, bó kanbyɔ́ ɛ ɖɔ: “Étɛ́ mɛ énɛ́ lɛ́ɛ ká wá ɖɔ nú we? Fí e yě ká gosín bó wá gɔ̌n towe lɔ?” Bɔ Ezekiyási yí gbe n'i ɖɔ: “To línlín mɛ wɛ yě gosín; Babilɔ́nu wɛ yě gosín.”

¹⁵Ezayíi lɛ́ kanbyɔ́ ɛ ɖɔ: “Étɛ́ yě ká mɔ ɖo xwé towe gbe?” Ezekiyási ka yí gbe n'i ɖɔ: “Yě mɔ nǔ e ɖo xwé ce gbe lɛ́ɛ bǐ. Dɔkun ce ɖě kpo nú un ma xlɛ́ yě ǎ.”

¹⁶Énɛ́ ɔ́, Ezayíi ɖɔ nú Ezekiyási ɖɔ: “Đǒtó xó e Mawu Mavɔmavɔ ɖɔ é; é ɖɔ:

¹⁷ ‘Gbe ɖokpó ná wá su, bɔ è nǎ bɛ́ nǔ e ɖo xwé towe gbe lɛ́ɛ bǐ yi Babilɔ́nu, bó ná bɛ́ nǔ e tɔ́gbó towe ko wa ɖ'ayǐ káká wá jɛ égbé lɛ́ɛ bǐ yi Babilɔ́nu. É ná kpo ɖokpó ǎ. Mawu Mavɔmavɔ wɛ ɖɔ mɔ̌.

¹⁸ È nǎ kplá vǐ towe lɛ́ɛ ɖě, vǐ e a ji lɛ́ɛ ɖě, bɔ yě ná nyí agooɖojǐe ɖo Babilɔ́nu xɔ́sú ɔ́ sín hɔnmɛ.’ ”

¹⁹Ezekiyási ka ɖɔ nú Ezayíi ɖɔ: “Xó e Mawu Mavɔmavɔ ɖɔ bɔ a ɖɔ ɔ́ nyɔ́.” Đó é tunwun dó xo tɔn mɛ ɖɔ: “Nú un ɖo gbɛ jɛ́n wɛ ɔ́, mǐ nǎ mɔ fífá kpó ayi jɛ ayǐ kpó.”

²⁰È wlǎn axɔ́sú Ezekiyási sín tan e kpo lɛ́ɛ, akɔ́nkpinkpan e é ɖó ɔ́, kpó lě e é kun sindo ɖokpó, bó ɖe ali nú sin ɔ́, bó dɔn káká wá Jeluzalɛ́mu toxo ɔ́ mɛ gbɔn ɔ́ kpó dó “Judáa xɔ́sú lɛ́ɛ sín Tan wéma” mɛ.

²¹Axɔ́sú Ezekiyási zán wá kú, bɔ vǐ tɔn Manasée ɖu axɔ́sú ɖó tɛn tɔn mɛ.