Read fon 2 Axɔ́sú 24 Bible Online

2 Axɔ́sú 24 - fon bible

2 Axɔ́sú 24

¹ Yoyakímu hwenu wɛ Nabukodonɔzɔ́ɔ Babilɔ́nu xɔ́sú ɔ́ tɔ́n ahwan Judáa to ɔ́, bɔ Yoyakímu nɔ acɛ tɔn mɛ nú xwe atɔn, bó lɛ́ fɔ́n gǔ dó jǐ tɔn.

²Énɛ́ ɔ́, Mawu Mavɔmavɔ sɛ́ gbɛ̌ta tɛnmɛ tɛnmɛ dó Yoyakímu. É sɛ́ gbɛ̌ta Babilɔ́nunu lɛ́ɛ tɔn, Sikíinu lɛ́ɛ tɔn, Mɔwabunu lɛ́ɛ tɔn, kpó Amumɔ́ɔ ví lɛ́ɛ tɔn kpó dó, bɔ yě wǎ gba Judáa to ɔ́ bǐ hánnyá lě e Mawu Mavɔmavɔ ko ɖɔ gbɔn, gbɔn mɛsɛntɔ́ tɔn gbeyíɖɔ lɛ́ɛ jí é.

³Mawu Mavɔmavɔ bló mɔ̌ ɖó é sɔ́ jló ná mɔ Judáa to ɔ́ ɖó nukún wú ǎ, ɖó hwɛ e Manasée hu lɛ́ɛ,

⁴kpódó xomɛvɔ́nɔ e sín hun Manasée kɔn nyi ayǐ káká bɔ é gbɔn Jeluzalɛ́mu toxo ɔ́ bǐ mɛ é kpó wútu. Énɛ́ ɔ́ wɛ zɔ́n bɔ Mawu Mavɔmavɔ jló ná sɔ́ nǔ énɛ́ lɛ́ɛ kɛ yě ǎ.

⁵È wlǎn axɔ́sú Yoyakímu sín tan e kpo lɛ́ɛ kpódó nǔ e é bló lɛ́ɛ kpó dó “Judáa xɔ́sú lɛ́ɛ sín Tan wéma” mɛ.

⁶Ée Yoyakímu zán wá kú ɔ́, vǐ tɔn Yoyakini ɖu axɔ́sú ɖó tɛn tɔn mɛ.

⁷Axɔ́sú Babilɔ́nu tɔn ɔ́ yí to e ɖo Ejípu xɔ́sú ɔ́ sín acɛ mɛ lɛ́ɛ bǐ, bɛ́ sín Ejípu tɔ ɔ́ tó, káká yi Efláti tɔ ɔ́ tó. Énɛ́ ɔ́ wú ɔ́, Ejípu xɔ́sú ɔ́ sɔ́ nɔ́ tɔ́n sín to tɔn mɛ ɖě ǎ.

⁸Xwe afɔtɔn nukún atɔn wɛ Yoyakini ɖó bó yi zinkpo jí ɖo Jeluzalɛ́mu, bó ɖu axɔ́sú nú sun atɔn. Nɔ tɔn nɔ nyí Nɛxucita bo nyí Ɛlunatáni Jeluzalɛ́munu ɔ́ sín vǐ.

⁹Nǔ e má nyɔ́ Mawu Mavɔmavɔ nukún mɛ ǎ lɛ́ɛ wɛ Yoyakini bló gbɔn ali bǐ xo tɔ́ tɔn ɖɔhun.

¹⁰Hwenɛ́nu ɔ́, ahwangán axɔ́sú Nabukodonɔzɔ́ɔ tɔn lɛ́ɛ wá xá Jeluzalɛ́mu toxo ɔ́.

¹¹Hwenu e Nabukodonɔzɔ́ɔ sín mɛ lɛ́ɛ ɖo toxo ɔ́ xá wɛ ɔ́, Nabukodonɔzɔ́ɔ ɖésú wá Jeluzalɛ́mu toxo ɔ́ sín hɔn nukɔn.

¹² Énɛ́ ɔ́, axɔ́sú Yoyakini kplá nɔ tɔn, ahwangán tɔn lɛ́ɛ, gǎn hɔn-yitɔ́ lɛ́ɛ kpó agooɖojǐe tɔn lɛ́ɛ kpó, bó yi su axɔ́sú Babilɔ́nu tɔn, bɔ é wlí yě, bɔ yě húzú gantɔ́ tɔn. Xwe tántɔn bló wɛ Nabukodonɔzɔ́ɔ ɖe ɖo zinkpo jí hwenɛ́nu.

¹³Axɔ́sú Nabukodonɔzɔ́ɔ bɛ́ dɔkun e ɖo Mawu Mavɔmavɔ xwé gbe é bǐ, bó bɛ́ ée ɖo axɔ́sú ɔ́ xwé gbe lɛ́ɛ bǐ. Sikágannú e axɔ́sú Izlayɛ́li tɔn Salomɔ́ɔ bló ɖó Mawu Mavɔmavɔ xwé ɔ́ gbe lɛ́ɛ ɔ́, é hɛn bǐ gblé. É bló nǔ énɛ́ lɛ́ɛ lě e Mawu Mavɔmavɔ ko ɖɔ gbɔn é.

¹⁴É kplá Jeluzalɛ́mu to ɔ́ bǐ, gǎn hɔn-yitɔ́ lɛ́ɛ, gbɛtɔ́ nukúnɖéjí lɛ́ɛ. Yě bǐ yi gbɛtɔ́ děgba we afɔwó (10.000). É lɛ́ kplá alɔlyɛ́nzɔ́watɔ́ lɛ́ɛ kpó fletuntɔ́ lɛ́ɛ kpó. Wamamɔnɔ lɛ́ɛ kɛ́ɖɛ́ jɛ́n kpo ɖo to ɔ́ mɛ.

¹⁵ É kplá Yoyakini sín Jeluzalɛ́mu yi Babilɔ́nu, é kpódó nɔ tɔn kpó, kpó asi tɔn lɛ́ɛ kpó, kpó agooɖojǐe tɔn lɛ́ɛ kpó, kpó gǎn e ɖo to ɔ́ mɛ lɛ́ɛ kpó.

¹⁶Gbɛtɔ́ nukúnɖéjí lɛ́ɛ ɔ́, yě mɛ děgba ɖě afɔwó-afatɔ́n (7.000) wɛ, bɔ alɔlyɛ́nzɔ́watɔ́ lɛ́ɛ kpó fletuntɔ́ lɛ́ɛ kpó nyí afatɔ́n (1.000). Yě bǐ wɛ nyí gbɛtɔ́ syɛ́nsyɛ́n, bó nɔ fun ahwan, bɔ Babilɔ́nu xɔ́sú ɔ́ bɛ́ yě bǐ yi Babilɔ́nu.

¹⁷ Axɔ́sú Babilɔ́nu tɔn ɔ́ sɔ́ Yoyakini sín tɔ́ nɔví ɖokpó ɖó tɛn tɔn mɛ, bɔ é nyí axɔ́sú. Nyǐkɔ tɔn nɔ nyí Mataniya, bɔ é ɖyɔ́ nyǐkɔ n'i bɔ é nɔ́ nyí Sedesíyasi.

¹⁸ Xwe ko-nukún-ɖokpó wɛ Sedesíyasi ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe wǒ-ɖokpó. Nɔ tɔn nɔ nyí Hamutálu; Yiimɛyahu Livunanu ɔ́ sín vǐ wɛ.

¹⁹Nǔ e ma nyɔ́ Mawu Mavɔmavɔ nukún mɛ ǎ lɛ́ɛ wɛ é bló gbɔn ali bǐ xo Yoyakímu ɖɔhun; ɖě hwe ɖ'é mɛ ǎ.

²⁰ Nǔ énɛ́ lɛ́ɛ jɛ ɖó xomɛ e Mawu Mavɔmavɔ sin dó Jeluzalɛ́mu toxo ɔ́, bó sin dó Judáa to ɔ́ bǐ ɔ́ syɛ́n káká, bɔ é nya togun tɔn dó gbě. Amɔ̌, Sedesíyasi wá fɔ́n gǔ dó axɔ́sú Babilɔ́nu tɔn jí.