Read fon 2 Axɔ́sú 4 Bible Online

2 Axɔ́sú 4 - fon bible

2 Axɔ́sú 4

¹Gbeyíɖɔ e nɔ gbeyíɖɔ Mawu tɔn lɛ́ɛ gbɛ́ta ɔ́ mɛ lɛ́ɛ ɖokpó sín asúkúsi wá mɔ Elizée gbe ɖokpó, bó sa vo n'i ɖɔ ní wá hwlɛ́n émí. É ɖɔ n'i ɖɔ: “Gǎn, asú ce kú. A ka tunwun ɖɔ é nɔ ɖó sísí nú Mawu Mavɔmavɔ. Axɔ́tɔ́nɔ ka wá din bo jló ná kplá vǐ ce we lɛ́ɛ, bó ná sɔ́ yě dó ɖó kannumɔ ná.”

²Elizée kanbyɔ́ ɛ ɖɔ: “Étɛ́ un ká sixú bló nú we? Đɔ nǔ e a ɖǒ ɖo xwé gbe ɔ́ nú mì.” É yí gbe n'i ɖɔ: “Un sɔ́ ɖó nǔɖé ɖo xwé gbe zɛ ami kpɛ e un ná sa bɔ é ná vɔ é wú ǎ.”

³Ée é ɖɔ mɔ̌ ɔ́, Elizée ɖɔ n'i ɖɔ: “Yi ba zɛ̌n hwé ɖo mɛ e ɖo xwé towe kpá lɛ́ɛ sí. Hwě zɛ̌n nabí e wú a kpé é.

⁴Ényí a yi xwé gbe ɔ́, a nǎ kplá vǐ towe lɛ́ɛ, bɔ mi ná dɔn hɔn sú dó ta. Énɛ́ ɔ́, a nǎ kɔn ami e kpo ɖo así towe ɔ́ dó zɛ̌n lɛ́ɛ bǐ mɛ, bɔ ɖě gɔ́ ɔ́, a nǎ nɔ sɔ́ ɖó kɛ́n ɖokpó.”

⁵Nyɔ̌nu ɔ́ yi hwé zɛ̌n lɛ́ɛ bó wá xwé gbe, bɔ é kpó vǐ tɔn lɛ́ɛ kpó sú hɔn dó ta. Vǐ tɔn lɛ́ɛ jɛ zɛ̌n lɛ́ɛ fɔ n'i jí, bɔ é jɛ ami ɔ́ kɔn d'é mɛ jí.

⁶Zɛ̌n lɛ́ɛ bǐ kó gɔ́, é ka tunwun ǎ, bó ɖɔ nú vǐ tɔn lɛ́ɛ ɖokpó ɖɔ ní lɛ́ sɔ́ zɛ̌n ɖěvo nú émí, bɔ vǐ ɔ́ yí gbe n'i ɖɔ zɛ̌n ɖě kún sɔ́ kpo ó. Ée vǐ ɔ́ ɖɔ mɔ̌ ɔ́, ami ɔ́ gbo.

⁷Nyɔ̌nu ɔ́ yi ɖó gbe nú ɖɛ̌mɛnu Mawu tɔn ɔ́, bɔ é ɖɔ n'i ɖɔ: “Yi sa ami ɔ́, bó sú axɔ́ e a ɖu ɔ́, bó sɔ́ akwɛ́ e kpo ɔ́, bónú hwi kpó vǐ towe lɛ́ɛ kpó ná zán, bó ná nɔ gbɛ.”

⁸Gbe ɖokpó tíin, bɔ Elizée ɖo Cunɛ́mu gbɔn dín wɛ, bó mɔ nyɔ̌nu nukúnɖéjí ɖokpó. Nyɔ̌nu ɔ́ ɖɔ n'i ɖɔ ní wá ɖu nǔ ɖo xwé émítɔn gbe dandan. Énɛ́ ɔ́ wú ɔ́, sín gbe nɛ́ gbe ɔ́, é wá toxo ɔ́ mɛ hweɖěbǔnu ɔ́, é nɔ yi nyɔ̌nu ɔ́ xwé, bó nɔ yi ɖu nǔ.

⁹É wá su gbe ɖokpó, bɔ nyɔ̌nu ɔ́ ɖɔ nú asú tɔn ɖɔ: “Un tunwun ɖɔ nya e nɔ wá xwé mǐtɔn gbe hwɛhwɛ ɔ́, ɖɛ̌mɛnu Mawu tɔn wɛ é nyí nǔgbó.

¹⁰Mǐ ní gbá xɔ kpɛví ɖokpó ɖó xɔ mǐtɔn ta n'i. Mǐ ná sɔ́ zan ɖokpó, távo ɖokpó, zinkpo ɖokpó, kpódó zogbɛ́n ɖokpó kpó dó xɔ ɔ́ mɛ n'i. Énɛ́ ɔ́, é wá mǐ gɔ́n ɔ́, é ná nɔ́ nɔ fínɛ́.”

¹¹Elizée lɛ́ wá Cunɛ́mu gbe ɖokpó, bó yi mlɔ́ xɔ e è blǒ n'i ɔ́ mɛ.

¹²É ɖɔ nú mɛsɛntɔ́ tɔn Gehazíi ɖɔ: “Yi ylɔ́ nyɔ̌nu Cunɛ́munu énɛ́ ɔ́ wá nú mì.” Bɔ Gehazíi yi ylɔ́ nyɔ̌nu ɔ́ wá, bɔ nyɔ̌nu ɔ́ wá nɔ te ɖo nukɔn tɔn.

¹³Elizée ɖɔ nú Gehazíi ɖɔ é ní ɖɔ nú nyɔ̌nu ɔ́ ɖɔ: “Hwi ɖíe jɛ tagba dó mǐ tamɛ káká e! Étɛ́ wɛ un ká sixú wa nú we? A jlǒ nú má yi ɖɔ xó towe nú axɔ́sú ɔ́ abǐ ahwangán ɔ́ a?” É yí gbe ɖɔ: “Éeǒ, mi ma jɛ tagba ó, mɛ ce lɛ́ɛ mɛ wɛ un ɖe, un jɛ nǔɖé do ǎ.”

¹⁴Bɔ Elizée ɖɔ nú Gehazíi ɖɔ: “Étɛ́ mǐ ká ná wa n'i din?” Gehazíi yí gbe n'i ɖɔ: “Á! Un ko tunwun nǔ e mǐ nǎ wa n'i é. É ɖó vǐ ǎ, asú tɔn ká kó kpo.”

¹⁵Énɛ́ ɔ́, Elizée ɖɔ: “Bo lɛ́ yi ylɔ́ ɛ wá.” Bɔ Gehazíi yi ylɔ́ ɛ wá, bɔ nyɔ̌nu ɔ́ wá nɔ te hɔnli ɔ́ nu.

¹⁶ Énɛ́ ɔ́, Elizée ɖɔ n'i ɖɔ: “Xwe ɖě ɔ́ mɛ lěhwenu ɔ́, a nǎ ji vǐ súnnu ɖokpó.” Bɔ nyɔ̌nu ɔ́ ɖɔ n'i ɖɔ: “Nǔ sixú nyí mɔ̌ ǎ! Gbeyíɖɔ Mawu tɔn wɛ nú we, ma blɛ́ nyɛ mɛsɛntɔ́ towe ɔ́ ó.”

¹⁷Nyɔ̌nu ɔ́ ká mɔ xo nǔgbó, bó ji vǐ súnnu ɖokpó ɖo hwenu e Elizée ɖó n'i é.

¹⁸Vǐ e nyɔ̌nu Cunɛ́munu ɔ́ ji ɔ́ ɖo susu wɛ. É ká wá su gbe ɖokpó, bɔ é yi tɔ́ tɔn gɔ́n ɖo gle mɛ fí e tɔ́ tɔn kpó azɔ̌watɔ́ lɛ́ɛ kpó ɖo nǔkún ya ɖe wɛ é.

¹⁹Ée yě ɖo fínɛ́ ɔ́, é sú xó, bó jɛ ɖiɖɔ nú tɔ́ tɔn jí ɖɔ: “Ta ce! Ta ce!” Bɔ tɔ́ tɔn ɖɔ nú mɛsɛntɔ́ tɔn ɖokpó ɖɔ: “Sɔ́ ɛ yi jó nú nɔ tɔn.”

²⁰Mɛsɛntɔ́ ɔ́ sɔ́ ɛ yi jó nú nɔ tɔn, bɔ vǐ ɔ́ nɔ nɔ tɔn sín akɔn káká jɛ hwemɛ bo kú.

²¹Ée vǐ ɔ́ kú é ɔ́, nɔ ɔ́ sɔ́ ɛ yi mlɔ́ Elizée sín zan jí, bó sú hɔn ɔ́, bó yi gle ɔ́ mɛ,

²²bó sú xó ylɔ́ asú tɔn, bó ɖɔ n'i ɖɔ: “Kɛnklɛ́n sɛ́ mɛsɛntɔ́ ɖokpó kpó tócí asi ɖokpó kpó dó mì, bónú má yá wǔ yi gbeyíɖɔ Mawu tɔn ɔ́ gɔ́n bó wá.”

²³Bɔ asú tɔn ɖɔ n'i ɖɔ: “Étɛ́wú a jlǒ ná yi gɔ̌n tɔn égbé? Sun ma wá jǐ nɛ́, égbé ma ká nyí gbɔjɛzán gbe nɛ́!” Nyɔ̌nu ɔ́ yí gbe n'i ɖɔ: “Nǔɖé jɛ ǎ.”

²⁴Énɛ́ ɔ́, nyɔ̌nu ɔ́ ɖɔ bɔ è blǎ akpa nú tócí ɔ́, bɔ é jínjɔ́n jí, bó ɖɔ nú mɛsɛntɔ́ tɔn ɖɔ: “Kplá tócí ɔ́ nú mǐ ná yi. Ényí un ma ná gbe tɔn we ǎ hǔn, ma nɔ te alixo ó.”

²⁵Énɛ́ ɔ́, é ɖidó gbeyíɖɔ Mawu tɔn ɔ́ gɔ́n ɖo Kaamɛ́li só jí. Hwenu e gbeyíɖɔ ɔ́ mɔ ɛ sɛ́ dó jǎwe ɔ́, é ɖɔ nú mɛsɛntɔ́ tɔn Gehazíi ɖɔ: “Kpɔ́n nyɔ̌nu Cunɛ́munu ɔ́!

²⁶Kán wezun yi kpé e, bó kanbyɔ́ ɛ ɖɔ é má ɖo ganjí a jí; asú tɔn kpó vǐ tɔn kpó má ɖo ganjí a jí.” Ée Gehazíi yi kan xó byɔ́ nyɔ̌nu ɔ́, é yí gbe n'i ɖɔ yě bǐ ɖo ganjí.

²⁷Ée é wá gbeyíɖɔ Mawu tɔn ɔ́ gɔ́n ɖo só jí ɔ́, é zunfán afɔ tɔn, bɔ Gehazíi sɛkpɔ́ ɛ, bó jló ná sísɛ́ ɛ. Lo ɔ́, gbeyíɖɔ Mawu tɔn ɔ́ ɖɔ: “Jǒ e dó, ɖó aluwɛ mɛ wɛ é ɖe. Mawu Mavɔmavɔ ká sɔ́ nǔ e sín aluwɛ mɛ é ɖe ɔ́ hwlá dó mì. É gba kpá nú mì ǎ.”

²⁸Nyɔ̌nu ɔ́ ɖɔ: “Un byɔ́ vǐ ɖé we a? Un ma ko ɖɔ nú we ɖɔ hwi ma blɛ́ mì ó a?”

²⁹Ée é ɖɔ mɔ̌ ɔ́, Elizée ɖɔ nú Gehazíi ɖɔ: “Sɔ́ nǔ, bó sɔ́ kpogɛ ce bo yi. Ma gú hwenu bo ɖo gbe dó mɛɖé wɛ ɖo alixo ó; mɛɖé ká dó gbe we hǔn, ma kɛ nu ó. A jɛ dɔ̌n hǔn, sɔ́ kpogɛ ɔ́ ɖó nukún mɛ nú vǐ ɔ́.”

³⁰Vǐ ɔ́ sín nɔ xwlé Mawu ɖɔ: “Nú Mawu Mavɔmavɔ ɖo gbɛ, nú hwi lɔ ɖo gbɛ jɛ́n wɛ ɔ́, un ɖo nǎ jó we dó wɛ ǎ.” Ée é ɖɔ mɔ̌ ɔ́, Elizée gbɔ bo sí te, bo xwedó e.

³¹Nǔ ɖo mɔ̌ có, Gehazíi jɛ nukɔn nú yě, bó sɔ́ kpogɛ ɔ́ ɖó nukún mɛ nú vǐ ɔ́; vǐ ɔ́ ká dán wǔ ǎ, é ká kɛ nu ǎ. É lɛ́ kɔ bo wá kpé Elizée, bó ɖɔ n'i ɖɔ: “Vǐ ɔ́ fɔ́n ǎ.”

³²Hwenu e Elizée wá xwé ɔ́ gbe ɔ́, vǐ ɔ́ sín cyɔ ɖo ayǐmlɔ́mlɔ́ ɖo zan tɔn jí.

³³Elizée byɔ́ xɔ ɔ́ mɛ, bó dɔn hɔn ɔ́ sú, bɔ é kpó vǐ kúkú ɔ́ kpó we lɛ́ɛ ɖo xɔ ɔ́ mɛ, bɔ é xo ɖɛ.

³⁴ É xá zan ɔ́ jí, bó mlɔ́ vǐ ɔ́ jí, bó sɔ́ nu tɔn bɔ ɖó nu tɔn wú, bó sɔ́ nukún tɔn lɛ́ɛ bɔ ɖó nukún tɔn lɛ́ɛ wú, bó fɔ alɔ tɔn lɛ́ɛ ɖó vǐ ɔ́ sín alɔ lɛ́ɛ jí, lobo dlɛ́n éɖée ɖó jǐ tɔn, bɔ zozo byɔ́ vǐ ɔ́ sín lanmɛ.

³⁵Elizée fɔ́n sín vǐ ɔ́ jí, bó ɖi sa gbɔn xɔ ɔ́ mɛ, lobo lɛ́ wá mlɔ́ vǐ ɔ́ jí, bó dlɛ́n éɖée, bɔ vǐ ɔ́ nyi cin azɔn tɛ́nwe bo hun nukún.

³⁶Tlóló ɔ́, Elizée ylɔ́ Gehazíi bo ɖɔ n'i ɖɔ: “Yi ylɔ́ vǐ ɔ́ sín nɔ wá.” Bɔ Gehazíi yi ylɔ́ ɛ, bɔ é wá Elizée gɔ́n, bɔ Elizée ɖɔ n'i ɖɔ: “Wǎ kplá vǐ towe.”

³⁷Ée Elizée ɖɔ mɔ̌ n'i ɔ́, é wá jɛ kpo ɖo asá tɔn mɛ, bó ɖe kɔ́. Énɛ́ ɔ́ gúdo ɔ́, é kplá vǐ tɔn bó tɔ́n.

³⁸Elizée lɛ́ kɔ wá Gilugalu. Adɔ ɖé ká tɔ́n ɖo to ɔ́ mɛ hwenɛ́nu. É kplé gbeyíɖɔ Mawu tɔn lɛ́ɛ bɔ yě lɛ́ lɛ̌ dó e, bɔ é ɖɔ nú mɛsɛntɔ́ tɔn ɖɔ: “Sɔ́ zɛ̌n ɖaxó ɔ́ nyi ado jí, bó ɖa nǔsúnnú nú gbeyíɖɔ Mawu tɔn lɛ́ɛ.”

³⁹Gbeyíɖɔ Mawu tɔn lɛ́ɛ ɖokpó ɖidó mǎ ba gbé ɖo gle mɛ, bó yi mɔ atín e nɔ́ vun kan é ɖokpó, bó gbɛ sínsɛ́n tɔn gɔ́ avɔ mɛ. Ée é lɛ́ kɔ wá ɔ́, é já, bó bɛ́ kɔn nyi nǔsúnnú ɔ́ mɛ, mɛɖé ká tunwun nǔ e wɛ é ǎ.

⁴⁰È wǔn nǔsúnnú ɔ́ nú yě; lo ɔ́, ée yě dó nu ɔ́, yě sú xó bó ɖɔ: “Gbeyíɖɔ Mawu tɔn, nǔsúnnú ɔ́ ɖó aɖǐ.” Énɛ́ ɔ́ zɔ́n bɔ mɛɖé sixú ɖu ǎ.

⁴¹Elizée ɖɔ è nǐ zé linfín wá, bɔ è zě n'i bɔ é kɔn dó zɛ̌n ɔ́ mɛ, bó ɖɔ nú mɛsɛntɔ́ tɔn ɖɔ: “Nǎ mɛ lɛ́ɛ nú yě ɖu.” Énɛ́ ɔ́, nǔsúnnú ɔ́ nyɔ́ bɔ è hɛn ɔ́, è nǎ ɖu.

⁴²É wá su gbe ɖokpó, bɔ nya ɖé gosín Baalu-Calica wá. Nya ɔ́ hɛn ɔ́ji nukɔntɔn e é ya é sín wɔ̌xúxú ko wá nú gbeyíɖɔ Mawu tɔn ɔ́. É lɛ́ hɛn blěe nukɔntɔn e é ya ɔ́ dó glo tɔn mɛ wá n'i. Elizée ɖɔ nú mɛsɛntɔ́ tɔn ɖɔ: “Mǎ nú mɛ e ɖo fí lɛ́ɛ nú yě ɖu.”

⁴³Mɛsɛntɔ́ tɔn yí gbe n'i ɖɔ: “Nɛ̌ wɛ un ka sixú má nǔ élɔ́ lɛ́ɛ nú gbɛtɔ́ kanwe ko gbɔn?” Lo ɔ́, Elizée ɖɔ: “Un ɖɔ hwi ní má nú yě nú yě ní ɖu. Đó Mawu Mavɔmavɔ ɖɔ: ‘Mɛ bǐ ná ɖu bɔ é ná lɛ́ kpo.’ ”

⁴⁴Énɛ́ ɔ́, mɛsɛntɔ́ ɔ́ má nǔɖuɖu ɔ́ nú yě, bɔ yě ɖu bɔ é kpo nǔgbó, lě e Mawu Mavɔmavɔ ɖɔ gbɔn é.