Read fon 2 Axɔ́sú 5 Bible Online

2 Axɔ́sú 5 - fon bible

2 Axɔ́sú 5

¹ Naamáni wɛ nyí ahwangán Silíi xɔ́sú ɔ́ tɔn. Silíi xɔ́sú ɔ́ nyɔ́ xomɛ dó wǔ tɔn. Gbɛtɔ́ nukúnɖéjí ɖokpó wɛ é nyí ɖo axɔ́sú ɔ́ gɔ́n, ɖó é jí wɛ Mawu Mavɔmavɔ ná ɖuɖéjí Silíinu lɛ́ɛ gbɔn. Amɔ̌, nya ahwanfuntɔ́ syɛ́nsyɛ́n nɛ́ ɔ́, gudunɔ wɛ.

²Hwenu e sɔ́ja Silíi tɔn lɛ́ɛ fɔ nǔ e ɖo Izlayɛ́li to ɔ́ mɛ lɛ́ɛ bǐ ɔ́, yě mɔ ɖyɔ̌vǐvú ɖé bó wlí kannumɔ tɔn. Ée yě kplá ɛ wá ɔ́, è sɔ́ ɛ ɖó Naamáni sín asi gɔ́n.

³É wá su gbe ɖokpó, bɔ vǐ ɔ́ ɖɔ nú mɛ e gɔ́n é ɖe ɔ́ ɖɔ: “Áo! Ényí gbeyíɖɔ Mawu tɔn e ɖo Samalíi ɔ́ gɔ́n wɛ gǎn ce yi din ɔ́, é ná gbɔ azɔn e jɛ wɛ é ɖe ɔ́ n'i tlóló.”

⁴Ée Naamáni se mɔ̌ ɔ́, é yi ɖɔ nǔ e ɖyɔ̌vǐvú Izlayɛ́linu ɔ́ ɖɔ ɔ́ nú axɔ́sú ɔ́.

⁵Ée é ɖɔ mɔ̌ ɔ́, axɔ́sú ɔ́ ɖɔ: “Ényí mɔ̌ wɛ hǔn, bo yi. Un ná wlán wěma ɖokpó dó así nú we, bɔ a nǎ sɔ́ nú Izlayɛ́li xɔ́sú ɔ́.” Ée Naamáni xweyǐgbe ɔ́, é hɛn kpatágan kilóo afɔɖé kanwe ko (300) mɔ̌, bó hɛn siká ɖagbe ɖagbe kilóo kanɖé ko (60) mɔ̌, bó hɛn nǔzínzán ɖagbe ɖagbe wǒ.

⁶Ée Naamáni jɛ dɔ̌n ɔ́, é zé wěma ɔ́ jó nú Izlayɛ́li xɔ́sú ɔ́. Wěma ɔ́ ɖo ɖiɖɔ wɛ ɖɔ: “Un wlán wěma élɔ́ dó así nú ahwangán ce Naamáni, bó dó ɖe xlɛ́ we ɖɔ nyi wɛ sɛ́ ɛ dó nú a nǎ gbɔ gudu e jɛ wɛ é ɖe ɔ́ n'i.”

⁷Ée Izlayɛ́li xɔ́sú ɔ́ xa wěma ɔ́, é vún awu dó kɔ nú éɖée bó ɖɔ: “Mawu wɛ un nyí bó ɖó acɛ bó ná hu mɛ bo lɛ́ fɔ́n a? Bɔ è wlán wěma sɛ́ dó mì ɖɔ nyɛ ní gbɔ gudu nú mɛ. Mi ma mɔ ganjí ɖɔ nǔ ɖɔ ba mì wɛ é ɖe a?”

⁸Ée Elizée gbeyíɖɔ Mavɔmavɔ tɔn ɔ́ se ɖɔ Izlayɛ́li xɔ́sú ɔ́ vún awu dó kɔ nú éɖée ɔ́, é sɛ́ mɛ dó ɖɔ è nǐ yi kanbyɔ́ ɛ ɖɔ: “Étɛ́wú a ka vún awu dó kɔ nú hwiɖée? Ní wá gɔ̌n ce, énɛ́ ɔ́, é ná tunwun ɖɔ gbeyíɖɔ Mawu tɔn ɖokpó ɖo Izlayɛ́li fí.”

⁹Énɛ́ ɔ́, Naamáni sɔ́ kɛkɛ́ví tɔn, kpódó sɔ́ tɔn lɛ́ɛ kpó, bó yi nɔ te ɖo Elizée sín hɔntogbó jí.

¹⁰Elizée sɛ́ mɛ dó ɖɔ è nǐ yi ɖɔ n'i ɖɔ: “Yi, bó nylɔ́ hwiɖée dó Judɛ́ɛn tɔ mɛ azɔn tɛ́nwe; énɛ́ ɔ́, gudu towe ná fyɔ́, bɔ a nǎ húzú mɛ mímɛ́.”

¹¹Ée Naamáni se mɔ̌ ɔ́, xomɛ sin i, bɔ é ɖidó bó ɖɔ: “Nyɛ ɖo linlin wɛ ɖɔ é ná tɔ́n, bó ná wá gɔ̌n ce dandan, bɔ é ɖésú ná ylɔ́ Mawu Mavɔmavɔ, Mawu tɔn sín nyǐkɔ, lobo ná sɔ́ alɔ tɔn gbɔn fí e gudu ɔ́ gbɔn nú mì lɛ́ɛ, bó ná gbɔ azɔn nú mì.

¹²Abana tɔ kpó Paapáa tɔ kpó e ɖo Damási lɛ́ɛ má nyɔ́ hú ée ɖo Izlayɛ́li lɛ́ɛ bǐ a? Un hɛn ɔ́, un ná yi nylɔ́ nyɛɖée dó tɔ énɛ́ lɛ́ɛ ɖokpó mɛ, bó húzú mɛ mímɛ́!” Ée é ɖɔ mɔ̌ ɔ́, é lɛ́ kɔ bo ɖidó kpó xomɛsin kpó.

¹³Lo ɔ́, mɛsɛntɔ́ tɔn lɛ́ɛ sɛkpɔ́ ɛ, bo ɖɔ n'i ɖɔ: “Gǎn, ényí ɖɔ nǔvɛ́wǔ ɖé wɛ gbeyíɖɔ Mawu tɔn ɔ́ zɔ́n we ɖɔ hwi bló ɔ́, a nǎ bló ǎ cé? Étɛ́wú a ma ka ná bló nǔ e é ɖɔ ɔ́ ǎ? Nylɔ̌ hwiɖée dó tɔ mɛ bo húzú mɛ mímɛ́ bó!”

¹⁴Ée yě ɖɔ mɔ̌ n'i ɔ́, é yi Judɛ́ɛn tɔ ɔ́ nu, bó nylɔ́ éɖée dó tɔ ɔ́ mɛ azɔn tɛ́nwe lě e gbeyíɖɔ Mawu tɔn ɔ́ ɖɔ gbɔn n'i é. Bɔ wǔtu tɔn cí yɔkpɔ́vú sín wǔtu ɖɔhun, bɔ é húzú mɛ mímɛ́.

¹⁵Naamáni lɛ́ kɔ ɖidó gbeyíɖɔ Mawu tɔn ɔ́ gɔ́n tlóló, é kpódó mɛ e xwedó e lɛ́ɛ kpó. Ée é wá ɔ́, é nɔ te nukɔn tɔn bo ɖɔ n'i ɖɔ: “Un mɔ din ɖɔ nǔmɛsɛn ɖě kún sɔ́ ɖo fí ɖěbǔ ɖo ayǐkúngban ɔ́ jí zɛ Mawu Izlayɛ́li tɔn ɔ́ wú ó. Din ɔ́, kɛnklɛ́n bó yí nǔ e nyɛ mɛsɛntɔ́ towe hɛn wá nú we é.”

¹⁶Elizée ka xwlé nǔ n'i ɖɔ: “Mawu Mavɔmavɔ e un nɔ sɛn ɔ́ ɖo gbɛ, un ná yí nǔ ɖěbǔ ǎ.” Naamáni ka ɖɔ yǐ jɛ́n é ná yí dandan, lo ɔ́, é gbɛ́ bǐ gbídígbídí.

¹⁷Bɔ Naamáni ɖɔ: “Ée a gbɛ̌ nǔ e un ná we lɛ́ɛ bǐ ɔ́, bo gbɔ nú è nǐ ná to ɔ́ mɛ sín kɔ́ e tócí we sixú hɛn ɔ́ mì. Đó nyɛ mɛsɛntɔ́ towe sɔ́ jló ná sá vɔ̌ e è nɔ dó zo ɔ́ ɖě, abǐ kɔnɖókpɔ́vɔ́ ɖě nú nǔmɛsɛn ɖěbǔ zɛ Mawu Mavɔmavɔ Izlayɛ́li tɔn wú ǎ.

¹⁸Nǔ ɖokpó e byɔ́ Mawu Mavɔmavɔ wɛ un ɖe ɖɔ é ní sɔ́ kɛ mì ɔ́ ɖíe: ényí gǎn ce Silíi xɔ́sú ɔ́ xwe vodún Hlimumɔ́ni sín xɔ mɛ bo xwe kɔ́ ɖe gbé ɔ́, awa ce wɛ é nɔ́ hɛn, bó nɔ́ jɛ kpo. Hǔn nyi lɔmɔ̌ ɖó ná jɛ kpo. Ényí un bló mɔ̌ hǔn, Mawu Mavɔmavɔ ní kɛnklɛ́n sɔ́ kɛ mì.”

¹⁹Ée é ɖɔ mɔ̌ ɔ́, Elizée ɖɔ n'i ɖɔ: “Yi xwé, ado ma hu we ó.” Bɔ é ɖidó. Ée Naamáni gosín Elizée gɔ́n ɔ́, é ko yi zɔ fí ɖé ǎ,

²⁰bɔ Gehazíi, mɛsɛntɔ́ Elizée tɔn ɖɔ dó ayi mɛ ɖɔ: “Gǎn ce ɖíe gbɔ azɔn nú Naamáni Silíinu énɛ́ ɔ́, bó ká gbɛ́ nǔ e é hɛn wá n'i ɔ́ bǐ e. Un xwlé Mawu ɖɔ Mawu Mavɔmavɔ ɖo gbɛ, un ná kán wezun xwedó e, bó ná yí nǔ lɛ́ɛ ɖě.”

²¹Énɛ́ ɔ́, Gehazíi kán wezun jɛ Naamáni gúdo. Ée Naamáni mɔ ɛ ɖo wezun jí jǎwe ɔ́, é jɛ te sín kɛkɛ́ví tɔn mɛ, bó yi kpé e bó ɖɔ: “Nǔɖé jɛ wɛ a?”

²²Bɔ Gehazíi yí gbe n'i ɖɔ: “Nǔɖé jɛ ǎ. Gǎn ce wɛ sɛ́ mì dó ɖɔ nyɛ ní ɖɔ nú we ɖɔ gbeyíɖɔ dɔ̌nkpɛvú we ɖé lɛ́ɛ gosín Eflayímu só ta wá émí gɔ́n. Hwi ní kɛnklɛ́n sɛ́ kpatágan kilóo gban (30) kpó nǔzínzán ɖagbe ɖagbe we kpó dó yě.”

²³Ée é ɖɔ mɔ̌ ɔ́, Naamáni ɖɔ: “A yǐ kpatágan kilóo kanɖé ko (60) ɔ́, é ná nyɔ́ hú.” É ɖɔ kilóo kanɖé ko (60) jɛ́n é ná yí dandan, bó blá kpatágan kilóo kanɖé ko (60) ɔ́ n'i dó glo we mɛ, bó fɔ awu ɖagbe ɖagbe we d'é jí, bó dó agban tɔn nú mɛsɛntɔ́ tɔn we, bɔ yě hɛn, bó jɛ Gehazíi nukɔn.

²⁴Ée yě jɛ Ofɛ́lu ɔ́, Gehazíi yí nǔ lɛ́ɛ, bó bɛ́ yi ɖó xwé gbe, bó nyi mɛ lɛ́ɛ bɔ yě yi.

²⁵Énɛ́ ɔ́ gúdo ɔ́, é yi gǎn tɔn gɔ́n, bɔ gǎn tɔn ɖɔ: “Gehazíi, fítɛ́ a gosín?” É yí gbe n'i ɖɔ: “Gǎn, un ma yi fí ɖé nɛ́.”

²⁶Lo ɔ́, Elizée ɖɔ n'i ɖɔ: “Hwenu e nya ɔ́ gosín kɛkɛ́ví tɔn mɛ, bó wá kpé we ɔ́, un tunwun ǎ wɛ a vɛdó a? Hwenu e a nǎ yí kpatágan, bó yí awu, bo yí olívugbo, bó yí vǐwungbo, bó yí lɛ̌ngbɔ́, bó yí nyibú, bó yí mɛsɛntɔ́ súnnu kpó nyɔ̌nu kpó ɔ́, hwe ɔ́ nu ɖíe ǎ.

²⁷Énɛ́ ɔ́ wú ɔ́, hwi kpódó vǐ towe lɛ́ɛ kpó ná bɛ́ gudu e Naamáni jɛ ɔ́, bɔ é ná nɔ mi wú káká yi.” Ée Elizée ɖɔ mɔ̌ ɔ́, gudu kpé Gehazíi wú, bɔ wǔtu tɔn bǐ wé kɛ́njí ɖɔhun, bɔ é ɖidó.