Read fon 2 Axɔ́sú 7 Bible Online

2 Axɔ́sú 7 - fon bible

2 Axɔ́sú 7

¹Elizée yí gbe ɖɔ: “Mi ɖótó xó e Mawu Mavɔmavɔ ɖɔ é! É ɖɔ: ‘Sɔ lěhwenu ɔ́, linfín kilóo wěwe ná jɛ kpatágankwɛ́ ɖokpó, bɔ ɔ́ji kilóo ko-nukún-ɛnɛ ná jɛ kpatágankwɛ́ ɖokpó ɖo Samalíi xi mɛ.’ ”

²Ée é ɖɔ mɔ̌ ɔ́, ahwangán e nɔ kplá axɔ́sú ɔ́ ɖɔ nú gbeyíɖɔ Mawu tɔn ɔ́ ɖɔ: “Ényí Mawu Mavɔmavɔ na bo tɔ́n ali dó jǐnukúnsin, bó sɛ́ jinukún dó gbɔn fínɛ́ ɔ́, nǔ e a ɖɔ din ɔ́ ná sixú jɛ wɛ a?” Elizée yí gbe n'i ɖɔ: “A nǎ mɔ kpó nukún towe kpó, lo ɔ́, ɖě ɖo nu towe ná jɛ wɛ ǎ.”

³Gudunɔ ɛnɛ ɖé lɛ́ɛ ká ɖo toxo ɔ́ sín hɔntogbó jí, bó ɖɔ nú yěɖée ɖɔ: “Anǐwo! Mǐ ná nɔ fí káká bó kú wɛ a?

⁴Ényí mǐ ɖɔ mǐ ná byɔ́ toxo ɔ́ mɛ din ɔ́, mǐ ná kú adɔ, ɖó adɔ tɔ́n ɖo toxo ɔ́ mɛ. Ényí mǐ ká lɛ́ nɔ fí ɔ́, mǐ ná lɛ́ kú. Mi gbɔ bo wá mǐ ní yi fí e ahwangɔnu Silíi tɔn lɛ́ɛ ɖó gɔnu ɖó é, bó ná sɔ́ mǐɖée jó nú yě. Ényí yě jó mǐ dó nyi gbɛ hǔn, é jɛ́n nɛ́. Yě ká hu mǐ hǔn, é jɛ́n lɛ́ nɛ́, mǐ ná kú bɔ xó ná fó.”

⁵Nǔgbó ɔ́, yě sɔ́ nǔ zǎn ɖo bibɔ wɛ, bó ɖidó fí e ahwangɔnu Silíi tɔn lɛ́ɛ ɖó gɔnu ɖó é. Yě sɛkpɔ́ fí ɔ́, yě ká mɔ mɛ ɖěbǔ ǎ.

⁶Cóbónú yě ná wá fí e ahwangɔnu Silíi tɔn lɛ́ɛ ɖó gɔnu ɖó ɔ́, sɔ́ja Silíi tɔn lɛ́ɛ kó se zǐngídi ɖé, bɔ é cí ahwangɔnu ɖaxó ɖé wɛ hɛn sɔ́ kpódó kɛkɛ́ví kpó jǎwe ɖɔhun. Mawu Mavɔmavɔ wɛ ka sɛ́ zǐngídi énɛ́ ɔ́ dó, bɔ Silíinu lɛ́ɛ ɖɔ ɖo yěɖée tɛ́ntin ɖɔ: “Mi mɔ axɔ́sú Izlayɛ́li tɔn dó ajɔ axɔ́sú Hitíti tɔn lɛ́ɛ kpódó Ejípu tɔn lɛ́ɛ kpó, bɔ ahwangɔnu yětɔn lɛ́ɛ wá tɔ́n ahwan mǐ din a?”

⁷Énɛ́ ɔ́ wú wɛ, ée zǎn ɖo bibɔ wɛ ɔ́, yě hɔn jó goxɔ yětɔn lɛ́ɛ, sɔ́ yětɔn lɛ́ɛ kpó tócí yětɔn lɛ́ɛ kpó dó, lobo jó tɛn e mɛ yě ɖó gɔnu ɖó ɔ́ dó nyi lě e é ɖe gbɔn é, bó hwlɛ́n ta yětɔn.

⁸Ée gudunɔ lɛ́ɛ wá fí e sɔ́ja Silíi tɔn lɛ́ɛ ɖó gɔnu ɖó ɔ́, yě byɔ́ goxɔ lɛ́ɛ ɖokpó mɛ, bó ɖu nǔ, bó nu ahan, lobo bɛ́ kpatágan, siká kpó awu kpó yi hwlá. Yě lɛ́ lɛ́ kɔ wá, bó byɔ́ goxɔ ɖěvo mɛ, lobo lɛ́ bɛ́ nǔ ɖěvo ɖěvo sɔ́ yi hwlá.

⁹Ée yě bló mɔ̌ gúdo ɔ́, yě ɖɔ ɖo yěɖée tɛ́ntin ɖɔ: “Nǔ e wa wɛ mǐ ɖe ɔ́ nyɔ́ ǎ. Azǎn égbé tɔn ɔ́, wɛn ɖagbe sín azǎn ɖé wɛ. Nú mǐ tin, lobo nɔ te káká nú ayǐ hɔ́n ɔ́, è nǎ dɔn tó nú mǐ. Mi bo wá nú mǐ ná yi ɖɔ xó ɔ́ ɖo hɔnmɛ.”

¹⁰Ée yě ɖɔ mɔ̌ ɔ́, yě lɛ́ kɔ wá toxo ɔ́ mɛ, bó ylɔ́ sɔ́ja e ɖo toxo ɔ́ sín hɔntogbó cɔ́ wɛ lɛ́ɛ, bó ɖɔ nú yě ɖɔ: “Mǐ yi fí e sɔ́ja Silíi tɔn lɛ́ɛ ɖó gɔnu ɖó é, mǐ ká sɔ́ mɔ mɛɖé ɖo fínɛ́ ǎ, mǐ ká sɔ́ se mɛɖé sín gbe ǎ. Sɔ́ lɛ́ɛ kpó tócí lɛ́ɛ kpó jɛ́n mǐ mɔ ɖo kanmɛ, bó mɔ goxɔ lɛ́ɛ bǐ ɖo te.”

¹¹Sɔ́ja e ɖo toxo ɔ́ sín hɔntogbó cɔ́ wɛ lɛ́ɛ ylɔ́ mɛ ɖokpó tlóló, bó ɖɔ xó ɔ́ sɛ́ dó hɔnmɛ.

¹²Ée Axɔ́sú ɔ́ se mɔ̌ ɔ́, é sí te zǎn ɔ́ mɛ, bó ɖɔ nú azaglɔ́gán tɔn lɛ́ɛ ɖɔ: “Un jló ná ɖɔ wě e ɖe dó mǐ wú wɛ Silíinu lɛ́ɛ ɖe ɔ́ nú mi. Ée yě tunwun ɖɔ mǐ ɖo xovɛ́ ɔ́, yě gosín fí e yě ɖó gɔnu ɖó ɔ́, bó yi hɔn hwlá dó gle lɛ́ɛ mɛ, bó ɖo ɖiɖɔ nú yěɖée wɛ ɖɔ: ‘Hwenu e yě ná tɔ́n sín toxo ɔ́ mɛ ɔ́, mǐ ná wlí yě gbɛɖe gbɛɖe, bó ná byɔ́ toxo ɔ́ mɛ.’ ”

¹³Axɔ́sú ɔ́ sín azaglɔ́gán ɖokpó yí gbe bo ɖɔ: “Mi wá mǐ nǐ fɔ sɔ́ e kpo ɖo gbɛ lɛ́ɛ atɔ́ɔ́n, bó ná sɛ́ mɛ dó, nú yě ná yi kpɔ́n nǔ e ɖo jijɛ wɛ ɖo dɔ̌n é. È na bo gɔn mɔ̌ bló ɔ́, nǎ kú wɛ jɛ́n yě ɖe Izlayɛ́linu tobutóbú e kú lɛ́ɛ ɖɔhun.”

¹⁴Énɛ́ ɔ́, è sin kɛkɛ́ví we dó sɔ́ wú, bɔ axɔ́sú ɔ́ sɛ́ mɛ dó sɔ́ja Silíi tɔn lɛ́ɛ gbé mɛ, bó ɖɔ yě ní yi kpɔ́n nǔ e ɖo jijɛ wɛ é.

¹⁵Mɛ e axɔ́sú ɔ́ sɛ́ dó lɛ́ɛ xwedó Silíinu lɛ́ɛ sín afɔdo káká yi Judɛ́ɛn tɔ ɔ́ kɔn. Ée yě ɖo yiyi wɛ ɔ́, yě mɔ awu kpódó nǔ yětɔn e yě jó dó, bó mɔ tɛn bó yá wǔ hɔn yi lɛ́ɛ kpó gěgé. Yě wá wlí nǔ e yě mɔ ɔ́ ɖɔ nú axɔ́sú ɔ́.

¹⁶Ée togun ɔ́ se mɔ̌ tlóló ɔ́, yě bǐ tɔ́n, bó yi fɔ nǔ e sɔ́ja Silíi tɔn lɛ́ɛ jó dó, ɖo fí e yě ɖó gɔnu ɖó é. Énɛ́ ɔ́, linfín kilóo wěwe jɛ kpatágankwɛ́ ɖokpó, bɔ ɔ́ji kilóo ko-nukún-ɛnɛ jɛ kpatágankwɛ́ ɖokpó lě e Mawu Mavɔmavɔ ɖɔ gbɔn é.

¹⁷Axɔ́sú ɔ́ ɖɔ nú ahwangán e nɔ kplá ɛ ɔ́ ɖɔ ní yi toxo ɔ́ sín hɔntogbó jí, bó kpɔ́n nǔ e ɖo jijɛ wɛ ɖo fínɛ́ é. Lo ɔ́, ée é yi ɔ́, mɛ e kplé ɖo fínɛ́ lɛ́ɛ gbídí i ɖó afɔ wú, bɔ é kú lě e gbeyíɖɔ Mawu tɔn Elizée ko ɖɔ gbɔn hwenu e axɔ́sú ɔ́ wá gɔ̌n tɔn é.

¹⁸Nǔgbó ɔ́, Elizée ko ɖɔ nú axɔ́sú ɔ́ ɖɔ: “Sɔ lěhwenu ɔ́, linfín kilóo wěwe ná jɛ kpatágankwɛ́ ɖokpó, bɔ ɔ́ji kilóo ko-nukún-ɛnɛ ná jɛ kpatágankwɛ́ ɖokpó ɖo Samalíi xi mɛ.”

¹⁹Bɔ ahwangán ɔ́ yí gbe nú gbeyíɖɔ Mawu tɔn ɔ́ ɖɔ: “Ényí Mawu Mavɔmavɔ na bo tɔ́n ali dó jǐnukúnsin, bó sɛ́ jinukún dó gbɔn fínɛ́ ɔ́, nǔ e a ɖɔ din ɔ́ ná sixú jɛ wɛ a?” Bɔ Elizée yí gbe n'i ɖɔ: “A nǎ mɔ kpó nukún towe kpó, lo ɔ́ ɖě ɖo nu towe ná jɛ wɛ ǎ.”

²⁰Nǔ e jɛ dó jǐ tɔn nǔgbó ɔ́ nɛ́: togun e kplé ɖo toxo ɔ́ sín hɔntogbó jí ɔ́ gbídí ahwangán e nɔ́ kplá axɔ́sú ɔ́ é ɖó afɔ wú.