Read fon 2 Axɔ́sú 8 Bible Online

2 Axɔ́sú 8 - fon bible

2 Axɔ́sú 8

¹ Nyɔ̌nu e sín vǐ kú bɔ Elizée fɔ́n ɛ ɔ́, Elizée ɖɔ n'i gbe ɖokpó ɖɔ: “Sɔ́ nǔ bo yi fí e hwi kpódó mɛ towe lɛ́ɛ kpó ná sixú nɔ é, ɖó Mawu Mavɔmavɔ sɛ́ adɔ dó to ɔ́ mɛ, bɔ adɔ ɔ́ ná tɔ́n nú xwe tɛ́nwe.”

²Nyɔ̌nu ɔ́ sɔ́ nǔ nǔgbó, bó bló nǔ e gbeyíɖɔ Mawu tɔn ɔ́ ɖɔ n'i é. É yi, é kpó mɛ tɔn lɛ́ɛ kpó, bó yi nɔ Filisitɛ́ɛn lɛ́ɛ sín tomɛ xɔ xwe tɛ́nwe.

³Xwe tɛ́nwe lɛ́ɛ gúdo ɔ́, nyɔ̌nu ɔ́ kplá mɛ tɔn lɛ́ɛ, bó gosín Filisitɛ́ɛn lɛ́ɛ sín tomɛ. Ée é wá Izlayɛ́li ɔ́, é yi axɔ́sú ɔ́ gɔ́n bó sa vo n'i ɖɔ é ní sɔ́ xwé émítɔn kpó gle émítɔn kpó nú émí.

⁴Hwenɛ́nu ɔ́, axɔ́sú ɔ́ ɖo xó ɖɔ xá gbeyíɖɔ Mawu tɔn Elizée sín mɛsɛntɔ́ Gehazíi wɛ bo ɖɔ: “Kɛnklɛ́n ɖɔ nǔ ɖaxó ɖaxó e Elizée wa lɛ́ɛ nú mì.”

⁵Hwenu e Gehazíi ɖo lě e Elizée fɔ́n mɛkúkú ɖokpó gbɔn ɔ́ wlí ɖɔ nú axɔ́sú ɔ́ wɛ ɔ́, nyɔ̌nu e sín vǐ Elizée fɔ́n ɔ́ wá axɔ́sú ɔ́ gɔ́n, bó ná byɔ́ xwé tɔn kpó gle tɔn kpó. Ée Gehazíi mɔ nyɔ̌nu ɔ́, é ɖɔ nú axɔ́sú ɔ́ ɖɔ: “Sɛ́mɛɖó, nyɔ̌nu ɔ́ ɖíe, vǐ e Elizée fɔ́n ɔ́ lɔ ka ɖíe.”

⁶Axɔ́sú ɔ́ kan nǔ byɔ́ nyɔ̌nu ɔ́, bɔ é wlí nǔ e jɛ lɛ́ɛ ɖɔ n'i. Énɛ́ ɔ́, axɔ́sú ɔ́ sɔ́ ɛ dó alɔ mɛ nú azaglɔ́gán tɔn ɖokpó, bó ɖɔ: “Bɛ̌ nǔ e nyí nyɔ̌nu élɔ́ tɔn lɛ́ɛ bǐ jó n'i, bó ná nǔ i dó nǔkún e è ya ɖo gle tɔn mɛ, sín gbe e gbe é gosín tomɛ fí káká jɛ din ɔ́ do mɛ.”

⁷Elizée yi Damási Silíi tota ɔ́ mɛ. Bɛni-Hadadi Silíi xɔ́sú ɔ́ ká ɖo azɔn jɛ wɛ hwenɛ́nu. È wǎ yi ɖɔ n'i ɖɔ gbeyíɖɔ Mawu tɔn ɔ́ wá fí.

⁸Ée axɔ́sú ɔ́ se mɔ̌ ɔ́, é ɖɔ nú Hazayɛ́li ɖɔ: “Hɛn nǔɖé bó yi ná gbeyíɖɔ Mawu tɔn ɔ́, bónú é ní kanbyɔ́ Mawu Mavɔmavɔ ɖɔ azɔn e jɛ wɛ un ɖe ɔ́ ká ná xwɛ a jí.”

⁹Ée axɔ́sú ɔ́ ɖɔ mɔ̌ ɔ́, Hazayɛ́li dó nǔ ɖagbe ɖagbe e ɖo Damási ɔ́ sín agban dó lǎkúnmí kanɖé (40) jí, bó ná yi ná Elizée. Ée é yi Elizée gɔ́n ɔ́, é ɖɔ n'i ɖɔ: “Mɛsɛntɔ́ towe Bɛni-Hadadi Silíi xɔ́sú ɔ́ wɛ sɛ́ mì dó gɔ̌n towe, bó ɖɔ nyɛ ní wá kanbyɔ́ we ɖɔ azɔn e jɛ wɛ émí ɖe ɔ́ ká ná xwɛ a jí.”

¹⁰Elizée yí gbe n'i ɖɔ: “Mawu Mavɔmavɔ ɖe xlɛ́ mì ɖɔ é ná kú dandan; amɔ̌, yi ɖɔ n'i ɖɔ azɔn tɔn ná xwɛ.”

¹¹Ée gbeyíɖɔ Mawu tɔn ɔ́ ɖɔ mɔ̌ tlóló ɔ́, é sɔ́ xwe nukún ǎ. É cí too mɔ̌ káká bó wlí avǐ.

¹²Hazayɛ́li kanbyɔ́ ɛ ɖɔ: “Gǎn, étɛ́wú è ká ɖo avǐ ya wɛ?” Ée Hazayɛ́li kan mɔ̌ byɔ́ ɔ́, Elizée yí gbe n'i ɖɔ: “Un ko tunwun nǔ e a nǎ wa xá Izlayɛ́linu lɛ́ɛ ɔ́ wú wɛ un ɖo avǐ ya wɛ. A nǎ dó toxo yětɔn e è mɛ ahohó lɛ́ lɛ̌ dó lɛ́ɛ zo. A nǎ hu dɔ̌nkpɛvú yětɔn lɛ́ɛ, a nǎ nyínyɛ́ yɔkpɔ́vú yětɔn lɛ́ɛ, bó ná zɛ adɔgo nú xoxónɔ yětɔn lɛ́ɛ.”

¹³ Hazayɛ́li ɖɔ n'i ɖɔ: “Nyɛ mɛ e má ɖó acɛ ɖěbǔ ǎ ɔ́ sixú wa nǔ mɔ̌hunkɔtɔn a?” Bɔ Elizée yí gbe n'i ɖɔ: “Mawu Mavɔmavɔ ɖe xlɛ́ mì ɖɔ hwi ná nyí Silíi xɔ́sú.”

¹⁴Hazayɛ́li gosín Elizée gɔ́n, bó wá yi gǎn tɔn gɔ́n, bɔ gǎn tɔn kanbyɔ́ ɛ ɖɔ: “Étɛ́ wɛ Elizée ɖɔ nú we?” Bɔ é yí gbe n'i ɖɔ: “É ɖɔ nú mì ɖɔ azɔn towe ná gbɔ dandan.”

¹⁵Ayǐhɔ́ngbe tɔn ɔ́, Hazayɛ́li zé wǔcyɔ́n ɖé nylɔ́ dó sin mɛ, bó bú dó nukún mɛ nú axɔ́sú ɔ́, bó glɔ́n agbɔ̌n n'i bɔ é kú, bɔ Hazayɛ́li jɛ tɛn tɔn mɛ.

¹⁶Hwenu e Yolámu Akábu ví ɔ́ ɖo xwe atɔ́ɔ́n bló wɛ ɖo axɔ́súzinkpo Izlayɛ́li tɔn jí ɔ́, Jozafáti kpo ɖo Judáa xɔ́sú nyí wɛ, bɔ vǐ tɔn Yexolámu húzú Judáa xɔ́sú.

¹⁷Xwe gban-nukún-we (32) ɖó wɛ é ɖe bó yi zinkpo jí ɖo Jeluzalɛ́mu, bó ɖu axɔ́sú nú xwe tántɔn.

¹⁸É lɔmɔ̌ wa nǔ nyanya Izlayɛ́li xɔ́sú lɛ́ɛ ɖɔhun. É wa nǔ e má nyɔ́ Mawu Mavɔmavɔ nukún mɛ ǎ é, lě e Akábu sín hɛ̌nnu ɔ́ bló gbɔn é, ɖó é da Akábu sín vǐ ɖokpó.

¹⁹ Lo ɔ́, Mawu Mavɔmavɔ jló ná vívá kún Judáanu lɛ́ɛ tɔn ǎ. É jló ná vívá kún yětɔn ǎ, ɖó akpá e é dó nú mɛsɛntɔ́ tɔn Davídi ɖɔ kúnkan tɔn ná ɖu axɔ́sú káká sɔ́yi é wú.

²⁰ Hwenu e axɔ́sú Yexolámu ɖo zinkpo jí ɔ́, Edɔ́mu sín togun ɔ́ fɔ́n gǔ dó acɛkpikpa Judáa tɔn jí, bó sɔ́ axɔ́sú ɖokpó ɖó to ɔ́ nu.

²¹Ée Yexolámu se mɔ̌ ɔ́, é bɛ́ ahwankɛkɛ́ví tɔn lɛ́ɛ bǐ bó yi Sayíi. Edɔ́munu lɛ́ɛ ka xá yě ɖo fínɛ́, bɔ zǎn xóxó mɛ ɔ́, Yexolámu kpó ahwangán e kpa acɛ dó ahwankɛkɛ́ví tɔn lɛ́ɛ nu lɛ́ɛ kpó tɛ́nkpɔ́n bó ba ali bó gbɔn Edɔ́munu lɛ́ɛ tɛ́ntin, bɔ sɔ́ja Judáa tɔn lɛ́ɛ hɔn yi xwé.

²²Sín gbe énɛ́ ɔ́ gbe ɔ́, Edɔ́mu to ɔ́ gosín acɛkpikpa Judáa tɔn mɛ, bó kpo ɖo mɔ̌ káká jɛ égbé. Hwenɛ́nu ɖokpó ɔ́ wɛ Livuna toxo ɔ́ lɔ fɔ́n gǔ.

²³È wlǎn axɔ́sú Yexolámu sín tan e kpo ɔ́ dó “Judáa xɔ́sú lɛ́ɛ sín Tan wéma” mɛ.

²⁴Yexolámu zán wá kú, bɔ è sɔ́ ɛ ɖó tɔ́ tɔn lɛ́ɛ kpá ɖo Davídi Toxo mɛ. Énɛ́ ɔ́ gúdo ɔ́, vǐ tɔn Akaziasi ɖu axɔ́sú ɖó tɛn tɔn mɛ.

²⁵Hwenu e Yolámu Akábu ví ɔ́ ɖo xwe wěwe bló wɛ ɖo axɔ́súzinkpo Izlayɛ́li tɔn jí ɔ́, Akaziasi Yexolámu ví ɔ́ húzú Judáa xɔ́sú.

²⁶Xwe ko-nukún-we ɖó wɛ Akaziasi ɖe bó yi zinkpo jí ɖo Jeluzalɛ́mu. É ɖu axɔ́sú nú xwe ɖokpó. Nɔ tɔn nɔ nyí Atalíi, bó jɔ ɖo Izlayɛ́li xɔ́sú Ɔmúli kún mɛ.

²⁷É lɔmɔ̌ wa nǔ nyanya Akábu hɛ́nnu ɔ́ ɖɔhun. É wa nǔ e má nyɔ́ Mawu Mavɔmavɔ nukún mɛ ǎ é, ɖó Akábu kún mɛ wɛ é lɔmɔ̌ jɔ ɖe.

²⁸Akaziasi xwedó Yolámu Akábu ví ɔ́, bó yi fun ahwan xá Hazayɛ́li Silíi xɔ́sú ɔ́ ɖo Hlamɔti toxo mɛ, ɖo Galadi yíkúngban jí. Hwenu e yě ɖo ahwan ɔ́ fun wɛ ɔ́, Silíinu lɛ́ɛ gblé wǔ Yolámu.

²⁹Axɔ́sú Yolámu lɛ́ kɔ yi Izleyɛ́li, bó ná kpé nukún dó wǔ e è gblě e ɔ́ wú. Judáa xɔ́sú Akaziasi Yexolámu ví ɔ́ yi kpɔ́n Yolámu Akábu ví ɔ́ ɖo Izleyɛ́li, ɖó Yolámu ɖo wǔvɛ́ mɔ wɛ.