Read fon 2 Axɔ́sú 9 Bible Online

2 Axɔ́sú 9 - fon bible

2 Axɔ́sú 9

¹É wá su gbe ɖokpó, bɔ Elizée ylɔ́ gbeyíɖɔ Mawu tɔn lɛ́ɛ ɖokpó, bó ɖɔ n'i ɖɔ: “Sɔ́ nǔ, bó zé amigoví élɔ́, bó yá wǔ yi Hlamɔti toxo mɛ, ɖo Galadi yíkúngban jí.

²Nú a jɛ dɔ̌n hǔn, yi mɔ Jehu Jozafáti ví, Nimuci vívú ɔ́. A nǎ kplá ɛ sín hǎgbɛ́ tɔn lɛ́ɛ tɛ́ntin, bɔ mi ná yi jɛ vo ɖo xɔ ɖokpó mɛ.

³A nǎ zé ami e ɖo goví ɔ́ mɛ ɔ́ kɔn dó ta n'i, bó ná ɖɔ: ‘Mawu Mavɔmavɔ ɖɔ: Un sɔ́ we Izlayɛ́li xɔ́sú.’ Énɛ́ ɔ́ gúdo ɔ́, ma nɔ te ó, yǎ wǔ hun hɔn bo hɔn tɔ́n.”

⁴Ée Elizée ɖɔ mɔ̌ ɔ́, gbeyíɖɔ Mawu tɔn ɔ́ ɖidó Hlamɔti.

⁵Ée é jɛ dɔ̌n ɔ́, ahwangán lɛ́ɛ ɖo kplé jí, bɔ é ɖɔ: “Gǎn, un jló ná ɖɔ xó ɖé nú we.” Bɔ Jehu kanbyɔ́ ɛ ɖɔ: “Mɛ̌ ba wɛ a ɖe ɖo mǐ mɛ?” Bɔ é yí gbe n'i ɖɔ: “Gǎn, hwi wɛ.”

⁶ Ée é ɖɔ mɔ̌ ɔ́, Jehu sí te, bó kplá ɛ yi xwé gbe, bɔ gbeyíɖɔ Mawu tɔn ɔ́ kɔn ami dó ta n'i bó ɖɔ: “Mawu Mavɔmavɔ, Mawu Izlayɛ́li tɔn ɔ́ ɖɔ: ‘Un sɔ́ we Izlayɛ́li xɔ́sú ɖó togun ce nu.

⁷Hwi wɛ ná hu gǎn towe Akábu sín hɛ̌nnumɔ lɛ́ɛ bǐ. Énɛ́ ɔ́, un ná ba hlɔn nú mɛsɛntɔ́ ce gbeyíɖɔ lɛ́ɛ kpódó mɛsɛntɔ́ ce ɖě lɛ́ɛ kpó e Jezabɛ́li hu lɛ́ɛ.

⁸Akábu sín hɛ̌nnumɔ lɛ́ɛ bǐ wɛ ná kú. Un ná hu mɛ tɔn lɛ́ɛ bǐ, un ná hu yɔkpɔ́vú kpó mɛxó kpó.

⁹Nǔ e un ná wa xá Akábu sín hɛ̌nnumɔ lɛ́ɛ ɔ́ wɛ un ko wa xá Jelobowámu Nɛvati ví ɔ́ sín hɛ̌nnumɔ lɛ́ɛ kpó Baeca Axiya ví ɔ́ sín hɛ̌nnumɔ lɛ́ɛ kpó.

¹⁰ Jezabɛ́li ɔ́, mɛɖé ná mɔ cyɔ tɔn bó ɖi ǎ. Cukú lɛ́ɛ wɛ ná ɖu lan tɔn ɖo Izleyɛ́li sín gle mɛ.’ ” Ée gbeyíɖɔ ɔ́ ɖɔ xó énɛ́ lɛ́ɛ ɔ́, é hun hɔn bo hɔn yi.

¹¹Ée Jehu lɛ́ kɔ yi ahwangán ɖě lɛ́ɛ gɔ́n ɔ́, yě kanbyɔ́ ɛ ɖɔ: “Nɛ̌ ká gbɔn? Étɛ́ ba wɛ nǔ taɖunɔ nɛ́ ɔ́ ká ɖe bó wá gɔ̌n towe?” Jehu yí gbe nú yě ɖɔ: “Éeǒ! Nǔɖé jɛ ǎ. Mi tunwun gbeyíɖɔ Mawu tɔn énɛ́ lɛ́ɛ, bó tunwun lě e yě nɔ́ ɖɔ xó gbɔn é.”

¹²Lo ɔ́, yě lɛ́ ɖɔ: “Adingban wɛ! Đɔ xó e é ɖɔ ɔ́ nú mǐ.” Bɔ é ɖɔ: “Xó e é ɖɔ nú mì ɔ́ bǐ ɖíe: é ɖɔ nú mì ɖɔ Mawu Mavɔmavɔ kɔn ami dó ta nú mì bó sɔ́ mì Izlayɛ́li xɔ́sú.”

¹³Ée é ɖɔ mɔ̌ tlóló ɔ́, ahwangán ɖě lɛ́ɛ bǐ ɖe awu yětɔn lɛ́ɛ, bó tɛ́ dó kpekán jí aga, bo sɔ́ Jehu jínjɔ́n jí, bó jɛ lanzo kún jí, bó nɔ ɖɔ: “Susu nú axɔ́sú Jehu!”

¹⁴Ée Jehu Jozafáti ví Nimuci vívú ɔ́ húzú axɔ́sú ɔ́, é blá Yolámu gbé. Hwenɛ́nu ɔ́, Yolámu kpó Izlayɛ́li togun ɔ́ bǐ kpó ka ɖo xɛ nya ɖo Hlamɔti toxo ɔ́ jí wɛ ɖo Galadi, bónú Hazayɛ́li Silíi xɔ́sú ɔ́ ma yí ó.

¹⁵Lo ɔ́, axɔ́sú Yolámu ko lɛ́ kɔ yi Izleyɛ́li, bónú è nǎ kpé nukún dó wǔ e Silíinu lɛ́ɛ gblé e, hwenu e é ɖo ahwan fun xá Hazayɛ́li Silíi xɔ́sú ɔ́ wɛ ɔ́ wú. Énɛ́ ɔ́, Jehu ɖɔ nú ahwangán ɖě lɛ́ɛ ɖɔ: “Nú mi ɖo jǐ ce nǔgbó hǔn, mɛ ɖokpó ní tɔ́n sín toxo ɔ́ mɛ, bó yi Izleyɛ́li, bó yi ɖɔ nǔ e jɛ ɖo Hlamɔti fí é.”

¹⁶Ée Jehu ɖɔ mɔ̌ ɔ́, é byɔ́ kɛkɛ́ví tɔn mɛ, bó ɖidó Izleyɛ́li, ɖó Yolámu ɖo azɔnxɔmɛ ɖo dɔ̌n. Hwenɛ́nu ɔ́, Akaziasi Judáa xɔ́sú ɔ́ lɔ wá kpínkpɔ́n ɛ gbé.

¹⁷Sɔ́ja alicɔ́tɔ́ e è sɔ́ ɖó Izleyɛ́li sín ahohó ɔ́ jí ɔ́ mɔ Jehu sín ahwangɔnu ɔ́ jǎwe, bó ɖɔ sɛ́ dó axɔ́sú ɔ́ ɖɔ: “Un mɔ mɛɖé lɛ́ɛ dó ahwan gbě ja.” Bɔ Yolámu ɖɔ sɛ́ dó e ɖɔ: “Sɛ́ sɔ́xátɔ́ ɖokpó dó, ní kanbyɔ́ yě ɖɔ ɖagbe jɛ́n wɛ a jí.”

¹⁸Sɔ́xátɔ́ ɔ́ yi Jehu gɔ́n, bó ɖɔ: “Axɔ́sú ɔ́ kanbyɔ́ ɖɔ ɖagbe jɛ́n wɛ a jí.” Bɔ Jehu yí gbe n'i ɖɔ: “Étɛ́ ka kan we ɖ'é mɛ? Jɛ gǔdo ce.” Énɛ́ ɔ́, sɔ́ja alicɔ́tɔ́ ɔ́ ɖɔ nú axɔ́sú ɔ́ ɖɔ: “Mɛ e a sɛ́ dó ɔ́ yi káká gɔ̌n yětɔn, é ká sɔ́ lɛ́ kɔ wá ǎ.”

¹⁹Axɔ́sú Yolámu sɛ́ sɔ́xátɔ́ ɖěvo dó, bɔ é yi yě gɔ́n bó ɖɔ: “Axɔ́sú ɔ́ ɖɔ má kanbyɔ́ ɖɔ ɖagbe jɛ́n wɛ a jí.” Bɔ Jehu yí gbe n'i ɖɔ: “Étɛ́ ká kan we ɖ'é mɛ? Jɛ gǔdo ce.”

²⁰Sɔ́ja alicɔ́tɔ́ ɔ́ lɛ́ ɖɔ nú axɔ́sú ɔ́ ɖɔ: “Mɛ wegɔ́ e a sɛ́ dó ɔ́ yi káká gɔ̌n yětɔn, élɔ́ ka sɔ́ lɛ́ kɔ wá ǎ. Amɔ̌, lě e mɔ gbɔn wɛ un ɖe ɔ́, é cí ɖɔ Jehu Nimuci vívú ɔ́ wɛ ɖɔhun. Đó un tunwun lě e é nɔ kun kɛkɛ́ví gbɔn ɔ́, taɖunɔ ɖɔhun wɛ é nɔ kun.”

²¹Énɛ́ ɔ́, axɔ́sú Yolámu ná gbe bɔ è sɔ́ kɛkɛ́ví tɔn sin dó sɔ́ wú, bɔ é byɔ́ mɛ; Akaziasi Judáa xɔ́sú ɔ́ lɔ byɔ́ kɛkɛ́ví élɔ́ tɔn mɛ, bɔ yě ɖidó, bó yi kpé Jehu, ɖo Nabɔti e ɖo Izleyɛ́li ɔ́ sín gle kpá.

²²Ée Yolámu mɔ Jehu lě ɔ́, é kanbyɔ́ ɛ ɖɔ: “Jehu, ɖagbe jɛ́n wɛ a?” Bɔ Jehu yí gbe n'i ɖɔ: “Nɔ towe Jezabɛ́li ɔ́ kpo ɖo vodún sɛn wɛ, bó kpo ɖo azě gbo mɛ wɛ bɔ a nɔ kanbyɔ́ ɖɔ ɖagbe jɛ́n wɛ a jí a?”

²³Yolámu lɛ́ kɔ ɖo tɛndo tɔn mɛ bó hɔn, bó ɖɔ nú Akaziasi ɖɔ: “Akaziasi, adingban wɛ mɛ!”

²⁴Ée Yolámu hɔn bo ɖo yiyi wɛ ɔ́, Jehu sɔ́ gǎ tɔn, bó da ɛ dó abɔ̌ mɛ, bɔ é xo hǔn tɔn zlɛ́, bɔ é yɔ́ cí kɛkɛ́ví tɔn mɛ.

²⁵Jehu ɖɔ nú ahwangán tɔn Bidikáa ɖɔ: “Sɔ́ cyɔ tɔn nyi dó Nabɔti gle mɛ. Đó, nú a flín ɔ́, hwenu e nyɛ kpó hwi kpó ɖo sɔ́ jí ɖo tɔ́ tɔn Akábu gúdo ɔ́, Mawu Mavɔmavɔ ɖó hwɛ n'i ɖɔ:

²⁶ ‘A hu Nabɔti kpódó vǐ tɔn lɛ́ɛ kpó sɔ, un mɔ bǐ. Nyɛ Mawu Mavɔmavɔ ɔ́, un mɔ bǐ, un ná sú hun yětɔn sín axɔ́ we ɖo gle ɖokpó élɔ́ ɔ́ mɛ.’ Jehu lɛ́ ɖɔ: énɛ́ wú ɔ́, sɔ́ cyɔ tɔn nyi dó gle ɔ́ mɛ lě e Mawu Mavɔmavɔ kó ɖɔ gbɔn é.”

²⁷Ée Akaziasi Judáa xɔ́sú ɔ́ mɔ nǔ e jɛ nɛ́ ɔ́, é hɔn bó tunta Bɛti-Gani. Jehu ka jɛ gǔdo tɔn, bó ɖɔ: “Mi hu é lɔmɔ̌ dó kɛkɛ́ví tɔn mɛ.” Bɔ hwenu e é ɖo ali jí bó xwe Gǔu ɖo malín málín mɛ dó Yivleámu ɔ́, yě da gǎ dó e, bɔ é hɔn yi Mɛgido bó kú.

²⁸Mɛsɛntɔ́ tɔn lɛ́ɛ ɖíɖá cyɔ tɔn dó kɛkɛ́ví tɔn mɛ yi Jeluzalɛ́mu, bó yi ɖi i dó yɔdo e mɛ è ɖi tɔ́gbó tɔn lɛ́ɛ dó é mɛ, ɖo Davídi Toxo mɛ.

²⁹Yolámu Akábu ví ɔ́ ɖu axɔ́sú ɔ́, xwe tɔn wǒ-ɖokpógɔ́ ɔ́ mɛ wɛ Akaziasi ɖu axɔ́sú ɖo Judáa.

³⁰Jehu xwe Izleyɛ́li toxo ɔ́ mɛ. Ée Jezabɛ́li se mɔ̌ ɔ́, é sá nǔ dó wundama, bó bló ɖa tɔn ɖó, bó yi cí flɛtɛ́li nu ɖo síngbó jí, bó ɖo do kpɔ́n sɛ́ dó wɛ.

³¹Ée Jehu ɖo toxo ɔ́ mɛ byɔ́ wɛ ɔ́, é ɖɔ n'i ɖɔ: “Zimuli jɔmɔ, nɛ̌ a ɖe gbɔn, axɔ́súhutɔ́?”

³²Jehu kpɔ́n flɛtɛ́li ɔ́ nu sɛ́ dó, bó ɖɔ: “Mɛ̌ wɛ ɖo jǐ ce? Mɛ̌ wɛ?” Ée é ɖɔ mɔ̌ ɔ́, azaglɔ́gán nǎ yi we kpó atɔn kpó mɔ̌ sɛkpɔ́ flɛtɛ́li ɔ́, bó kpɔ́n ɛ sɛ́ dó ɖo do.

³³Jehu ɖɔ nú yě ɖɔ: “Mi sɔ́ ɛ nyi gbɔn flɛtɛ́li ɔ́ nu sɛ́ dó mì ɖo do dě.” Ée é ɖɔ mɔ̌ ɔ́, yě sɔ́ ɛ nyi gbɔn flɛtɛ́li ɔ́ nu, bɔ é wá jɛ ayǐ, bɔ hun tɔn zlɔ́n kɔn nyi dǒ ɔ́ kpó sɔ́ lɛ́ɛ kpó wú, bɔ Jehu kun kɛkɛ́ví tɔn gbɔn jǐ tɔn dín.

³⁴Énɛ́ ɔ́ gúdo ɔ́, Jehu byɔ́ hɔn ɔ́ mɛ, bó ɖu nǔ, bó nu ahan bo ɖɔ: “Mi yi sɔ́ nyɔ̌nu énɛ́ e Mawu ko dó nu é, bó yi ɖi, ɖó axɔ́sú ví wɛ.”

³⁵Yě tɔ́n, bó ná yi sɔ́ cyɔ ɔ́ yi, lo ɔ́, yě sɔ́ mɔ nǔɖé zɛ takágo tɔn kpó afɔ tɔn lɛ́ɛ kpó, kpódó alɔ tɔn lɛ́ɛ kpó wú ǎ.

³⁶ Yě lɛ́ kɔ bo ɖɔ nǔ e jɛ ɔ́ nú Jehu, bɔ é ɖɔ: “Éénɛ́! Xó e Mawu Mavɔmavɔ ɖɔ gbɔn gbeyíɖɔ tɔn Elíi Ticibéenu ɔ́ jí ɔ́ nɛ́. É ɖɔ: ‘Cukú lɛ́ɛ wɛ ná ɖu Jezabɛ́li sín lan ɖo gle mɛ ɖo Izleyɛ́li,

³⁷bɔ nǔ e ná kpo ɖo wǔ tɔn lɛ́ɛ ná nyí zunkɔ́ ɖo gle mɛ, ɖo Izleyɛ́li, bɔ énɛ́ ɔ́, mɛɖé sɔ́ ná sixú ɖɔ Jezabɛ́li ɖíe ǎ.’ ”