Read fon 1 Tan 10 Bible Online

1 Tan 10 - fon bible

1 Tan 10

¹Filisitɛ́ɛn lɛ́ɛ wá tɔ́n ahwan Izlayɛ́linu lɛ́ɛ, bó gblé wǔ yě, bɔ yě yi kú jɛ Gilubowa só ɔ́ ta.

²Filisitɛ́ɛn lɛ́ɛ ká zun dó Sawúlu kpó vǐ tɔn lɛ́ɛ kpó jí. Yě hu vǐ tɔn Jonatáan, Avinadávu kpódó Maluki-Cua kpó.

³Sawúlu gbé nya wɛ yě ɖe tawun. Mɛ e nɔ da gǎ lɛ́ɛ wá mɔ ɛ, bɔ xɛsi ɖaxó ɖé jɛ jǐ tɔn.

⁴Énɛ́ ɔ́, Sawúlu ɖɔ nú mɛ e nɔ hɛn ahwanfunnú tɔn lɛ́ɛ n'i ɔ́ ɖɔ: “Sún hwǐ towe bó hu mì, bónú mɛ e ma nɔ sɛn Mawu ǎ nɛ́ lɛ́ɛ ma wá hu mì kpó hwǐ kpó, bó wá cá mì ko ó.” Mɛ e nɔ hɛn ahwanfunnú tɔn lɛ́ɛ n'i ɔ́ ká ɖi xɛsi bo gbɛ́. Énɛ́ ɔ́, Sawúlu zé hwǐ tɔn tun te, bó zé éɖée slɔ́ nu.

⁵Ée mɛ e nɔ hɛn ahwanfunnú tɔn lɛ́ɛ n'i ɔ́ mɔ mɔ̌ ɔ́, élɔ́ sɔ́ hwǐ tɔn tun te, bó zé éɖée slɔ́ nu bó kú.

⁶Lě e Sawúlu kpó vǐ tɔn atɔn lɛ́ɛ kpó kú gbɔn ɔ́ nɛ́; lě e axɔ́súɖuɖu sú dó gbɔn ɖo axɔ́sú Sawúlu kan jí ɔ́ nɛ́.

⁷Ée Izlayɛ́li ví e ɖo tɔdo ɔ́ mɛ lɛ́ɛ mɔ ɖɔ yě hɔn, bɔ Sawúlu kpó vǐ tɔn lɛ́ɛ kpó kú ɔ́, yě hɔn jó toxo yětɔn lɛ́ɛ dó, bɔ Filisitɛ́ɛn lɛ́ɛ wá cí toxo yětɔn lɛ́ɛ mɛ.

⁸Ayǐhɔ́ngbe tɔn ɔ́, Filisitɛ́ɛn lɛ́ɛ tɔ́n gǒ mɛ kíjé nú cyɔ lɛ́ɛ gbé, bó wá mɔ ɖɔ Sawúlu kpó vǐ tɔn lɛ́ɛ kpó sín cyɔ ɖo Gilubowa só ɔ́ jí.

⁹Ée yě mɔ mɔ̌ ɔ́, yě fɔ nǔ e ɖo Sawúlu cyɔ wú lɛ́ɛ, bó zé ta tɔn kpó ahwanfunnú tɔn lɛ́ɛ kpó, bó sɛ́ mɛ dó ɖɔ yě nǐ yi jlá wɛnɖagbe énɛ́ gbɔn Filisitɛ́ɛn to ɔ́ bǐ mɛ, bónú vodún yětɔn lɛ́ɛ kpó togun ɔ́ bǐ kpó ní se.

¹⁰Yě bɛ̌ Sawúlu sín ahwanfunnú lɛ́ɛ yi ɖó vodún yětɔn xwé lobo sɔ́ taká tɔn kplá nǔ kɔ ɖo vodún Dagɔ́ni xɔ mɛ.

¹¹Mɛ e ɖo Yavɛ́ci, ɖo Galadi yíkúngban jí lɛ́ɛ bǐ se nǔ e Filisitɛ́ɛn lɛ́ɛ dó sin xá Sawúlu é bǐ.

¹²Ée yě se mɔ̌ ɔ́, súnnu glegbenu lɛ́ɛ bǐ sí te bo yi fɔ Sawúlu kpó vǐ tɔn lɛ́ɛ kpó sín cyɔ wá Yavɛ́ci. Yě ɖi xú yětɔn lɛ́ɛ ɖó telebɛ́ntitín ɖé sá, ɖo Yavɛ́ci, lobo blá nu xɔ azǎn tɛ́nwe.

¹³ Sawúlu kú, ɖó é nɔ gbejí nú Mawu Mavɔmavɔ ǎ. É xwedó Mawu Mavɔmavɔ xó ǎ; é yi kan nǔ ɖo mɛ e nɔ kan bo lɛ́ɛ gɔ́n.

¹⁴É kan nǔ byɔ́ Mawu Mavɔmavɔ ǎ. Énɛ́ ɔ́, Mawu Mavɔmavɔ hu i, bó zé axɔ́súɖuto ɔ́ jó nú Davídi, Jɛsée ví ɔ́.