Read fon 1 Tan 14 Bible Online

1 Tan 14 - fon bible

1 Tan 14

¹Ilámu Tíi xɔ́sú ɔ́ sɛ́ mɛ dó Davídi gɔ́n, bó sɛ́ sɛ́dlutín dó e, bó sɛ́ awǐnnyakpatɔ́ kpódó xɔgbátɔ́ kpó dó e, bónú yě ná gbá hɔnmɛ ɖokpó n'i.

²Énɛ́ ɔ́, Davídi mɔ ɖɔ Mawu Mavɔmavɔ ɖésú wɛ sɔ́ émí Izlayɛ́li xɔ́sú, bó nɔ́ ɖo axɔ́súɖuto émítɔn sɔ́ su wɛ ɖó togun tɔn Izlayɛ́li wú.

³Davídi lɛ́ da asi ɖěvo lɛ́ɛ ɖo Jeluzalɛ́mu, bó ji vǐ súnnu kpó nyɔ̌nu kpó ɖo xo yětɔn mɛ.

⁴Vǐ e é ji ɖo Jeluzalɛ́mu lɛ́ɛ sín nyǐkɔ ɖíe: Camumúa, Covavu, Natáni, Salomɔ́ɔ,

⁵Yiváa, Elicuwa, Ɛlupalɛ́ti,

⁶Nɔgáxi, Nɛfɛ́gi, Yafia,

⁷Elicama, Beɛlyada kpódó Elifɛlɛ́ti kpó.

⁸Filisitɛ́ɛn lɛ́ɛ se ɖɔ è kɔn ami ɖó ta nú Davídi bó sɔ́ ɛ axɔ́sú ɖó togun Izlayɛ́li tɔn ɔ́ bǐ nu. Ée yě se mɔ̌ ɔ́, yě bǐ jɛ gbě tɔn nya jí, bó ná wlí i. Davídi ka se bó sɔ́ ahwan nú, bó ná yi kpé yě.

⁹Filisitɛ́ɛn lɛ́ɛ wá, bó gba kpé Hlafa ví lɛ́ɛ sín tɔdo mɛ.

¹⁰Davídi kanbyɔ́ Mawu ɖɔ: “Ma yi tɔ́n ahwan Filisitɛ́ɛn lɛ́ɛ a? A nǎ jó yě nú mì a?” Bɔ Mawu Mavɔmavɔ yí gbe n'i ɖɔ: “Yi tɔ́n ahwan yě, un ná jó yě nú we.”

¹¹Filisitɛ́ɛn lɛ́ɛ wá Baalu-Pelasímu, tínmɛ tɔn wɛ nyí “Aliɖedókɛntɔ́mɛtɔ́ Gán.” Fínɛ́ wɛ Davídi gba yě ɖe. Énɛ́ ɔ́ gúdo ɔ́, é ɖɔ: “Mawu zé mì dó gba kɛntɔ́ ce lɛ́ɛ dó, bɔ yě gba wu sin ɖɔhun.” Énɛ́ ɔ́ wú wɛ è sun nyǐ tɛn énɛ́ ɔ́ mɛ ɖɔ Baalu-Pelasímu.

¹²Filisitɛ́ɛn lɛ́ɛ jǒ vodún yětɔn lɛ́ɛ dó nyi fínɛ́, bɔ Davídi ná gbe ɖɔ è nǐ dó yě zo.

¹³Filisitɛ́ɛn lɛ́ɛ lɛ́ gba kpé tɔdo Hlafa ví lɛ́ɛ tɔn ɔ́ mɛ.

¹⁴Davídi lɛ́ kan nǔ byɔ́ Mawu, bɔ Mawu ɖɔ n'i ɖɔ: “Ma tɔ́n ahwan yě gbɔn gǔdo ó. Lɛ̌ kɔ sín gǔdo yětɔn, bó sɛ yi zɔ nú yě ganjí, lobo gbɔn mukokulitínkan mɛ wá tɔ́n dó yě jí.

¹⁵Hwenu e a nǎ se afɔgbe ɖo atín lɛ́ɛ sín ɖavínu ɔ́, a nǎ tɔ́n ahwan yě, ɖó nyɛ Mawu wɛ ɖo nukɔn towe, bó ná gba Filisitɛ́ɛn lɛ́ɛ sín ahwangɔnu ɔ́.”

¹⁶Davídi bló nǔ e Mawu ɖɔ n'i é. Énɛ́ ɔ́, Izlayɛ́li ví lɛ́ɛ ɖu ɖo Filisitɛ́ɛn lɛ́ɛ jí, bó nya yě sín Gabawɔ́ɔn káká yi Gɛzɛ́ɛ.

¹⁷Davídi sín nyǐkɔ gba kpé to lɛ́ɛ bǐ mɛ; Mawu Mavɔmavɔ bló bɔ akɔta lɛ́ɛ bǐ nɔ ɖi xɛsi n'i.