Read fon 1 Tan 15 Bible Online

1 Tan 15 - fon bible

1 Tan 15

¹Davídi gbá xɔ ɖó Jeluzalɛ́mu. É bló tɛnmɛ ɖokpó ɖ'ayǐ nú akɔjijɛgbá Mawu tɔn ɔ́, bó gbá goxɔ e sá akɔjijɛgbá ɔ́ ná nɔ é.

² Énɛ́ ɔ́ gúdo ɔ́, é ɖɔ: “Levíi ví lɛ́ɛ kɛ́ɖɛ́ wɛ ɖó acɛ bo ná zé akɔjijɛgbá Mawu tɔn ɔ́, ɖó Mawu Mavɔmavɔ wɛ ɖe yě bɔ yě ná nɔ́ zé, bɔ é nyí azɔ̌ yětɔn káká sɔ́yi.”

³Ée Davídi ɖɔ mɔ̌ ɔ́, é ylɔ́ togun Izlayɛ́li tɔn ɔ́ bǐ kplé ɖo Jeluzalɛ́mu, bónú è nǎ zé akɔjijɛgbá Mawu Mavɔmavɔ tɔn ɔ́ yi ɖó tɛn e é bló ɖ'ayǐ n'i é mɛ.

⁴Davídi kplé vɔ̌sánú-xwlémawutɔ́ Aalɔ́ɔn ví lɛ́ɛ kpó Levíi ví ɖě lɛ́ɛ kpó.

⁵Đo Kexáti hɛ̌nnu mɛ ɔ́, Wuliyɛ́li kpó nɔví tɔn lɛ́ɛ kpó. Yě bǐ bló gbɛtɔ́ kantɔn (120); Wuliyɛ́li wɛ ɖo yě nu.

⁶Đo Mɛlali hɛ̌nnu mɛ ɔ́, Asaya kpó nɔví tɔn lɛ́ɛ kpó. Yě bǐ bló gbɛtɔ́ afɔɖé ko (220). Asaya wɛ ɖo yě nu.

⁷Đo Gɛɛcɔ́ni hɛ̌nnu mɛ ɔ́, Yoɛ́li kpó nɔví tɔn lɛ́ɛ kpó. Yě bǐ bló gbɛtɔ́ kantɔn wǒ (130); Yoɛ́li wɛ ɖo yě nu.

⁸Đo Elisafáni hɛ̌nnu mɛ ɔ́, Cemaya kpó nɔví tɔn lɛ́ɛ kpó. Yě bǐ bló gbɛtɔ́ afɔɖé (200); Cemaya wɛ ɖo yě nu.

⁹Đo Eblɔ́n hɛ̌nnu mɛ ɔ́, Eliyɛ́li kpó nɔví tɔn lɛ́ɛ kpó. Yě bǐ bló gbɛtɔ́ kanwe (80); Eliyɛ́li wɛ ɖo yě nu.

¹⁰Đo Wuziyɛ́li hɛ̌nnu mɛ ɔ́, Aminadabu kpó nɔví tɔn lɛ́ɛ kpó. Yě bǐ bló gbɛtɔ́ kanwe gban-nukún-we (112); Aminadabu wɛ ɖo yě nu.

¹¹Davídi ylɔ́ vɔ̌sánú-xwlémawutɔ́ Sadɔ́ku kpó Abiyatáa kpó, bó ylɔ́ Levíi ví Wuliyɛ́li, Asaya, Yoɛ́li, Cemaya, Eliyɛ́li, kpó Aminadabu kpó,

¹²bó ɖɔ nú yě ɖɔ: “Hɛ̌nnugán Levíi ví lɛ́ɛ tɔn wɛ mi nyí. Mi slá wǔ, mi kpó nɔví mitɔn lɛ́ɛ kpó, bó yi zé akɔjijɛgbá Mawu Mavɔmavɔ, Mawu Izlayɛ́li tɔn ɔ́ tɔn wá ɖó tɛn e un bló ɖ'ayǐ n'i é mɛ.

¹³Azɔn nukɔntɔn e mǐ zě ɔ́, mi ɖo tɛn tɔn mɛ ǎ; énɛ́ ɔ́ wú wɛ Mawu Mavɔmavɔ, Mawu mǐtɔn dɔn tó nú mǐ, ɖó mǐ zé lě e sɛ́n ɔ́ zɔ́n gbɔn ɔ́ ǎ.”

¹⁴Ée Davídi ɖɔ mɔ̌ ɔ́, vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó slá wǔ, bó ná yi zé Mawu Mavɔmavɔ, Mawu Izlayɛ́li tɔn ɔ́ sín akɔjijɛgbá ɔ́.

¹⁵ Levíi ví lɛ́ɛ dó kpɔn akɔjijɛgbá ɔ́, lobo sɔ́ ɖó abɔ̌ta, lě e Mawu Mavɔmavɔ ɖɔ gbɔn nú Mɔyízi bɔ é ɖɔ é.

¹⁶Bɔ Davídi ɖɔ nú Levíi ví lɛ́ɛ sín gǎn lɛ́ɛ ɖɔ yě ní to nɔví yětɔn hanjitɔ́ lɛ́ɛ, bónú yě ná zé kanhún, agǐdigbo kpó gan kpó, bó ná xo dó ɖe awǎjijɛ yětɔn xlɛ́.

¹⁷Ée Davídi ɖɔ mɔ̌ ɔ́, Levíi ví lɛ́ɛ sɔ́ Hemani Yoɛ́li ví ɔ́, bó sɔ́ Asáfu Bɛlɛkiyahu ví ɔ́ ɖo nɔví tɔn lɛ́ɛ mɛ gɔ́ ná, bó sɔ́ nɔví yětɔn Etáni Kucayahu ví ɔ́ ɖo Mɛlali ví lɛ́ɛ mɛ gɔ́ ná.

¹⁸Levíi ví ɖěvo lɛ́ɛ ɖo fínɛ́, bó bɔ dó yě wú. Yědɛɛ lɛ́ɛ ɔ́, hɔnjínɔtɔ́ wɛ nú yě. Yě wɛ nyí Zekaliyahu, Bɛni, Yaaziɛ́li, Cemilamɔti, Yexiyɛ́li, Wunni, Eliavu, Benayahu, Maaseyahu, Matitiahu, Eliflexu, Mikinɛyahu, Ovɛ́di-Edɔ́mu kpó Yeyiɛ́li kpó.

¹⁹Hanjitɔ́ Hemani, Asáfu kpódó Etáni kpó ɖo gan xo wɛ, bɔ é ɖo gbe ɖi wɛ ɖésú. Gan e xo wɛ yě ɖe lɛ́ɛ ɔ́, ganvɔ wɛ è dǒ bló yě ná.

²⁰Zekaliya, Aziyɛ́li, Cemilamɔti, Yexiyɛ́li, Wunni, Eliavu, Maaseyahu kpódó Benayahu kpó ɖo agǐdigbo e nɔ dó gbe wínníwínní lɛ́ɛ xo wɛ.

²¹Bɔ Matitiahu, Eliflexu, Mikinɛyahu, Ovɛ́di-Edɔ́mu, Yeyiɛ́li kpó Azaziyahu kpó ká ɖo kanhún kantántɔnnɔ e nɔ dó gbe kloklo lɛ́ɛ xo wɛ dó han ɔ́ mɛ.

²²Kenaniya wɛ kpa acɛ dó Levíi ví e hɛn akɔjijɛgbá ɔ́ lɛ́ɛ nu. É wɛ ɖo ali xlɛ́ yě wɛ, ɖó é bí ɖésú.

²³Hɔnjínɔtɔ́ Bɛlɛkya kpó Ɛlukana kpó ɖo akɔjijɛgbá ɔ́ kpá.

²⁴Vɔ̌sánú-xwlémawutɔ́ Cevaniya, Yocafáti, Nɛtanɛli, Amasayi, Zekaliyahu, Benayahu kpódó Eliezɛ́ɛ kpó ká ɖo kpɛn kún wɛ ɖo akɔjijɛgbá Mawu tɔn ɔ́ nukɔn. Hɔnjínɔtɔ́ Ovɛ́di-Edɔ́mu kpó Yexiya kpó ɖo akɔjijɛgbá ɔ́ kpá.

²⁵Davídi kpó tomɛxó Izlayɛ́li tɔn lɛ́ɛ kpó, kpódó sɔ́ja afatɔ́ngán lɛ́ɛ kpó zé akɔjijɛgbá Mawu Mavɔmavɔ tɔn ɔ́ sín Ovɛ́di-Edɔ́mu xwé, bó jɛ ali kpó awǎjijɛ kpó.

²⁶Mawu wɛ gɔ́ alɔ nú Levíi ví e hɛn akɔjijɛgbá ɔ́ lɛ́ɛ. Énɛ́ ɔ́, è hu nyibúsú tɛ́nwe, agbo tɛ́nwe dó sá vɔ̌ ná.

²⁷Davídi dó awu ɖaxó ɖé; kanvɔ fɛ́ɖɛ́fɛ́ɖɛ́ ɖé wɛ è dǒ tɔ. Levíi ví e hɛn akɔjijɛgbá ɔ́ lɛ́ɛ bǐ kpó nǔxotɔ́ lɛ́ɛ kpó, kpódó Kenaniya e ɖo yě nu ɔ́ kpó lɔmɔ̌ dǒ nǔ ɖokpó ɔ́. Davídi lɛ́ dó lɛ̌ɛnkanvɔ e mɛ vɔ̌sánú-xwlémawutɔ́ lɛ́ɛ nɔ nɔ ɔ́ dó éyɛ́ tɔn jí.

²⁸Izlayɛ́li to ɔ́ bǐ zě akɔjijɛgbá Mawu Mavɔmavɔ tɔn ɔ́ wá Jeluzalɛ́mu bó ɖo awǒbóbó kpa wɛ, bɔ lanzo ɖo gbe jɛ wɛ, kpɛn kpó gan kpó ɖo gbe jɛ wɛ, bɔ kanhún kpó agǐdigbo kpó ɖo nǔ ɖɔ wɛ.

²⁹Hwenu e akɔjijɛgbá Mawu Mavɔmavɔ tɔn ɖo Davídi Toxo mɛ byɔ́ wɛ ɔ́, Sawúlu sín vǐ nyɔ̌nu Mikali Davídi si ɔ́ kpɔ́n sɛ́ dó gbɔn flɛtɛ́li nu, bó mɔ bɔ axɔ́sú Davídi ɖo jǐ lɔ́n yi wɛ, bó ɖo awǎ jɛ wɛ, bɔ axɔ́sú Davídi sín nǔ vɛ́ wǔ tɔn ɖésú.