Read fon 1 Tan 17 Bible Online

1 Tan 17 - fon bible

1 Tan 17

¹Axɔ́sú Davídi jɛ hɔn tɔn mɛ. É wá su gbe ɖokpó, bɔ é ɖɔ nú gbeyíɖɔ Mawu tɔn Natáan ɖɔ: “Kpɔ́n! Xɔ e mɛ nyɛ ɖe ɔ́, sɛ́dlutín wɛ è dǒ gbá, bɔ akɔjijɛgbá Mawu Mavɔmavɔ tɔn ɔ́ ká ɖo avɔgoxɔ mɛ. Étɛ́ a lin d'é wú?”

²Bɔ Natáan yí gbe nú axɔ́sú ɔ́ ɖɔ: “Yi bo bló nǔ e lin wɛ a ɖe ɔ́, ɖó Mawu ɖo kpɔ́ xá we.”

³Lo ɔ́, gbe énɛ́ gbe zǎn mɛ ɔ́, Mawu ɖɔ xó nú Natáan. É ɖɔ n'i ɖɔ:

⁴“Yi ɖɔ nú mɛsɛntɔ́ ce Davídi ɖɔ é kún nyí é wɛ ná gbá xɔ e mɛ un ná nɔ ɔ́ ó.

⁵Sín gbe e gbe un kplá Izlayɛ́li ví lɛ́ɛ sín Ejípu ɔ́ káká wá jɛ égbé ɔ́, un nɔ xɔ ɖě mɛ kpɔ́n ǎ; goxɔ jɛ́n nyí xwé ce, bɔ un nɔ ɖe mɛ, bó nɔ́ ɖo yiyi wɛ xá yě.

⁶Fí e gbɔn wɛ nyi kpó Izlayɛ́li ví lɛ́ɛ bǐ kpó ɖe ɔ́, un zɔ́n nǔɖé Izlayɛ́li gán e un ɖɔ ná ɖɔ yě ní kpé nukún dó Izlayɛ́li to ɔ́ wú lɛ́ɛ kpɔ́n gbeɖé a? Un ka kanbyɔ́ yě ɖě ɖɔ étɛ́wú yě má gbá sɛ́dluxɔ nú mì a jí kpɔ́n a?

⁷Din ɔ́, a nǎ ɖɔ nú mɛsɛntɔ́ ce Davídi ɖɔ xó e nyɛ Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: ‘Sín hwenu e a ɖo lɛ̌ngbɔ́nyitɔ́ nyí wɛ ɔ́ wɛ un ylɔ́ we, bó sɔ́ we gǎn ɖó togun ce Izlayɛ́li nu.

⁸Un nɔ kpɔ́ xá we ɖo fí e a gbɔn lɛ́ɛ bǐ. Un vívá kɛntɔ́ towe lɛ́ɛ bǐ sín kún ɖo nukún towe mɛ. Un zé nyǐkɔ towe su gǎn e ɖo ayǐkúngban ɔ́ jí lɛ́ɛ ɖɔhun.

⁹Un ná ná tɛnmɛ ɖé togun ce Izlayɛ́li, bó ná sɔ́ ɛ ɖó fínɛ́, bɔ ayi tɔn ná jɛ ayǐ. Adǎnúwatɔ́ lɛ́ɛ ɖě sɔ́ ná dó ya n'i lě e yě nɔ́ bló gbɔn n'i ɖ'ayǐ é ǎ.

¹⁰É sɔ́ ná cí hwenu e un zé hwɛɖɔtɔ́ lɛ́ɛ bɔ yě nɔ́ kpɔ́n jǐ tɔn ɔ́ ɖɔhun ǎ. Davídi, un ná bló bɔ kɛntɔ́ towe lɛ́ɛ bǐ ná jɛ ayǐ. Nyɛ Mawu Mavɔmavɔ ɖo ɖiɖɔ nú we wɛ ɖɔ nyɛ wɛ ná sɔ́ xwé towe jínjɔ́n ayǐ.

¹¹Hwenu e kú ná wá kplá we, bɔ a nǎ yi mlɔ́ tɔ́gbó towe lɛ́ɛ kpá ɔ́, un ná sɔ́ vǐ e hwi ɖésúnɔ ji lɛ́ɛ ɖokpó axɔ́sú ɖó tɛn towe mɛ, bó ná bló bɔ acɛkpikpa tɔn ná syɛ́n ɖésú.

¹²É wɛ ná gbá xɔ nú mì, bɔ un ná sɔ́ axɔ́súɖuɖu tɔn jínjɔ́n ayǐ káká sɔ́yi.

¹³ Un ná nyí tɔ́ n'i, bɔ é ná nyí vǐ nú mì. Un ná gɔn hun jɛ dó jǐ tɔn ǎ; é ná cí lě e un bló gbɔn xá mɛ e jɛ nukɔn nú we ɔ́ ɖɔhun ǎ.

¹⁴Un ná sɔ́ ɛ axɔ́sú ɖó xwé ce nu káká sɔ́yi; é ná nɔ axɔ́súɖuto ce nu káká sɔ́yi. Nǔɖé ná yí axɔ́súɖuɖu ɔ́ sín hwɛndo tɔn mɛ ǎ.’ ”

¹⁵Natáan wlí nǔ e Mawu ɖe xlɛ́ ɔ́ bǐ ɖɔ nú Davídi.

¹⁶Ée axɔ́sú Davídi se mɔ̌ ɔ́, é yi Mawu Mavɔmavɔ nukɔn, bó ɖɔ: “Mawu Mavɔmavɔ, Mawu ce, étɛ́ un ka nyí, nɛ̌ a ka mɔ xwédo ce gbɔn, bó zé mì wá ɖó tɛn e mɛ un ɖe din é?

¹⁷Mawu ce, nǔ énɛ́ ɔ́ nyí nǔɖé ɖo nukún towe mɛ ǎ. Din ɔ́ ɖíe a dǒ akpá ɖ'ayǐ nú xwédo ce, bɔ é ná nɔ ayǐ káká sɔ́yi e. Mawu Mavɔmavɔ, Mawu ce, a mɔ mì dó mɔ gbɛtɔ́ nukúnɖéjí ɖé ná.

¹⁸Étɛ́ nyɛ Davídi ka sixú lɛ́ ɖɔ nú we dó susu e a nǎ nyɛ mɛsɛntɔ́ towe ɔ́ wú? A tunwun nyɛ mɛsɛntɔ́ towe ganjí.

¹⁹Mawu Mavɔmavɔ, wǎn e a yǐ nú mì ɔ́ wú wɛ a blǒ nǔ ɖaxó ɖaxó énɛ́ lɛ́ɛ, bó ná ɖe susu ɖaxó e a ɖǒ ɔ́ xlɛ́.

²⁰Mawu Mavɔmavɔ, è sixú jlɛ́ we dó nǔmɛsɛn ɖěbǔ wú ǎ. Xó e è ɖɔ bɔ mǐ se lɛ́ɛ bǐ ɖe xlɛ́ ɖɔ Mawu ɖěvo kún tíin zɛ hwɛ wú ó.

²¹Mɔ̌ ɖokpó ɔ́, togun ɖěbǔ ɖo ayǐkúngban jí, bó cí togun towe Izlayɛ́li ɖɔhun ǎ. É ɖokpónɔ wɛ a wǎ hwlɛ́n gán sín tagba e dó n'i wɛ Ejípunu lɛ́ɛ ɖe ɔ́ sí, bó sɔ́ ɛ dó bló togun towe. A blǒ nǔjíwǔ lɛ́ɛ, nǔdábaɖa lɛ́ɛ, bó dó nya akɔta lɛ́ɛ sín togun towe nukɔn, bó dó sɔ́ nyǐkɔ towe su.

²²A blǒ bɔ togun towe Izlayɛ́li ná nyí togun towe káká sɔ́yi, bɔ hwɛ Mawu Mavɔmavɔ ɔ́, a hǔzú Mawu tɔn.

²³Óo! Mawu Mavɔmavɔ, din ɔ́, blǒ bónú xó e a ɖɔ dó nyɛ mɛsɛntɔ́ towe wú, bó ɖɔ dó xwédo tɔn wú ɔ́, ní nɔ te káká sɔ́yi. Blǒ lě e a ɖɔ gbɔn é.

²⁴Nǔ e a ɖɔ ɔ́ ní jɛ, bónú è nǎ nɔ kpa susu nú nyǐkɔ towe tɛgbɛ ɖɔ: ‘Mawu Mavɔmavɔ Nǔbǐwúkpétɔ́ ɔ́, Mawu Izlayɛ́li tɔn wɛ.’ Nyɛ mɛsɛntɔ́ towe Davídi sín xwédo ɔ́ ní lí dǒ ɖo nukɔn towe.

²⁵Đó hwi ɖésú Mawu ce ɔ́, a ɖe hwiɖée xlɛ́ nyɛ mɛsɛntɔ́ towe bó ɖɔ: un ná zé xwédo towe jínjɔ́n ayǐ. Xó énɛ́ ɔ́ wɛ ná akɔ́nkpinkpan nyɛ mɛsɛntɔ́ towe, bɔ un ɖo ɖɛ élɔ́ xo wɛ.

²⁶Din ɔ́, Mawu Mavɔmavɔ, Mawu wɛ a nyǐ, bó ɖɔ nyɔ̌ná énɛ́ ɔ́ xó nú nyɛ mɛsɛntɔ́ towe.

²⁷Mawu Mavɔmavɔ, é jló we bɔ a xo ɖɛ dó nyɛ mɛsɛntɔ́ towe sín xwédo ɔ́ jí din, bónú é ná sixú nɔ te nukɔn towe káká sɔ́yi. Đó Mawu Mavɔmavɔ, nǔ e jí a xo ɖɛ dó ɔ́ nɔ́ nɔ mɔ̌ káká sɔ́yi.”