Read fon 1 Tan 18 Bible Online

1 Tan 18 - fon bible

1 Tan 18

¹Énɛ́ ɔ́ gúdo ɔ́, Davídi ɖu ɖo Filisitɛ́ɛn lɛ́ɛ jí, bó dó winnyá yě, bó yí Gati toxo ɔ́ kpódó gletoxo e lɛ́ dó e lɛ́ɛ kpó sín yě sí.

²É lɛ́ ɖu ɖo Mɔwabunu lɛ́ɛ jí, bɔ yě húzú kannumɔ tɔn, bó nɔ hɛn nǔjɔ wá n'i.

³Hwenu e Hadadɛzɛ́ɛ, Silíi to e ɖo Sova, ɖo Hamáti wa jí ɔ́, sín axɔ́sú jló ná gbló ada nú acɛkpikpa tɔn káká wá Efláti tɔ ɔ́ kɔn ɔ́, Davídi hu i.

⁴Davídi wlí kɛkɛ́ví afatɔ́n (1.000), bó wlí sɔ́xátɔ́ děgba ɖě afɔwó-afatɔ́n (7.000), bó wlí sɔ́ja adɔ̌kpo (20.000). Amɔ̌, é jó sɔ́ e ná dɔn ahwankɛkɛ́ví kanwe ko (100) mɔ̌ lɛ́ɛ dó, bó ká sɛ́n dɔn nú sɔ́ e kpo lɛ́ɛ bǐ.

⁵Silíinu e ɖo Damási lɛ́ɛ wá, bó ná dó alɔ Sova xɔ́sú Hadadɛzɛ́ɛ; Davídi ɖu ɖo yě lɔ jí, bó hu Silíinu adɔ̌kpo ɖě afɔwó (22.000) ɖo yě mɛ.

⁶Davídi fɔ tokpɔngán ɖó yě nu gǎnnugǎnnu, bɔ Silíinu lɛ́ɛ húzú kannumɔ tɔn, bó nɔ́ ná nǔjɔ. Mawu Mavɔmavɔ nɔ bló bɔ Davídi fun ahwan gbɔn fí ɖěbǔ ɔ́, é nɔ́ ɖu ɖ'é jí.

⁷Davídi bɛ́ gǎglónú sikánɔ e Hadadɛzɛ́ɛ sín mɛsɛntɔ́ lɛ́ɛ nɔ́ zán lɛ́ɛ, bó bɛ́ wá yi Jeluzalɛ́mu.

⁸ Davídi lɛ́ bɛ́ ganvɔ wɔ̌buwɔ́bú ɖé ɖo Hadadɛzɛ́ɛ sín toxo Tivuxáti kpó Kuni kpó mɛ. Salomɔ́ɔ zé ganvɔ ɔ́ dó bló basya ɖaxó ɖaxó lɛ́ɛ, dotín lɛ́ɛ kpó nǔ e è nɔ zán ɖo sinsɛnxɔ mɛ lɛ́ɛ kpó ná.

⁹Axɔ́sú Hamáti tɔn e è nɔ ylɔ́ ɖɔ Tɔwu ɔ́ se ɖɔ Davídi ɖu ɖo Hadadɛzɛ́ɛ sín ahwangɔnu ɔ́ bǐ jí.

¹⁰Ée é se mɔ̌ ɔ́, é sɛ́ vǐ tɔn Hadolámu dó axɔ́sú Davídi gɔ́n, bónú é ná yi dó gbe e, bó kpa gbe n'i ɖó ahwan e é fun xá Hadadɛzɛ́ɛ, bo ɖu ɖo jǐ tɔn ɔ́ wú. Đó Tɔwu lɔ ɖo ahwan fun xá Hadadɛzɛ́ɛ wɛ. Ée Hadolámu xweyǐgbe ɔ́, é hɛn nǔ e è sɔ́ siká dó bló lɛ́ɛ, nǔ e è sɔ́ kpatágan dó bló lɛ́ɛ kpódó nǔ e è sɔ́ ganvɔ dó bló lɛ́ɛ kpó wá nú Davídi.

¹¹Énɛ́ ɔ́, axɔ́sú Davídi zé nǔ énɛ́ lɛ́ɛ bǐ ɖó vo nú Mawu Mavɔmavɔ, lě e é zé kpatágan kpó siká kpó e é yí ɖo Edɔ́munu lɛ́ɛ, Mɔwabunu lɛ́ɛ, Amumɔ́ɔ ví lɛ́ɛ, Filisitɛ́ɛn lɛ́ɛ kpódó Amalɛ́ki ví lɛ́ɛ kpó sí é ɖó vo nú Mawu Mavɔmavɔ gbɔn é.

¹² Avicáyi, Selúya ví ɔ́ tɔ́n ahwan Edɔ́munu lɛ́ɛ, bó hu mɛ děgba ɛnɛ afɔwó (18.000) ɖo yě mɛ, ɖo Jɛtɔdo ɔ́ mɛ.

¹³É fɔ tokpɔngán ɖó Edɔ́munu lɛ́ɛ nu gǎnnugǎnnu, bɔ Edɔ́munu lɛ́ɛ húzú kannumɔ Davídi tɔn. Mawu Mavɔmavɔ nɔ bló bɔ Davídi fun ahwan gbɔn fí ɖěbǔ ɔ́, é nɔ́ ɖu ɖ'é jí.

¹⁴Davídi ɖó acɛ dó Izlayɛ́li to ɔ́ bǐ jí. É ɖɔ hwɛ jlɔ́jlɔ́ nú mɛ bǐ ɖo togun tɔn bǐ mɛ.

¹⁵Azɔ̌watɔ́ Davídi tɔn lɛ́ɛ ɖíe: Jowabu, Selúya ví ɔ́. É wɛ nyí ahwangán. Yexosafáti, Axiludi ví ɔ́. É wɛ nyí ɖɛ̌mɛnu axɔ́sú ɔ́ tɔn.

¹⁶Sadɔ́ku Axitúvu ví ɔ́ kpódó Abimɛlɛ́ki, Abiyatáa ví ɔ́ kpó; vɔ̌sánú-xwlémawutɔ́ wɛ nú yě. Cawuca; é wɛ nyí wěgbójínɔtɔ́.

¹⁷Benayahu, Yexoyada ví ɔ́. É wɛ nyí gǎn ɖo Keleti lɛ́ɛ kpó Pɛlɛ́ti lɛ́ɛ kpó nu; yě wɛ nɔ́ cɔ́ axɔ́sú ɔ́ sín hɔnmɛ. Davídi ví lɛ́ɛ wɛ bɔ dó axɔ́sú ɔ́ wú.