Read fon 1 Tan 27 Bible Online

1 Tan 27 - fon bible

1 Tan 27

¹Izlayɛ́li ví e ɖo azɔ̌ wa nú axɔ́sú ɔ́ wɛ lɛ́ɛ ɖíe: hɛ̌nnugán lɛ́ɛ, sɔ́ja afatɔ́ngán lɛ́ɛ, sɔ́ja kanwekogán lɛ́ɛ, kpódó nǔjíkpɔ́ntɔ́ lɛ́ɛ kpó. Yě wɛ nɔ́ kpé nukún dó ahwanfuntɔ́ lɛ́ɛ sín kánɖó lɛ́ɛ wú, ɖo xwe ɔ́ mɛ. Kánɖó ɖokpó ɖokpó nɔ́ wa azɔ̌ nú sun ɖokpó xwewú xwewú. Gbɛtɔ́ adɔ̌kpo ɖě děgba (24.000) wɛ ɖo kánɖó ɖokpó ɖokpó mɛ.

²Sun nukɔntɔn mɛ ɔ́, kánɖó e nu Yacoveamu, Zavúdiɛ́li ví ɔ́ nɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ.

³Yacoveamu ɔ́, Pɛlɛ́si sín kún mɛ wɛ é jɔ ɖe. É wɛ kpa acɛ nú ahwangán e nɔ́ wa azɔ̌ ɖo sun nukɔntɔn ɔ́ mɛ lɛ́ɛ bǐ.

⁴Sun wegɔ́ ɔ́ mɛ ɔ́, kánɖó e nu Dodayi Axoxi ví ɔ́ nɔ ɔ́ wɛ nɔ́ wa azɔ̌. Ahwangán Miklɔ́ti wɛ nɔ kánɖó ɔ́ nu gɔ́ n'i. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ.

⁵Sun atɔngɔ́ ɔ́ mɛ ɔ́, kánɖó e nu Benayahu vɔ̌sánú-xwlémawutɔ́gán Yexoyada ví ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ.

⁶Benayahu ɔ́, ahwanfuntɔ́ syɛ́nsyɛ́n ɖokpó wɛ é nyí ɖo ahwangán gban (30) lɛ́ɛ mɛ; é wɛ ɖo yě nu. Ée é húzú gǎn ɖo yě nu ɔ́, vǐ tɔn Amumizavadu wɛ jɛ kánɖó tɔn nu.

⁷Sun ɛnɛgɔ́ ɔ́ mɛ ɔ́, kánɖó e nu Asaxɛli, Jowabu nɔví ɔ́ nɔ ɔ́ wɛ nɔ́ wa azɔ̌. Vǐ tɔn Zevadiya wɛ wá ɖyɔ́ ɛ. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ.

⁸Sun atɔ́ɔ́ngɔ́ ɔ́ mɛ ɔ́, kánɖó e nu Camuti, Yizláxya ví ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ.

⁹Sun ayizɛ́ngɔ́ ɔ́ mɛ ɔ́, kánɖó e nu Ila Ikɛ́ci ví Tekowanu ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ.

¹⁰Sun tɛ́nwegɔ́ ɔ́ mɛ ɔ́, kánɖó e nu Hɛlɛ́si Bɛti-Pɛlɛ́tinu e jɔ ɖo akɔta Eflayímu tɔn mɛ ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ.

¹¹Sun tántɔngɔ́ ɔ́ mɛ ɔ́, kánɖó e nu Sibekayi, Hucanu e jɔ ɖo Zeláxi kún mɛ ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ.

¹²Sun tɛ́nnɛgɔ́ ɔ́ mɛ ɔ́, kánɖó e nu Aviɛzɛ́ɛ, Anatɔ́tinu e jɔ ɖo akɔta Bɛnjamɛ́ɛ tɔn mɛ ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ.

¹³Sun wǒgɔ́ ɔ́ mɛ ɔ́, kánɖó e nu Maxlayi, Nɛtofanu e jɔ ɖo Zeláxi kún mɛ ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ.

¹⁴Sun wǒ-ɖokpógɔ́ ɔ́ mɛ ɔ́, kánɖó e nu Benaya Pileyatɔ́ninu e jɔ ɖo akɔta Eflayímu tɔn mɛ ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ.

¹⁵Sun wěwegɔ́ ɔ́ mɛ ɔ́, kánɖó e nu Hɛludayi, Nɛtofanu e jɔ ɖo Ɔtiniyɛ́li kún mɛ ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ.

¹⁶Akɔta Izlayɛ́li tɔn lɛ́ɛ sín gǎn lɛ́ɛ ɖíe: Eliezɛ́ɛ, Zikli ví ɔ́; é wɛ nyí akɔta Hwlibɛ́ni tɔn sín gǎn. Cefátiyahu, Maaka ví ɔ́; é wɛ nyí akɔta Sinmɛnyɔ́ɔ tɔn sín gǎn.

¹⁷Hacaviyahu, Kemuwɛ́li ví ɔ́; é wɛ nyí akɔta Levíi tɔn sín gǎn. Sadɔ́ku nyí gǎn ɖo Aalɔ́ɔn ví lɛ́ɛ nu.

¹⁸Elihu Davídi nɔví ɔ́; é wɛ nyí akɔta Judáa tɔn sín gǎn. Ɔmúli, Mikaɛli ví ɔ́; é wɛ nyí akɔta Isakáa tɔn sín gǎn.

¹⁹Yicimayahu, Ovadiahu ví ɔ́; é wɛ nyí akɔta Zabulɔ́ɔn tɔn sín gǎn. Yelimɔ́ti, Azliyɛ́li ví ɔ́; é wɛ nyí akɔta Nɛfutali tɔn sín gǎn.

²⁰Hocea, Azaziyahu ví ɔ́; é wɛ nyí akɔta Eflayímu tɔn sín gǎn. Yoɛ́li, Pedayahu ví ɔ́; é wɛ nyí akɔtavlɔ́ Manasée tɔn sín gǎn.

²¹Idóo, Zekaliyahu ví ɔ́; é wɛ nyí akɔta vlɔ́ Manasée tɔn e ɖo Galadi ɔ́ sín gǎn. Yaasiɛ́li, Avunɛ́ɛ ví ɔ́; é wɛ nyí akɔta Bɛnjamɛ́ɛ tɔn sín gǎn.

²²Azalɛ́li, Yeloxámu ví ɔ́; é wɛ nyí akɔta Dan tɔn sín gǎn. Akɔtagán Izlayɛ́li tɔn lɛ́ɛ nɛ́.

²³ Mɛ e ko ɖó xwe ko lɛ́ɛ kpó mɛ e ma ko ɖó xwe ko ǎ lɛ́ɛ kpó ɔ́, Davídi sɔ́ ɖě sín kɛ́n ǎ, ɖó Mawu Mavɔmavɔ kó dó akpá ɖɔ émí ná bló bɔ Izlayɛ́li ví lɛ́ɛ ná sukpɔ́ sunví e ɖo jǐnukúnsin lɛ́ɛ ɖɔhun.

²⁴ Jowabu Selúya ví ɔ́ kó jɛ mɛ lɛ́ɛ sín kɛ́n sɔ́ jí, lo ɔ́, é sɔ́ kɛ́n ɔ́ fó ǎ, ɖó Mawu Mavɔmavɔ sin xomɛ dó Izlayɛ́li ví lɛ́ɛ, ɖó azɔ̌ énɛ́ e yě bɛ̌ ɔ́ wú. Énɛ́ ɔ́ wú wɛ mɛ nabí e ɖo to ɔ́ mɛ ɔ́ má ɖo “Axɔ́sú Davídi sín Tan wéma lɛ́ɛ” mɛ ǎ.

²⁵Azimawɛ́ti, Adiyɛli ví ɔ́; é wɛ nɔ kpɔ́n dɔkun axɔ́sú ɔ́ tɔn lɛ́ɛ jí. Yexonatáni Wuziyahu ví ɔ́; é wɛ nɔ kpɔ́n agɔ̌ e ɖo gleta lɛ́ɛ, éé ɖo toxo mɛ lɛ́ɛ, éé ɖo gletoxo mɛ lɛ́ɛ kpódó éé ɖo gletoxo kpɛví kpɛví mɛ lɛ́ɛ kpó jí.

²⁶Ezli Kelúvu ví ɔ́; é wɛ nɔ́ kpɔ́n glesi e ɖo to ɔ́ mɛ lɛ́ɛ jí.

²⁷Cimɛ́yi, Hlamanu ɔ́; é wɛ nɔ́ kpɔ́n vǐwungbo lɛ́ɛ jí. Zavúdi Cefámunu ɔ́; é wɛ nɔ kpɔ́n vɛ̌ɛn e è xo kplé lɛ́ɛ jí.

²⁸Baalu-Hanáni, Gɛdɛ́ɛnu ɔ́; é wɛ nɔ kpɔ́n olívugbo lɛ́ɛ kpó sikomɔ́ɔgbo lɛ́ɛ kpó jí ɖo ayǐkúngban wɛnjɛ jí. Yoaci wɛ ka nɔ kpɔ́n ami e è xo kplé lɛ́ɛ jí.

²⁹Citlayi Calɔ́ninu ɔ́; é wɛ nɔ kpɔ́n nyibúkpó e ɖo amagbo mɛ ɖo Calɔ́ni lɛ́ɛ jí. Cafáti Adlayi ví ɔ́; é wɛ nɔ kpɔ́n nyibúkpó e ɖo amagbo mɛ ɖo tɔdo lɛ́ɛ mɛ lɛ́ɛ jí.

³⁰Ovílu Isimayɛ́li ví ɔ́; é wɛ nɔ kpɔ́n lǎkúnmí lɛ́ɛ jí. Yɛxideyahu Mɛlɔnɔtinu ɔ́; é wɛ nɔ kpɔ́n tócí asi lɛ́ɛ jí.

³¹Yazízi Hagáa ví ɔ́; é wɛ nɔ kpɔ́n gbɔ̌ lɛ́ɛ jí. Yě mɛ e nɔ kpɔ́n axɔ́sú Davídi sín dɔkun jí lɛ́ɛ nɛ́.

³²Yexonatáni Davídi sín tɔ́ nɔví ɔ́ wɛ nɔ́ ɖe wě xá axɔ́sú Davídi. Mɛ ɖé wɛ é nyí bó ɖó nǔnywɛ́ ganjí, lobo se wěma ganjí. Yexiyɛ́li Hakimɔ́ni ví ɔ́ wɛ nɔ́ ná kplɔ́n axɔ́sú ɔ́ sín vǐ lɛ́ɛ.

³³Axitofɛ́li lɔmɔ̌ nɔ́ ɖe wě xá axɔ́sú ɔ́. Hucáyi Aakíti ɔ́ ká nyí axɔ́sú ɔ́ sín xɔ́ntɔn.

³⁴Yexoyada Benayahu ví ɔ́ kpódó Abiyatáa kpó wɛ wá nɔ Axitofɛ́li sín do mɛ, bó nɔ́ ɖe wě xá axɔ́sú ɔ́. Jowabu ka nyí ahwangán e kpa acɛ dó ahwangɔnu axɔ́sú tɔn ɔ́ nu é.