Read fon 1 Tan 5 Bible Online

1 Tan 5 - fon bible

1 Tan 5

¹ Hwlibɛ́ni wɛ nyí nukɔngbéví Izlayɛ́li tɔn. É wɛ nyí nukɔngbéví, amɔ̌, é wá ɖó xó xá tɔ́ tɔn sín asi bɔ è yǐ vǐɖaxó sín acɛ e é ɖó ɔ́ sín así tɔn, bó zé nú Jozɛ́fu ví lɛ́ɛ. Hǔn hwenu e è sɔ́ kɛ́n yětɔn ɔ́, è wlǎn ɖɔ Hwlibɛ́ni nyí vǐɖaxó ǎ.

² Judáa ɔ́ wɛ nyí mɛ syɛ́nsyɛ́n e ɖo nɔví tɔn lɛ́ɛ mɛ é. Kún tɔn mɛ wɛ Izlayɛ́li xɔ́sú ɖokpó jɔ ɖe. Amɔ̌, Jozɛ́fu wɛ ɖó vǐɖaxó sín acɛ ɔ́.

³Hwlibɛ́ni nukɔngbéví Izlayɛ́li tɔn ɔ́ sín vǐ lɛ́ɛ ɖíe: Hanɔki, Palúu, Ɛslɔ́ni kpódó Kaamíi kpó.

⁴Yoɛ́li ji Cemaya, Cemaya ji Gɔgu, bɔ Gɔgu ji Cimɛ́yi,

⁵Cimɛ́yi ji Mika, Mika ji Hleaya, bɔ Hleaya ji Baalu,

⁶ Baalu ji Beela; Beela ɔ́ wɛ kpa acɛ dó Hwlibɛ́ni ví lɛ́ɛ nu. É wɛ axɔ́sú Asilíi tɔn Tiglati-Pilesɛ́ɛ wlí hɛn yi kannumɔgbénu.

⁷È sɔ́ Beela mɛ lɛ́ɛ sín kɛ́n. Yeyiɛ́li wɛ nyí mɛ nukɔntɔn ɔ́, bɔ Zekaliyahu bɔ d'é wú.

⁸Lobɔ Bɛ́la wá jɛ fínɛ́. Bɛ́la ɔ́, Azazi sín vǐ wɛ é nyí, bó nyí Cɛma vívú, lobo nyí Yoɛ́li vívú vivu. Ayǐkúngban e jí Hwlibɛ́ni ví lɛ́ɛ nɔ ɔ́, bɛ́ sín Alowɛ́ɛ, bo gbɔn Nɛbo só ɔ́ kɔn káká yi Baalu-Mɛyɔ́ni toxo ɔ́ mɛ, ɖo totaligbé.

⁹Ayǐkúngban yětɔn lɛ́ ɖo zǎnzǎnhwe jí, ɖo gbětótló e yi tɔsisa Efláti tɔn ɔ́ kɔn é kpá. Đó kanlin yětɔn lɛ́ɛ sukpɔ́ ɖésú ɖo Galadi yíkúngban jí.

¹⁰Đo Sawúlu hwenu ɔ́, yě fun ahwan xá Hagáa ví lɛ́ɛ bó ɖu ɖo yě jí. Énɛ́ ɔ́ gúdo ɔ́, yě sá xwé gbɔn Galadi yíkúngban ɔ́ bǐ jí ɖo zǎnzǎnhwe jí.

¹¹Ayǐkúngban Gadi ví lɛ́ɛ tɔn ɖo Hwlibɛ́ni ví lɛ́ɛ tɔn sín taligbé, bɛ́ sín Basáni káká yi Saluka ɖo zǎnzǎnhwe jí.

¹²È nɔ mɔ Yoɛ́li nukɔntɔ́ ɔ́ sín hɛ̌nnu, Cafámu e bɔ d'é wú ɔ́ sín hɛ̌nnu, Yaenayi sín hɛ̌nnu kpódó Cafáti sín hɛ̌nnu kpó ɖo fínɛ́.

¹³Mɔ̌ ɖokpó ɔ́, è nɔ lɛ́ mɔ hɛ̌nnu tɛ́nwe ɖěvo ɖo fínɛ́. Hɛ̌nnu lɛ́ɛ wɛ nyí Mikaɛli hɛ́nnu ɔ́, Mɛculamu hɛ́nnu ɔ́, Cɛ́va hɛ́nnu ɔ́, Yolayi hɛ́nnu ɔ́, Yaekani hɛ́nnu ɔ́, Ziya hɛ́nnu ɔ́ kpó Ebɛ́ɛ hɛ́nnu ɔ́ kpó.

¹⁴Avihayilu ví lɛ́ɛ wɛ ɖó hɛ̌nnu énɛ́ lɛ́ɛ ayǐ. Tɔ́gbó yětɔn lɛ́ɛ ká ɖíe: Avihayilu Hulíi ví ɔ́, Hulíi Yalɔáxi ví ɔ́, Yalɔáxi Galadi ví ɔ́, Galadi Mikaɛli ví ɔ́, Mikaɛli Yecicayi ví ɔ́, Yecicayi Yaxidóo ví ɔ́, Yaxidóo Buzu ví ɔ́.

¹⁵Axi e nyí Avidyɛli ví, bó nyí Gúni vívú ɔ́ wɛ nyí gǎn nú hɛ̌nnu énɛ́ lɛ́ɛ bǐ.

¹⁶Yě nɔ́ nɔ Galadi, bó nɔ́ nɔ Basáni kpó toxo e lɛ́ dó yě lɛ́ɛ kpó mɛ, bó nɔ́ nɔ nǔkan e lɛ́ dó Calɔ́ni toxo ɔ́ é mɛ, káká yi fí e dogbó yětɔn vɔ dó é.

¹⁷Gadi ví lɛ́ɛ bǐ sín kɛ́n wɛ è sɔ́ ɖo Yotámu Judáa xɔ́sú ɔ́ kpódó Jelobowámu Izlayɛ́li xɔ́sú ɔ́ kpó sín hwenu.

¹⁸Akɔta Hwlibɛ́ni tɔn, Gadi tɔn kpódó akɔta vlɔ́ Manasée tɔn kpó ɖó ahwanfuntɔ́ syɛ́nsyɛ́n ɖé lɛ́ɛ; yě tunwun ahwanzɔ́; yě nyɔ́ gǎglónú kpó hwǐ kpó gǎ kpó zán, bó ɖo gbesisɔ mɛ bo ná yi ahwangbénu. Yě mɛ ahwanfuntɔ́ syɛ́nsyɛ́n énɛ́ lɛ́ɛ bló gbɛtɔ́ adɔ̌kpo we děgba ɖě nǔwɔntɔn kɛnnɛ (44.760).

¹⁹Yě fun ahwan xá Hagáa ví lɛ́ɛ, bó fun xá Yetúu ví lɛ́ɛ, lobo fun xá Nafíci ví lɛ́ɛ kpódó Nɔdávu ví lɛ́ɛ kpó.

²⁰Hwenu e yě ɖo ahwan ɔ́ fun wɛ ɔ́, yě sú xó ylɔ́ Mawu ɖɔ é ní wá dó alɔ émí, bɔ Mawu dó alɔ yě bɔ yě ɖu ɖo Hagáa ví lɛ́ɛ kpó mɛ yětɔn lɛ́ɛ kpó jí, bó wlí yě. Mawu dó alɔ yě ɖó yě ɖeji dó wǔ tɔn.

²¹Yě bɛ̌ kanlin yětɔn lɛ́ɛ bǐ; kanlin e yě bɛ̌ lɛ́ɛ ɖíe: lǎkúnmí adɔ̌kpo we děgba we afɔwó (50.000), tócí afɔwó (2.000). Gbɔ̌ adɔ̌kpo wěwe děgba we afɔwó (250.000). Yě wlí gbɛtɔ́ adɔ̌kpo atɔ́ɔ́n (100.000)

²²Gbɛtɔ́ e ka kú lɛ́ɛ sukpɔ́, ɖó ahwan énɛ́ ɔ́ e yě fun ɔ́, Mawu wɛ fun. Bɔ yě jɛ agban ɖó Hagáa ví lɛ́ɛ sín tɛn mɛ káká wá jɛ hwenu e è wlǐ yě lɔmɔ̌ yi kannumɔgbénu é.

²³Akɔtavlɔ́ Manasée tɔn ɔ́ nɔ to ɔ́ mɛ bɛ́ sín Basáni ɖo tofɔligbé káká yi Baalu-Ɛmɔ́ɔ, Seníi kpó Ɛmɔ́ɔ só ɔ́ kɔn kpó ɖo totaligbé. Yě wá sukpɔ́ ɖo to ɔ́ mɛ.

²⁴Hɛ̌nnugán e ɖo akɔta ɔ́ mɛ lɛ́ɛ ɖíe: Efɛ́ɛ, Yiceyi, Eliyɛ́li, Azliyɛ́li, Yiimɛya, Hodawya kpódó Yaxidiɛ́li kpó. Yě mɛ énɛ́ lɛ́ɛ bǐ wɛ nyí gbɛtɔ́ nukúnɖéjí, bɔ nyǐkɔ yětɔn yi jǐ.

²⁵Lo ɔ́, yě hu hwɛ dó Mawu tɔ́gbó yětɔn lɛ́ɛ tɔn. Yě jǒ Mawu e tɔ́gbó yětɔn lɛ́ɛ nɔ sɛn ɔ́ dó, bó nɔ sɛn togun e sín kún Mawu sú dó lɛ́ɛ sín vodún.

²⁶ Énɛ́ ɔ́, Mawu Izlayɛ́li tɔn ɔ́ fɔ́n hun dó jǐ nú Asilíi xɔ́sú Púlu e è nɔ lɛ́ ylɔ́ ɖɔ Tiglati-Pilesɛ́ɛ é, bɔ é yi gba akɔta Hwlibɛ́ni tɔn, Gadi tɔn kpódó akɔta vlɔ́ Manasée tɔn ɔ́ kpó, bó bɛ́ mɛ e ɖo to ɔ́ mɛ lɛ́ɛ wá yi Halaxi, yi Habɔ́ɔ, yi Hala, bó bɛ́ yi tɔsisa Gozáni tɔn ɔ́ kɔn. Vǐ yětɔn lɛ́ɛ kpo ɖo fínɛ́ káká wá jɛ égbé.

²⁷Levíi ví lɛ́ɛ ɖíe: Gɛɛcɔ́ni, Kexáti kpódó Mɛlali kpó.

²⁸Kexáti ví lɛ́ɛ ɖíe: Amulámu, Yisexáa, Eblɔ́n kpó Wuziyɛ́li kpó.

²⁹Amulámu ví lɛ́ɛ ɖíe: Aalɔ́ɔn kpó Mɔyízi kpó, kpódó nɔví yětɔn nyɔ̌nu Miliamu kpó. Aalɔ́ɔn ví lɛ́ɛ ɖíe: Nadavu, Avihu, Eleazáa kpódó Itamáa kpó.

³⁰Eleazáa ji Pínxási, bɔ Pínxási ji Avicua.

³¹Avicua ji Buki; Buki ji Wúzi,

³²Wúzi ji Zelaxiya; Zelaxiya ji Mɛlayɔ́ti.

³³Mɛlayɔ́ti ji Amaliya; Amaliya ji Axitúvu.

³⁴Axitúvu ji Sadɔ́ku; Sadɔ́ku ji Aximáasi,

³⁵Aximáasi ji Azalya; Azalya ji Yoxanáni.

³⁶Yoxanáni ji Azalya; Azalya élɔ́ wɛ nyí vɔ̌sánú-xwlémawutɔ́ e wa azɔ̌ ɖo sinsɛnxɔ e Salomɔ́ɔ gbá ɖó Jeluzalɛ́mu ɔ́ mɛ é.

³⁷Azalya ji Amaliya; Amaliya ji Axitúvu,

³⁸Axitúvu ji Sadɔ́ku, bɔ Sadɔ́ku ji Calúmu.

³⁹Calúmu ji Ilukya, bɔ Ilukya ji Azalya.

⁴⁰Azalya ji Selaya, bɔ Selaya ji Yexosadaki.

⁴¹Yexosadaki ɔ́ wɛ Nabukodonɔzɔ́ɔ kplá hɛn yi hwenu e Mawu Mavɔmavɔ nyi Jeluzalɛ́munu lɛ́ɛ kpódó Judáanu lɛ́ɛ kpó sɛ́ dó kannumɔgbénu é.