Read fon 2 Tan 1 Bible Online

2 Tan 1 - fon bible

2 Tan 1

¹Salomɔ́ɔ Davídi ví ɔ́ sín axɔ́súɖuɖu ɖo dǒ lí wɛ. Mawu Mavɔmavɔ, Mawu tɔn ɖo kpɔ́ xá ɛ, bó sɔ́ ɛ su.

²Salomɔ́ɔ ylɔ́ Izlayɛ́li togun ɔ́ bǐ kplé, ɖo tají ɔ́, sɔ́ja afatɔ́ngán lɛ́ɛ, sɔ́ja kanwekogán lɛ́ɛ, hwɛɖɔtɔ́ lɛ́ɛ, kpódó hɛ̌nnugán nukúnɖéjí Izlayɛ́li tɔn lɛ́ɛ kpó.

³Salomɔ́ɔ kpódó mɛ e é ylɔ́ lɛ́ɛ bǐ kpó yi tɛn mímɛ́ e ɖo Gabawɔ́ɔn é mɛ. Goxɔ e mɛ Mawu nɔ́ kpé togun ɔ́ ɖe, bɔ mɛsɛntɔ́ Mawu Mavɔmavɔ tɔn Mɔyízi bló ɖó gbětótló mɛ ɔ́, fínɛ́ wɛ é ɖe.

⁴ Davídi ko zé akɔjijɛgbá Mawu tɔn ɔ́ sín Kiliyati-Yealimu yi goxɔ e é kó bló ɖ'ayǐ nú akɔjijɛgbá ɔ́ ɖo Jeluzalɛ́mu ɔ́ mɛ.

⁵ Lo ɔ́, vɔ̌sákpe e Besalɛli Wulíi ví, Húu vívú ɔ́ zé ganvɔ dó bló ɔ́ ɖo goxɔ Mawu Mavɔmavɔ tɔn ɔ́ nukɔn, ɖo Gabawɔ́ɔn. Fínɛ́ wɛ Salomɔ́ɔ kpódó mɛ e xwedó e lɛ́ɛ kpó kan nǔ byɔ́ Mawu Mavɔmavɔ ɖe.

⁶Vɔ̌sákpe énɛ́ e ɖo goxɔ Mawu Mavɔmavɔ tɔn ɔ́ nukɔn ɔ́ jí wɛ Salomɔ́ɔ xwlé vɔ̌ e è nɔ dó zo ɔ́ afatɔ́n (1.000) Mawu Mavɔmavɔ ɖe hwenɛ́nu.

⁷Mawu tɔ́n dó Salomɔ́ɔ jí gbe nɛ́ gbe zǎn mɛ, bó ɖɔ n'i ɖɔ: “Byɔ̌ nǔ e jló we ɔ́ nú má ná we.”

⁸Bɔ Salomɔ́ɔ ɖɔ n'i ɖɔ: “A nyɔ̌ xomɛ dó tɔ́ ce Davídi wú tawun, bó sɔ́ mì axɔ́sú ɖó tɛn tɔn mɛ.

⁹ Mawu Mavɔmavɔ, din ɔ́, ɖe akpá e a dǒ nú tɔ́ ce Davídi é, ɖó a sɔ́ mì axɔ́sú ɖó togun wɔ̌buwɔ́bú kɔ́gúdu ɖɔhun élɔ́ nu.

¹⁰Hǔn, bo ná nǔnywɛ́ kpódó nǔtunwuntunwun kpó mì, bónú ma tunwun lě e un ná wa nǔ gbɔn ɖo togun élɔ́ nu é! Đó togun ɔ́ sukpɔ́ dín! Nǔ énɛ́ lɛ́ɛ mɛ vo ɔ́, mɛɖé sixú nɔ togun e sukpɔ́ sɔ mɔ̌ ɔ́ nu ǎ.”

¹¹Ée Salomɔ́ɔ ɖɔ mɔ̌ ɔ́, Mawu ɖɔ n'i ɖɔ: “Ée a ma byɔ́ dɔkun ǎ, bó má byɔ́ nǔ ɖó kan ǎ, bó má byɔ́ ɖɔ kɛntɔ́ émítɔn lɛ́ɛ ní kú ǎ, bó má tlɛ byɔ́ jidɔ́ nú hwiɖée ǎ, bɔ é nyí ɖɔ nǔnywɛ́ kpódó nǔtunwuntunwun kpó wɛ ɖo ayi towe mɛ, bɔ a byɔ́, bó ná dó nɔ togun ce e nu un sɔ́ we axɔ́sú ɖe ɔ́ nu ɔ́,

¹²un ná nǔnywɛ́ ɔ́ kpódó nǔtunwuntunwun ɔ́ kpó we; un ka ná lɛ́ ná dɔkun we, bó ná ná nǔ gěgé kpódó susu kpó we gɔ́ ná, bɔ é ná hú axɔ́sú e ko jɛ nukɔn nú we lɛ́ɛ kpó éé ná wá jɛ gǔdo towe lɛ́ɛ bǐ kpó tɔn.”

¹³Ée Mawu Mavɔmavɔ ɖɔ mɔ̌ ɔ́, Salomɔ́ɔ gosín goxɔ Mawu Mavɔmavɔ tɔn mɛ, ɖo tɛn mímɛ́ e ɖo Gabawɔ́ɔn ɔ́ mɛ, bó lɛ́ kɔ wá Jeluzalɛ́mu, bó ɖu axɔ́sú ɖo Izlayɛ́li to ɔ́ nu.

¹⁴ Salomɔ́ɔ kplé kɛkɛ́ví lɛ́ɛ kpódó sɔ́ lɛ́ɛ kpó: kɛkɛ́ví lɛ́ɛ bló afɔtɛ́nwe (1.400), bɔ sɔ́ lɛ́ɛ bló děgba atɔn (12.000). É ɖésúnɔ hɛn ɖě ɖó Jeluzalɛ́mu, bó má éé kpo lɛ́ɛ gbɔn toxo e è ko bló ɖ'ayǐ nú kɛkɛ́ví lɛ́ɛ kpó sɔ́ lɛ́ɛ kpó lɛ́ɛ mɛ.

¹⁵Axɔ́sú Salomɔ́ɔ bló bɔ kpatágan e ɖo Jeluzalɛ́mu ɔ́ sukpɔ́ kɛ́n ɖɔhun. É bló bɔ sɛ́dlutín sukpɔ́ sikomɔ́ɔtín e ɖo Cefela lɛ́ɛ ɖɔhun.

¹⁶ Ejípu kpó Kewe kpó wɛ axɔ́sú Salomɔ́ɔ sín sɔ́ lɛ́ɛ gosín. Ajɔ̌tɔ́ ɖé lɛ́ɛ wɛ nɔ́ yi xɔ wá n'i sín dɔ̌n.

¹⁷Gankwɛ́ nǔwɔntɔn (600) wɛ ajɔ̌tɔ́ énɛ́ lɛ́ɛ nɔ dó xɔ kɛkɛ́ví ɖokpó sín Ejípu wá, bó nɔ xɔ sɔ́ ɖokpó yí gankwɛ́ kantɔn gban (150). Ajɔ̌tɔ́ ɖokpó énɛ́ lɛ́ɛ wɛ nɔ xɔ wá nú axɔ́sú Hitíti tɔn lɛ́ɛ bǐ kpódó axɔ́sú Silíi tɔn lɛ́ɛ bǐ kpó.

¹⁸Salomɔ́ɔ ná gbe ɖɔ è nǐ sá xwé ɖokpó nú Mawu Mavɔmavɔ, bó sá xwé ɖokpó nú émí ɖésúnɔ.