Read fon 2 Tan 10 Bible Online

2 Tan 10 - fon bible

2 Tan 10

¹Hlobowámu yi Sikɛ́mu, ɖó akɔta Izlayɛ́li tɔn e ɖo Totaligbé lɛ́ɛ bǐ wá Sikɛ́mu, bó ná sɔ́ ɛ axɔ́sú.

²Jelobowámu Nɛvati ví ɔ́, Ejípu fí e é hɔn nú axɔ́sú Salomɔ́ɔ bo yi cí ɔ́ wɛ é ɖe, bó se ɖɔ è sɔ́ Hlobowámu axɔ́sú. Ée é se mɔ̌ ɔ́, é lɛ́ kɔ sín Ejípu wá.

³Énɛ́ ɔ́, è sɛ́ mɛ dó e ɖɔ è nǐ yi kplá ɛ wá, bɔ é kpó akɔta Izlayɛ́li tɔn e ɖo Totaligbé lɛ́ɛ bǐ kpó wá Hlobowámu gɔ́n, bó ɖɔ n'i ɖɔ:

⁴“Agban kpinkpɛn wɛ tɔ́ towe ɖíɖá mǐ. Hwɛ din ɔ́, nú a ɖe kan kpo nú azɔ̌ syɛ́nsyɛ́n e wa wɛ mǐ ɖe ɔ́, bó ɖe agban kpinkpɛn e tɔ́ towe ɖíɖá mǐ ɔ́ kpo nú mǐ ɔ́, mǐ nǎ wa azɔ̌ nú we.”

⁵Ée yě ɖɔ mɔ̌ ɔ́, Hlobowámu ɖɔ nú yě ɖɔ: “Mi lɛ́ kɔ wá gɔ̌n ce azǎn atɔn gbe.” Ée é ɖɔ mɔ̌ ɔ́, yě ɖidó.

⁶Ée togun ɔ́ yi ɔ́, axɔ́sú Hlobowámu yi mɔ tomɛxó e wa azɔ̌ xá tɔ́ tɔn Salomɔ́ɔ hwenu e é ɖo gbɛ ɔ́, bó kanbyɔ́ yě ɖɔ: “Nǔ tɛ́ wɛ mi ná kplɔ́n mì, nú má ɖɔ nú togun énɛ́ ɔ́?”

⁷Bɔ yě ɖɔ n'i ɖɔ: “Nú a nyɔ̌ xomɛ dó togun élɔ́ wú, bó yí yě ganjí, bó dó gbe ɖagbe nú yě ɔ́, yě ná nyí mɛsɛntɔ́ towe káká sɔ́yi.”

⁸Hlobowámu ka zé nǔ e tomɛxó lɛ́ɛ kplɔ́n ɛ ɔ́ dó wa azɔ̌ ná ǎ, lobo yi mɔ gbɛ̌ tɔn e kpó é kpó su hǎ jí, bɔ yě nɔ́ sɛn ɛ lɛ́ɛ,

⁹bó ɖɔ nú yě ɖɔ: “Togun énɛ́ wá ɖɔ nú mì ɖɔ nyɛ ní ɖe agban kpinkpɛn e tɔ́ ce dó nú émí, bó ɖɔ émí ní hɛn dandan ɔ́ kpo nú émí; nǔ tɛ́ wɛ mi ná kplɔ́n mì, nú má ɖɔ nú yě?”

¹⁰Ée é ɖɔ mɔ̌ ɔ́, gbɛ̌ tɔn lɛ́ɛ ɖɔ n'i ɖɔ: “Mɛ énɛ́ lɛ́ɛ ɖo vo sa wɛ ɖɔ tɔ́ hwi tɔn ɖíɖá agban kpinkpɛn émí, bó ɖo byɔ̌byɔ́ wɛ ɖɔ hwi ní ɖe agban kpo nú émí. É nyɔ́! Xó e a ɖǒ ná ɖɔ nú yě ɔ́ ɖíe: ɖɔ nú yě ɖɔ: ‘Alɔví ce tókɛ́ ɔ́ kló hú tɔ́ ce sín awa.

¹¹Tɔ́ ce dó agban kpinkpɛn nú mi. Nyɛ ká ná dó agban e kpɛn hú mɔ̌ ɔ́ nú mi. Tɔ́ ce zé lanbá dó kplɔ́n mi ná, lanbá mɔ̌hun we wɛ nyɛ ka ná zé dó kplɔ́n mi ná.’ ”

¹²Azǎn atɔn e axɔ́sú ɔ́ ɖɔ ɔ́ sɔgbe, bɔ Hlobowámu kpódó togun ɔ́ bǐ kpó wá gɔ̌n tɔn lě e é ɖɔ nú yě gbɔn é.

¹³Ée yě wá é ɔ́, é bló nǔ e tomɛxó lɛ́ɛ kplɔ́n ɛ ɔ́ ǎ; é dó gbe ɖagbe nú yě ǎ.

¹⁴É bló nǔ e gbɛ̌ tɔn lɛ́ɛ kplɔ́n ɛ é. É ɖɔ nú yě ɖɔ: “Un ná dó agban kpinkpɛn nú mi, bó ná fɔ́n, bó ná lɛ́ ɖo dǐdó d'é jí wɛ. Tɔ́ ce zé lanbá dó kplɔ́n mi ná, lanbá mɔ̌hun we wɛ nyɛ ka ná zé dó kplɔ́n mi ná.”

¹⁵Hǔn axɔ́sú ɔ́ bló nǔ e ba wɛ togun ɔ́ ɖe ɔ́ ǎ. Mawu Mavɔmavɔ wɛ ka zɔ́n bɔ nǔ nɛ́ lɛ́ɛ nyí gbɔn mɔ̌, bónú xó e é ɖɔ nú Jelobowámu Nɛvati ví ɔ́ gbɔn Axiya Silóonu ɔ́ jí ɔ́ ná dó jɛ.

¹⁶ Ée akɔta Izlayɛ́li tɔn e ɖo Totaligbé lɛ́ɛ bǐ mɔ ɖɔ axɔ́sú ɔ́ kún bló nǔ e ba wɛ émí ɖe ɔ́ ó ɔ́, yě ɖɔ: “Ani wɛ ɖo mǐ kpódó Davídi kpó tɛ́ntin? Mǐ kpó Jɛsée ví énɛ́ ɔ́ kpó kpé nǔɖé ǎ Izlayɛ́linu e mi; mɛ ɖokpó ɖokpó ní lɛ́ kɔ yi xwé tɔn gbe! Din ɔ́, Davídi ví, kpé nukún dó axɔ́súɖuto towe wú!” Ée Izlayɛ́linu lɛ́ɛ ɖɔ mɔ̌ ɔ́, yě ɖidó.

¹⁷Judáanu lɛ́ɛ kɛ́ɖɛ́ jɛ́n nɔ́ mɔ Hlobowámu dó mɔ axɔ́sú.

¹⁸Nǔ ká ɖo mɔ̌ có, Hlobowámu sɛ́ Adolámu e kpa acɛ dó mɛɖezɔ́ nu ɔ́ dó Izlayɛ́linu e ɖo Totaligbé lɛ́ɛ gɔ́n, bɔ yě nyi hwǎn dó hu i. Énɛ́ ɔ́, Hlobowámu yá wǔ byɔ́ kɛkɛ́ví tɔn mɛ, bó hɔn yi Jeluzalɛ́mu.

¹⁹Lě e Izlayɛ́linu e ɖo Totaligbé lɛ́ɛ gbɛ́ ɖɔ xwédo Davídi tɔn kún ná kpa acɛ nú émí ó gbɔn ɔ́ nɛ́, bɔ é kpo ɖo mɔ̌ káká wá jɛ égbé.