Read fon 2 Tan 13 Bible Online

2 Tan 13 - fon bible

2 Tan 13

¹Hwenu e Jelobowámu ɖo xwe afɔtɔn-nukún-atɔn bló wɛ ɖo axɔ́súzinkpo jí ɔ́, Abiya ɖu axɔ́sú ɖo Judáa.

²É ɖu axɔ́sú nú xwe atɔn; Jeluzalɛ́mu wɛ é nɔ́ nɔ. Nɔ tɔn nɔ nyí Mikayahu, Wuliyɛ́li Giveyanu ɔ́ ví wɛ. Abiya lɔmɔ̌ fun ahwan xá Jelobowámu.

³Abiya yi ahwan fun gbé kpódó ahwanfuntɔ́ syɛ́nsyɛ́n adɔ̌kpo ko (400.000) kpó. Jelobowámu ka kplá ahwanfuntɔ́ ɖaxó ɖaxó adɔ̌kpo kanɖé (800.000), bó kpé ahwan xá ɛ.

⁴Abiya xá Semalayímu só e ɖo sókan Eflayímu tɔn mɛ ɔ́ ta, bó sú xó, bó ɖɔ sɛ́ dó Jelobowámu kpódó Izlayɛ́li togun ɔ́ bǐ kpó ɖɔ: “Mi ɖótó mì!

⁵Mi tunwun ɖɔ Mawu Mavɔmavɔ, Mawu Izlayɛ́li tɔn ɔ́ kó ɖɔ Davídi kpódó kúnkan tɔn lɛ́ɛ kpó wɛ ná ɖu axɔ́sú ɖo Izlayɛ́li to ɔ́ nu káká sɔ́yi ǎ cé? Nǔ e ná húzú gbeta énɛ́ ɔ́ ɖe ǎ.

⁶Lo ɔ́, Jelobowámu Nɛvati ví e nyí Salomɔ́ɔ Davídi ví ɔ́ sín mɛsɛntɔ́ ɔ́ fɔ́n gǔ dó gǎn tɔn Salomɔ́ɔ jí.

⁷Hwenu e é fɔ́n gǔ ɔ́, gbɛtɔ́ nǔvɔ́nɔ, gbɛtɔ́ dídá ɖé lɛ́ɛ wá Jelobowámu gɔ́n, bó dɔn ɛ dó Hlobowámu Salomɔ́ɔ ví ɔ́ jí. Hlobowámu ka dɔn nǔɖé xá yě ǎ; ɖó dɔ̌nkpɛvú wɛ; é ɖó nǔnywɛ́ ɖé ǎ.

⁸Din ɔ́, mi vɛdó ɖɔ émí ná sí te dó axɔ́súɖuɖu e Mawu Mavɔmavɔ zé dó así nú Davídi ví lɛ́ɛ ɔ́ jí wɛ sín, ɖó mi sukpɔ́ ɖésú, bó hɛn sikányibúví e Jelobowámu bló nú mi, bɔ mi nɔ sɛn lɛ́ɛ.

⁹Mi nya vɔ̌sánú-xwlémawutɔ́ Aalɔ́ɔn ví lɛ́ɛ kpódó Levíi ví lɛ́ɛ kpó, bó sɔ́ vodúnnɔ ɖé lɛ́ɛ nú miɖée ɖó tɛn yětɔn mɛ lě e to ɖě lɛ́ɛ nɔ́ bló gbɔn é. Mɛ ɖé ko hɛn nyibúsú ɖokpó kpódó agbo tɛ́nwe kpó wá kpowun ɔ́, mi nɔ sɔ́ mɛ ɔ́, bɔ é nɔ́ jɛ vɔ̌sánú xwlé vodún lɛ́ɛ jí. Vodún ká nyí Mawu ǎ.

¹⁰Mǐdɛɛ lɛ́ɛ ɔ́, Mawu Mavɔmavɔ wɛ mǐ nɔ́ sɛn. Mǐ jó e dó ǎ. Aalɔ́ɔn ví lɛ́ɛ wɛ nyí vɔ̌sánú-xwlémawutɔ́, bɔ Levíi ví lɛ́ɛ ká nɔ ɖo azɔ̌ yětɔn wa wɛ.

¹¹Zǎnzǎn gbada ɔ́, yě nɔ́ ɖo vɔ̌ e è nɔ dó zo lɛ́ɛ xwlé Mawu Mavɔmavɔ wɛ, bó nɔ́ ɖo zǎlínkpɔ́n dó zo n'i wɛ. Yě nɔ́ to wɔ̌xúxú e è nǎ Mawu lɛ́ɛ ɖó távo mímɛ́ ɔ́ jí, bɔ gbadanu tɛgbɛ ɔ́, yě nɔ́ tá zogbɛ́n lɛ́ɛ ɖó zogbɛ́nhɛnnú e è zě siká dó bló ɔ́ jí. Mǐ nɔ́ kpé nukún dó azɔ̌ e Mawu Mavɔmavɔ, Mawu mǐtɔn zɔ́n mǐ lɛ́ɛ wú, bó nɔ́ wa ganjí. Amɔ̌, midɛɛ lɛ́ɛ ɔ́, mi jó e dó.

¹²Mi ɖótó! Mawu kpódó mɛ e nɔ xwlé vɔ̌sánú i lɛ́ɛ kpó wɛ ɖo mǐ nu. Vɔ̌sánú-xwlémawutɔ́ tɔn lɛ́ɛ ɖo fínɛ́ bó ná kwín kpɛn bɔ è nǎ tɔ́n ahwan mi. Izlayɛ́linu e mi, mi ma fun ahwan xá Mawu Mavɔmavɔ, Mawu tɔ́gbó mitɔn lɛ́ɛ tɔn ó, ɖó mi ná mɔ nu tɔn ǎ.”

¹³Hwenɛ́nu ɔ́, Jelobowámu sɛ́ sɔ́ja ɖé lɛ́ɛ dó, bɔ yě yi tɔwu nú Judáanu lɛ́ɛ ɖo gǔdo, bɔ ahwangɔnu tɔn ɔ́ ɖo nukɔn, bɔ Judáanu lɛ́ɛ ɖo tɛ́ntin.

¹⁴Sɔ́ja Judáa tɔn lɛ́ɛ mɔ ɖɔ è tɔ́n ahwan émí ɖo gǔdo nukɔn, lobo sú xó ylɔ́ Mawu Mavɔmavɔ ɖɔ é ní wá hwlɛ́n émí, bɔ vɔ̌sánú-xwlémawutɔ́ lɛ́ɛ kwín ahwankpɛn.

¹⁵Ée vɔ̌sánú-xwlémawutɔ́ lɛ́ɛ kwín ahwankpɛn ɔ́, sɔ́ja Judáa tɔn lɛ́ɛ sú xó. Ée yě sú xó lě tlóló ɔ́, Mawu bló bɔ Abiya kpó Judáanu lɛ́ɛ kpó ɖu ɖo Jelobowámu kpó Izlayɛ́linu lɛ́ɛ kpó jí.

¹⁶Izlayɛ́linu lɛ́ɛ hɔn ɖo Judáanu lɛ́ɛ nukɔn, Mawu ká jó Izlayɛ́linu lɛ́ɛ nú yě.

¹⁷Abiya kpódó ahwanfuntɔ́ tɔn lɛ́ɛ kpó ɖu ɖo ahwanfuntɔ́ Izlayɛ́li tɔn lɛ́ɛ jí tawun, bó hu ahwanfuntɔ́ ɖaxó ɖaxó adɔ̌kpo ko atɔ́ɔ́n (500.000).

¹⁸Đo ahwan énɛ́ ɔ́ mɛ ɔ́, Izlayɛ́linu lɛ́ɛ ɖu winnyá, bɔ Judáanu lɛ́ɛ ɖu ɖ'é jí; yě ɖu ɖ'é jí, ɖó yě gán jɛ Mawu Mavɔmavɔ, Mawu tɔ́gbó yětɔn lɛ́ɛ tɔn wú.

¹⁹Abiya jɛ Jelobowámu gúdo, bó yí Betɛ́li toxo ɔ́, Yecana toxo ɔ́ kpó Eflɔ́ni toxo ɔ́ kpó; é lɛ́ yí gletoxo e ɖo toxo énɛ́ lɛ́ɛ kpá lɛ́ɛ sín Jelobowámu sí.

²⁰Hwenu e Abiya ɖo axɔ́sú ɖu wɛ ɔ́, axɔ́sú Jelobowámu sɔ́ ɖó acɛ lě e é ɖó gbɔn ɖ'ayǐ é ǎ; ée é wá yá é ɔ́, Mawu Mavɔmavɔ sín alɔ jɛ wǔ tɔn bɔ é kú.

²¹Lo ɔ́, Abiya sɔ́ acɛkpikpa tɔn jínjɔ́n ayǐ. É da asi wǒ-ɛnɛ, bó ɖó vǐ súnnu ko-nukún-we, vǐ nyɔ̌nu afɔtɔn-nukún-ɖokpó.

²²È wlǎn Abiya sín tan e kpo ɔ́, nǔ e é wa lɛ́ɛ kpódó xó e é ɖɔ lɛ́ɛ kpó dó wěma e è nɔ ylɔ́ ɖɔ: “Nǔtínmɛ wéma gbeyíɖɔ Mawu tɔn Idóo tɔn” ɔ́ mɛ.

²³Abiya zán wá kú bɔ è sɔ́ ɛ ɖó Davídi Toxo mɛ, bɔ vǐ tɔn Asa ɖu axɔ́sú ɖó tɛn tɔn mɛ. Ée Asa jɛ axɔ́sú ɖu jí ɔ́, to ɔ́ mɔ agbɔ̌n nú xwe wǒ.