Read fon 2 Tan 17 Bible Online

2 Tan 17 - fon bible

2 Tan 17

¹Jozafáti Asa ví ɔ́ ɖu axɔ́sú ɖó tɔ́ tɔn tɛnmɛ. É zé acɛkpikpa tɔn jínjɔ́n ayǐ ɖo Izlayɛ́li.

²É ɖó ahwangɔnu gbɔn Judáa toxo e è mɛ ahohó lɛ́ lɛ̌ dó lɛ́ɛ ɖokpó ɖokpó mɛ, bó ɖó ahwankpá gbɔn toxo e ɖo Judáa lɛ́ɛ ɖokpó ɖokpó mɛ, bó lɛ́ ɖó gbɔn Eflayímu toxo e tɔ́ tɔn yí lɛ́ɛ ɖokpó ɖokpó mɛ.

³Mawu Mavɔmavɔ ɖo kpɔ́ xá Jozafáti, ɖó é zán gbɛ tɔn lě e tɔ́gbó tɔn Davídi zán gbɛ gbɔn hwenu e é yi zinkpo jí tlóló é. É sɛn vodún Baalu lɛ́ɛ ǎ.

⁴É nyɔ́ wa ɔ́, Mawu e tɔ́ tɔn nɔ sɛn ɔ́ wɛ é xwedó bó wa nǔ e é zɔ́n lɛ́ɛ. Éyɛ́ wa nǔ lě e è nɔ bló gbɔn ɖo axɔ́súɖuto Totaligbé tɔn ɔ́ mɛ é ǎ.

⁵Mawu Mavɔmavɔ sɔ́ acɛkpikpa tɔn jínjɔ́n ayǐ. Judáanu lɛ́ɛ bǐ nɔ́ hɛn nǔ bó nɔ́ wá ná Jozafáti, káká bɔ é jɛ dɔkun, bó xɔ susu bɔ é vɛ́ jlɛ́.

⁶Mawu Mavɔmavɔ sín jlǒ wiwa wɛ nɔ́ myá nukún n'i, bɔ é ɖe vodún xwé e gbɔn só jí só jí lɛ́ɛ kpódó vodún Acela lɛ́ɛ kpó sín axɔ́súɖuto Judáa tɔn mɛ.

⁷Hwenu e Jozafáti ɖo xwe atɔn bló wɛ ɖo zinkpo jí ɔ́, é sɛ́ azaglɔ́gán tɔn Bɛni-Hayílu, Ovadiahu, Zekaliya, Nɛtanɛli kpódó Mikayahu kpó dó Judáa toxo lɛ́ɛ mɛ, bɔ yě ná nɔ́ kplɔ́n nǔ mɛ.

⁸É sɛ́ Levíi ví Cemayahu, Nɛtaniyahu, Zevadiyahu, Asaxɛli, Cemilamɔti, Yexonatáni, Adoniyahu, Toviyahu kpódó Tɔ́vu-Adoniya kpó dó, bɔ yě xwedó azaglɔ́gán lɛ́ɛ. É lɛ́ sɛ́ vɔ̌sánú-xwlémawutɔ́ Elicama kpódó Yexolámu kpó dó, bɔ yě xwedó yě.

⁹Yě hɛn sɛ́nwéma Mawu Mavɔmavɔ tɔn ɔ́ bó kplɔ́n nǔ togun ɔ́ ɖ'é mɛ gbɔn Judáa toxo lɛ́ɛ bǐ mɛ.

¹⁰Axɔ́súɖuto e lɛ́ lɛ̌ dó Judáa lɛ́ɛ bǐ jɛ xɛsi ɖi nú Mawu Mavɔmavɔ jí, bɔ yě ɖě nɔ́ glá tɔ́n ahwan Jozafáti ǎ.

¹¹Filisitɛ́ɛn ɖé lɛ́ɛ nɔ́ hɛn nǔ bó nɔ́ wá ná Jozafáti, bó nɔ hɛn kpatágan dó wá ná nǔjɔ. Alabíinu lɛ́ɛ lɔ nɔ hɛn kanlin wá. Yě nɔ́ hɛn agbo děgba ɖě afɔwó-afatɔ́n nǔwɔntɔn kanwe ko (7.700), gbǎgbá děgba ɖě afɔwó-afatɔ́n nǔwɔntɔn kanwe ko (7.700).

¹²Acɛkpikpa Jozafáti tɔn fɔ́n bó ɖo jijɛ jí wɛ. É bló fí e mɛɖé má sixú kpé mɛ wú ɖe ǎ é gěgé ɖó Judáa, bó zé toxo gěgé bó ná nɔ́ bɛ́ agban d'é mɛ.

¹³Ée é bló mɔ̌ ɔ́, nǔɖuɖu tíin sukpɔ́ ɖo toxo e ɖo axɔ́súɖuto tɔn mɛ lɛ́ɛ bǐ mɛ; é bɛ́ ahwanfuntɔ́ e syɛ́n ganjí lɛ́ɛ ɖó Jeluzalɛ́mu.

¹⁴Ahwanfuntɔ́ énɛ́ lɛ́ɛ ɔ́, yě kplé ɖo hɛ̌nnu yětɔn yětɔn mɛ; ahwangán ɖaxó ɖaxó e ɖo akɔta Judáa tɔn ɔ́ mɛ lɛ́ɛ ɖíe: Adina. É kpa acɛ dó ahwanfuntɔ́ syɛ́nsyɛ́n adɔ̌kpo afɔtɔn nu (300.000).

¹⁵Yexoxanáni; é kpa acɛ dó ahwanfuntɔ́ adɔ̌kpo wɛ̌nɛ nu (280.000).

¹⁶Amasíya Zikli ví ɔ́. Éyɛ́ ɖésúnɔ wɛ ɖó jlǒ bó ná wa azɔ̌ nú Mawu Mavɔmavɔ. É kpa acɛ dó ahwanfuntɔ́ syɛ́nsyɛ́n adɔ̌kpo wǒ nu (200.000).

¹⁷Ahwangán ɖaxó ɖaxó e ɖo akɔta Bɛnjamɛ́ɛ tɔn mɛ lɛ́ɛ ɖíe: ahwanfuntɔ́ syɛ́nsyɛ́n Eliyada. É kpa acɛ dó ahwanfuntɔ́ adɔ̌kpo wǒ nu (200.000).

¹⁸Yexozavadi; é kpa acɛ dó ahwanfuntɔ́ adɔ̌kpo wɛ̌nɛ nu (280.000); yě bǐ ko sɔ́ ahwan nú.

¹⁹Yě mɛ e ɖo azɔ̌ wa nú axɔ́sú ɔ́ wɛ ɖo Jeluzalɛ́mu lɛ́ɛ nɛ́. È ka xa mɛ e axɔ́sú ɔ́ fɔ ɖó toxo e é mɛ ahohó lɛ́ lɛ̌ dó ɖo axɔ́súɖuto tɔn mɛ lɛ́ɛ d'é mɛ ǎ.