Read fon 2 Tan 19 Bible Online

2 Tan 19 - fon bible

2 Tan 19

¹Axɔ́sú Judáa tɔn Jozafáti lɛ́ kɔ wá xwé tɔn gbe ɖo Jeluzalɛ́mu wǔyɛ́yɛ́ afɔyɛ́yɛ́.

²Nǔmɔtɔ́ Jehu Hanáni ví ɔ́ ká yi kpé e, bó ɖɔ n'i ɖɔ: “Étɛ́wú wɛ a yi gɔ́ alɔ nú nǔnyanyawatɔ́? È nǎ yí wǎn nú mɛ e gbɛ́ wǎn nú Mawu Mavɔmavɔ lɛ́ɛ wɛ a? Mawu Mavɔmavɔ sin xomɛ dó we ɖó nǔ énɛ́ e a wa ɔ́ wú.

³Nǔ ɖo mɔ̌ có, a wa nǔ ɖagbe gěgé, ɖó a dǒ vodún Acela e ɖo to towe mɛ lɛ́ɛ bǐ zo, lobo sɛn Mawu kpódó ayi towe bǐ kpó.”

⁴Jeluzalɛ́mu wɛ Jozafáti nɔ nɔ, có é nɔ́ lɛ́ gbɔn to ɔ́ bǐ jí, sín Bɛ̌-Ceva káká yi Eflayímu sókan mɛ, bó nɔ ɖɔ nú Izlayɛ́li ví lɛ́ɛ ɖɔ yě ní lɛ́ kɔ wá Mawu Mavɔmavɔ, Mawu tɔ́gbó yětɔn lɛ́ɛ tɔn ɔ́ gɔ́n.

⁵É sɔ́ hwɛɖɔtɔ́ ɖó toxo e è mɛ ahohó lɛ́ lɛ̌ dó ɖo Judáa lɛ́ɛ bǐ nu.

⁶Ée axɔ́sú Jozafáti sɔ́ yě ɔ́, é ɖɔ nú yě ɖɔ: “Mi kpé nukún dó azɔ̌ mitɔn wú bó wa. Đó hwɛ e ná ɖɔ wɛ mi ɖe lɛ́ɛ ɔ́, gbɛtɔ́ nyíkɔ mɛ ná ɖɔ hwɛ dó wɛ mi ɖe ǎ, lo ɔ́, Mawu Mavɔmavɔ nyíkɔ mɛ ná ɖɔ hwɛ dó wɛ mi ɖe; é ná ɖo kpɔ́ xá mi hwenu e mi ná ɖo hwɛ ɖɔ wɛ é.

⁷Mi bo ɖó sísí nú Mawu Mavɔmavɔ ganjí, bó hɛn ayi dó azɔ̌ e wa gbé mi ja ɔ́ wú, ɖó Mawu Mavɔmavɔ, Mawu mǐtɔn nɔ́ yí gbe nú hwɛagɔdídó ǎ, é ka nɔ́ yí gbe ɖɔ è nǐ nɔ gbɛtɔ́ jí ǎ, é nɔ́ ba ɖɔ è nǐ nɔ ɖu kpa ǎ.”

⁸Jozafáti bló nǔ ɖokpó ɔ́ ɖo Jeluzalɛ́mu; é ɖe Levíi ví ɖé lɛ́ɛ, vɔ̌sánú-xwlémawutɔ́ ɖé lɛ́ɛ, kpódó hɛ̌nnugán Izlayɛ́li tɔn ɖé lɛ́ɛ kpó, bɔ yě ná nɔ́ xwedó sɛ́n dó ɖɔ hwɛ ɖo Mawu Mavɔmavɔ nyǐkɔ mɛ, bó ná nɔ́ ɖɔ hwɛ gbo nú Jeluzalɛ́munu lɛ́ɛ.

⁹Ée Jozafáti ɖe yě ɔ́, é ɖɔ nú yě ɖɔ: “Mi ɖó ná ɖó sísí nú Mawu Mavɔmavɔ, bó ná sixú wa nǔ kpó ayixa mitɔn bǐ kpó, kpódó gbejíninɔ kpó.

¹⁰Nɔví mitɔn hwɛɖɔtɔ́ e ɖo toxo lɛ́ɛ mɛ lɛ́ɛ ɖě zě hwɛ ɖé wá gɔ̌n mitɔn hweɖěbǔnu hǔn, mi ɖe yě ɖó ali jí: é sixú nyí mɛ wɛ è hu, é sixú nyí sɛ́n ɔ́ jí dɔn nǔ dó wɛ è ɖe, abǐ nǔ e Mawu Mavɔmavɔ zɔ́n lɛ́ɛ, abǐ gbeta tɔn lɛ́ɛ, abǐ hwɛndo lɛ́ɛ; mi ɖe yě ɖó ali jí bónú yě ma wá hu hwɛ dó Mawu Mavɔmavɔ, bónú Mawu Mavɔmavɔ wá sin xomɛ dó mi kpó vǐ mitɔn lɛ́ɛ kpó ó. Lě e mi ná bló gbɔn, bó ma ná hu hwɛ ǎ é nɛ́.

¹¹Amaliyahu, vɔ̌sánú-xwlémawutɔ́ ɖaxó ɔ́ ká ɖo mi nu, bó ná nɔ kpé nukún nǔ e kan Mawu Mavɔmavɔ lɛ́ɛ bǐ wǔ. Zevadiyahu, Yicimayɛ́li ví e nyí gǎn hɔn-yitɔ́ ɖo axɔ́súɖuto Judáa tɔn ɔ́ mɛ ɔ́ ná nɔ kpé nukún dó nǔ e kan axɔ́sú ɔ́ lɛ́ɛ bǐ wú. Levíi ví lɛ́ɛ ka ná nɔ́ dó alɔ mi. Mi bo ɖó kan dó azɔ̌ wú, lobo nú Mawu Mavɔmavɔ ní nɔ kpɔ́ xá mɛ e ná bló ganjí é.”