Read fon 2 Tan 21 Bible Online

2 Tan 21 - fon bible

2 Tan 21

¹Jozafáti zán wá kú, bɔ è sɔ́ ɛ yi ɖó tɔ́gbó tɔn lɛ́ɛ sín yɔdo mɛ, ɖo Davídi Toxo mɛ, bɔ vǐ tɔn Yexolámu ɖu axɔ́sú ɖó tɛn tɔn mɛ.

²Yexolámu ɖó nɔví súnnu gěgé; yě bǐ wɛ nyí axɔ́sú Jozafáti ví. Yě wɛ nyí Azalya, Yexiyɛ́li, Zekaliyahu, Azalyahu, Mikaɛli kpódó Cefátiyahu kpó.

³Tɔ́ yětɔn ná nǔjɔnǔ yě. É ná yě kpatágan, siká kpó nǔ xɔ akwɛ́ tɛnmɛ tɛnmɛ lɛ́ɛ kpó, bó sɔ́ yě gǎn ɖó toxo e ɖo Judáa bɔ è mɛ ahohó lɛ́ lɛ̌ dó lɛ́ɛ gěgé nu. Lo ɔ́, Yexolámu wɛ é ɖe, bɔ é ná nɔ tɛn tɔn mɛ, ɖó é wɛ nyí vǐɖaxó tɔn.

⁴Ée Yexolámu yi zinkpo jí, bó zé acɛkpikpa tɔn jínjɔ́n ayǐ ganjí ɔ́, é zɔ́n bɔ è hu nɔví tɔn súnnu lɛ́ɛ bǐ kpódó gǎn e ɖo axɔ́súɖuto tɔn mɛ lɛ́ɛ ɖěe kpó.

⁵Xwe gban-nukún-we (32) ɖó wɛ Yexolámu ɖe bó yi zinkpo jí ɖo Jeluzalɛ́mu, bó ɖu axɔ́sú nú xwe tántɔn.

⁶É lɔmɔ̌ wa nǔ nyanya Izlayɛ́li xɔ́sú lɛ́ɛ ɖɔhun. É wa nǔ e ma nyɔ́ Mawu Mavɔmavɔ nukún mɛ ǎ é, lě e Akábu hɛ́nnu ɔ́ bló gbɔn é, ɖó é da Akábu sín vǐ ɖokpó.

⁷ Lo ɔ́, Mawu Mavɔmavɔ jló ná vívá kún nú Davídi xwédo ɔ́ ǎ. É jló ná sú kún tɔn dó ǎ, ɖó akpá e é dó nú mɛsɛntɔ́ tɔn Davídi ɖɔ kúnkan tɔn ná ɖu axɔ́sú káká sɔ́yi é wú.

⁸ Hwenu e axɔ́sú Yexolámu ɖo zinkpo jí ɔ́, Edɔ́mu sín togun ɔ́ fɔ́n gǔ dó acɛkpikpa Judáa tɔn jí, bó sɔ́ axɔ́sú ɖokpó ɖó Edɔ́mu to ɔ́ nu.

⁹Ée Yexolámu se mɔ̌ ɔ́, é bɛ́ ahwankɛkɛ́ví tɔn lɛ́ɛ bɔ é kpó ahwangán tɔn lɛ́ɛ bǐ kpó jɛ ali; Edɔ́munu lɛ́ɛ ká xá yě, bɔ zǎn xóxó mɛ ɔ́, Yexolámu kpó ahwangán e kpa acɛ dó ahwankɛkɛ́ví tɔn lɛ́ɛ nu lɛ́ɛ kpó tɛ́nkpɔ́n, bó ba ali bó gbɔn Edɔ́munu lɛ́ɛ tɛ́ntin.

¹⁰Sín gbe énɛ́ ɔ́ gbe ɔ́, Edɔ́mu to ɔ́ gosín acɛ Judáa tɔn mɛ, bó kpo ɖo mɔ̌ káká jɛ égbé. Hwenɛ́nu ɖokpó ɔ́, Livuna toxo ɔ́ lɔmɔ̌ fɔ́n gǔ dó acɛkpikpa Yexolámu tɔn jí, ɖó é jó Mawu Mavɔmavɔ, Mawu e tɔ́gbó tɔn lɛ́ɛ sɛn é dó.

¹¹Yexolámu tlɛ mɛ vodúnkpe lɛ́ɛ ɖó Judáa sín só lɛ́ɛ ta. É bló mɔ̌ dó dɔn Jeluzalɛ́munu lɛ́ɛ kpódó Judáanu lɛ́ɛ kpó bɔ yě sɔ́ nɔ́ nɔ gbejí nú Mawu Mavɔmavɔ ǎ.

¹²Gbeyíɖɔ Mawu tɔn Elíi bló wěma sɛ́ dó e gbe ɖokpó, bɔ wěma ɔ́ ɖo ɖiɖɔ wɛ ɖɔ: “Xó e Mawu Mavɔmavɔ, Mawu tɔ́gbó towe Davídi tɔn ɔ́ ɖɔ ɔ́ ɖíe: ‘A wa nǔ tɔ́ towe Jozafáti ɖɔhun ǎ; a ka wa nǔ axɔ́sú Judáa tɔn Asa ɖɔhun ǎ.

¹³Izlayɛ́li xɔ́sú lɛ́ɛ ɖɔhun wɛ a wa nǔ. A wa nǔ yě ɖɔhun ɖó a dɔn Jeluzalɛ́munu lɛ́ɛ kpó Judáanu ɖě lɛ́ɛ kpó, bɔ yě jɛ vodún sɛn jí Akábu hɛ́nnu ɔ́ ɖɔhun. É víví hwe, bɔ a hu nɔví hwi ɖésúnɔ tɔn súnnu e nyɔ́ hú we lɛ́ɛ.

¹⁴Énɛ́ ɔ́ wú wɛ Mawu Mavɔmavɔ ná sɛ́ awě ɖaxó ɖokpó dó togun towe, bó ná sɛ́ dó vǐ towe lɛ́ɛ kpó asi towe lɛ́ɛ kpó; mɔ̌ ɖokpó ɔ́, é ná hɛn dɔkun towe lɛ́ɛ bǐ gblé.

¹⁵Hwi ɖésú ɔ́, é ná sɛ́ azɔn tɛnmɛ tɛnmɛ dó we, xomɛzɔn ɖé ná bɛ́ nú we bó fɔ́n ɔ́, é ná nɔ́ ɖo syɛ́nsyɛ́n d'é jí wɛ káká bɔ adɔ e ɖo xo towe mɛ lɛ́ɛ ná tɔ́n jɛ wěxo.’ ”

¹⁶Énɛ́ ɔ́, Mawu Mavɔmavɔ fɔ́n Filisitɛ́ɛn lɛ́ɛ kpódó Alabíinu e ɖo Etiopíinu lɛ́ɛ kpá lɛ́ɛ kpó dó Yexolámu jí.

¹⁷Yě wǎ tɔ́n ahwan axɔ́súɖuto Judáa tɔn ɔ́, bó nyi ahwan byɔ́ to ɔ́ mɛ, bó bɛ́ dɔkun e ɖo hɔnmɛ lɛ́ɛ bǐ, bó wlí axɔ́sú ɔ́ sín vǐ lɛ́ɛ kpó asi tɔn lɛ́ɛ kpó. Kpodé tɔn Akaziasi kɛ́ɖɛ́ wɛ yě jó dó n'i.

¹⁸Ée nǔ énɛ́ lɛ́ɛ bǐ jɛ wá yi ɔ́, Mawu Mavɔmavɔ sɛ́ xomɛzɔn e ma ná gbɔ gbeɖé ǎ ɔ́ dó Yexolámu.

¹⁹Azɔn ɔ́ fɔ́n ɔ́, é nɔ́ ɖo syɛ́nsyɛ́n d'é jí wɛ, káká bó bló xwe we kpíkpé, bɔ adɔ tɔn lɛ́ɛ tɔ́n jɛ wěxo. É ɖo wǔvɛ́ ɖaxó ɖé mɔ wɛ mɔ̌ káká bó kú. Ée é kú ɔ́, toví tɔn lɛ́ɛ flɔ́ myɔ dó wlí yɛ̌yi n'i, lě e yě bló gbɔn nú tɔ́gbó tɔn lɛ́ɛ é ǎ.

²⁰Xwe gban-nukún-we (32) ɖó wɛ Yexolámu ɖe, bó yi zinkpo jí ɖo Jeluzalɛ́mu, bó ɖu axɔ́sú nú xwe tántɔn. Ée Yexolámu zán kú ɔ́, kú tɔn vɛ́ nú mɛ ɖěbǔ ǎ. È ɖi i ɖó Davídi Toxo mɛ. Amɔ̌, è sɔ́ ɛ yi ɖó yɔdo e mɛ è nɔ ɖi axɔ́sú lɛ́ɛ dó ɔ́ mɛ ǎ.