Read fon 2 Tan 22 Bible Online

2 Tan 22 - fon bible

2 Tan 22

¹Akaziasi sín vǐ kpodé Yexolámu tɔn ɔ́ wɛ Jeluzalɛ́munu lɛ́ɛ sɔ́ axɔ́sú ɖó tɔ́ tɔn tɛnmɛ. Đó vǐ tɔn mɛxó lɛ́ɛ bǐ wɛ mɛ wɔ̌buwɔ́bú e nyi ahwan xwedó Alabíinu lɛ́ɛ, bó byɔ́ ahwankpá yětɔn mɛ lɛ́ɛ hu. Lě e Akaziasi Yexolámu ví ɔ́ húzú Judáa xɔ́sú gbɔn é nɛ́.

²Xwe ko ɖó wɛ Akaziasi ɖe hwenu e é yi axɔ́súzinkpo jí ɖo Jeluzalɛ́mu é; é ɖu axɔ́sú nú xwe ɖokpó. Nɔ tɔn nɔ nyí Atalíi, bó jɔ ɖo Ɔmúli kún mɛ.

³É lɔmɔ̌ wa nǔ nyanya Akábu xwédo ɔ́ ɖɔhun, ɖó nǔ nyanya wɛ nɔ tɔn nɔ kplɔ́n ɛ.

⁴É wa nǔ e ma nyɔ́ Mawu Mavɔmavɔ nukún mɛ ǎ é, Akábu xwédo ɔ́ ɖɔhun. Đó ée tɔ́ tɔn kú ɔ́, Akábu mɛ lɛ́ɛ jɛ nǔ kplɔ́n ɛ jí, lobo dɔn ɛ bú ali.

⁵Nǔ e yě kplɔ́n Akaziasi lɛ́ɛ wɛ é xwedó, bɔ é kpó Yolámu axɔ́sú Izlayɛ́li tɔn Akábu ví ɔ́ kpó yi ahwan fun xá Hazayɛ́li Silíi xɔ́sú ɔ́ gbé, ɖo Hlamɔti, ɖo Galadi yíkúngban jí. Hwenu e yě ɖo ahwan ɔ́ fun wɛ ɔ́, Silíinu lɛ́ɛ gblé wǔ Yolámu.

⁶Énɛ́ ɔ́, axɔ́sú Yolámu lɛ́ kɔ yi Izleyɛ́li bó ná kpé nukún dó wǔ e è gblě ɔ́ wú. Judáa xɔ́sú Akaziasi yi kpɔ́n Yolámu Akábu ví ɔ́, ɖo Izleyɛ́li, ɖó é ɖo wǔvɛ́ mɔ wɛ.

⁷Mawu ɖó dó kpɔ́n e Akaziasi yi kpɔ́n Yolámu ɔ́ wú, lobo wa nǔ xá ɛ. Ée Akaziasi wá Yolámu gɔ́n ɔ́, é kpó é kpó ɖidó, bó yi kpé Jehu Nimuci ví ɔ́. Jehu ɔ́, Mawu Mavɔmavɔ ka ko sɔ́ ɛ axɔ́sú, bɔ é ná vívá kún nú Akábu xwédo ɔ́.

⁸Jehu wa nǔ xá Akábu xwédo ɔ́ lě e Mawu Mavɔmavɔ ɖɔ gbɔn é. Ée é yi Judáa gán lɛ́ɛ kpó Akaziasi nɔví súnnu lɛ́ɛ sín vǐ e nɔ wa azɔ̌ nú axɔ́sú ɔ́ lɛ́ɛ kpó gɔ́n ɔ́, é hu bǐ.

⁹Énɛ́ ɔ́ gúdo ɔ́, Jehu sɛ́ mɛ dó Akaziasi gbé mɛ bɔ yě mɔ ɛ wlí ɖo Samalíi fí e é hɔn hwlá cí é, bó kplá ɛ wá Jehu gɔ́n, bó hu i. È ka ɖi i, ɖó è mɔ ɖɔ axɔ́sú Jozafáti e sɛn Mawu Mavɔmavɔ kpó ayixa tɔn bǐ kpó ɔ́ sín vǐvú wɛ. Ée è hu i mɔ̌ ɔ́, mɛ ɖěbǔ sɔ́ kpo ɖo xwédo Akaziasi tɔn mɛ, bó sixú ɖu axɔ́sú ǎ.

¹⁰Ée Atalíi axɔ́sú Akaziasi sín nɔ se ɖɔ vǐ émítɔn kú ɔ́, é jɛ mɛ e ko jɔ ɖo axɔ́ví kún mɛ ɖo Judáa lɛ́ɛ bǐ hu jí.

¹¹Lo ɔ́, cóbónú é ná hu mɛ lɛ́ɛ ɔ́, Yexosavati axɔ́sú Yexolámu ví nyɔ̌nu Akaziasi nɔví ɔ́ zé Joasi Akaziasi ví ɔ́ sín axɔ́sú ví lɛ́ɛ mɛ; é zé e yi hwlá hwenu e è ɖo mɛ lɛ́ɛ hu wɛ é. É zé vǐ ɔ́ kpó nyɔ̌nu e ɖo vǐ ɔ́ hɛn wɛ ɔ́ kpó yi ɖó xɔ e mɛ è nɔ dɔ́ ɖo Mawu xwé gbe ɔ́ ɖokpó mɛ. Lě e Joasi gló Atalíi, bo ma kú ǎ gbɔn é nɛ́.

¹²Vǐ ɔ́ kpó nyɔ̌nu e nɔ́ hɛn ɔ́ kpó nɔ hwlǎhwlá ɖo yě gɔ́n ɖo Mawu xwé gbe káká nú xwe ayizɛ́n. Atalíi ɔ́ ka ɖo axɔ́sú ɖu wɛ ɖo to ɔ́ nu hwenɛ́nu.