Read fon 2 Tan 24 Bible Online

2 Tan 24 - fon bible

2 Tan 24

¹Xwe tɛ́nwe wɛ Joasi ɖó bó yi zinkpo jí; é ɖu axɔ́sú ɖo Jeluzalɛ́mu nú xwe kanɖé. Nɔ tɔn ɔ́, Bɛ̌-Cevanu wɛ, bɔ è nɔ ylɔ́ ɛ ɖɔ Sivía.

²Joasi nɔ wa nǔ e nyɔ́ Mawu Mavɔmavɔ nukún mɛ ɔ́ hwenu e vɔ̌sánú-xwlémawutɔ́ Yexoyada ɖo gbɛ é.

³Yexoyada da asi we nú Joasi, bɔ é ji vǐ súnnu bó ji nyɔ̌nu.

⁴É wá jɛ hweɖénu bɔ Joasi mɔ ɖɔ émí ná bló Mawu Mavɔmavɔ xwé ɔ́ ɖó.

⁵Énɛ́ ɔ́, é kplé vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó, bó ɖɔ nú yě ɖɔ: “Mi ná nɔ́ gbɔn toxo e ɖo Judáa lɛ́ɛ mɛ, bó ná nɔ́ yí akwɛ́ ɖo Izlayɛ́li ví lɛ́ɛ bǐ sí, bó ná nɔ́ dó bló xwé Mawu mitɔn tɔn ɖó xwewú xwewú. Mi ní ká yá wǔ sí te dó azɔ̌ énɛ́ ɔ́ wú.” É ɖɔ mɔ̌ có Levíi ví lɛ́ɛ yá wǔ sí te dó azɔ̌ wú ǎ.

⁶ Axɔ́sú ɔ́ ylɔ́ Yexoyada vɔ̌sánú-xwlémawutɔ́ ɖaxó ɔ́, bó ɖɔ n'i ɖɔ: “Tokwɛ́ e Mɔyízi mɛsɛntɔ́ Mawu Mavɔmavɔ tɔn ɔ́ ɖɔ è nǎ yǐ ɖo Izlayɛ́linu lɛ́ɛ sí, bó ná dó bló goxɔ e mɛ akɔjijɛgbá ɔ́ ɖe ɔ́ ɖó ná bɔ Izlayɛ́li togun ɔ́ bǐ yí gbe ná ɔ́, étɛ́wú wɛ a ma kpé nukún d'é wú, bónú Levíi ví lɛ́ɛ ní yi yí ɖo Judáanu lɛ́ɛ kpó Jeluzalɛ́munu lɛ́ɛ kpó sí ǎ?

⁷Đó Atalíi, nǎwe dídá énɛ́ ɔ́ kpódó mɛ tɔn lɛ́ɛ kpó jó Mawu xwé ɔ́ dó, bɔ é gba; énɛ́ ɔ́ víví hwedó e, bɔ yě bɛ̌ nǔ e ɖo xwé ɔ́ gbe lɛ́ɛ bǐ, dó yi sɛn vodún Baalu lɛ́ɛ ná.”

⁸Énɛ́ ɔ́, axɔ́sú ɔ́ ɖe gbe ɖɔ è nǐ bló gbǎ ɖokpó, bó zé ɖó Mawu Mavɔmavɔ xwé ɔ́ sín hɔntogbó kpá ɖo kɔ́xo.

⁹Énɛ́ ɔ́ gúdo ɔ́, è ɖǒ gan gbɔn Judáa kpó Jeluzalɛ́mu kpó; è ɖǒ gan ɖɔ è nǐ zé tokwɛ́ e xó Mɔyízi mɛsɛntɔ́ Mawu Mavɔmavɔ tɔn ɔ́ ɖɔ ɖo gbětótló mɛ ɔ́ wá; tokwɛ́ e xó é ɖɔ è nǐ yǐ ɖo Izlayɛ́li ví lɛ́ɛ sí ɔ́, è ɖǒ gan ɖɔ è nǐ zé wá.

¹⁰Ée gǎn lɛ́ɛ bǐ kpó togun ɔ́ bǐ kpó se ɔ́, é víví nú yě, bɔ yě wá jɔ akwɛ́ dó gbǎ ɔ́ mɛ káká bɔ é gɔ́.

¹¹Ée hwenu e è nǎ zé gbǎ ɔ́ wá nú Levíi ví lɛ́ɛ, bɔ yě ná kpɔ́n akwɛ́ e ɖ'é mɛ ɔ́, bó ná ɖó gbe nú axɔ́sú ɔ́ su ɔ́, è zě wá. Ée è zě wá ɔ́, akwɛ́ e yě mɔ ɖ'é mɛ ɔ́ sukpɔ́ káká bɔ wěgbójínɔtɔ́ axɔ́sú ɔ́ tɔn kpódó nǔjíkpɔ́ntɔ́ vɔ̌sánú-xwlémawutɔ́ ɖaxó ɔ́ tɔn kpó húzú akwɛ́ ɔ́ sín gbǎ ɔ́ mɛ. Ée yě húzú sín gbǎ ɔ́ mɛ ɔ́, yě lɛ́ zé gbǎ ɔ́ yi ɖó tɛn tɔn mɛ. Bɛ́ sín hwenɛ́nu ɔ́, è nɔ bló mɔ̌ ayǐhɔ́ngbe ayǐhɔ́ngbe; akwɛ́ e è nɔ mɔ ɔ́ nɔ́ sukpɔ́ ɖésú.

¹²Énɛ́ ɔ́, axɔ́sú ɔ́ kpó Yexoyada kpó bɛ́ jó nú mɛ e lɔmɛ è zě Mawu Mavɔmavɔ xwé ɔ́ sín azɔ̌ ɔ́ dó lɛ́ɛ. Bɔ yědɛɛ yí mɛ e nɔ kpa awǐnnya lɛ́ɛ, xɔgbátɔ́ lɛ́ɛ kpó mɛ e nɔ wa gan kpó ganvɔ kpó sín azɔ̌ lɛ́ɛ kpó, bónú yě ná bló Mawu Mavɔmavɔ xwé ɔ́ ɖó, bɔ é ná syɛ́n ganjí.

¹³Azɔ̌watɔ́ lɛ́ɛ jɛ azɔ̌ jí. Azɔ̌ nyɔ́ wa yětɔn zɔ́n bɔ fí e xwé ɔ́ gblé ɖe lɛ́ɛ ɔ́, yě jɛ blǒbló ɖó jí, bɔ xwé ɔ́ jɛ lě e é ɖe gbɔn ɖ'ayǐ ɔ́, bó syɛ́n ganjí.

¹⁴Ée yě wa azɔ̌ lɛ́ɛ fó ɔ́, mɛ e lɔmɛ è zě azɔ̌ ɔ́ dó lɛ́ɛ bɛ́ akwɛ́ e kpo ɔ́ wá nú axɔ́sú ɔ́ kpó Yexoyada kpó. Ée yě zě wá é ɔ́, axɔ́sú ɔ́ kpó Yexoyada kpó zé dó bló nǔ e è nɔ zán ɖo Mawu Mavɔmavɔ xwé gbe lɛ́ɛ ná: nǔ e è nɔ zán ɖo sinsɛn hwenu lɛ́ɛ, nǔ e è nɔ zán ɖo vɔ̌sísá hwenu lɛ́ɛ, kɔ́fu kpódó gannú kpó e è sɔ́ siká dó bló ná lɛ́ɛ, kpó ée è sɔ́ kpatágan dó bló ná lɛ́ɛ kpó. Bɔ hwenu e Yexoyada ɖo gbɛ ɔ́, è nɔ sá vɔ̌ e è nɔ dó zo ɔ́ ɖo Mawu Mavɔmavɔ xwé gbe hwɛhwɛ.

¹⁵Yexoyada wá kpo bǐ. Xwe kantɔn wǒ (130) wɛ é ɖó bó kú; é dɔ́ ji ɖésú.

¹⁶È yi ɖi i dó yɔdo e mɛ è nɔ ɖi axɔ́sú lɛ́ɛ dó ɔ́ mɛ, ɖo Davídi Toxo mɛ, ɖó é wa ɖagbe nú Izlayɛ́li togun ɔ́; é sɔ́ Mawu kpódó Mawu xwé ɔ́ kpó su.

¹⁷Ée Yexoyada zán wá kú ɔ́, Judáa sín gǎn lɛ́ɛ wá axɔ́sú ɔ́ gɔ́n, bó kan xwé byɔ́. Bɛ́ sín hwenɛ́nu ɔ́, é nɔ́ bló nǔ e yě nɔ́ ɖɔ n'i lɛ́ɛ é.

¹⁸Ée axɔ́sú ɔ́ jɛ nǔ e yě nɔ́ kplɔ́n ɛ lɛ́ɛ xwedó jí ɔ́, Izlayɛ́li ví lɛ́ɛ jó Mawu Mavɔmavɔ, Mawu tɔ́gbó yětɔn lɛ́ɛ tɔn ɔ́ sín xwé ɔ́ dó, bó jɛ vodún Acela kpó bǒcyɔ ɖěvo ɖěvo lɛ́ɛ kpó sɛn jí. Énɛ́ ɔ́ wú wɛ Mawu Mavɔmavɔ sin xomɛ dó axɔ́súɖuto Judáa tɔn ɔ́ kpó Jeluzalɛ́mu toxo ɔ́ kpó.

¹⁹Mawu Mavɔmavɔ wá sɛ́ gbeyíɖɔ tɔn lɛ́ɛ dó yě bónú yě ná ɖɔ xó nú yě, bónú yě ná lɛ́ kɔ wá gɔ̌n tɔn. Lo ɔ́, mɛɖé ɖótó yě ǎ.

²⁰ Ée mɛɖé má ɖótó yě ǎ ɔ́, Yɛ Mawu tɔn wá Zekaliya vɔ̌sánú-xwlémawutɔ́ Yexoyada ví ɔ́ jí, bɔ é nɔ te togun ɔ́ nukɔn, bó ɖɔ: “Mi ɖótó xó e ɖɔ nú mi wɛ Mawu ɖe é; é ɖɔ: ‘Étɛ́wú wɛ mi nɔ gba sɛ́n ce lɛ́ɛ? Nǔɖé sɔ́ ná nyɔ́ nú mi ǎ. Mi jó nyɛ Mawu Mavɔmavɔ dó, nyi lɔmɔ̌ ná jó mi dó.’ ”

²¹Ée Zekaliya ɖɔ mɔ̌ ɔ́, yě blá sé ta tɔn, bɔ axɔ́sú ɔ́ ná gbe lobɔ yě nyi awǐnnyaglo dó hu i sɔ́ nyi kɔ́xota ɖo Mawu Mavɔmavɔ xwé ɔ́ gbe.

²²Axɔ́sú Joasi sɔ́ flín ɖagbe e Yexoyada Zekaliya tɔ́ ɔ́ kó wa n'i é ǎ, bó hu vǐ tɔn. Ée Zekaliya ja kúkú gbé ɔ́, é ɖɔ: “Mawu Mavɔmavɔ mɔ nǔ e wa wɛ a ɖe é, é ná byɔ́ axɔ́ tɔn we.”

²³Ée Zekaliya kú ɔ́, xwe e jɛ fínɛ́ ɔ́ mɛ ɔ́, ahwangɔnu Silíi tɔn ɔ́ wá tɔ́n ahwan axɔ́sú Joasi, bó byɔ́ axɔ́súɖuto Judáa tɔn ɔ́ kpó Jeluzalɛ́mu toxo ɔ́ kpó mɛ. Yě hu gǎn e ɖo toxo ɔ́ mɛ lɛ́ɛ bǐ, bó bɛ́ nǔ e yě mɔ lɛ́ɛ bǐ sɛ́ dó axɔ́sú Damási tɔn.

²⁴Silíinu e wá ahwan fun gbé lɛ́ɛ sukpɔ́ ǎ; yě sukpɔ́ ǎ có Mawu Mavɔmavɔ jó Judáanu tobutóbú ɖé nú yě bɔ yě hu, ɖó Judáanu lɛ́ɛ jó Mawu Mavɔmavɔ, Mawu tɔ́gbó yětɔn lɛ́ɛ tɔn dó. Lě e Mawu Mavɔmavɔ zán Silíinu lɛ́ɛ dó dɔn tó nú Joasi gbɔn ɔ́ nɛ́.

²⁵Silíinu lɛ́ɛ gblé wǔ i vantankánnyá bó jó e dó bó yi. Ée yě yi ɔ́, mɛsɛntɔ́ tɔn lɛ́ɛ yi kpá dó ta tɔn, bó wá hu i nyi zan tɔn jí, dó ba vɔ̌sánú-xwlémawutɔ́ Yexoyada sín vǐ e é hu ɔ́ sín hlɔn. È sɔ́ ɛ yi ɖi dó Davídi Toxo mɛ. È ka ɖi i dó yɔdo e mɛ è nɔ ɖi axɔ́sú lɛ́ɛ dó ɔ́ mɛ ǎ.

²⁶Mɛsɛntɔ́ e yi kpá dó Joasi ta lɛ́ɛ ɖíe: Zavadu kpódó Yexozavadi kpó. Zavadu ɔ́, nɔ tɔn nɔ nyí Cimɛyati; Amumɔ́ɔ ví wɛ. Yexozavadi ɔ́, nɔ tɔn nɔ nyí Cimuliti; Mɔwabunu wɛ.

²⁷È wlǎn Joasi ví lɛ́ɛ sín nyǐkɔ, bó wlán xó tobutóbú e Mawu ɖɔ dó Joasi wú gbɔn gbeyíɖɔ tɔn lɛ́ɛ jí é kpódó lě e è blǒ Mawu xwé ɔ́ ɖó gbɔn ɔ́ kpó dó wěma e è nɔ ylɔ́ ɖɔ Nǔtínmɛwéma axɔ́sú lɛ́ɛ tɔn é mɛ. Vǐ tɔn Amasiyasi wɛ ɖu axɔ́sú ɖó tɛn tɔn mɛ.