Read fon 2 Tan 25 Bible Online

2 Tan 25 - fon bible

2 Tan 25

¹Xwe koatɔ́n (25) wɛ Amasiyasi ɖó bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe koatɔ́n-nukún-ɛnɛ (29). Nɔ tɔn ɔ́, Jeluzalɛ́munu wɛ, bɔ è nɔ ylɔ́ ɛ ɖɔ Yexoadani.

²Amasiyasi nɔ wa nǔ e nyɔ́ Mawu Mavɔmavɔ nukún mɛ é, amɔ̌, ayixa tɔn bǐ ɖo Mawu jí ǎ.

³Ée Amasiyasi sín acɛkpikpa jínjɔ́n ayǐ bǐ é ɔ́, é hu mɛsɛntɔ́ e hu tɔ́ tɔn lɛ́ɛ é.

⁴ Amɔ̌, é ɖó alɔ vǐ yětɔn lɛ́ɛ ɖěbǔ wú ǎ. É bló lě e é ɖe gbɔn ɖo Mɔyízi sín sɛ́nwéma mɛ ɔ́, ɖó Mawu Mavɔmavɔ ɖɔ dó wěma ɔ́ mɛ ɖɔ: “È nǎ hu tɔ́ ɖó vǐ tɔn nu ǎ. È nǎ hu vǐ ɖó tɔ́ tɔn nu ǎ. Mɛ e wa nǔ nyi do ɔ́ wɛ è ɖǒ nǎ hu, ɖó nǔ e é wa ɔ́ nu.”

⁵Amasiyasi kplé súnnu e ɖo axɔ́súɖuto tɔn mɛ lɛ́ɛ, Judáanu kpó Bɛnjamɛ́ɛnu kpó, bó kpɔ́n hɛ̌nnu lɛ́ɛ mɛ, bó ɖe sɔ́ja afatɔ́ngán lɛ́ɛ kpó kanwekogán lɛ́ɛ kpó. È xa súnnu e sín xwe bɛ́ sín ko lɛ́ɛ bǐ, bó xa yě dó adɔ̌kpo afɔtɔn (300.000). Yě bǐ ko su ahwan yi bo nyɔ́ hwǎn kpó gǎglónú kpó zán.

⁶Amasiyasi lɛ́ sɔ́ kpatágan tɔ́nu atɔn mɔ̌ dó da sɔ́ja syɛ́nsyɛ́n e ɖo axɔ́súɖuto taligbé tɔn mɛ lɛ́ɛ adɔ̌kpo atɔ́ɔ́n (100.000) dó mɛ ɖě lɛ́ɛ jí.

⁷Lo ɔ́, ɖɛ̌mɛnu Mawu tɔn ɖokpó wá gɔ̌n tɔn, bó ɖɔ n'i ɖɔ: “Sɛ́mɛɖó, ma nú sɔ́ja Izlayɛ́li tɔn lɛ́ɛ xwedó we yi ó, ɖó Mawu Mavɔmavɔ ɖo mɛ e ɖo axɔ́súɖuto Totaligbé tɔn ɔ́ mɛ lɛ́ɛ jí ǎ.

⁸Ényí a kplá yě yi, bó ná bo dó gǎn bó fun ahwan gbɔn ɖěbǔ ɔ́, Mawu ná zin we dɛ́ ɖo kɛntɔ́ towe lɛ́ɛ nukɔn, ɖó è nǎ ɖu ɖ'é jí kpó è nǎ gbɔ kpó ɔ́, Mawu ɖokpónɔ wɛ nɔ́ ɖɔ.”

⁹Amasiyasi kanbyɔ́ ɖɛ̌mɛnu Mawu tɔn ɔ́ ɖɔ: “Nɛ̌ kpatágan tobutóbú e un sú sɔ́ja énɛ́ lɛ́ɛ ka ná nyí gbɔn?” Bɔ ɖɛ̌mɛnu Mawu tɔn ɔ́ yí gbe n'i ɖɔ: “Mawu Mavɔmavɔ hɛn ɔ́, é ná ná ée hú mɔ̌ ɔ́ we.”

¹⁰Ée é ɖɔ mɔ̌ ɔ́, Amasiyasi lɛ́ kɔ nú sɔ́ja Totaligbé tɔn e kplá ɛ wá lɛ́ɛ, bɔ yě ɖidó xwé kpó xomɛsin kpó. Yě sin xomɛ dó axɔ́súɖuto Judáa tɔn ɔ́ ɖésú.

¹¹Ée Amasiyasi lɛ́ kɔ nú sɔ́ja énɛ́ lɛ́ɛ ɔ́, é ná glǎglá éɖée, lobo nɔ sɔ́ja e kpo lɛ́ɛ nu, bó kplá yě yi Jɛtɔdo ɔ́ mɛ, bó hu sɔ́ja Edɔ́munu děgba we afɔwó (10.000).

¹²Bɔ Judáanu lɛ́ɛ wlí sɔ́ja děgba we afɔwó (10.000) gbɛɖe gbɛɖe, bó kplá yě yi só ɖé ta aga, lobo kpíkpé yě nyi dodomɛ, bɔ yě bǐ gba hánnyá.

¹³Lo ɔ́, sɔ́ja Izlayɛ́li tɔn e Amasiyasi ma ba ɖɔ yě ní xwedó émí ǎ, bó lɛ́ kɔ nú yě lɛ́ɛ ɔ́, yě nyi ahwan byɔ́ Judáa toxo lɛ́ɛ mɛ, bɛ́ sín Samalíi káká yi Bɛti-Holɔ́ni, bó hu gbɛtɔ́ afɔwó-afatɔ́n (3.000), bó bɛ́ nǔ yětɔn lɛ́ɛ kpɔ́ gégé.

¹⁴Ée Amasiyasi ɖu ɖo Edɔ́munu lɛ́ɛ jí, bó lɛ́ kɔ wá xwé ɔ́, é bɛ́ vodún Edɔ́mu tɔn lɛ́ɛ wá xwé, bó sɔ́ yě dó ɖó vodún tɔn, bó nɔ́ sɛn, lobo nɔ dó zǎlínkpɔ́n zo nú yě.

¹⁵Ée nǔ nyí mɔ̌ ɔ́, Mawu Mavɔmavɔ sin xomɛ dó Amasiyasi ɖésú, bó sɛ́ gbeyíɖɔ tɔn ɖokpó dó e. Gbeyíɖɔ ɔ́ wá kanbyɔ́ ɛ ɖɔ: “Étɛ́wú a ka ɖo vodún e ma kpé wú bó hwlɛ́n togun yětɔn gán ɖo nukɔn towe ǎ lɛ́ɛ sɛn wɛ?”

¹⁶Gbeyíɖɔ Mawu tɔn ɔ́ kpo ɖo xó ɖɔ wɛ, bɔ Amasiyasi yí xó sín nu tɔn bó kanbyɔ́ ɛ ɖɔ: “Wěɖexámɛtɔ́ ce wɛ a nyǐ a? Nyɛ wɛ sɔ́ we a? Nú a ma ba nú è nǎ hu we ǎ hǔn, yǎ wǔ xwɛ.” Ée é ɖɔ mɔ̌ ɔ́, gbeyíɖɔ Mawu tɔn ɔ́ sɔ́ dɔn nǔ ǎ, amɔ̌, é ɖɔ: “Un tunwun ɖɔ Mawu ɖɔ émí ná hu we, ɖó nǔ e a dǒ sin ɔ́ kpó xó ce e a ma jló ná se ǎ ɔ́ kpó wú.”

¹⁷Axɔ́sú Judáa tɔn Amasiyasi ɖótó mɛ ɖěvo lɛ́ɛ, bó sɛ́ mɛ dó Yexoázi Yoakázi ví, Jehu vívú, Izlayɛ́li xɔ́sú ɔ́ ɖɔ yě nǐ yi ɖɔ n'i ɖɔ: “Wǎ mǐ ná fun ahwan.”

¹⁸Bɔ Yexoázi ɖɔ sɛ́ dó Amasiyasi ɖɔ: “Wunkan byɔ́ vǐ sɛ́dlutín ɖo Libáan só jí, bó ná da nú vǐ tɔn, gběkanlin ɖokpó ka gbɔn wunkan ɔ́ jí, bó gbídí i.

¹⁹Ée a ɖu ɖo Edɔ́munu lɛ́ɛ jí é ɔ́, a ɖo ajɔ̌ jlá wɛ; a ɖo afɔ tɛ ayǐ wɛ; a ka kpé nǔɖé wú ǎ. A gbɔ bo nɔ xwé towe gbe ɔ́, é nyɔ́ nú we hú. Étɛ́wú a jlǒ ná dó ta ahwan e mɛ hwi kpó Judáanu lɛ́ɛ kpó bǐ ná yi dɔn ɖe é mɛ?”

²⁰Lo ɔ́, Amasiyasi wlí tó xó énɛ́ wú ǎ. Đó Mawu ko jló ná jó Amasiyasi kpó sɔ́ja tɔn lɛ́ɛ kpó nú kɛntɔ́ yětɔn lɛ́ɛ, ɖó yě húzú kpan nukɔn Edɔ́mu vodún lɛ́ɛ bó nɔ́ sɛn.

²¹Ée nǔ cí mɔ̌ ɔ́, Yexoázi axɔ́sú Izlayɛ́li tɔn ɔ́ sɔ́ ahwannú bɔ é kpó Amasiyasi kpó wá kplé ɖo Bɛti-Cɛmɛ́ci ɖo Judáa yíkúngban jí.

²²Izlayɛ́linu lɛ́ɛ ɖu ɖo Judáanu lɛ́ɛ jí, bɔ Judáanu lɛ́ɛ ɖokpó ɖokpó hɔn yi xwé.

²³Izlayɛ́li xɔ́sú Yexoázi wlí Judáa xɔ́sú Amasiyasi, Joasi ví, Akaziasi vívú ɔ́ ɖo Bɛti-Cɛmɛ́ci bó kplá ɛ yi Jeluzalɛ́mu. Ée é kplá ɛ yi Jeluzalɛ́mu é ɔ́, é mu Jeluzalɛ́mu sín ahohó ɔ́, sín Eflayímu hɔntogbó ɔ́ jí káká wá jɛ Zwemɛhɔntogbó ɔ́ jí. Fí e é mu ahohó ɔ́ gbɔn ɔ́ yi nǔjlɛ́kpo afɔɖé (200) mɔ̌.

²⁴É bɛ́ siká kpó kpatágan kpó, kpódó nǔ xɔ akwɛ́ tɛnmɛ tɛnmɛ kpó e ɖo Mawu xwé gbe, bɔ Ovɛ́di-Edɔ́mu nɔ cɔ́ lɛ́ɛ kpó, kpó ée ɖo dɔkunxɔ axɔ́sú ɔ́ tɔn mɛ lɛ́ɛ kpó. É bɛ́ mɛ e è wlǐ ɖó gbanu lɛ́ɛ lɔmɔ̌, lobo lɛ́ kɔ ɖidó Samalíi.

²⁵Ée Izlayɛ́li xɔ́sú Yexoázi zán kú é ɔ́, Judáa xɔ́sú Amasiyasi nɔ gbɛ xɔ xwe afɔtɔn.

²⁶Axɔ́sú Amasiyasi sín tan e kpo ɔ́, è wlǎn sín fí e é bɛ́ sín ɔ́ káká yi fí e é fó dó ɔ́ dó axɔ́sú Judáa tɔn lɛ́ɛ kpó Izlayɛ́li tɔn lɛ́ɛ kpó sín “Tan wéma” mɛ.

²⁷Sín hwenu e Amasiyasi lɛ́ kɔ sín Mawu Mavɔmavɔ gúdo ɔ́, lě e é kú gbɔn ɔ́ ɖíe: è blǎ gbě tɔn ɖo Jeluzalɛ́mu. É wá su gbe ɖokpó, bɔ é hɔn yi cí Lakíci toxo mɛ; amɔ̌, è tɔ́n gbě tɔn káká yi Lakíci dɔ̌n, bó hu i.

²⁸Ée é kú ɔ́, è zě cyɔ tɔn ɖó kɛkɛ́ví jí bɔ sɔ́ gěgé dɔn, bɔ è wǎ ɖi ɖó tɔ́gbó tɔn lɛ́ɛ sín yɔdo mɛ, ɖo Judáa sín toxo ɖaxó ɔ́ mɛ.