Read fon 2 Tan 29 Bible Online

2 Tan 29 - fon bible

2 Tan 29

¹Xwe koatɔ́n (25) wɛ Ezekiyási ɖó bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe koatɔ́n-nukún-ɛnɛ (29). È nɔ ylɔ́ nɔ tɔn ɖɔ Avíya; Zekaliya ví wɛ.

²Ezekiyási nɔ́ wa nǔ e nyɔ́ Mawu Mavɔmavɔ nukún mɛ ɔ́ tɔ́gbó tɔn Davídi ɖɔhun pɛ́pɛ́pɛ́.

³Ezekiyási wɛ hun Mawu Mavɔmavɔ xwé ɔ́ sín hɔn lɛ́ɛ, lobo bló yě ɖó xwe e xwe é yi zinkpo jí é. Sun e mɛ é yi zinkpo jí ɔ́ jɛ́n é bló yě ɖó.

⁴É ylɔ́ vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó, bó kplé yě ɖó Zǎnzǎnhwe jí sín tɛn ɔ́ mɛ,

⁵bó ɖɔ nú yě ɖɔ: “Levíi ví lɛ́ɛ mi, mi ɖótó mì, din ɔ́, mi slá wǔ nú miɖée, bó slá wǔ nú Mawu Mavɔmavɔ, Mawu tɔ́gbó mitɔn lɛ́ɛ tɔn sín xwé ɔ́, lobo bɛ́ nǔ e nyí suɖunú lɛ́ɛ bǐ sín xwé ɔ́ gbe.

⁶Đó tɔ́gbó mǐtɔn lɛ́ɛ nɔ gbejí ǎ. Yě wa nǔ e ma nyɔ́ Mawu Mavɔmavɔ, Mawu mǐtɔn nukún mɛ ǎ lɛ́ɛ. Yě jó e dó, yě ɖe kɔ sín Mawu Mavɔmavɔ xwé ɔ́ wú, lobo dó gǔdo.

⁷Yě dǒ vɛ̌ nú Mawu Mavɔmavɔ xwé ɔ́ káká bó sú hɔn lɛ́ɛ. Yě cí zogbɛ́n lɛ́ɛ, bó dó zǎlínkpɔ́n zo nú Mawu Izlayɛ́li tɔn ɔ́ ǎ; yě ká sá vɔ̌ e è nɔ dó zo lɛ́ɛ n'i ɖo Mawu Mavɔmavɔ xwé ɔ́ gbe ǎ.

⁸Énɛ́ ɔ́, Mawu Mavɔmavɔ sin xomɛ dó Judáanu lɛ́ɛ kpó Jeluzalɛ́munu lɛ́ɛ kpó, bó dó nǔ sin xá yě; nǔ e é wa xá yě ɔ́ zɔ́n bɔ yě húzú nǔ gbɛ́hɛn, nǔdábaɖa, bó húzú nǔkiko nú mɛ lɛ́ɛ, lě e mɔ gbɔn wɛ mi ɖe din kpó nukún mi ɖésúnɔ tɔn kpó é.

⁹Nǔ e zɔ́n bɔ tɔ́gbó mǐtɔn lɛ́ɛ cí ahwan, bɔ vǐ mǐtɔn súnnu kpó nyɔ̌nu kpó, kpódó asi mǐtɔn lɛ́ɛ kpó ɖo kannumɔgbénu ɔ́ nɛ́.

¹⁰Din ɔ́, un jló ná jɛ akɔ xá Mawu Mavɔmavɔ, Mawu Izlayɛ́li tɔn ɔ́, bónú xomɛ tɔn ná fá dó mǐ wǔ.

¹¹Vǐ ce lɛ́ɛ mi, din ɔ́, mi gɔn vɛ̌ dó nú nǔ, ɖó Mawu Mavɔmavɔ wɛ sɔ́ mi, bónú mi ná nɔ nukɔn tɔn, bó ná wa azɔ̌ n'i, bó ná nyí mɛsɛntɔ́ tɔn, bó ná nɔ́ dó zǎlínkpɔ́n zo n'i.”

¹²Ée é ɖɔ mɔ̌ ɔ́, Levíi ví e sí te lɛ́ɛ ɖíe: xwédo Kexáti tɔn mɛ ɔ́, Maxáti Amasayi ví ɔ́ kpódó Yoɛ́li Azalyahu ví ɔ́ kpó sí te. Xwédo Mɛlali tɔn mɛ ɔ́, Kícu Avudi ví ɔ́ kpódó Azalyahu Yexalelɛ́li ví ɔ́ kpó sí te. Xwédo Gɛɛcɔ́ni tɔn mɛ ɔ́, Yoáxi Zimuma ví ɔ́ kpó Edɛ́ni Yoáxi ví ɔ́ kpó sí te.

¹³Xwédo Elisafáni tɔn mɛ ɔ́, Cimuli kpó Yeyiɛ́li kpó sí te. Xwédo Asáfu tɔn mɛ ɔ́, Zekaliya kpó Mataniyahu kpó sí te.

¹⁴Xwédo Hemani tɔn mɛ ɔ́, Yexiyɛ́li kpó Cimɛ́yi kpó sí te. Xwédo Yedutún tɔn mɛ ɔ́, Cemaya kpó Wuziyɛ́li kpó sí te.

¹⁵Yě kplé nɔví yětɔn lɛ́ɛ, bɔ ée yě slá wǔ nú yěɖée fó ɔ́, yě wǎ wǔ slá nú Mawu Mavɔmavɔ xwé ɔ́ gbe lě e axɔ́sú ɔ́ ɖɔ gbɔn bɔ é sɔgbe xá jlǒ Mawu Mavɔmavɔ tɔn é.

¹⁶Vɔ̌sánú-xwlémawutɔ́ lɛ́ɛ byɔ́ Mawu Mavɔmavɔ xwé ɔ́ gbe, bó ná slá wǔ ná. Yě ɖe suɖunú e yě mɔ ɖo Mawu Mavɔmavɔ xwé gbe lɛ́ɛ bǐ tɔ́n, bó bɛ́ yě ɖó kɔ́xota, ɖo xwé ɔ́ gbe, bɔ Levíi ví lɛ́ɛ wá bɛ́ yě kɔn nyi tɔdo Sedlɔ́n tɔn ɔ́ mɛ.

¹⁷Yě bɛ́ wǔsláslá ɔ́ ɖo sun nukɔntɔn ɔ́ sín azǎn nukɔntɔn ɔ́ gbe, bɔ azǎn tɔn tántɔngɔ́ ɔ́ gbe ɔ́, yě byɔ́ Mawu Mavɔmavɔ sín hɔnnúwa sá, bó sɔ́ azǎn tántɔn ɖó te dó slá wǔ nú Mawu Mavɔmavɔ xɔ ɔ́. Yě fó nǔwiwa énɛ́ ɔ́ ɖo sun nukɔntɔn ɔ́ sín azǎn afɔtɔn-nukún-ɖokpógɔ́ ɔ́ gbe.

¹⁸Énɛ́ ɔ́ gúdo ɔ́, yě yi axɔ́sú Ezekiyási gɔ́n, bó ɖɔ n'i ɖɔ: “Mǐ kó slá wǔ nú Mawu Mavɔmavɔ xwé ɔ́ bǐ: mǐ slá wǔ nú vɔ̌sákpe e jí è nɔ dó vɔ̌ zo ɖe ɔ́ kpó nǔ e è nɔ zán ɖo fínɛ́ lɛ́ɛ bǐ kpó, bó slá wǔ nú távo e jí è nɔ fɔ wɔ̌xúxú e è xwlé Mawu lɛ́ɛ ɖó ɔ́ kpó nǔ e è nɔ zán ɖo fínɛ́ lɛ́ɛ bǐ kpó.

¹⁹Nǔ e axɔ́sú Akázi e ma nɔ gbejí nú Mawu ǎ ɔ́ ɖu su ná hwenu e é ɖo zinkpo jí lɛ́ɛ ɔ́ bǐ ɔ́, mǐ kó bló bǐ ɖó bó slá wǔ nú bǐ. Yě nɛ́ ɖo vɔ̌sákpe Mawu Mavɔmavɔ tɔn nukɔn fínɛ́ nɛ́.”

²⁰Axɔ́sú Ezekiyási fɔ́n zǎn ayǐhɔ́ngbe tɔn, bó kplé toxo ɔ́ sín gǎn lɛ́ɛ, lobo yi Mawu Mavɔmavɔ xwé gbe.

²¹Yě hɛn nyibúsú tɛ́nwe, agbo tɛ́nwe, lɛ̌ngbɔ́ví tɛ́nwe kpódó gbǎgbá tɛ́nwe kpó, bó ná sá hwɛsɔ́kɛmɛvɔ́ ná dó hɛ̌nnu axɔ́sú ɔ́ tɔn ɔ́ kpó Mawu Mavɔmavɔ xwé ɔ́ kpó, kpódó Judáa to ɔ́ kpó tamɛ. Bɔ axɔ́sú ɔ́ ná gbe vɔ̌sánú-xwlémawutɔ́ Aalɔ́ɔn ví lɛ́ɛ ɖɔ yě ní sá vɔ̌ ɖo vɔ̌sákpe Mawu Mavɔmavɔ tɔn ɔ́ jí.

²²Vɔ̌sánú-xwlémawutɔ́ lɛ́ɛ ká gbo gbe nyibú lɛ́ɛ, bó yí hun yětɔn lobo mi dó vɔ̌sákpe ɔ́ wú. Yě gbo gbe agbo lɛ́ɛ, bó yí hun yětɔn, lobo mi dó vɔ̌sákpe ɔ́ wú. Yě gbo gbe lɛ̌ngbɔ́ví lɛ́ɛ, bó yí hun yětɔn, lobo mi dó vɔ̌sákpe ɔ́ wú.

²³Énɛ́ ɔ́ gúdo ɔ́, è bɛ̌ gbǎgbá e è nǎ dǒ sá hwɛsɔ́kɛmɛvɔ́ ná lɛ́ɛ wá axɔ́sú ɔ́ kpó agun ɔ́ kpó nukɔn, bɔ yě bɛ̌ alɔ ɖó kanlin lɛ́ɛ jí.

²⁴Vɔ̌sánú-xwlémawutɔ́ lɛ́ɛ ká gbo gbe gbǎgbá lɛ́ɛ bó kɔn hun yětɔn dó vɔ̌sákpe ɔ́ jí dó sá hwɛsɔ́kɛmɛvɔ́ ná dó hwɛ e Izlayɛ́li togun ɔ́ bǐ hu lɛ́ɛ tamɛ. Đó togun Izlayɛ́li tɔn ɔ́ bǐ tamɛ wɛ axɔ́sú ɔ́ ná gbe ɖɔ è nǐ sá vɔ̌ e è nɔ dó zo ɔ́ kpó hwɛsɔ́kɛmɛvɔ́ ɔ́ kpó dó.

²⁵Énɛ́ ɔ́ gúdo ɔ́, axɔ́sú ɔ́ ɖó tɛnmɛ nú Levíi ví lɛ́ɛ ɖó Mawu Mavɔmavɔ xwé gbe. Yě hɛn agǐdigbo bó hɛn kanhún bó hɛn kpɛn lě e Davídi kpó Gadi nǔmɔtɔ́ axɔ́sú ɔ́ tɔn ɔ́ kpódó Natáan gbeyíɖɔ Mawu tɔn ɔ́ kpó kó ná gbe tɔn gbɔn é. Đó Mawu Mavɔmavɔ wɛ ko ɖɔ mɔ̌ gbɔn gbeyíɖɔ tɔn lɛ́ɛ jí.

²⁶Levíi ví lɛ́ɛ nɔ fínɛ́ kpó nǔxonú Davídi tɔn lɛ́ɛ kpó. Vɔ̌sánú-xwlémawutɔ́ lɛ́ɛ nɔ fínɛ́ kpó kpɛn yětɔn lɛ́ɛ kpó.

²⁷Énɛ́ ɔ́, axɔ́sú Ezekiyási ná gbe ɖɔ è nǐ sá vɔ̌ e è nɔ dó zo ɔ́ ɖo vɔ̌sákpe ɔ́ jí. Bɔ ée è jɛ vɔ̌ ɔ́ sá jí ɔ́, è jɛ han ji dó kpa Mawu Mavɔmavɔ jí, bó ɖo kpɛn kún d'é mɛ wɛ, lobo ɖo axɔ́sú Izlayɛ́li tɔn Davídi sín nǔxonú lɛ́ɛ xo d'é mɛ wɛ.

²⁸Togun ɔ́ bǐ ɖe kɔ́, bɔ è ɖo han ɔ́ ji wɛ, bó ɖo kpɛn kún wɛ mɔ̌ káká bó sá vɔ̌ ɔ́ fó.

²⁹Ée è sá vɔ̌ ɔ́ fó ɔ́, axɔ́sú ɔ́ kpó mɛ e ɖo akpá tɔn lɛ́ɛ bǐ kpó jɛ kpo bo ɖe kɔ́.

³⁰Énɛ́ ɔ́ gúdo ɔ́, axɔ́sú Ezekiyási kpó azaglɔ́gán tɔn lɛ́ɛ kpó ɖɔ nú Levíi ví lɛ́ɛ ɖɔ yě ní lɛ́ ji han e Davídi kpó nǔmɔtɔ́ Asáfu kpó kpa lɛ́ɛ dó sɔ́ Mawu Mavɔmavɔ su. Bɔ yě ji han ɔ́ kpó awǎjijɛ kpó dó kpa susu nú Mawu Mavɔmavɔ, lobo jɛ kpo bo ɖe kɔ́.

³¹Énɛ́ ɔ́, Ezekiyási yí xó bó ɖɔ: “Din ɔ́, mi mɛ e dó agban wá nú Mawu Mavɔmavɔ lɛ́ɛ ɔ́, mi wá, mi fɔ kanlin mitɔn lɛ́ɛ kpó kú dó nú Mawu vɔ́ mitɔn lɛ́ɛ kpó wá Mawu Mavɔmavɔ xwé gbe.” Ée é ɖɔ mɔ̌ ɔ́, yě bɛ̌ kanlin yětɔn lɛ́ɛ kpó kú dó nú Mawu vɔ́ yětɔn lɛ́ɛ kpó wá. Mɛ e nɔ hun alɔ bo nɔ ná nǔ mɛ ɖo yě mɛ lɛ́ɛ hɛn kanlin bó ná sá vɔ̌ e è nɔ dó zo ɔ́ ná.

³²Vɔ̌sánú e togun ɔ́ hɛn wá bó ná dó sá vɔ̌ e è nɔ dó zo ɔ́ ná lɛ́ɛ bǐ bló nyibú kanɖé gban (70), agbo kanwe ko (100) kpódó lɛ̌ngbɔ́ví afɔɖé (200) kpó.

³³È lɛ̌ hɛn nyibú nǔwɔntɔn (600) kpódó lɛ̌ngbɔ́ afɔwó-afatɔ́n (3.000) kpó, dó sá vɔ̌ ɖě lɛ́ɛ ná.

³⁴Lo ɔ́, vɔ̌sánú-xwlémawutɔ́ lɛ́ɛ sukpɔ́ bó ná sixú kɔ́n kanlin e è dǒ sá vɔ̌ lɛ́ɛ bǐ ǎ. Énɛ́ ɔ́, nɔví yětɔn Levíi ví lɛ́ɛ gɔ́ alɔ nú yě káká bɔ yě wa azɔ̌ ɔ́ bǐ fó, yě ɖo alɔ gɔ́ nú yě wɛ káká bɔ vɔ̌sánú-xwlémawutɔ́ ɖě lɛ́ɛ slá wǔ nú yěɖée. Đó Levíi ví lɛ́ɛ ko yá wǔ slá wǔ dó nukɔn nú vɔ̌sánú-xwlémawutɔ́ lɛ́ɛ.

³⁵É nyí vɔ̌ tobutóbú e è dó zo lɛ́ɛ kpó vɛ̌ɛn e jɛ jí lɛ́ɛ kpó kɛ́ɖɛ́ wɛ yě zě yi vɔ̌sákpe ɔ́ jí ǎ; yě lɛ́ zé kanlin e è dǒ sá kɔnɖókpɔ́ vɔ́ ná lɛ́ɛ sín jǒ yi vɔ̌sákpe ɔ́ jí. Lě e Ezekiyási lɛ́ vɔ́ Mawu sinsɛn ɖó ayǐ gbɔn ɖo Mawu Mavɔmavɔ xwé gbe ɔ́ nɛ́.

³⁶Ezekiyási kpó togun ɔ́ bǐ kpó j'awǎ, ɖó nǔ énɛ́ e Mawu zɔ́n bɔ yě kpé wú bó bló ganjí ɔ́ wú, ɖó nǔ lɛ́ɛ yá wǔ fó.