Read fon 2 Tan 3 Bible Online

2 Tan 3 - fon bible

2 Tan 3

¹ Salomɔ́ɔ jɛ xwé sá nú Mawu Mavɔmavɔ jí ɖo Jeluzalɛ́mu, ɖo Mɔliya só ɔ́ jí. É jɛ xwé ɔ́ sá jí ɖo fí e Mawu Mavɔmavɔ tɔ́n dó tɔ́ tɔn Davídi jí ɖe é. Tɛn e mɛ Davídi ko sɔ́ bɔ è nǎ sá xwé ɔ́ ɖó ɖo Ɔnáni Jebuzinu ɔ́ sín kɔ́xota fí e é nɔ́ fún jinukún ɖe ɔ́ wɛ.

²Hwenu e Salomɔ́ɔ ɖo xwe ɛnɛ bló wɛ ɖo zinkpo jí ɔ́ wɛ é jɛ Mawu xwé ɔ́ sá jí, ɖo sun wegɔ́ ɔ́ e ɖo xwe ɔ́ mɛ é.

³Jlɛ̌ e xɔ ɔ́ ná ɖó, bɔ Salomɔ́ɔ ɖɔ lɛ́ɛ ɖíe: ga tɔn ná nyí mɛ̌tlu gban, bɔ gblǒ tɔn ná nyí mɛ̌tlu wǒ.

⁴Hɔnnúwa e ɖo xɔ ɔ́ nukɔn ɔ́ sín gblǒ nyí mɛ̌tlu wǒ xɔ ɔ́ sín gblǒ ɖɔhun, bɔ jǐ yiyi tɔn nyí mɛ̌tlu kanɖé ko; è kɔn siká akú dó hɔnnúwa ɔ́ gbɔn xomɛ bǐ.

⁵È tɛ́ siplɛ́tín sín xwlɛ gbɔn xɔ ɖaxó ɔ́ sín dǒ lɛ́ɛ wú, bó kɔn siká akú dó xwlɛ lɛ́ɛ, bó ɖe děma kpó wlɔ kpɛví kpɛví kpó gbɔn wú.

⁶Awǐnnya xɔ akwɛ́ wɛ è dǒ ɖó acɔ́ nú xɔ ɔ́; siká e è zǎn ɔ́, Paawayímu wɛ è hɛn sín.

⁷È kɔn siká dó kpo lɛ́ɛ, bó kɔn dó kpekán lɛ́ɛ, bó kɔn dó dǒ lɛ́ɛ kpódó hɔn lɛ́ɛ kpó, lobo ɖe wɛnsagun susunɔ lɛ́ɛ gbɔn dǒ lɛ́ɛ wú.

⁸ È lɛ̌ bló fí e è nɔ ylɔ́ ɖɔ tɛn mímɛ́ bǐ ɔ́, bɔ gblǒ tɔn nyí mɛ̌tlu wǒ xɔ ɔ́ sín gblǒ ɖɔhun, bɔ ga tɔn lɔ nyí mɛ̌tlu wǒ; siká akú tɔ́nu ko wɛ è kɔn gbɔn xɔ ɔ́ sín xomɛ bǐ.

⁹Siká kilóo vlɔ́ wɛ è dǒ bló hǔnjɛ́n lɛ́ɛ. È kɔn siká gbɔn xɔ e ɖo aga lɛ́ɛ lɔ mɛ.

¹⁰ È sínsín gan dó bló wɛnsagun susunɔ we ná, bó kɔn siká dó, bó bɛ́ yě ɖó tɛn mímɛ́ bǐ ɔ́ mɛ.

¹¹Wɛnsagun susunɔ we lɛ́ɛ ɔ́, awa yětɔn ɖo kikɛ, bɔ ga yětɔn bló mɛ̌tlu wǒ. Wɛnsagun nukɔntɔn ɔ́ sín awa ɖokpó bló mɛ̌tlu we adaɖé, bó yi sɔ́ xɔ ɔ́ sín dǒ, bɔ awa tɔn wegɔ́ ɔ́ lɔ bló mɛ̌tlu we adaɖé, bó yi sɔ́ wɛnsagun wegɔ́ ɔ́ sín awa.

¹²Wɛnsagun wegɔ́ ɔ́ sín awa ɖokpó bló mɛ̌tlu we adaɖé, bó yi sɔ́ xɔ ɔ́ sín dǒ, bɔ awa tɔn wegɔ́ ɔ́ lɔ bló mɛ̌tlu we adaɖé, bó yi sɔ́ wɛnsagun nukɔntɔn ɔ́ sín awa.

¹³Wɛnsagun we lɛ́ɛ sín awa lɛ́ɛ ɖo kikɛ, bɔ ga yětɔn bló mɛ̌tlu wǒ. Wɛnsagun lɛ́ɛ ɖo te ɖě bɔ dó ɖě wú, bó kpan nukɔn ali e byɔ́ xɔ ɔ́ mɛ é.

¹⁴ È lɔn lɛ̌ɛnkanvɔ, bó dó bló xɔmɛgbovɔ ná, bó dó ahǒ kwélesinnɔ, vɔvɔ kpódó vɔvɔ cɛ́cɛ́ kpó, lobo ɖe wɛnsagun susunɔ lɛ́ɛ ɖ'é mɛ dó ba acɔ́ ná.

¹⁵È blǒ dotín we, bɔ jǐ yiyi yětɔn nyí mɛ̌tlu afɔtɔn-nukún-we, bɔ yě ná nɔ xwé ɔ́ nukɔn. È ɖǒ ata dotín lɛ́ɛ ɖokpó ɖokpó jí. Ata lɛ́ɛ ɖokpó ɖokpó sín jǐ yiyi nyí mɛ̌tlu we adaɖé.

¹⁶È blǒ wlɔ kpɛví kpɛví dó ata lɛ́ɛ wú, è blǒ glenádi kanwe ko (100), bó sin dó wlɔ kpɛví kpɛví lɛ́ɛ wú dó ɖó acɔ́ ná.

¹⁷È dǒ dotín lɛ́ɛ do nyi xɔ ɔ́ nukɔn. Đokpó ɖo ɖisíxwé, bɔ ɖokpó ɖo amyɔxwé nú hɔnli ɔ́. È nɔ ylɔ́ ée ɖo ɖisíxwé ɔ́ ɖɔ Yakíni; éé ɖo amyɔxwé ɔ́ ká nɔ nyí Bowazi.