Read fon 2 Tan 32 Bible Online

2 Tan 32 - fon bible

2 Tan 32

¹Ée Ezekiyási bló nǔ énɛ́ lɛ́ɛ bǐ bó dó ɖe gbejí nɔ nú Mawu tɔn xlɛ́ ɔ́, axɔ́sú Asilíi tɔn Senakelíbu wá, bó ná tɔ́n ahwan Judáa to ɔ́; é xá toxo e è mɛ ahohó lɛ́ lɛ̌ dó lɛ́ɛ, bó tunwun ɖɔ émí ná yí yě dandan.

²Ée Ezekiyási mɔ ɖɔ Senakelíbu wá bó ná tɔ́n ahwan Jeluzalɛ́mu ɔ́,

³é kplé azaglɔ́gán tɔn lɛ́ɛ kpó ahwanfuntɔ́ syɛ́nsyɛ́n lɛ́ɛ kpó, bó ɖɔ nú yě ɖɔ è nǎ sú tɔjɔtɛn e ma ɖo toxo ɔ́ mɛ ǎ lɛ́ɛ, bɔ yě yǐ gbe nú xó tɔn.

⁴Énɛ́ ɔ́, mɛ tobutóbú ɖé lɛ́ɛ kplé bó sú tɔjɔtɛn lɛ́ɛ bǐ kpó tɔ e è ɖe ali ná, bɔ é nɔ́ sa gbɔn do glɔ́ é kpó. Đó yě nɔ́ ɖɔ nú yěɖée ɖɔ: “Axɔ́sú Asilíi tɔn ɔ́ wá fí ɔ́, é ná mɔ sin gěgé bó zán ǎ.”

⁵Ezekiyási ná glǎglá éɖée; fí e ahohó lɛ́ɛ mu gbɔn ɔ́, é vɔ́ blóɖó; é mɛ kpe e jí è nɔ nɔ bo nɔ cɔ́ toxo ɔ́ lɛ́ɛ d'é nu; énɛ́ ɔ́ gúdo ɔ́, é mɛ ahohó ɖěvo gbɔn toxo ɔ́ gúdo; é bló Milo ɔ́ ɖó, ɖo Davídi Toxo ɔ́ mɛ. É tun ahwanfunnú kpó gǎglónú kpó kɔn nyi kpɔ́.

⁶É ɖe sɔ́jagán ɖé lɛ́ɛ ɖó togun ɔ́ nu. É kplé yě mɛ bǐ ɖó toxo ɔ́ sín hɔntogbó nukɔn, bó ná glǎglá yě bó ɖɔ:

⁷“Mi kpan akɔ́n bó dó gǎn. Mi ma ɖi xɛsi ó, ado ní ma hu mi ɖo axɔ́sú Asilíi tɔn ɔ́ kpódó mɛ tobutóbú e zɔn xá ɛ lɛ́ɛ kpó nukɔn ó. Đó mɛ e zɔn xá mǐ lɛ́ɛ sukpɔ́ hú mɛ e zɔn xá ɛ lɛ́ɛ.

⁸Mɛ e kpó éyɛ́ kpó zɔn lɛ́ɛ ɔ́, gbɛtɔ́ lɛ́ɛ wɛ. Lo ɔ́, Mawu Mavɔmavɔ wɛ nyí mɛ e kpó mǐdɛɛ lɛ́ɛ kpó zɔn é, é wɛ ná gɔ́ alɔ nú mǐ, bó ná fun ahwan ɔ́ nú mǐ.” Xó énɛ́ e Judáa xɔ́sú Ezekiyási ɖɔ ɔ́ dó wǔsyɛ́n lanmɛ nú togun ɔ́.

⁹Énɛ́ ɔ́ gúdo ɔ́, Asilíi xɔ́sú Senakelíbu sɛ́ mɛ dó Jeluzalɛ́mu; Lakíci toxo ɔ́ nukɔn wɛ é ɖe kpó ahwangɔnu tɔn lɛ́ɛ bǐ kpó hwenɛ́nu. Fínɛ́ wɛ é nɔ bó dó wɛn sɛ́ dó Judáa xɔ́sú Ezekiyási kpó Judáanu e ɖo Jeluzalɛ́mu lɛ́ɛ bǐ kpó ɖɔ:

¹⁰“Xó e axɔ́sú Asilíi tɔn Senakelíbu ɖɔ ɔ́ ɖíe: Étɛ́wú mi ka gán jɛ bó cí ahohó Jeluzalɛ́mu tɔn mɛ?

¹¹Ezekiyási ná gǎnjɛwú mi ɖɔ Mawu Mavɔmavɔ, Mawu mitɔn ná hwlɛ́n mi sín alɔ ce mɛ. Blɛ̌blɛ́ mi wɛ é ɖe. Adɔ kpó sinnugblá kpó wɛ ná hu mi.

¹²É má nyí éyɛ́ Ezekiyási ɔ́ wɛ ká gba tɛn e ɖo só jí bɔ è nɔ sɛn Mawu ɖe lɛ́ɛ kpó vɔ̌sákpe Mawu tɔn lɛ́ɛ kpó, lobo ɖɔ nú Judáanu lɛ́ɛ kpó Jeluzalɛ́munu lɛ́ɛ kpó ɖɔ vɔ̌sákpe ɖokpó géé nukɔn wɛ yě ná nɔ́ ɖe kɔ́ ɖe, lobo ná nɔ dó zǎlínkpɔ́n zo ɖ'é jí ɖe ǎ cé?

¹³Mi tunwun nǔ e nyɛ kpó tɔ́gbó ce lɛ́ɛ kpó wa xá togun e ɖo to ɖě lɛ́ɛ mɛ lɛ́ɛ bǐ é ǎ cé? Nǔmɛsɛn akɔta to énɛ́ lɛ́ɛ tɔn lɛ́ɛ kpé wú bó hwlɛ́n to yětɔn lɛ́ɛ ɖo así ce a?

¹⁴Đo nǔmɛsɛn e ɖo to énɛ́ lɛ́ɛ e tɔ́gbó ce lɛ́ɛ gba lɛ́ɛ bǐ mɛ ɔ́, ɖě tɛ́ wɛ kpé wú bó hwlɛ́n togun tɔn ɖo así ce, bɔ é ná nyí nǔmɛsɛn midɛɛ lɛ́ɛ tɔn wɛ ná hwlɛ́n mi ɖo así ce?

¹⁵Hǔn, mi ma lɔn nú Ezekiyási ní ɖó adingban nú mi, bó blɛ́ mi mɔ̌ ó. Mi ma ɖi xó tɔn ó. Đó nǔmɛsɛn ɖěbǔ tíin ɖo akɔta ɖěbǔ mɛ abǐ axɔ́súɖuto ɖěbǔ mɛ bó ná kpé wú bó hwlɛ́n togun tɔn ɖo así ce ǎ, ɖě ká ɖe bó ná hwlɛ́n ɖo tɔ́gbó ce lɛ́ɛ sí ǎ. Nɛ̌ wɛ nǔmɛsɛn mitɔn ka ná kpé wú bó hwlɛ́n mi ɖo así ce gbɔn?”

¹⁶Mɛsɛntɔ́ Senakelíbu tɔn lɛ́ɛ ɖo slǎmɛ ɖɔ Mawu Mavɔmavɔ kpó Ezekiyási mɛsɛntɔ́ Mawu Mavɔmavɔ tɔn ɔ́ kpó wú wɛ kpowun.

¹⁷Senakelíbu sɛ́ wěma ɖokpó dó, bó zun Mawu Mavɔmavɔ, Mawu Izlayɛ́li tɔn ɔ́ d'é mɛ ɖɔ: “Lě e nǔmɛsɛn akɔta to ɖě lɛ́ɛ mɛ tɔn lɛ́ɛ má kpé wú bó hwlɛ́n togun yětɔn lɛ́ɛ ɖo así ce ǎ ɔ́, mɔ̌ ɖokpó ɔ́, nǔmɛsɛn Ezekiyási tɔn sixú hwlɛ́n togun tɔn ɖo así ce ǎ.”

¹⁸Mɛsɛntɔ́ Senakelíbu tɔn lɛ́ɛ ɖo xó sú wɛ, bó ɖo xó ɖɔ wɛ nú mɛ e ɖo ahohó Jeluzalɛ́mu tɔn jí lɛ́ɛ wɛ dó Ebléegbe mɛ, bó ná ɖó adohu nú yě, bó dó xɛsi yě, bó ná mɔ tɛn dó yí toxo ɔ́.

¹⁹Yě ɖo Mawu Jeluzalɛ́mu tɔn ɔ́ xó ɖɔ wɛ nǔmɛsɛn ɖé kpowun xó ɖɔ wɛ yě ɖe ɖɔhun; nǔmɛsɛn akɔta ɖě lɛ́ɛ tɔn e è sɔ́ alɔ dó bló ná lɛ́ɛ ɖɔhun.

²⁰Ée nǔ cí mɔ̌ ɔ́, axɔ́sú Ezekiyási kpó gbeyíɖɔ Mawu tɔn Ezayíi Amɔ̌si ví ɔ́ kpó jɛ ɖɛ xo dó nǔ énɛ́ ɔ́ tamɛ jí. Yě sú xó ylɔ́ Mawu ɖɔ é ní wá gɔ́ alɔ nú émí.

²¹Bɔ Mawu Mavɔmavɔ sɛ́ wɛnsagun ɖokpó dó ahwankpá Asilíi xɔ́sú ɔ́ tɔn mɛ, bɔ é hu ahwanfuntɔ́ syɛ́nsyɛ́n lɛ́ɛ, ahwangán lɛ́ɛ kpódó gbɛtɔ́ nukúnɖéjí lɛ́ɛ kpó. Nǔ énɛ́ ɔ́ hu winnyá nú axɔ́sú ɔ́, bɔ é lɛ́ kɔ yi to tɔn mɛ. É ká wá su gbe ɖokpó bɔ é yi byɔ́ vodún tɔn xɔ mɛ, bɔ vǐ é ɖésúnɔ tɔn lɛ́ɛ hu i kpó hwǐ kpó.

²²Énɛ́ ɔ́, Mawu Mavɔmavɔ hwlɛ́n Ezekiyási kpó Jeluzalɛ́munu lɛ́ɛ kpó ɖo Senakelíbu Asilíi xɔ́sú ɔ́ sí, bó hwlɛ́n yě ɖo kɛntɔ́ yětɔn lɛ́ɛ bǐ sí, bó cyɔ́n alɔ yě jí ɖo yě mɛ e lɛ́ dó yě lɛ́ɛ nukɔn.

²³Mɛ gěgé hɛn nǔníná wá nú Mawu Mavɔmavɔ ɖo Jeluzalɛ́mu, bó lɛ́ ná nǔ ɖagbe ɖagbe lɛ́ɛ Ezekiyási Judáa xɔ́sú ɔ́, bɔ sín hwenɛ́nu ɔ́, é xɔ susu ɖo akɔta lɛ́ɛ bǐ nukɔn.

²⁴Hwenɛ́nu ɔ́, Ezekiyási bɛ́ azɔn ɖé bó ná kú. É ka sú xó ylɔ́ Mawu Mavɔmavɔ, bó xo ɖɛ. Bɔ Mawu Mavɔmavɔ bló nǔjíwǔ ɖokpó bó ná dó ɖe xlɛ́ ɛ ɖɔ azɔn tɔn ná gbɔ.

²⁵Lo ɔ́, ɖagbe e Mawu Mavɔmavɔ wa nú Ezekiyási ɔ́, é tunwun n'i ǎ. É nyɔ́ wa ɔ́, afɔ tɛ ayǐ jí wɛ é lɛ́ jɛ, bɔ Mawu Mavɔmavɔ sin xomɛ dó e, bó sin xomɛ dó Judáa to ɔ́ kpó Jeluzalɛ́mu toxo ɔ́ kpó.

²⁶Ezekiyási ɖo afɔ tɛ ayǐ wɛ mɔ̌, có é kpó Jeluzalɛ́munu lɛ́ɛ kpó yí nǔ e yě wa nyi do lɛ́ɛ gbe, lobo sɔ́ yěɖée hwe; énɛ́ ɔ́, Mawu Mavɔmavɔ sɔ́ zé xomɛsin tɔn dó wa nǔ xá yě ɖo Ezekiyási hwenu ǎ.

²⁷Ezekiyási jɛ dɔkun ɖésú, bó xɔ susu tawun. É ɖɔ bɔ è mɛ xɔ e mɛ é ná bɛ́ kpatágan dó lɛ́ɛ, éé mɛ é ná bɛ́ siká dó lɛ́ɛ, éé mɛ é ná bɛ́ awǐnnya xɔ akwɛ́ dó lɛ́ɛ, éé mɛ é ná bɛ́ nǔsáwǔ wǎnɖagbenɔ dó lɛ́ɛ, éé mɛ é ná bɛ́ gǎglónú kpódó nǔ xɔ akwɛ́ tɛnmɛ tɛnmɛ bǐ kpó dó lɛ́ɛ.

²⁸É lɛ́ ɖɔ bɔ è blǒ agbanxɔ nú jinukún lɛ́ɛ, bó bló nú vɛ̌ɛn, bó bló nú ami, bó bló nǔ e mɛ kanlin tɔn tɛnmɛ tɛnmɛ lɛ́ɛ ná nɔ́ ɖu nǔ ɖe lɛ́ɛ, bó bló kpó e mɛ kanlin tɔn tɛnmɛ tɛnmɛ lɛ́ɛ ná nɔ́ nɔ lɛ́ɛ.

²⁹É ɖó toxo ɖé lɛ́ɛ ayǐ; é ɖó gbɔ̌ kpódó nyibú kpó kɔn nyi kpɔ́, ɖó Mawu dǒ dɔkun n'i.

³⁰Ezekiyási ɖokpó énɛ́ ɔ́ wɛ sú fí e tɔjɔtɛn Gixɔ́ni tɔn ɔ́ nɔ́ tɔ́n sin ɖe é, bó ɖe ali nú sin ɔ́ gbɔn ayǐkúngban glɔ́ yi Davídi Toxo ɔ́ sín gbadahwe jí. Nǔ e Ezekiyási wa lɛ́ɛ bǐ wɛ nyɔ́ n'i.

³¹Énɛ́ ɔ́ wú wɛ hwenu e Babilɔ́nu sín azaglɔ́gán lɛ́ɛ sɛ́ mɛ dó Ezekiyási bónú é ná ɖɔ nǔjíwǔ e jɛ ɖo to ɔ́ mɛ ɔ́ sɛ́ dó yě ɔ́, Mawu jó e dó, bó ná kpɔ́n lě e é ná bló gbɔn é; é bló mɔ̌ bó ná dó dó é kpɔ́n, bó ná tunwun nǔ e ɖo ayi tɔn mɛ é bǐ.

³²Nǔ e kpo bɔ Ezekiyási wa lɛ́ɛ kpó azɔ̌ tɔn e ɖe lě e é nɔ́ wa nǔ dó sɛ́nxwi jí gbɔn ɔ́ xlɛ́ lɛ́ɛ kpó ɔ́, è wlǎn dó nǔ e gbeyíɖɔ Mawu tɔn Ezayíi Amɔ̌si ví ɔ́ mɔ ɔ́ sín Tan wéma mɛ, bó wlán dó axɔ́sú Judáa tɔn lɛ́ɛ kpó Izlayɛ́li tɔn lɛ́ɛ kpó sín Tan wéma mɛ.

³³Ezekiyási zán wá kú, bɔ è sɔ́ ɛ ɖó Davídi ví lɛ́ɛ sín yɔdo mɛ ɖo fí e yi jǐ hú fí bǐ é. Judáa to ɔ́ bǐ kpó Jeluzalɛ́munu lɛ́ɛ kpó wlí yɛ̌yi n'i ɖo kú tɔn hwenu. Vǐ tɔn Manasée wɛ ɖu axɔ́sú ɖó tɛn tɔn mɛ.