Read fon 2 Tan 35 Bible Online

2 Tan 35 - fon bible

2 Tan 35

¹Joziyási ɖu Dǐndínwáyixwe ɔ́ ɖo Jeluzalɛ́mu dó Mawu Mavɔmavɔ tamɛ; è hu kanlin e è nǎ dó ɖu xwe ɔ́ ná lɛ́ɛ ɖo sun nukɔntɔn ɔ́ sín azǎn wǒ-ɛnɛgɔ́ ɔ́ gbe.

²Joziyási sɔ́ vɔ̌sánú-xwlémawutɔ́ lɛ́ɛ ɖó azɔ̌ yětɔn lɛ́ɛ nu, bó dó wǔsyɛ́n lanmɛ nú yě ɖɔ yě ní kpé nukún dó azɔ̌ e yě nɔ́ wa ɖo Mawu Mavɔmavɔ xwé gbe ɔ́ wú.

³É ɖɔ xó nú Levíi ví lɛ́ɛ lɔ. Levíi ví lɛ́ɛ wɛ nɔ kplɔ́n nǔ Izlayɛ́li ví lɛ́ɛ bǐ bɔ è sɔ́ yě ɖó vo nú Mawu Mavɔmavɔ. É ɖɔ nú yě ɖɔ: “Mi zé akɔjijɛgbá mímɛ́ ɔ́ ɖó xwé e axɔ́sú Izlayɛ́li tɔn Salomɔ́ɔ Davídi ví ɔ́ sá nú Mawu ɔ́ gbe. Mi sɔ́ ná nɔ́ ɖíɖá ɖó abɔ̌ta ɖě ǎ. Din ɔ́, mi bo wa azɔ̌ nú Mawu Mavɔmavɔ, Mawu mitɔn ɔ́ kpó togun tɔn Izlayɛ́li ɔ́ kpó.

⁴ Mi ná kpɔ́n xwédo e mɛ mɛ ɖokpó ɖokpó gosín é, bó ná kpɔ́n azɔ̌ e mɛ ɖokpó ɖokpó nɔ́ wá ɔ́, bó ná kplé miɖée gbɛ̌ta gbɛ̌ta, lě e axɔ́sú Izlayɛ́li tɔn Davídi kpó vǐ tɔn Salomɔ́ɔ kpó wlán gbɔn é.

⁵Xwédo mitɔn lɛ́ɛ sín gbɛ̌ta ɖokpó ɖokpó ní nɔ Mawu xwé gbe, bó ná dó alɔ nɔví mitɔn Izlayɛ́li ví ɖě lɛ́ɛ gbɔn xwédo yětɔn yětɔn mɛ.

⁶Mi hu kanlin e è nǎ dó ɖu Dǐndínwáyixwe ɔ́ ná lɛ́ɛ; mi slá wǔ nú miɖée, mi dó alɔ nɔví mitɔn lɛ́ɛ, bónú è nǎ bló nǔ lɛ́ɛ bǐ lě e Mawu Mavɔmavɔ ɖɔ gbɔn Mɔyízi jí é.”

⁷Joziyási kpɔ́n kanlinkpó é ɖésúnɔ tɔn mɛ, bó ná kanlin e Izlayɛ́li ví e ɖo fínɛ́ lɛ́ɛ ná hu nú Dǐndínwáyixwe ɔ́ lɛ́ɛ é: é ná lɛ̌ngbɔ́ kpó gbɔ̌ví kpó adɔ̌kpo ɖě děgba we afɔwó (30.000) yě, bó lɛ́ ná nyibú afɔwó-afatɔ́n (3.000) yě.

⁸Azaglɔ́gán tɔn lɛ́ɛ kpɔ́n yě ɖésúnɔ xomɛ bó ná kanlin togun ɔ́, vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó. Ilukya, Zekaliyahu kpódó Yexiyɛ́li kpó ɔ́, nukɔntɔ́ wɛ yě nyí ɖo Mawu xwé ɔ́ gbe; yě ná lɛ̌ngbɔ́ví kpó gbɔ̌ví kpó afɔwó nǔwɔntɔn (2.600), nyibú afɔɖé kanwe ko (300), vɔ̌sánú-xwlémawutɔ́ lɛ́ɛ nú Dǐndínwáyixwe ɔ́.

⁹Kɔnaniahu kpó nɔví tɔn Cemayahu kpó, kpódó Nɛtanɛli kpó ɔ́, gǎn wɛ yě nyǐ ɖo Levíi ví lɛ́ɛ mɛ. Mɔ̌ ɖokpó ɔ́, Hacaviyahu, Yeyiɛ́li kpódó Yozavadi kpó nyí gǎn ɖo Levíi ví lɛ́ɛ mɛ; yě ná lɛ̌ngbɔ́ví kpó gbɔ̌ví kpó děgba ɖě afatɔ́n (5.000), bó ná nyibú afɔwe kanwe ko (500) Levíi ví lɛ́ɛ nú Dǐndínwáyixwe ɔ́.

¹⁰Lě e è to nǔ lɛ́ɛ gbɔn é ɖíe: vɔ̌sánú-xwlémawutɔ́ lɛ́ɛ ɖo azɔ̌ yětɔn lɛ́ɛ kɔn, bɔ Levíi ví lɛ́ɛ ɖo gbɛ̌ta yětɔn yětɔn mɛ lě e axɔ́sú ɔ́ zɔ́n gbɔn é.

¹¹Yě hu kanlin lɛ́ɛ nú Dǐndínwáyixwe ɔ́. Vɔ̌sánú-xwlémawutɔ́ lɛ́ɛ kɔn hun e Levíi ví lɛ́ɛ sɔ́ nú yě ɔ́ kɔn nyi vɔ̌sákpe ɔ́ jí, bɔ Levíi ví lɛ́ɛ kɔ́n kanlin lɛ́ɛ.

¹²Yě ɖe kanlin lɛ́ɛ sín akpáxwé e è nǎ dó sá vɔ̌ e è nɔ dó zo ɔ́ ná lɛ́ɛ ɖó vo bó ná bɛ́ nú togun ɔ́ sín hɛ̌nnu tɛnmɛ tɛnmɛ lɛ́ɛ bónú yě ná sá vɔ̌ nú Mawu Mavɔmavɔ lě e è wlǎn dó Mɔyízi wéma ɔ́ mɛ gbɔn é. Mɔ̌ ɖokpó ɔ́ wɛ è wa nyibú lɛ́ɛ sín nǔ gbɔn.

¹³ È mɛ lɛ̌ngbɔ́ví Dǐndínwáyixwe ɔ́ tɔn ɔ́, bó ɖa vɔ̌sánú mímɛ́ lɛ́ɛ ɖo kozɛ́n kpó ganzɛ́n gɔngɔn kpó, kpódó ganzɛ́n wɛnjɛ kpó mɛ, lě e è nɔ bló gbɔn sín do é. Yě hwlɛ́n dó bó má nǔ e è ɖa lɛ́ɛ nú togun ɔ́ bǐ.

¹⁴Énɛ́ ɔ́ gúdo ɔ́, yě ɖa éé nyí yědɛɛ lɛ́ɛ kpó vɔ̌sánú-xwlémawutɔ́ lɛ́ɛ kpó tɔn lɛ́ɛ, ɖó vɔ̌sánú-xwlémawutɔ́ Aalɔ́ɔn ví lɛ́ɛ ɔ́, yě ɖo vɔ̌ e è nɔ dó zo lɛ́ɛ sá wɛ, bó ɖo jǒ lɛ́ɛ dó zo wɛ káká bɔ zǎn kú. Nǔ e wútu Levíi ví lɛ́ɛ ɖa éé nyí yědɛɛ lɛ́ɛ ɖésú tɔn lɛ́ɛ kpó vɔ̌sánú-xwlémawutɔ́ Aalɔ́ɔn ví lɛ́ɛ kpó tɔn ɔ́ nɛ́.

¹⁵ Asáfu ví, hanjitɔ́ lɛ́ɛ, ɖo tɛn yětɔn lɛ́ɛ mɛ lě e gbeta e Davídi kpó Asáfu kpó, kpó Hemani kpó, kpódó Yedutún axɔ́sú ɔ́ sín nǔmɔtɔ́ ɔ́ kpó ɖe tɔ́n ɔ́ ɖɔ gbɔn é, bɔ hɔnjínɔtɔ́ lɛ́ɛ ɖo hɔn lɛ́ɛ ɖokpó ɖokpó jí. Yě gosín azɔ̌ yětɔn lɛ́ɛ kɔn ǎ, ɖó Levíi ví ɖěvo lɛ́ɛ ɖo nǔɖuɖu ɖa nú yě wɛ.

¹⁶Ɖó gbe énɛ́ ɔ́ gbe ɔ́, lě e è to sinsɛn Mawu Mavɔmavɔ tɔn ɔ́ gbɔn bó dó ɖu Dǐndínwáyixwe ɔ́, lobo sá vɔ̌ e è nɔ dó zo lɛ́ɛ ɖo vɔ̌sákpe Mawu Mavɔmavɔ tɔn jí gbɔn ɔ́ nɛ́; lě e axɔ́sú Joziyási ná gbe tɔn gbɔn ɔ́ wɛ è blǒ gbɔn.

¹⁷ Izlayɛ́li ví e ɖo fínɛ́ lɛ́ɛ ɖu Dǐndínwáyixwe ɔ́ bó ɖu wɔ̌xúxú e mɛ è ma dó tɔ́n ǎ é sín xwe ɔ́ hwenɛ́nu xɔ azǎn tɛ́nwe.

¹⁸Sín gbeyíɖɔ Mawu tɔn Samuwɛ́li hwenu ɔ́, è ko sɔ́ ɖu Dǐndínwáyixwe mɔ̌hunkɔtɔn kpɔ́n ɖo Izlayɛ́li ǎ. Dǐndínwáyixwe élɔ́ e axɔ́sú Joziyási kpódó vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó, Judáa togun ɔ́ kpó Izlayɛ́li togun ɔ́ kpó bǐ kpódó Jeluzalɛ́munu lɛ́ɛ kpó ɖu ɔ́, axɔ́sú Izlayɛ́li tɔn lɛ́ɛ ɖěbǔ kó ɖu mɔ̌hunkɔtɔn kpɔ́n ǎ.

¹⁹Joziyási yi zinkpo jí ɔ́, xwe tɔn afɔtɔn-nukún-atɔngɔ́ ɔ́ mɛ wɛ è ɖu Dǐndínwáyixwe énɛ́ ɔ́.

²⁰Ée nǔ énɛ́ lɛ́ɛ bǐ jɛ wá yi ɔ́, ée Joziyási bló Mawu xwé ɔ́ ɖó fó ɔ́, axɔ́sú Ejípu tɔn Nɛko sɔ́ nǔ bó ná yi fun ahwan xá Babilɔ́nunu lɛ́ɛ ɖo Kaakemíci ɖo Efláti tɔ ɔ́ tó. Bɔ Joziyási yi gbo ali n'i,

²¹bɔ Nɛko sɛ́ mɛ dó e ɖɔ yě ní yi ɖɔ n'i ɖɔ: “Judáa xɔ́sú, ani wɛ ɖo hwi kpó nyɛ kpó tɛ́ntin? Un má tɔ́n gbě towe égbé nɛ́. Kɛntɔ́ ce kpó nyɛ kpó wɛ ɖo ahwan fun wɛ, bɔ un tɔ́n gbě tɔn, bɔ Mawu ɖɔ nú mì ɖɔ nyɛ ní yá wǔ. Ma fɔ́n gǔ dó Mawu e ɖo kpɔ́ xá mì ɔ́ jí ó, é táá vívá kún nú we.”

²²Lo ɔ́, Joziyási lɛ́ kɔ sín gǔdo tɔn ǎ. É ɖótó xó e Nɛko ɖɔ lɛ́ɛ ǎ, bó húzú kan bo ná tɔ́n ahwan ɛ, có xó e axɔ́sú Nɛko ɖɔ lɛ́ɛ ɔ́, Mawu gɔ́n wɛ yě gosín. Joziyási ɖidó ayǐkúngban wɛnjɛ Mɛgido tɔn ɔ́ jí bó ná fun ahwan.

²³Sɔ́ja e nɔ hɛn gǎ lɛ́ɛ da gǎ dó axɔ́sú Joziyási, bɔ é ɖɔ nú mɛsɛntɔ́ tɔn lɛ́ɛ ɖɔ: “Mi zé mi yi xwé, ɖó un ɖo ganjí ɖěbǔ ǎ.”

²⁴Énɛ́ ɔ́, mɛsɛntɔ́ tɔn lɛ́ɛ ɖe e sín ahwankɛkɛ́ví e mɛ é ɖe bó ɖo ahwan fun wɛ ɔ́ mɛ, bó sɔ́ ɛ ɖó ahwankɛkɛ́ví tɔn ɖěvo mɛ, bó kplá ɛ yi Jeluzalɛ́mu. Joziyási zán kú bɔ è ɖi i dó yɔdo tɔ́gbó tɔn lɛ́ɛ tɔn mɛ. Judáanu lɛ́ɛ bǐ kpó Jeluzalɛ́munu lɛ́ɛ bǐ kpó nɔ aluwɛ mɛ n'i.

²⁵Gbeyíɖɔ Mawu tɔn Jelemíi ji gbɛvíhan dó Joziyási sín cyɔ jí. Hanjitɔ́ súnnu kpó nyɔ̌nu kpó bǐ wɛ ɖɔ Joziyási sín xó dó gbɛvíhan yětɔn lɛ́ɛ mɛ káká wá jɛ égbé, bó ɖó hwɛndo tɔn ayǐ ɖo Izlayɛ́li. È wlǎn han énɛ́ lɛ́ɛ dó gbɛvíhan lɛ́ɛ mɛ.

²⁶Axɔ́sú Joziyási sín tan e kpo ɔ́, è wlán, sín fí e é bɛ́ sín ɔ́ káká yi fí e é fó dó ɔ́ dó axɔ́sú Izlayɛ́li tɔn lɛ́ɛ kpódó Judáa tɔn lɛ́ɛ kpó sín Tan wéma mɛ; è wlǎn lě e é nɔ gbejí nú nǔ e è wlǎn dó Mawu Mavɔmavɔ sɛ́n ɔ́ mɛ gbɔn é d'é mɛ.