Read fon 2 Tan 4 Bible Online

2 Tan 4 - fon bible

2 Tan 4

¹ È zě ganvɔ dó bló vɔ̌sákpe ɖokpó ná, bɔ ga tɔn nyí mɛ̌tlu wǒ, gblǒ tɔn lɔ ɔ́ nyí mɛ̌tlu wǒ, jǐ yiyi tɔn nyí mɛ̌tlu atɔ́ɔ́n.

²È zě ganvɔ dó bló basya ɖaxó tobotobo ɖokpó ná. Gblǒ tɔn nyí mɛ̌tlu atɔ́ɔ́n, jǐ yiyi tɔn nyí mɛ̌tlu we adaɖé, bɔ goto tɔn nyí mɛ̌tlu afɔtɔn.

³Nyibú sín ɖiɖe gbɔn tó tɔn lɛ́ dó. È to yě ko ko ɖó mɛ̌tlu ɖokpó jí lɛ́ dó, bó to hǎ we. Nyibú lɛ́ɛ kpó basya ɖaxó ɔ́ kpó wɛ è kɔn ɖó kpɔ́.

⁴Nyibúsú ganvɔ tɔn wěwe jí wɛ basya ɔ́ jínjɔ́n. Nyibúsú ɔ́ atɔn kpan nukɔn totaligbé, atɔn kpan nukɔn gbadahwe jí, atɔn kpan nukɔn tofɔligbé, bɔ atɔn kpan nukɔn zǎnzǎnhwe jí. Yonu yětɔn ka lílɛ́ byɔ́ xomɛ ɖo basya ɖaxó ɔ́ glɔ́.

⁵Basya ɖaxó ɔ́ sín tlitli yi santimɛ́tlu tántɔn; è blǒ tó tɔn, bɔ é cí kɔ́fu sín tó ɖɔhun, bó kɛ folówa ɖɔhun. É nɔ́ hɛn sin lǐtli adɔ̌kpo ayizɛ́n (120.000).

⁶ È zě ganvɔ dó bló basya wǒ ná, bó bɛ́ atɔ́ɔ́n ɖó xwé ɔ́ sín ɖisíxwé, bó bɛ́ atɔ́ɔ́n ɖó amyɔ tɔn xwé, bɔ è nǎ nɔ slá wǔ ɖ'é mɛ. È nɔ lɛ́ klɔ́ kanlin e è hu bó ná dó sá vɔ̌ e è nɔ dó zo ɔ́ ná lɛ́ɛ ɖ'é mɛ. Vɔ̌sánú-xwlémawutɔ́ lɛ́ɛ wɛ nɔ zé sin e ɖo basya ɖaxó ɔ́ mɛ ɔ́ dó slá wǔ ná.

⁷ È zě siká dó kɔn zogbɛ́nhɛnnú wǒ ná, bɔ é sɔgbe xá jlɛ̌ e è nǎ ɔ́, bɔ è bɛ̌ yě ɖó xɔ ɖaxó ɔ́ mɛ. Atɔ́ɔ́n ɖo ɖisíxwé, bɔ atɔ́ɔ́n ɖo amyɔxwé.

⁸È blǒ távo wǒ, bó bɛ́ dó xɔ ɖaxó ɔ́ mɛ; atɔ́ɔ́n ɖo ɖisíxwé, bɔ atɔ́ɔ́n ɖo amyɔxwé. È zě siká dó kɔn gannú kanwe ko (100) ná.

⁹È blǒ kɔ́xota ɖokpó nú vɔ̌sánú-xwlémawutɔ́ lɛ́ɛ, bó lɛ́ bló kɔ́xota ɖaxó ɖěvo; è dǒ hɔn bǐ nu, bó kɔn ganvɔ dó.

¹⁰È zě basya ɖaxó tobotobo ɔ́ ɖó xwé ɔ́ sín ɖisíxwé, ɖo zwe e ɖo afɔligbé zǎnzǎnhwe jí ɔ́ kpá.

¹¹Ilámu bló basya lɛ́ɛ, bó bló afínbɛ́nú lɛ́ɛ, lobo bló gannú lɛ́ɛ. Ilámu bló nǔ e axɔ́sú Salomɔ́ɔ zɔ́n ɛ nú Mawu xwé ɔ́ é bǐ.

¹²É bló dotín we, ata tobotobo we, bɔ è nǎ bɛ́ yě ɖó dotín lɛ́ɛ ta. È bló nǔ ɖɔ ɖɔhun we, bɔ è nǎ bɛ́ yě cyɔ́n dó ata tobotobo lɛ́ɛ ɖo dotín lɛ́ɛ jí.

¹³É bló atínsínsɛ́n e è nɔ ylɔ́ ɖɔ glenádi ɔ́ afɔwe (400) ɖó ɖɔ we e è cyɔ́n dó ata lɛ́ɛ wú. É to glenádi lɛ́ɛ hǎ we we dó ɖɔ ɖokpó ɖokpó wú dó ata lɛ́ɛ ɖokpó ɖokpó wú.

¹⁴É lɛ́ bló kɛkɛ́ví lɛ́ɛ, bó bló basya ɖó yě jí.

¹⁵É bló basya ɖaxó tobotobo ɖokpó, bó bló nyibúsú wěwe; basya ɔ́ ɖo nyibúsú lɛ́ɛ jí.

¹⁶É bló afíngannú lɛ́ɛ, pɛ́li lɛ́ɛ, kpódó gǎfu lɛ́ɛ kpó. Nǔ énɛ́ lɛ́ɛ e axɔ́sú Salomɔ́ɔ ɖɔ nú Ilámu-Abíi bɔ é bló nú Mawu Mavɔmavɔ xwé ɔ́ lɛ́ɛ ɔ́, ganvɔ wɛ è dǒ bló bǐ ná, bó ɖíɖí wǔ ná.

¹⁷Kɔ́kpe mɛ wɛ é kɔn nǔ énɛ́ lɛ́ɛ bǐ ɖe, ɖo Judɛ́ɛn tɔdo mɛ, ɖo Sukɔ́tu kpódó Seledata kpó sín gletoxo lɛ́ɛ tɛ́ntin.

¹⁸Salomɔ́ɔ zɔ́n bɔ è blǒ nǔ énɛ́ lɛ́ɛ, bɔ yě sukpɔ́ káká, bɔ è sɔ́ ba ná tunwun ganvɔ kilóo nabí e è zǎn ɔ́ ǎ.

¹⁹Salomɔ́ɔ ɖɔ bɔ è lɛ̌ bló sikánú e è nǎ nɔ́ zán ɖo Mawu xwé gbe lɛ́ɛ bǐ: vɔ̌sákpe e jí è nɔ dó zǎlínkpɔ́n zo ɖe é; siká akú wɛ è dǒ bló ná; távo e jí è nɔ bɛ́ wɔ̌xúxú e è nɔ xwlé Mawu lɛ́ɛ ɖó lɛ́ɛ.

²⁰É zé siká akú dó bló zogbɛ́nhɛnnú lɛ́ɛ, zogbɛ́n yětɔn e è ɖǒ ná tá ɖó tɛn mímɛ́ bǐ ɔ́ nukɔn, lě e sɛ́n ɔ́ zɔ́n gbɔn é. É zé siká akú dó bló távo e jí è nɔ bɛ́ wɔ̌xúxú e è nɔ xwlé Mawu lɛ́ɛ ɖó lɛ́ɛ.

²¹Siká mímɛ́, siká akú wɛ è dǒ bló folówa lɛ́ɛ, zogbɛ́n lɛ́ɛ, kpódó nǔ e è nɔ dó bló myɔ ɖó ná lɛ́ɛ kpó nú zogbɛ́nhɛnnú lɛ́ɛ.

²²Jǐví lɛ́ɛ, gannú lɛ́ɛ, kɔ́fu lɛ́ɛ, zǎlínkpɔ́nfyɔ́nú lɛ́ɛ ɔ́, siká akú wɛ è dǒ bló yě ná; hɔn e ɖo xwé ɔ́ nu lɛ́ɛ, tɛn mímɛ́ bǐ ɔ́ kpódó tɛn mímɛ́ ɔ́ kpó sín hɔn lɛ́ɛ ɔ́, siká wɛ è dǒ bló yě ná.