Read fon 2 Tan 7 Bible Online

2 Tan 7 - fon bible

2 Tan 7

¹ Hwenu e Salomɔ́ɔ xo ɖɛ fó ɔ́, myɔ ɖé jɛ te sín jǐxwé, bó wá fyɔ́ vɔ̌ e è nɔ dó zo ɔ́ kpódó kɔnɖókpɔ́ vɔ́ lɛ́ɛ kpó, bɔ susu Mawu Mavɔmavɔ tɔn gɔ́ xwé ɔ́.

²Vɔ̌sánú-xwlémawutɔ́ lɛ́ɛ sɔ́ sixú byɔ́ Mawu Mavɔmavɔ xwé ɔ́ gbe ǎ, ɖó susu Mawu Mavɔmavɔ tɔn gɔ́ xwé ɔ́.

³ Izlayɛ́li ví lɛ́ɛ bǐ mɔ myɔ kpódó susu Mawu Mavɔmavɔ tɔn kpó jɛ te dó xwé ɔ́ jí, bɔ yě jɛ kpo bo xwe agbɔ̌nnusú do ɖo kpé ɔ́ jí, bó ɖo susu kpa nú Mawu Mavɔmavɔ wɛ ɖɔ: “Mawu Mavɔmavɔ nyɔ́, xomɛnyínyɔ́ tɔn ɖó dogbó ǎ!”

⁴Axɔ́sú Salomɔ́ɔ kpódó Izlayɛ́li togun ɔ́ bǐ kpó sá vɔ̌ nú Mawu Mavɔmavɔ.

⁵Axɔ́sú Salomɔ́ɔ fɔ nyibú adɔ̌kpo ɖě afɔwó (22.000) kpódó gbɔ̌ adɔ̌kpo ayizɛ́n (120.000) kpó dó sá vɔ̌ nú Mawu. Lě e axɔ́sú ɔ́ kpódó Izlayɛ́li togun ɔ́ bǐ kpó hun Mawu xwé ɔ́ gbɔn é nɛ́.

⁶Vɔ̌sánú-xwlémawutɔ́ lɛ́ɛ ɖo azɔ̌ yětɔn jí. Levíi ví lɛ́ɛ ɖo nǔxonú e axɔ́sú Davídi bló nú Mawu lɛ́ɛ xo wɛ. Yě ɖo susu kpa nú Mawu Mavɔmavɔ wɛ ɖó wǎn yíyí tɔn ma ɖó dogbó ɔ́ wú, lě e Davídi kplɔ́n yě gbɔn é. Vɔ̌sánú-xwlémawutɔ́ ɖé lɛ́ɛ ɖo kpɛn kún wɛ ɖo nukɔn yětɔn, bɔ Izlayɛ́li togun ɔ́ bǐ ɖo te.

⁷Énɛ́ ɔ́, Salomɔ́ɔ jó kɔ́xota e ɖo goxɔ ɔ́ nukɔn ɔ́ bǐ nú Mawu Mavɔmavɔ. Đó vɔ̌sákpe ganvɔ tɔn e Salomɔ́ɔ bló ɔ́ sixú hɛn vɔ̌ lɛ́ɛ bǐ ǎ, bɔ Salomɔ́ɔ gbɔ bó dó vɔ̌ e è nɔ dó zo lɛ́ɛ, nǔníná jinukún tɔn lɛ́ɛ kpó kanlin e è dǒ sá kɔnɖókpɔ́vɔ́ ná lɛ́ɛ sín jǒ kpó zo ɖo kɔ́xo ɔ́ ta.

⁸Salomɔ́ɔ ɖu azavaxwe ɔ́ hwe énɛ́ ɔ́ nu kpódó Izlayɛ́li ví lɛ́ɛ bǐ kpó nú azǎn tɛ́nwe. Yě gosín fí tɛnmɛ tɛnmɛ ɖo to ɔ́ mɛ. Yě gosín káká Lɛbo-Hamáti ɖo totaligbé, bó lɛ́ gosín káká tɔsisa Ejípu tɔn ɔ́ kɔn ɖo tofɔligbé.

⁹Ée yě ɖu azavaxwe ɔ́ bɔ ayǐ hɔ́n ɔ́, yě ɖu xwe gɛnnyigɛnnyi ɖokpó; hǔn azǎn tɛ́nwe wɛ yě sɔ́ ɖó te dó zé vɔ̌sákpe ɔ́ dó alɔ mɛ nú Mawu; énɛ́ ɔ́ gúdo ɔ́, yě lɛ́ sɔ́ azǎn tɛ́nwe ɖěvo ɖó te dó ɖu azavaxwe ɔ́.

¹⁰Azǎn ko-nukún-atɔngɔ́ ɔ́ e ɖo sun tɛ́nwegɔ́ ɔ́ mɛ ɔ́ gbe ɔ́, Salomɔ́ɔ nyi togun ɔ́, bɔ mɛ ɖokpó ɖokpó ɖidó xwé. Yě bǐ ɖo awǎ jɛ wɛ, xomɛ ɖo yě hun wɛ, ɖó ɖagbe e Mawu Mavɔmavɔ wa nú Davídi, bo wa nú Salomɔ́ɔ, lobo wa nú togun tɔn Izlayɛ́li ɔ́ wú.

¹¹Hwenu e axɔ́sú Salomɔ́ɔ sá xwé nú Mawu Mavɔmavɔ fó, bó sá xwé é ɖésú tɔn, lobo bló nǔ e é lin ná bló ɖó xwé we lɛ́ɛ gbe é bǐ ɔ́,

¹²Mawu Mavɔmavɔ tɔ́n dó jǐ tɔn zǎn mɛ, bó ɖɔ n'i ɖɔ: “Un se ɖɛ towe, un yí gbe bó ná zé tɛn élɔ́, bɔ è nǎ nɔ́ sá vɔ̌ nú mì ɖo fí.

¹³Nú un sú jǐnukúnsin, bɔ jǐ má sɔ́ ná ja ǎ ɔ́, nú un ná gbe wɛn lɛ́ɛ bɔ yě ná ɖu jinukún e ɖo to ɔ́ mɛ lɛ́ɛ bǐ ɔ́, nú un sɛ́ jɛmɛjí dó togun ce,

¹⁴nú togun ce e wú nyǐkɔ ce ɖe ɔ́ lɛ́ kɔ sín nǔ nyanya e wa wɛ é ɖe lɛ́ɛ gúdo, bó sɔ́ éɖée hwe, bó xo ɖɛ, bó ba mì ɔ́, un ná nɔ jǐxwé dɔ̌n, bó ná ɖótó e; un ná sɔ́ hwɛ tɔn lɛ́ɛ kɛ ɛ, bó ná ɖó nǔ e ɖo jijɛ wɛ ɖo to tɔn mɛ ɔ́ bǐ te.

¹⁵Bɛ́ sín din ɔ́, nukún ce ná ɖo te, tó ce ná ɖo jɛ, bɔ un ná ɖótó ɖɛ e è nǎ xo ɖo tɛn élɔ́ mɛ lɛ́ɛ bǐ.

¹⁶Din ɔ́, un sɔ́ xwé élɔ́, un yí ɖɛ towe, bó se vo e a sa sɛ́ dó mì ɔ́. Un yí xwé élɔ́ e a sá nú mì, bɔ é ná nyí ce káká sɔ́yi ɔ́, bó ná nɔ́ ɖe nyɛɖée xlɛ́ mi ɖo fínɛ́, bɔ nukún ce kpódó ayixa ce kpó ná ɖo jǐ tɔn hwebǐnu.

¹⁷Hwɛ ɔ́, nú a zǎn gbɛ ganjí ɖo nukɔn ce tɔ́ towe Davídi ɖɔhun ɔ́, nú a wa nǔ e un zɔ́n we lɛ́ɛ bǐ ɔ́, nú a nyi sɛ́n ce lɛ́ɛ, bó xwedó nǔ e un ɖɔ lɛ́ɛ bǐ ɔ́,

¹⁸ un ná sɔ́ axɔ́súzinkpo axɔ́súɖuto towe tɔn ɖó te ɖo Izlayɛ́li, lě e un ɖɔ nú tɔ́ towe Davídi gbɔn ɖɔ é kún ná ba mɛ e ná nɔ axɔ́súzinkpo tɔn jí ɖo Izlayɛ́li ɔ́ kpo gbeɖé ɖo vǐ tɔn lɛ́ɛ mɛ ó é.

¹⁹Amɔ̌, nú mi lɛ́ kɔ sín gǔdo ce ɔ́, nú mi ma bló nǔ e un zɔ́n mi lɛ́ɛ ǎ ɔ́, nú mi ma nyi sɛ́n ce lɛ́ɛ, bó xwedó nǔ e un ɖɔ lɛ́ɛ ǎ ɔ́, nú mi sɛn vodún bó ɖe kɔ́ nú yě ɔ́,

²⁰un ná ɖe mi sín to ce e un ná mi ɔ́ mɛ. Un ná jó xwé élɔ́ e a sá nú mì bɔ un yí din ɔ́ dó, bɔ Izlayɛ́li to ɔ́ ná húzú to gbigba, bó ná húzú slǎmɛɖɔnú ɖo togun lɛ́ɛ bǐ mɛ.

²¹Bɔ xwé élɔ́ e ɖó susu sɔ mɔ̌ ɔ́, mɛɖé gbɔn akpá tɔn ɔ́, é ná nɔ kpácá ɛ, bɔ é ná nɔ́ sú xó. È nǎ nɔ́ ɖɔ: ‘Étɛ́wú wɛ Mawu Mavɔmavɔ ka wa nǔ xá to élɔ́ kpódó xwé élɔ́ kpó gbɔn mɔ̌?’

²²Bɔ è nǎ yí gbe nú yě ɖɔ: ‘Mawu Mavɔmavɔ, Mawu tɔ́gbó yětɔn lɛ́ɛ tɔn e ɖe yě tɔ́n sín Ejípu ɔ́ wɛ yě jó dó, bó tɛ́ dó vodún lɛ́ɛ wú, bó nɔ́ ɖe kɔ́ nú yě, lobo nɔ sɛn yě. Nǔ énɛ́ ɔ́ wú wɛ Mawu Mavɔmavɔ sɛ́ awě énɛ́ lɛ́ɛ bǐ dó yě.’ ”