Read fon Ɛsidlási 6 Bible Online

Ɛsidlási 6 - fon bible

Ɛsidlási 6

¹Dadá Daliwúsi ná gbe ɖɔ è nǐ yi kpɔ́n wěma e mɛ è nɔ wlán nǔ e jɛ wá yi lɛ́ɛ dó ɔ́ mɛ, ɖo xɔ e mɛ è bɛ̌ wěma énɛ́ lɛ́ɛ kpódó nǔ e nyí nǔvívɛ́ lɛ́ɛ kpó dó ɖo Babilɔ́nu é.

²Lo ɔ́, Ɛkibatáni, tota tokpɔn Mɛdi tɔn ɔ́ mɛ wɛ è wǎ yi mɔ wěma mlámlá ɖé ɖe. Nǔflínmɛxó e è wlǎn dó wěma ɔ́ mɛ ɔ́ ɖíe:

³“Hwenu e Dadá Silúsi ɖo xwe nukɔn nukɔntɔn ɔ́ bló wɛ ɖo zinkpo jí ɔ́, é ɖe gbeta élɔ́ tɔ́n: È ɖǒ ná vɔ́ Mawu xwé e ɖo Jeluzalɛ́mu ɔ́ blóɖó, bɔ é ná nyí tɛn e mɛ è nǎ nɔ xwlé vɔ̌sánú lɛ́ɛ Mawu ɖe é. Dodó xóxó ɔ́ jí wɛ è nǎ vɔ́ xwé ɔ́ gbá ɖó. Jǐyiyi tɔn ná nyí mɛ̌tlu gban, bɔ gblǒ tɔn ná nyí mɛ̌tlu gban.

⁴È nǎ to awǐnnya kpikpa hǎ atɔn d'é mɛ, bó ná to atín hǎ ɖokpó ján d'é mɛ. Akwɛ́gbá Dadá ɔ́ tɔn mɛ wɛ è nǎ kpɔ́n, bó dó wa azɔ̌ lɛ́ɛ ná.

⁵Nǔzínzán e è sɔ́ siká dó bló ná lɛ́ɛ, kpódó ée è sɔ́ kpatágan dó bló ná lɛ́ɛ kpó, bɔ axɔ́sú Nabukodonɔzɔ́ɔ bɛ́ sín Mawu xwé gbe ɖo Jeluzalɛ́mu, bó bɛ́ ɖó Babilɔ́nu lɛ́ɛ ɔ́, è ɖǒ ná lɛ́ bɛ́ yě jó bɔ è nǎ lɛ́ bɛ́ yi ɖó Mawu xwé gbe ɖo Jeluzalɛ́mu. È nǎ fɔ nǔ lɛ́ɛ ɖokpó ɖokpó ɖó tɛn e mɛ yě ko nɔ́ nɔ ɖ'ayǐ é mɛ.”

⁶Ée Dadá Daliwúsi se mɔ̌ ɔ́, é sɛ́ wěma élɔ́ dó tokpɔngán Tatunayi e ɖo tokpɔn e ɖo Efláti tɔ ɔ́ sín gbadahwe jí ɔ́ nu é, bó sɛ́ wěma dó Cetáa-Bozunayi kpódó tokpɔngán gbɛ̌ yětɔn lɛ́ɛ kpó; wěma ɔ́ ɖɔ: “Mi ɖe nu sín xó énɛ́ ɔ́ mɛ.

⁷Mi jó Jwifu lɛ́ɛ dó nú yě ní vɔ́ Mawu xwé ɔ́ gbá. Tokpɔngán ɔ́ kpódó Jwifu lɛ́ɛ sín gǎn lɛ́ɛ kpó ɖó ná vɔ́ Mawu xwé ɔ́ gbá ɖó tɛn tɔn xóxó ɔ́ mɛ.

⁸Hǔn, un ná gbe mi ɖɔ mi ní gɔ́ alɔ nú Jwifu lɛ́ɛ sín gǎn lɛ́ɛ ɖo Mawu xwé sín azɔ̌ énɛ́ ɔ́ kɔn. Mi kpé nukún d'é wú, bónú akwɛ́ e è na zán dó xɔ énɛ́ wú ɔ́ bǐ sésé ɔ́, ní gosín akwɛ́gbá Dadá ɔ́ tɔn mɛ. Akwɛ́gbá tɔn e mɛ è nɔ bɛ́ takwɛ́ e è jɔ ɖo tokpɔn ɔ́ mɛ ɔ́ dó é.

⁹Ayǐhɔ́ngbe ayǐhɔ́ngbe ɔ́, mǐ ná nɔ kpé nukún dó nǔ e ná hu dó vɔ̌sánú-xwlémawutɔ́ Jeluzalɛ́mu tɔn lɛ́ɛ é wú. Mi ná nɔ ná yě lě e yě byɔ́ gbɔn é; mi ná nɔ ná yě: Nyibúsú, agbo, kpódó lɛ̌ngbɔ́ví e è na dó sá vɔ̌ e è nɔ dó zo ɔ́ nú Mawu sɛ́xwé tɔn ɔ́ kpó. Mɔ̌ ɖokpó ɔ́, mi ná nɔ ná yě blěe, jɛ, vɛ̌ɛn kpódó ami kpó.

¹⁰Énɛ́ ɔ́, yě ná sixú nɔ dó vɔ̌sánú wǎnɖagbenɔ zo nú Mawu e ɖó sɛ́xwé ɔ́, bó ná nɔ xo ɖɛ nú Dadá ɔ́ kpódó vǐ tɔn lɛ́ɛ kpó nú yě ná nɔ ganjí.

¹¹Mɛ ɖé ma bló ɖó xó e un ɖɔ nɛ́ lɛ́ɛ jí ǎ ɔ́, un ná gbe ɖɔ è nǐ ɖe xɔtín tɔn nu xwíɖíxwíɖí ɖokpó, bó tun te bó sɔ́ ɛ slɔ́ nu, lobo zé xwé tɔn dó húzú zunkɔ́ta.

¹²Mawu e ɖo kpɔ́ xá Jeluzalɛ́mu ɔ́ ɖésú ní dɔn tó nú axɔ́sú, abǐ akɔta e ná gbɛ́ xó e un ɖɔ lɛ́ɛ xwedó, bó ná tɛ́nkpɔ́n ɖɔ émí ná gba xwé tɔn é. Nyɛ Daliwúsi wɛ ɖɔ mɔ̌; è nǐ kpé nukún d'é wú titewungbe bó bló.”

¹³Tatunayi, tokpɔngán e ɖo tokpɔn e ɖo Efláti tɔ ɔ́ sín gbadahwe jí ɔ́ nu ɔ́ kpódó Cetáa-Bozunayi kpó, kpódó tokpɔngán gbɛ̌ yětɔn lɛ́ɛ kpó xwedó xó e Dadá Daliwúsi ɖɔ lɛ́ɛ titewungbe.

¹⁴ Wɛn e gbeyíɖɔ Mawu tɔn Ajée kpódó Zakalíi Idóo ví ɔ́ kpó wá dó tomɛxó Jwifu lɛ́ɛ tɔn ɔ́ ná akɔ́nkpinkpan yě, bɔ Mawu xwé sín azɔ̌ ɔ́ yi nukɔn ganjí. Yě gbá xwé bɔ é sɔgbe xá lě e Mawu Izlayɛ́li tɔn ɔ́ ɖɔ gbɔn é, bó sɔgbe xá gbeta e Dadá Pɛ́si tɔn Silúsi, Aatazɛɛzɛsi, kpódó Daliwúsi kpó ɖe tɔ́n é.

¹⁵Adáasun ɔ́ sín azǎn atɔngɔ́ ɔ́ gbe wɛ yě gbá xwé ɔ́ fó, ɖo hwenu e Dadá Daliwúsi ɖo xwe ayizɛ́n bló wɛ ɖo zinkpo jí ɔ́.

¹⁶Jwifu vɔ̌sánú-xwlémawutɔ́ lɛ́ɛ, Levíi ví lɛ́ɛ, kpódó mɛ ɖě lɛ́ɛ e gosín kannumɔgbénu wá lɛ́ɛ kpó jó xwé ɔ́ nú Mawu, bó ɖu xwe tɔn kpódó awǎjijɛ kpó.

¹⁷Nyibúsú kanwe ko (100) kpódó agbo afɔɖé (200) kpó, kpódó lɛ̌ngbɔ́ví afɔwe kpó wɛ è do sá vɔ̌ nú Mawu ɖó xwe ɔ́ tamɛ. Yě lɛ́ zé gbǎgbá wěwe dó sá vɔ̌ nú Mawu, bónú é ná sɔ́ hwɛ kɛ Izlayɛ́li togun ɔ́ bǐ. Gbǎgbá ɖokpó ɖokpó ɖo akɔta ɖokpó ɖokpó sín tɛnmɛ.

¹⁸È mǎ vɔ̌sánú-xwlémawutɔ́ lɛ́ɛ ɖó vovo, bó má Levíi ví lɛ́ɛ ɖó vovo. Azɔ̌ e ɖokpó ɖokpó yětɔn nɔ wa nú Mawu ɖo Jeluzalɛ́mu ɔ́ wɛ è xwedó bo dó má yě, bɔ é sɔgbe xá nǔ e è wlǎn dó Mɔyízisɛ́n wěma mɛ é.

¹⁹ Xwe e xwe Jwifu lɛ́ɛ lɛ́ kɔ sín kannumɔgbénu wá ɔ́, xwe e jɛ fínɛ́ ɔ́ sín sun nukɔntɔn ɔ́ mɛ, ɖo azǎn tɔn wǒ-ɛnɛgɔ́ ɔ́ gbe ɔ́, yě ɖu Dǐndínwáyixwe ɔ́.

²⁰Vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó nɔ kpɔ́ bó slá wǔ, bɔ yě bǐ ɖo mǐmɛ́ jí. Énɛ́ ɔ́, Levíi ví lɛ́ɛ hu Dǐndínwáyigbɔ́ ɔ́ lě e yě kó nɔ́ bló gbɔn é. Yě hu gbɔ̌ énɛ́ lɛ́ɛ nú togun ɔ́, bó hu nú nɔví yětɔn vɔ̌sánú-xwlémawutɔ́ lɛ́ɛ kpódó yě ɖésúnɔ kpó.

²¹Izlayɛ́li ví lɛ́ɛ bǐ ɖu Dǐndínwáyixwe ɔ́ sín nǔɖuɖu: mɛ e lɛ́ kɔ sín kannumɔgbénu wá lɛ́ɛ, kpódó mɛ e ko jó walɔ kwíji kwíji to ɔ́ mɛ nu lɛ́ɛ tɔn lɛ́ɛ dó é kpó. Yě mɛ énɛ́ lɛ́ɛ wá gɔ́ nú Izlayɛ́li ví ɖě lɛ́ɛ bó nɔ́ sɛn Mawu Mavɔmavɔ, Mawu Izlayɛ́li tɔn.

²²Énɛ́ ɔ́ gúdo ɔ́, yě lɛ́ ɖu wɔ̌xúxú e mɛ è ma dó tɔ́n ǎ é sín xwe e è nɔ ɖu xɔ azǎn tɛ́nwe é kpódó awǎjijɛ kpó. Mawu Mavɔmavɔ ná yě awǎjijɛ, ɖó é ɖɔ dó ayi mɛ nú Dadá ɔ́, bɔ é nyɔ́ xomɛ dó yě wú. Énɛ́ ɔ́ wɛ ná akɔ́nkpinkpan yě, bɔ yě ɖó kan dó azɔ̌ ɔ́ wú, bó vɔ́ Mawu Izlayɛ́li tɔn sín xwé ɔ́ gbá.