Read fon Nɛɛmíi 1 Bible Online

Nɛɛmíi 1 - fon bible

Nɛɛmíi 1

¹Nɛɛmíi Hakaliya ví ɔ́ sín xó wɛ ɖo wěma élɔ́ mɛ. Hwenu e Dadá Aatazɛɛzɛsi ɖo xwe we bló wɛ ɖo zinkpo jí, ɖo Kisiléwu sín sun ɔ́ mɛ ɔ́, nyɛ Nɛɛmíi ɖo Súzi toxo ɖaxó Babilɔ́nu tɔn e è mɛ ahohó lɛ́ lɛ̌ dó é mɛ.

²Nɔví ce ɖokpó ká tíin bó nɔ́ nyí Hanáni; é kpó mɛɖé lɛ́ɛ kpó wɛ gosín tokpɔn Judáa tɔn mɛ wá hwenɛ́nu. Un kan nǔɖé lɛ́ɛ byɔ́ yě dó Jwifu e gán sín kannumɔgbénu bó wá lɛ́ɛ wú, bó kan nǔ byɔ́ yě dó Jeluzalɛ́mu toxo ɔ́ wú.

³Bɔ yě yí gbe nú mì ɖɔ: “Mɛ e lɛ́ kɔ sín kannumɔgbénu lɛ́ɛ wá cí Judáa sín tokpɔn ɔ́ mɛ; lo ɔ́, ya ɖaxó ɖé vun blá yě, bɔ ninɔmɛ yětɔn nyí winnyánú ɖé. Amɔ̌, ahohó e è mɛ lɛ́ lɛ̌ dó toxo ɔ́ mu ɖo akpá ɖé lɛ́ɛ xwé, bɔ è dǒ toxo ɔ́ sín hɔntogbó ɖé lɛ́ɛ zo.”

⁴Ée un se xó énɛ́ lɛ́ɛ ɔ́, un jínjɔ́n ayǐ, bó ya avǐ. Un nɔ aluwɛ mɛ xɔ azǎn mɔ̌kpán. Un blá nu bó xo ɖɛ ɖo Mawu nukɔn bó ɖɔ:

⁵“Áo Mawu Mavɔmavɔ, hwi mɛ e ɖo sɛ́xwé é. A kló bó nyí nǔsísí. A nɔ hɛn akɔ e a nɔ jɛ xá mɛ e nɔ nyi sɛ́n towe lɛ́ɛ é. A nɔ́ nɔ gbejí nú mɛ e yí wǎn nú we lɛ́ɛ.

⁶Nyi kɔ kpɔ́n mì, ɖǒtó mì, ɖǒtó ɖɛ ce din; ɖɛ e xo wɛ nyi mɛsɛntɔ́ towe ɔ́ ɖe é. Zǎn kpó kéze kpó ɔ́, un nɔ ɖo vo sa nú we dó mǐ Izlayɛ́li ví lɛ́ɛ tamɛ wɛ, mǐ sinsɛn we tɔ́ lɛ́ɛ. Un ɖo byɔ̌byɔ́ we wɛ ɖɔ hwi ní sɔ́ hwɛ mǐtɔn lɛ́ɛ kɛ mǐ; nyi kpó tɔ́ ce lɛ́ɛ kpó bǐ wɛ hu hwɛ.

⁷Sɛ́n towe lɛ́ɛ kpó nǔ e sɛ́n ɔ́ zɔ́n lɛ́ɛ kpó, kpódó lě e è na wa nǔ gbɔn, bɔ a ɖɔ nú mǐ gbɔn mɛsɛntɔ́ towe Mɔyízi jí lɛ́ɛ kpó ɔ́, mǐ gba bǐ bó dó jɛ agɔ dó we.

⁸ Nǔ ɖo mɔ̌ có, flín xó e a ɖɔ nú mǐ gbɔn Mɔyízi jí é. A ɖɔ nú mǐ ma nɔ gbejí ǎ ɔ́, émí ná gba mǐ dó gbɔn akɔta ɖěvo lɛ́ɛ mɛ.

⁹ Amɔ̌, nú mi ka wá mɔ ɖɔ émí wa nǔ nyi do, bo lɛ́ kɔ wá gɔ̌n ce, bó wlíbo nú sɛ́n ce lɛ́ɛ, bó jɛ nyinyi jí, bónú ahwan na bo wlí mi yi káká fí e gbɛ ɔ́ kponu ɖó ɔ́, un ná wá ba mi cyán, bó ná kplá mi wá fí e un sɔ́ bó nɔ ɖe susu ce xlɛ́ ɖe é.

¹⁰Mawu Mavɔmavɔ, mɛsɛntɔ́ towe wɛ mǐ nyǐ, bó nyí togun towe. Mǐdɛɛ lɛ́ɛ wɛ a sɔ́ hlɔ̌nhlɔ́n towe dó hwlɛ́n gán, bó sɔ́ alɔ towe hlɔ̌nhlɔ́nnɔ ɔ́ dó hwlɛ́n gán.

¹¹Mawu Mavɔmavɔ, kɛnklɛ́n ɖǒtó ɖɛ ce, bó ɖótó vo e sa nú we wɛ gbejínɔtɔ́ towe ɖě lɛ́ɛ lɔ ɖe é. Gbejínɔtɔ́ e nɔ ɖi xɛsi nú we kpó xomɛhunhun kpó lɛ́ɛ é. Blǒ bónú nǔ e ná bló wɛ un ɖe é, má mɔ nu tɔn bo bló bónú Dadá ɔ́ ná yí gbe nú nǔ e ná byɔ́ ɛ wɛ un ɖe ɔ́.” Hwe énɛ́ ɔ́ nu ɔ́, nyi wɛ nɔ hɛn sinnuká nú Dadá ɔ́.