Read fon Nɛɛmíi 5 Bible Online

Nɛɛmíi 5 - fon bible

Nɛɛmíi 5

¹Gbe ɖokpó tíin bɔ Jwifu súnnu kpódó nyɔ̌nu kpó wá jɛ nɔví yětɔn Jwifu ɖě lɛ́ɛ sín hwɛ kpó adǎn kpó.

²Mɛ ɖé lɛ́ɛ ɖɔ: “Mǐdɛɛ lɛ́ɛ ɔ́, vǐ mǐtɔn súnnu kpó nyɔ̌nu kpó sukpɔ́. È nǐ ná nǔɖuɖu mǐ ní sukpɔ́, bónú mǐ ná ɖu bó ná nɔ gbɛ.”

³Mɛ ɖě ɖɔ: “Cóbónú mǐ ná sixú mɔ nǔ ɖu adɔ hwenu ɔ́, è nɔ byɔ́ mǐ ɖɔ mǐ ní to sɔ́ gle mǐtɔn lɛ́ɛ, vǐwungbo mǐtɔn lɛ́ɛ, káká jɛ xwé mǐtɔn lɛ́ɛ ɖésú jí ɖó gbanu hwɛ̌.”

⁴Mɛ ɖěvo lɛ́ɛ lɛ́ ɖɔ: “Cóbónú mǐ ná sixú sú akwɛ́jɔ Dadá ɔ́ tɔn lɛ́ɛ ɔ́, gle mǐtɔn lɛ́ɛ kpó vǐwungbo mǐtɔn lɛ́ɛ kpó wɛ mǐ nɔ sɔ́ ɖó axɔ́nu hwɛ̌.

⁵Có akɔ ɖokpó ɔ́ wɛ mǐ ká nyí, vǐ mǐtɔn lɛ́ɛ gbɔn vo nú nɔví mǐtɔn énɛ́ lɛ́ɛ sín vǐ ǎ, bɔ mǐdɛɛ lɛ́ɛ ɔ́, vǐ mǐtɔn lɛ́ɛ wɛ mǐ nɔ sɔ́ ɖó gbanu, bɔ vǐ mǐtɔn nyɔ̌nu ɖé lɛ́ɛ ɖe, bɔ mǐ kó sa. Đěwagbɔn sɔ́ tíin nú mǐ ǎ, ɖó gle mǐtɔn lɛ́ɛ kpódó vǐwungbo mǐtɔn lɛ́ɛ kpó ko húzú axɔ́tɔ́nɔ mǐtɔn lɛ́ɛ tɔn.”

⁶Ée un se xó énɛ́ lɛ́ɛ bó se vo énɛ́ lɛ́ɛ e sa wɛ yě ɖe ɔ́, xomɛ sin mǐ ɖésú.

⁷ Agban kpinkpɛn énɛ́ lɛ́ɛ e tonukún lɛ́ɛ kpó toxo ɔ́ sín gǎn lɛ́ɛ kpó ɖíɖá nɔví yětɔn lɛ́ɛ ɔ́, un tunwun ɖɔ un ná ylɔ́ kplé ɖaxó ɖokpó, bó ná kɛ nu d'é wú nú yě.

⁸Nǔgbó ɔ́, un wá kplé yě, bó ɖɔ nú yě ɖɔ: “Nɔví mǐtɔn e sɔ́ yěɖée sa xá toɖévomɛnu, bó húzú kannumɔ lɛ́ɛ ɔ́, mǐ vɔ́ yě xɔ lě e mǐ kpé wú gbɔn é. Din ɔ́, mi ɖésúnɔ wɛ nɔ́ sa nɔví mitɔn lɛ́ɛ, bɔ é ka lɛ́ nyí to mǐtɔn mɛ nu lɛ́ɛ wɛ mi nɔ sa yě xá.” Ée un ɖɔ mɔ̌ ɔ́, yě mɔ nǔɖé ɖɔ ǎ bo gbɔ bo xwɛ.

⁹Un lɛ́ yí xó bo ɖɔ: nǔ e wa wɛ mi ɖe ɔ́ nyɔ́ ǎ. Mi tunwun ɖɔ émí ɖó ná ɖó sísí nú Mawu ɖo walɔ émítɔn mɛ, bó ná gló zun ɖo kɛntɔ́ mǐtɔn akɔta ɖěvo lɛ́ɛ sí ǎ cé?

¹⁰Nyɛ lɔ kpó mɛ e kpó nyɛ kpó ɖo kpɔ́ lɛ́ɛ kpó, kpódó azɔ̌gbɛ́ ce lɛ́ɛ kpó nya akwɛ́ nú yě, bó nya jinukún nú yě. Nǔ ɖo mɔ̌ có un ɖo byɔ̌byɔ́ mi wɛ ɖɔ mǐ ní jó nǔ e yě nya ɖo mǐ sí lɛ́ɛ bǐ dó nú yě.

¹¹Mɛ e ɖu axɔ́ dó mi lɛ́ɛ ɔ́, mi sɔ́ gle yětɔn, vǐwungbo yětɔn, olívugbo yětɔn kpó xwé yětɔn kpó jó nú yě égbé din, vǐ e akwɛ́ e mi nya nú yě ɔ́ ná ji ɔ́, vǐ e jinukún e mi nya nú yě ɔ́ ná ji ɔ́, vǐ e vɛ̌ɛn abǐ ami e mi nya nú yě ɔ́ ná ji ɔ́, mi jó bǐ dó nú yě.

¹²Énɛ́ ɔ́, yě yí gbe ɖɔ: “Mǐ ná bló nǔ e a ɖɔ nú mǐ lɛ́ɛ. Mǐ ná fɔ nǔ e mǐ yí ɖo yě sí ɖó gbanu lɛ́ɛ bǐ jó nú yě; mǐ sɔ́ ná byɔ́ nǔɖé yě ǎ.” Ée yě ɖɔ mɔ̌ ɔ́, un ylɔ́ vɔ̌sánú-xwlémawutɔ́ lɛ́ɛ kplé, bó byɔ́ axɔ́tɔ́nɔ lɛ́ɛ ɖɔ yě ní xwlé ɖo yě nukɔn ɖɔ akpá e émí dó ɔ́, émí ná bló ɖ'é jí.

¹³Énɛ́ gúdo ɔ́, un húnhún awu ce bó ɖɔ: Mawu ní húnhún mɛ e ma ná bló nǔ e yě ɖɔ din lɛ́ɛ ɖ'é jí ǎ é, lě e un húnhún awu ce gbɔn é. Ní ɖe yě sín vǐ yětɔn lɛ́ɛ kpó asi yětɔn lɛ́ɛ kpó kɔn, bó ɖe yě sín nyɔ̌ná yětɔn bǐ kɔn nú yě ní jɛ agbǎ. Énɛ́ ɔ́, kplékplémɛ ɔ́ bǐ yí gbe bó ɖɔ: “Amǐ, ní nyí mɔ̌.” Yě bǐ kpa susu nú Mawu Mavɔmavɔ, bó ka bló nǔ e yě ɖɔ ɔ́ ɖ'é jí.

¹⁴Ée è sɔ́ mì tokpɔngán Jwifu lɛ́ɛ tɔn ɖó tokpɔn Judáa tɔn nu ɔ́, xwe wěwe wɛ un bló ɖo gǎn jǐ; xwe e xwe Dadá Aatazɛɛzɛsi ɖo xwe ko bló wɛ ɖo zinkpo jí ɔ́ wɛ è sɔ́ mì tokpɔngán, bɔ un nɔ gǎn jí káká jɛ hwenu e é ɖo xwe gban-nukún-we (32) bló wɛ ɖo zinkpo jí é. Đo xwe wěwe énɛ́ e un bló lɛ́ɛ mɛ ɔ́, nyɛ kpó mɛ e ɖo azɔ̌ wa xá mì wɛ lɛ́ɛ ɖě kpó yí nǔ e tokpɔngán nɔ yí ɖo toví lɛ́ɛ sí é ɖě ǎ.

¹⁵Lo ɔ́, tokpɔngán e jɛ nukɔn nú mì lɛ́ɛ dó tagba nú togun ɔ́ káká bó nɔ́ yí nǔɖuɖu kpó ahan kpó ɖo yě sí, bó nɔ́ lɛ́ yí akwɛ́gan kanɖé (40) ɖo yě sí d'é jí gbe ɖokpó. Mɛ e nɔ wa azɔ̌ xá tokpɔngán lɛ́ɛ lɔ nɔ táfú togun ɔ́ ɖu. Amɔ̌, nyɛ ɔ́, ɖó sísí e un ɖó nú Mawu ɔ́ wútu ɔ́, un wa nǔ gbɔn mɔ̌ gbeɖé ǎ.

¹⁶É nyɔ́ wa ɔ́, nyi ɖésúnɔ wa azɔ̌ ɖo dǒ ɔ́ wú. Un ɖó dó tɛn e mɛ un ɖe ɔ́ wú, bó xɔ ayǐkúngban mɛɖé tɔn kpɔcɔnu ǎ; azɔ̌gbɛ́ ce e ɖo azɔ̌ wa wɛ ɖo dǒ ɔ́ wú lɛ́ɛ lɔ wa nǔ gbɔn mɔ̌ ǎ.

¹⁷É ɖo mɔ̌ bɔ un nɔ ná nǔɖuɖu toxo ɔ́ sín gǎn Jwifu kantɔn gban (150) kpó jǒnɔ e nɔ gosín to e ɖo to mǐtɔn kpá wá nú mì lɛ́ɛ kpó.

¹⁸Ayǐhɔ́ngbe tɛgbɛ ɔ́, un nɔ ná nyibúsú ɖokpó, lɛ̌ngbɔ́ ayizɛ́n kpódó xɛ kpó. Azǎn wǒ gbe tɛgbɛ ɔ́, è nɔ hɛn vɛ̌ɛn wá nú mì bɔ é nɔ su. Un ɖo nǔ énɛ́ lɛ́ɛ wa wɛ có, nǔ e nyí nǔ bɔ tokpɔngán ɔ́ ɖó acɛ ná lɛ́ɛ ɔ́, un nɔ byɔ́ ɖě ǎ, ɖó azɔ̌ lɛ́ɛ ko nyí agban ɖokpó bó kó kpɛn togun ɔ́.

¹⁹Mawu ce, kpɔ́n dó nǔ e un wa nú togun élɔ́ é wú, bó ná fífá towe mì.