Read fon Nɛɛmíi 6 Bible Online

Nɛɛmíi 6 - fon bible

Nɛɛmíi 6

¹Sanbaláti kpódó Toviya kpó, kpódó Gɛcɛ́mu Alabíinu ɔ́ kpó, kpódó kɛntɔ́ mǐtɔn ɖěvo lɛ́ɛ kpó se ɖɔ nyi bló dǒ ɔ́ ɖó kpé, bɔ é sɔ́ kpo fí e dǒ ɔ́ mu ɖe ɔ́ ɖě bɔ è gɔn blǒbló ɖó ǎ, un ka ko dó hɔn lɛ́ɛ ǎ.

²Sanbaláti kpó Gɛcɛ́mu kpó ka sɛ́ wɛn dó mì ɖɔ nyi ní wá kpé émí ɖo Kefilímu, ɖo Onɔ sín tɔdo ɔ́ mɛ. Yě tunwun ɖɔ émí ná wa nǔ xá mì.

³Xó e nyɛ ka ɖɔ sɛ́ dó yě ɔ́ ɖíe: “Azɔ̌ e kpo ɖo así ce bɔ un ná wa é sukpɔ́ ɖésú; un sixú wá mi gɔ́n din ǎ. Ényí un jó azɔ̌ dó din bo wá mɔ mi ɖo dɔ̌n ɔ́, azɔ̌ ɔ́ ná nɔ te.”

⁴Azɔn ɛnɛ wɛ yě dǒ wɛn ɖokpó ɔ́ sɛ́ dó mì, bɔ nyi lɔ ka nɔ ɖɔ xó ɖokpó ɔ́ sɛ́ dó yě.

⁵Azɔn atɔ́ɔ́ngɔ́ ɔ́, Sanbaláti sɛ́ wěma ɖokpó dó mì gbɔn azɔ̌gbɛ́ tɔn ɖokpó jí; é ka sú wěma ɔ́ ǎ.

⁶Wěma ɔ́ ɖo ɖiɖɔ wɛ ɖɔ: “È ɖo sise wɛ ɖɔ hwi kpódó mɛ towe lɛ́ɛ kpó ɖo linlin ná fɔ́n gǔ wɛ. Gɛcɛ́mu ko ɖɔ xó énɛ́ ɔ́ nú mì; xó ɔ́ ká ko gba kpé mɛ e ma nyí Jwifu ǎ lɛ́ɛ bǐ mɛ. Énɛ́ ɔ́ wú wɛ a ɖo Jeluzalɛ́mu dó ɔ́ bló ɖó wɛ. È ɖɔ hwi jló ná nyí axɔ́sú enyǐi,

⁷káká bɔ a ko ɖe gbeyíɖɔ ɖé lɛ́ɛ, bɔ yě ná jlá gbɔn Jeluzalɛ́mu ɖɔ hwi wɛ nyí Judáa xɔ́sú ɔ́. Dadá ɔ́ ná se xó énɛ́ ɔ́ din. Ényí a ma jló nú é ná se xó énɛ́ ɔ́ ǎ hǔn, wǎ nú mǐ ná ɖɔ xó dó xó ɔ́ wú.”

⁸Un ka ɖɔ sɛ́ dó e ɖɔ: “Nǔ e ba ɖɔ wɛ a ɖe nɛ́ lɛ́ɛ ɔ́, xó nǔgbó ɖokpó ɖ'é mɛ ǎ; xó ɖé wɛ a kpa ɖɔ kpowun.”

⁹Nǔ e wú yě ɖo mɔ̌ ɖɔ wɛ é ɖíe: Yě tunwun ɖɔ émí ná tɛ́nkpɔ́n bó dó xɛsi mǐ, bónú awakanmɛ ko kú mǐ ɔ́, mǐ na jó azɔ̌ ɔ́ dó. Mawu ce, din ɔ́, dǒ wǔsyɛ́n lanmɛ nú mì.

¹⁰Un wá yi Cemaya Deláya ví Mɛxetaveyɛ́li vívú ɔ́ gɔ́n gbe ɖokpó, ɖó é kpé wú bo wá gɔ̌n ce ǎ. Ée un yi mɔ ɛ ɔ́, é ɖɔ nú mì ɖɔ: “Wǎ mǐ yi Mawu xwé gbe, bó yi adɔ̌gba ɔ́ mɛ, bó ná sú hɔn lɛ́ɛ bǐ dó ta, ɖó kɛntɔ́ towe lɛ́ɛ ná tɔ́n gbě towe zǎn mɛ, bó ná wá hu we.”

¹¹Un ka yí gbe n'i ɖɔ: un nyí mɛ ná hɔn ɖo kɛntɔ́ nukɔn ɖé ǎ. Đésú ɔ́, hwɛhutɔ́ nyɛ ɖɔhun ná byɔ́ tɛn mímɛ́ bǐ ɔ́ mɛ bó nɔ gbɛ a? Gbeɖé un ná yi dɔ̌n ǎ.

¹²Un tunwun ganjí ɖɔ é kún nyí wɛn wɛ é yí sín Mawu gɔ́n, bó ɖo dǐdó mì wɛ ó. Lo ɔ́, Toviya kpó Sanbaláti kpó wɛ dó ajɔ ɛ, bɔ é ɖo xó énɛ́ ɔ́ ɖɔ wɛ,

¹³bónú ma ɖi xɛsi bo ná bló nǔ e ɖɔ wɛ é ɖe ɔ́, bó ná jɛ hwɛ mɛ bɔ yě ná dó hɛ̌n mì, bó ná hɛn nyǐkɔ ce blí.

¹⁴Mawu ce, flín nǔ e Toviya kpó Sanbaláti kpó bló é, bó flín nǔ e gbeyíɖɔ nyɔ̌nu Nɔadiya kpó gbeyíɖɔ ɖěɖě e jló ná dó xɛsi mì lɛ́ɛ kpó bló é.

¹⁵È blǒ dǒ ɔ́ ɖó fó ɖo Elúlisun ɔ́ sín azǎn koatɔ́ngɔ́ (25) ɔ́ gbe. Azǎn kanɖé wěwe (52) wɛ è sɔ́ ɖó te bó dó bló ná.

¹⁶Ée kɛntɔ́ mǐtɔn e ɖo to e lɛ́ lɛ̌ dó mǐ lɛ́ɛ mɛ lɛ́ɛ se mɔ̌ ɔ́, xɛsi jɛ yě jí, bɔ winnyá hu yě káká. Yě bǐ wá mɔ ɖɔ azɔ̌ énɛ́ ɔ́, Mawu mǐtɔn sín jlǒ mɛ wɛ é nyí wiwa dó.

¹⁷Hwe énɛ́ ɔ́ nu ɔ́, tonukún Judáa tɔn lɛ́ɛ kpó Toviya kpó nɔ sɛ́ wěma dó yěɖée káká.

¹⁸Jwifu gěgé kpó e kpó nɔ́ blá gbě, ɖó Jwifu ɖé sín vǐsú wɛ é nyí; Jwifu ɔ́ nɔ́ nyí Cekaniya; Aláxi ví wɛ, bɔ éyɛ́ ɖésú ɔ́, vǐ tɔn súnnu Yexoxanáni da Mɛculamu Bɛlɛkya ví ɔ́.

¹⁹È nɔ wá ɖɔ lě e é kpé nǔ wú sɔ é ɖo nukɔn ce, bó nɔ sɔ́ xó ce lɛ́ɛ yi ɖɔ n'i. Mɔ̌ ɖokpó ɔ́, Toviya ɖésúnɔ sɛ́ wěma dó mì, bó ná dó dó xɛsi nú mì.