Read fon Ɛsitɛ́ɛ 3 Bible Online

Ɛsitɛ́ɛ 3 - fon bible

Ɛsitɛ́ɛ 3

¹Ée nǔ énɛ́ lɛ́ɛ bǐ jɛ wá yi ɔ́, axɔ́sú Zɛ̌ɛzɛsi sɔ́ Hamáa gǎn. Hamáa ɔ́, Hamumɛdata ví wɛ, bó jɔ ɖo Agagi kún mɛ. Axɔ́sú ɔ́ sɔ́ ɛ gǎn hɔn-yitɔ́ xɔ́sú.

²Azɔ̌watɔ́ axɔ́sú ɔ́ tɔn lɛ́ɛ bǐ nɔ jɛ kpo nú Hamáa, bó nɔ́ ɖe kɔ́ n'i ɖó axɔ́sú ɔ́ wɛ ná gbe tɔn. Maadocée kɛ́ɖɛ́ jɛ́n má nɔ́ jɛ kpo bo nɔ ɖe kɔ́ n'i ǎ.

³Azɔ̌watɔ́ ɖě lɛ́ɛ kanbyɔ́ Maadocée ɖɔ: “Nɛ̌ ká gbɔn bɔ hwɛ ma nɔ bló nǔ e axɔ́sú ɔ́ ɖɔ ɔ́ ǎ?”

⁴Ée yě nɔ́ fɔ́n bó nɔ ɖo ɖiɖɔ n'i wɛ bɔ é ma se ǎ ɔ́, yě yi jɛ hwɛ tɔn nú Hamáa, bó ná kpɔ́n ɖɔ é ná lɛ́ kpo ɖo nǔ e é xwe ɔ́ bló wɛ a jí; ɖó é ɖɔ nú yě ɖɔ Jwifu wɛ émí nyí.

⁵Hamáa mɔ ɖɔ Maadocée kún nɔ jɛ kpo bo nɔ ɖe kɔ́ nú émí nǔgbó ó, bɔ xomɛ sin i ɖésú.

⁶Lo ɔ́, Hamáa mɔ ɖɔ nú émí dɔn tó nú Maadocée kɛ́ɖɛ́ ɔ́, é kún kpé ó, ɖó è ko ɖɔ n'i ɖɔ Jwifu wɛ Maadocée nyí, bɔ é ɖɔ émí ná sú to tɔn mɛ nu Jwifu e ɖo axɔ́súɖuto ɔ́ mɛ lɛ́ɛ bǐ sín kún dó.

⁷Hwenu e axɔ́sú Zɛ̌ɛzɛsi ɖo xwe wěwe bló wɛ ɖo axɔ́súzinkpo jí ɔ́, sun nukɔn nukɔntɔn e è nɔ ylɔ́ ɖɔ Nisáan ɔ́ mɛ ɔ́, Hamáa nyi akɔ dó sun ɖokpó ɖokpó, bó nyi dó azǎn ɖokpó ɖokpó, bó ná tunwun azǎn e ná nyɔ́ ɔ́ kpó sun e ná nyɔ́ nú tito tɔn lɛ́ɛ é kpó, bɔ akɔ wá jɛ sun wěwegɔ́ e nyí Adáa é jí.

⁸Hamáa ɖɔ nú axɔ́sú Zɛ̌ɛzɛsi ɖɔ: “Sɛ́mɛɖó e, togun ɖé tíin bó ɖo axɔ́súɖuto mɛtɔn mɛ, bó gba kpé tokpɔn lɛ́ɛ bǐ mɛ. Togun énɛ́ ɔ́ gbɔn vo ɖo togun ɖě lɛ́ɛ bǐ mɛ, bɔ walɔ tɔn gbɔn vo nú togun ɖě lɛ́ɛ bǐ tɔn; mɛ e ɖo togun énɛ́ ɔ́ mɛ lɛ́ɛ nɔ nyi sɛ́n mɛtɔn lɛ́ɛ ǎ; è nǎ agbɔ̌n mɛ énɛ́ lɛ́ɛ ɔ́, é ná nyɔ́ nú mɛ ǎ.

⁹Nú è mɔ ɖɔ é nyɔ́ ɔ́, è nǎ ɖe gbeta ɖokpó tɔ́n ɖɔ è nǐ hu yě, bɔ è nǎ wlán gbeta énɛ́ ɔ́ dó wěma mɛ. Énɛ́ ɔ́, un ná zé kpatágan tɔ́nu afɔɖé kanwe ko (300) jó nú azɔ̌watɔ́ lɛ́ɛ, bɔ yě ná bɛ̌ dó akwɛ́gbá mɛtɔn mɛ.”

¹⁰Ée kɛntɔ́ Jwifu lɛ́ɛ tɔn Hamáa, Hamumɛdata ví e jɔ ɖo Agagi kún mɛ ɔ́ ɖɔ mɔ̌ ɔ́, axɔ́sú ɔ́ ɖe alɔgan sín alɔ, bó sɔ́ dó n'i,

¹¹lobo ɖɔ n'i ɖɔ: “Sɔ́ akwɛ́ towe ɖ'ayǐ; un jó togun énɛ́ ɔ́ nú we; zě e dó wa nǔ e jló we ɔ́ ná.”

¹²Azǎn wǒ-atɔngɔ́ e ɖo sun nukɔntɔn ɔ́ mɛ ɔ́, è ylɔ̌ wěgbóhɛntɔ́ axɔ́sú ɔ́ tɔn lɛ́ɛ; yě wlán wěma lɛ́ɛ lě e Hamáa ɖɔ gbɔn nú yě é, bó sɛ́ dó mɛ e sɔ́ axɔ́sú ɔ́ sín afɔ ɖó te lɛ́ɛ kpó tokpɔngán lɛ́ɛ kpó, kpódó togun tɛnmɛ tɛnmɛ lɛ́ɛ sín gǎn lɛ́ɛ kpán. È wlǎn wěma lɛ́ɛ lě e tokpɔn ɖokpó ɖokpó nɔ wlán nǔ gbɔn é, bó wlán dó gbe e togun ɖokpó ɖokpó nɔ dó ɖo axɔ́súɖuto ɔ́ mɛ é mɛ. Axɔ́sú Zɛ̌ɛzɛsi sín nyǐkɔ mɛ wɛ è wlǎn wěma lɛ́ɛ dó, bó zé alɔgan tɔn dó ɖó wuntun ná.

¹³È bɛ̌ wěma lɛ́ɛ nú wɛnsagun lɛ́ɛ ɖɔ yě nǐ yi má gbɔn togun e ɖo axɔ́sú ɔ́ sín acɛ mɛ lɛ́ɛ bǐ mɛ. È wlǎn dó wěma ɔ́ mɛ ɖɔ è nǐ gbo gbe Jwifu lɛ́ɛ bǐ, è nǐ hu yě bǐ; mɛ wínnyáwínnyá lɛ́ɛ kpódó mɛ kpikpo lɛ́ɛ kpó; nyɔ̌nu lɛ́ɛ kpó yɔkpɔ́vú lɛ́ɛ kpó. Yě nǐ hu yě, bó bɛ́ nǔ yětɔn lɛ́ɛ bǐ; è ma kú nǔbláwǔ nú yě ó. Azǎn ɖokpó wɛ è nǎ sɔ́ ɖó te tawun, bó dó hu yě ná. Azǎn énɛ́ ɔ́ wɛ nyí azǎn wǒ-atɔngɔ́ e ɖo sun wěwegɔ́ ɔ́ mɛ é; sun wěwegɔ́ ɔ́ wɛ è nɔ ylɔ́ ɖɔ Adáa.

¹⁴Gbeta énɛ́ e axɔ́sú ɔ́ ɖe tɔ́n dó wěma mɛ ɔ́, è ɖǒ ná jlǎ gbɔn tokpɔn ɖokpó ɖokpó mɛ, bó byɔ́ togun lɛ́ɛ bǐ, ɖɔ yě nǐ ɖo gbesisɔ mɛ nú azǎn énɛ́ ɔ́.

¹⁵Wɛnsagun lɛ́ɛ hwlɛ́ndó bó yi lě e axɔ́sú ɔ́ ɖɔ gbɔn é. È jlǎ gbeta ɔ́ gbɔn Súzi tota ɔ́ mɛ. Hwenɛ́nu ɔ́, axɔ́sú ɔ́ kpó Hamáa kpó ɖo ayǐjínjɔ́n bó ɖo ahan nu wɛ; Súzi to ɔ́ bǐ ká wlú.