Read fon Ɛsitɛ́ɛ 6 Bible Online

Ɛsitɛ́ɛ 6 - fon bible

Ɛsitɛ́ɛ 6

¹Adɔ̌ vɛ́ axɔ́sú ɔ́ zǎn énɛ́ ɔ́ mɛ, bɔ é byɔ́ ɖɔ è ní zě wěma e mɛ è wlǎn nǔ e jɛ ɖo axɔ́súɖuto ɔ́ mɛ lɛ́ɛ dó ɔ́ wá nú émí, bɔ è zě wá bó xa nǔ e ɖ'é mɛ ɔ́ n'i.

² Akpá e xwé è wlǎn lě e azɔ̌watɔ́ axɔ́sú ɔ́ tɔn Bigitáni kpó Tɛlɛ́ci kpó e nɔ́ nɔ axɔ́sú ɔ́ sín hɔn jí lɛ́ɛ jló ná hu axɔ́sú ɔ́ gbɔn bɔ Maadocée se bó yi ɖɔ ɔ́ wɛ è xa n'i tawun.

³Đěe è xa n'i ɔ́, é kanbyɔ́ ɖɔ: “Ée Maadocée ka se xó énɛ́ ɔ́ bó wá ɖɔ ɔ́, ajɔ tɛ́ è ka ná ɛ? Yɛ̌yi tɛ́ è ka wlí n'i?” Bɔ azɔ̌watɔ́ axɔ́sú ɔ́ tɔn lɛ́ɛ yí gbe n'i ɖɔ: “È ma ná nǔ ɖěbǔ i nɛ́!”

⁴Hwenɛ́nu ɔ́, Hamáa ɖo axɔ́sú ɔ́ sín kɔ́xota jɛ wɛ, bó jló ná ɖɔ n'i ɖɔ é ní ná gbe bónú è nǎ dó kan kɔ nú Maadocée, bo sɔ́ sin dó atín e é zɔn bɔ è kpa ɔ́ wú; axɔ́sú ɔ́ kanbyɔ́ ɖɔ: “Mɛ̌ ka ɖo kɔ́xota fínɛ́?”

⁵Azɔ̌watɔ́ lɛ́ɛ yí gbe n'i ɖɔ: “Hamáa wɛ.” Bɔ axɔ́sú ɔ́ ɖɔ é ní byɔ́ xɔ mɛ.

⁶Hamáa ka byɔ́ xɔ mɛ bɔ axɔ́sú ɔ́ kanbyɔ́ ɛ ɖɔ: “Un jló ná wlí yɛ̌yi nú mɛɖé; yɛ̌yi e un ma wlí nú mɛɖé kpɔ́n gbeɖé ǎ ɔ́ wɛ un jló ná wlí nú mɛ ɔ́; nɛ̌ mɔ̌ un sixú bló gbɔn n'i?” Ée Hamáa se mɔ̌ ɔ́, é jɛ ɖiɖɔ dó xomɛ jí ɖɔ: “Mɛ̌ wɛ axɔ́sú ɔ́ ká jló ná sɔ́ su sɔ mɔ̌? Nyɛ jɛ́n é ná nyí.” Énɛ́ ɔ́, é yí gbe nú axɔ́sú ɔ́ ɖɔ:

⁷“Sɛ́mɛɖó, ényí è jlǒ ná sɔ́ mɛɖé su gbɔn mɔ̌ hǔn,

⁸è ɖɔ nú è nǐ sɔ́ axɔ́sú wú e mɛ nɔ dó lɛ́ɛ ɖokpó, bó sɔ́ mɛ ɔ́ ɖó sɔ́ e jí mɛ ɖésúnɔ nɔ jínjɔ́n bɔ axɔ́súgbákún ɖo ta tɔn ɔ́

⁹jó nú azɔ̌watɔ́ mɛtɔn ɖaxó ɖaxó lɛ́ɛ ɖokpó, bó zɔ́n ɛ ɖɔ ní sɔ́ awu ɔ́ dó nú mɛ ɔ́, bó sɔ́ ɛ jínjɔ́n sɔ́ ɔ́ jí, lobo kplá ɛ yi ɖi sa gbɔn toxo ɔ́ mɛ; azɔ̌watɔ́ ɔ́ ná ɖo xó sú wɛ ɖo nukɔn tɔn ɖɔ: lě e è nɔ bló gbɔn nú mɛ e axɔ́sú ɔ́ jló ná sɔ́ su ɔ́ ɖíe!”

¹⁰Ée Hamáa ɖɔ mɔ̌ ɔ́, axɔ́sú ɔ́ ɖɔ n'i ɖɔ: “Yi, zě awu ɔ́ kpó sɔ́ ɔ́ kpó din tlóló, bó bló nǔ e a ɖɔ nú mì din ɔ́ bǐ nú Maadocée, nya Jwifu e nɔ́ nɔ hɔn jí é; ma wɔn nǔ e a ɖɔ lɛ́ɛ ɖěbǔ ó.”

¹¹Nǔgbó ɔ́, Hamáa yi zé awu ɔ́ kpó sɔ́ ɔ́ kpó; é dó awu ɔ́ nú Maadocée, bó sɔ́ ɛ jínjɔ́n sɔ́ ɔ́ jí, lobo kplá ɛ ɖi sa gbɔn toxo ɔ́ mɛ, bó ɖo xó sú wɛ ɖo nukɔn tɔn ɖɔ: “Lě e è nɔ bló gbɔn nú mɛ e axɔ́sú ɔ́ jló ná sɔ́ su ɔ́ ɖíe!”

¹²Énɛ́ ɔ́ gúdo ɔ́, Maadocée lɛ́ kɔ wá axɔ́sú ɔ́ sín hɔn jí, bɔ winnyá hu Hamáa, bɔ é cyɔ́n avɔ ta, bó ka fyá yi xwé gbe.

¹³Ée é jɛ xwé gbe ɔ́, é wlí nǔ e jɛ ɔ́ bǐ ɖɔ nú asi tɔn Zelɛ́ci kpó xɔ́ntɔn tɔn lɛ́ɛ kpó. Bɔ nǔnywɛ́tɔ́ tɔn lɛ́ɛ kpó asi tɔn kpó ɖɔ n'i ɖɔ: “Maadocée e nukɔn a ko ɖo winnyá ɖu ɖe wɛ din ɔ́, ée é nyí ɖɔ Jwifu wɛ é nyí ɔ́, a sixú wa nǔ ɖěbǔ n'i ǎ; winnyá ɖu wɛ jɛ́n a nǎ nɔ ɖe ɖo nukɔn tɔn tɛgbɛ.”

¹⁴Xó énɛ́ ɔ́ ɖɔ n'i wɛ yě ɖe, bɔ agooɖojǐe axɔ́sú ɔ́ tɔn lɛ́ɛ wá, bó kplá ɛ tlóló ɖidó agɔ̌ e Ɛsitɛ́ɛ ylɔ́ ɔ́ tɛnmɛ.