Read fon Tíntɔ́n 1 Bible Online

Tíntɔ́n 1 - fon bible

Tíntɔ́n 1

¹ Jakɔ́bu e è nɔ lɛ́ ylɔ́ ɖɔ Izlayɛ́li ɔ́ kpó vǐ tɔn lɛ́ɛ kpó wá Ejípu. Mɛ ɖokpó ɖokpó wá kpódó xwédo[1] tɔn kpó. Vǐ lɛ́ɛ sín nyǐkɔ ɖíe:

²Hwlibɛ́ni, Sinmɛnyɔ́ɔ, Levíi, Judáa,

³Isakáa, Zabulɔ́ɔn, Bɛnjamɛ́ɛ,

⁴Dan, Nɛfutali, Gadi kpódó Acɛ́ɛ kpó.

⁵Jakɔ́bu ví e wá Ejípu lɛ́ɛ bǐ bló kanɖé gban (70). Vǐ tɔn Jozɛ́fu ɔ́ ká kó ɖo Ejípu hwenɛ́nu nɛ́.

⁶Jozɛ́fu wá kú, nɔví tɔn lɛ́ɛ kpódó mɛ e nyí gbɛ̌ yětɔn lɛ́ɛ kpó bǐ wá kú.

⁷ Izlayɛ́li ví lɛ́ɛ ɖo jiji wɛ, yě ɖo kún gba wɛ, yě fɔ́n ɔ́, yě nɔ́ ɖo jijɛ jí wɛ, bó nɔ́ ɖo hlɔ̌nhlɔ́n dó d'é jí wɛ. Yě sukpɔ́ káká bó kpé to ɔ́ mɛ bǐ.

⁸ Nǔ ɖo mɔ̌ káká bɔ axɔ́sú yɔ̌yɔ́ ɖé wá xɔ to ɖo Ejípu. Éyɛ́ ká tunwun Jozɛ́fu sín tan ɖěbǔ ǎ.

⁹Axɔ́sú ɔ́ ɖɔ nú togun tɔn ɖɔ: “Mi kpɔ́n; togun Izlayɛ́li ví lɛ́ɛ tɔn ɔ́, yě sukpɔ́ hú mǐ, yě hú gǎn mǐ.

¹⁰ Mi wá mǐ ɖe wě dó yě wú, bó ná ɖó ji e ji wɛ yě ɖe ɔ́ te. É má nyí mɔ̌ ǎ ɔ́, nú ahwan wá tɔ́n mǐ ɔ́, yě táá wá jɛ kɛntɔ́ mǐtɔn lɛ́ɛ jí, bó ná fun ahwan xá mǐ, lobo ná tɔ́n sín to ɔ́ mɛ.”

¹¹Ée axɔ́sú ɔ́ ɖɔ mɔ̌ ɔ́, è ɖe azɔ̌gán ɖé lɛ́ɛ ɖó yě nu, bónú yě ná nɔ́ ɖó azɔ̌ syɛ́nsyɛ́n lɛ́ɛ kɔ jí nú Izlayɛ́li ví lɛ́ɛ dó dó ya nú yě. Lě e yě bló gbɔn bɔ Izlayɛ́li ví lɛ́ɛ ɖó Pitɔ́mu toxo kpó Hlamusɛ́si toxo kpó ayǐ ɔ́ nɛ́. Toxo énɛ́ lɛ́ɛ mɛ wɛ è nɔ bɛ́ axɔ́sú sín jinukún lɛ́ɛ ɖó.

¹²Lo ɔ́, è ɖo ya dó nú yě wɛ ɔ́, lo wɛ yě nɔ́ lɛ́ ɖo jiji d'é jí wɛ, bó nɔ́ ɖo kún gba d'é jí wɛ ɔ́ nɛ́. Nǔ énɛ́ ɔ́ zɔ́n bɔ è mɔ Izlayɛ́li ví lɛ́ɛ lě ɔ́, ado nɔ hu mɛ.

¹³Énɛ́ ɔ́, Ejípunu lɛ́ɛ sɔ́ Izlayɛ́li ví lɛ́ɛ dó ɖó kannumɔ, bó hɛn yě syɛ́nsyɛ́n.

¹⁴Yě nɔ́ ɖó azɔ̌ syɛ́nsyɛ́n lɛ́ɛ kɔ jí nú yě, káká bɔ gbɛ nɔ vlɛ́ nu nú yě: yě nɔ́ wa kozɔ́, yě nɔ́ sún blǐki, bó nɔ́ wa glezɔ́ tɛnmɛ tɛnmɛ lɛ́ɛ bǐ. Yě nɔ́ ɖó azɔ̌ syɛ́nsyɛ́n alɔkpa alɔkpa énɛ́ lɛ́ɛ kɔ jí nú yě. Nǔ yětɔn nɔ́ blá wǔ nú yě ǎ.

¹⁵Axɔ́sú Ejípu tɔn ɔ́ ylɔ́ nyɔ̌nu e nɔ́ nɔ aji nú nyɔ̌nu Eblée lɛ́ɛ bó ɖɔ xó nú yě lɔmɔ̌; nyɔ̌nu énɛ́ lɛ́ɛ ɖokpó nɔ́ nyí Ciflá bɔ ɖokpó nɔ́ nyí Púwa.

¹⁶É ɖɔ nú yě ɖɔ: “Nú mi nɔ aji nú nyɔ̌nu Eblée lɛ́ɛ ɖě hǔn, mi kpɔ́n vǐ e é ji ɔ́: ényí súnnu wɛ hǔn, mi hu, é ká nyí nyɔ̌nu wɛ hǔn, mi jó e dó nyi gbɛ.”

¹⁷Lo ɔ́, ajinɔtɔ́ lɛ́ɛ ɖó sísí nú Mawu, bó bló nǔ e axɔ́sú ɔ́ ɖɔ yě ní bló ɔ́ ǎ; yě jó vǐ lɛ́ɛ bǐ dó nyi gbɛ.

¹⁸Énɛ́ ɔ́, axɔ́sú Ejípu tɔn ɔ́ wá ylɔ́ ajinɔtɔ́ lɛ́ɛ gbe ɖokpó, bó ɖɔ nú yě ɖɔ: “Aniwú mi nɔ jó vǐ lɛ́ɛ dó nyi gbɛ? Étɛ́wú wɛ mi ɖo nǔ wa gbɔn mɔ̌ wɛ?”

¹⁹Bɔ ajinɔtɔ́ lɛ́ɛ yí gbe n'i ɖɔ: “Nyɔ̌nu Eblée lɛ́ɛ cí nyɔ̌nu Ejípunu lɛ́ɛ ɖɔhun ǎ, yědɛɛ lɛ́ɛ dó hlɔ̌nhlɔ́n; yě nɔ́ kó ji vǐ cóbɔ mǐ mɛ ajinɔtɔ́ lɛ́ɛ nɔ́ wá.”

²⁰Énɛ́ wú ɔ́, Mawu wa ɖagbe nú ajinɔtɔ́ lɛ́ɛ. Izlayɛ́li ví lɛ́ɛ ká fɔ́n bó ɖo jiji wɛ, bó sukpɔ́ ɖésú.

²¹Sísí e nyɔ̌nu ajinɔtɔ́ lɛ́ɛ ɖó nú Mawu ɔ́ zɔ́n, bɔ Mawu ná vǐ yě dó wa ɖagbe nú yě.

²² Axɔ́sú Ejípu tɔn ɔ́ ká ná gbe togun tɔn ɔ́ bǐ ɖɔ: “È ji vǐ súnnu Eblée ɖěbǔ hǔn, mi sɔ́ ɛ nyi dó Nilu mɛ[2], mi ka ná jó nyɔ̌nu lɛ́ɛ bǐ dó nyi gbɛ.”