Read fon Tíntɔ́n 10 Bible Online

Tíntɔ́n 10 - fon bible

Tíntɔ́n 10

¹Mawu Mavɔmavɔ ɖɔ nú Mɔyízi ɖɔ: “Yi axɔ́sú ɔ́ gɔ́n. Nyɛ wɛ zɔ́n bɔ é kpó gǎn hɔn-yitɔ́ tɔn lɛ́ɛ kpó ɖo tó tlí wɛ, bónú má jlɛ́ nǔdábaɖa énɛ́ lɛ́ɛ ɖo tɛ́ntin yětɔn.

²Énɛ́ ɔ́, a nǎ sixú ɖɔ lě e un wa Ejípunu lɛ́ɛ sín nǔ gbɔn ɔ́ kpódó nǔdábaɖa e un jlɛ́ ɖo tɛ́ntin yětɔn lɛ́ɛ kpó sín xó nú vǐ towe lɛ́ɛ kpó vǐvú towe lɛ́ɛ kpó. Énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ.”

³Mɔyízi kpó Aalɔ́ɔn kpó yi axɔ́sú ɔ́ gɔ́n, bó ɖɔ n'i ɖɔ: “Mawu Mavɔmavɔ, Mawu Eblée lɛ́ɛ tɔn ɔ́ ɖɔ: ‘Káká jɛ hwetɛ́nu wɛ a nǎ gbɛ́ hwiɖée zé hwe ɖo nukɔn ce dó? Jǒ togun ce dó bónú é ní yi sɛn mì.

⁴Ényí a gbɛ̌ ɖɔ émí kún ná jó togun ce dó bɔ é ná yi ó ɔ́, é jɛ sɔ ɔ́, un ná dɔn wɛn lɛ́ɛ byɔ́ to towe mɛ.

⁵Yě ná kpé ayǐkúngban ɔ́ bǐ jí, bɔ è sɔ́ ná sixú mɔ ayǐkúngban ǎ; yě ná ɖu nǔ e kpo bɔ kɛ́njí má hɛn gblé ǎ lɛ́ɛ bǐ; yě ná ɖu atín e ɖo wǔwú wɛ ɖo gle mitɔn mɛ lɛ́ɛ bǐ.

⁶Yě ná gɔ́ xwé towe lɛ́ɛ gbe, bó ná gɔ́ gǎn hɔn-yitɔ́ towe lɛ́ɛ bǐ kpó Ejípunu lɛ́ɛ bǐ kpó sín xwé gbe. Sín tɔ́gbó tɔgbo towe lɛ́ɛ hwenu káká wá jɛ égbé ɔ́, nǔ mɔ̌hunkɔtɔn ko jɛ kpɔ́n gbeɖé ǎ.’ ” Énɛ́ ɔ́, Mɔyízi sí te sín axɔ́sú Ejípu tɔn ɔ́ gɔ́n bó tɔ́n.

⁷Bɔ gǎn hɔn-yitɔ́ lɛ́ɛ kanbyɔ́ axɔ́sú ɔ́ ɖɔ: “Káká jɛ hwetɛ́nu wɛ nya élɔ́ ná ɖó mɔ nú mǐ yi jɛ? Jǒ mɛ lɛ́ɛ dó nú yě ní yi sɛn Mawu Mavɔmavɔ, Mawu yětɔn. A mɔ ɖɔ Ejípu to ɔ́ ɖo kún sú dó wɛ a cé?”

⁸Énɛ́ ɔ́, è ylɔ̌ Mɔyízi kpó Aalɔ́ɔn kpó wá axɔ́sú ɔ́ gɔ́n, bɔ é ɖɔ nú yě ɖɔ: “Mi bo yi sɛn Mawu Mavɔmavɔ, Mawu mitɔn. Mɛ̌ lɛ́ɛ wɛ ná yi?”

⁹Bɔ Mɔyízi yí gbe n'i ɖɔ: “Mǐ mɛ bǐ wɛ ná yi; mǐ ná kplá mɛ wínnyáwínnyá mǐtɔn lɛ́ɛ, mǐ ná kplá nyɔ̌ɖaxóví mǐtɔn lɛ́ɛ, súnnu kpó nyɔ̌nu kpó, lobo ná kplá lɛ̌ngbɔ́ mǐtɔn lɛ́ɛ, kpó nyibú mǐtɔn lɛ́ɛ kpó, ɖó xwe ɔ́, Mawu Mavɔmavɔ tamɛ wɛ mǐ ná yi ɖu dó.”

¹⁰Axɔ́sú Ejípu tɔn ɔ́ ɖɔ nú yě ɖɔ: “Mawu Mavɔmavɔ ní bó nɔ kpɔ́ xá mi bó. Un ná ná gbe mi bɔ mi kpó hɛ̌nnu mitɔn lɛ́ɛ kpó ná yi nǔgbó. É ɖo wɛn din ɖɔ linlin nyanya wɛ mi ɖó.

¹¹Xó énɛ́ e ɖɔ wɛ mi ɖe ɔ́ nyí xó bɔ è nǎ ɖɔ ǎ, súnnu lɛ́ɛ kɛ́ɖɛ́ wɛ ná yi sɛn Mawu Mavɔmavɔ, ɖó nǔ e mi sixú byɔ́ ɔ́ bǐ jɛ́n nɛ́.” Bɔ è nya yě tɔ́n sín axɔ́sú ɔ́ gɔ́n.

¹²Mawu Mavɔmavɔ ɖɔ nú Mɔyízi ɖɔ: “Dlɛ̌n alɔ towe ɖó Ejípu to ɔ́ jí, bónú wɛn lɛ́ɛ ní tɔ́n ɖo to ɔ́ mɛ; yě ní ɖu gběhan e ɖo ayǐkúngban ɔ́ jí lɛ́ɛ bǐ; yě ní ɖu nǔ e kɛ́njí ma hɛn gblé ǎ lɛ́ɛ bǐ.”

¹³Mɔyízi ka dlɛ́n kpo tɔn dó Ejípu to ɔ́ jí, bɔ Mawu Mavɔmavɔ ɖɔ bɔ jɔhɔn ɖé nyi sín zǎnzǎnhwe jí dó to ɔ́ jí bó nyi káká bɔ zǎn kú, bɔ ayǐ hɔ́n. Ée é wá jɛ zǎnzǎn ɔ́, jɔhɔn énɛ́ e ɖo nyinyi wɛ ɔ́ dɔn wɛn lɛ́ɛ wá.

¹⁴ Wɛn lɛ́ɛ vun blá Ejípu to ɔ́, bó ɖó gbɔn ayǐkúngban ɔ́ bǐ jí. Yě sukpɔ́ káká bɔ è ko mɔ mɔ̌hunkɔtɔn kpɔ́n gbeɖé ǎ, è ka ná lɛ́ mɔ mɔ̌ kpɔ́n gbeɖé ǎ.

¹⁵Yě kpé ayǐkúngban ɔ́ bǐ jí, bɔ ayǐkúngban ɔ́ dó ablu. Yě ɖu gběhan e ɖo ayǐkúngban ɔ́ jí lɛ́ɛ bǐ, bó ɖu atínsínsɛ́n lɛ́ɛ bǐ; yě ɖu nǔ e kɛ́njí ɔ́ ma hɛn gblé ǎ lɛ́ɛ bǐ, bɔ é sɔ́ kpo ama ɖěbǔ ɖo atín lɛ́ɛ jí ǎ, é ká sɔ́ kpo gběhan ɖěbǔ ɖo gle lɛ́ɛ mɛ ɖo Ejípu to ɔ́ mɛ ǎ.

¹⁶Énɛ́ ɔ́, axɔ́sú ɔ́ ylɔ́ Mɔyízi kpó Aalɔ́ɔn kpó tlóló bó ɖɔ nú yě ɖɔ: “Un hu hwɛ dó Mawu Mavɔmavɔ, Mawu mitɔn, bó hu hwɛ dó mi.

¹⁷Hǔn mi bo lɛ́ sɔ́ hwɛ ce kɛ mì ɖo élɔ́ mɛ; gǔdo tɔn ɖíe. Mi sa vo nú Mawu Mavɔmavɔ, Mawu mitɔn bónú é ní lɛ́ sɛ nǔ nyanya élɔ́ e ná dɔn mɛ yi kú ɔ́ dó zɔ nú mì.”

¹⁸Ée axɔ́sú ɔ́ ɖɔ mɔ̌ ɔ́, Mɔyízi gosín gɔ̌n tɔn, bó yi sa vo nú Mawu Mavɔmavɔ.

¹⁹Énɛ́ ɔ́, Mawu Mavɔmavɔ ɖɔ bɔ jɔhɔn ɖaxó ɖé nyi sín gbadahwe jí bó kplɔ́ wɛn lɛ́ɛ yi kɔn nyi Xu Vɔvɔ ɔ́ mɛ, bɔ é sɔ́ kpo kwín ɖokpó géé ɖo Ejípu to ɔ́ mɛ ǎ.

²⁰Lo ɔ́, Mawu Mavɔmavɔ bló bɔ axɔ́sú ɔ́ lɛ́ tlí tó bó gbɛ́ ɖɔ Izlayɛ́li ví lɛ́ɛ kún ná yi ó.

²¹Mawu Mavɔmavɔ ɖɔ nú Mɔyízi ɖɔ: “Dlɛ̌n alɔ towe dó jǐnukúnsin, bónú ablu ní dó ɖo Ejípu to ɔ́ mɛ; ablu ɔ́ ní dó káká bó cí è hɛn ɔ́, è nǎ ɖó alɔ wú ɖɔhun.”

²² Bɔ Mɔyízi dlɛ́n alɔ tɔn dó jǐnukúnsin, bɔ ablu gɔngɔn ɖé dó ɖo Ejípu to ɔ́ bǐ mɛ xɔ azǎn atɔn.

²³È nɔ sixú mɔ mɛɖée ǎ; énɛ́ ɔ́, mɛ ɖěbǔ sɛ tɛn sín fí e é ɖe ɔ́ ǎ káká nú azǎn atɔn. Wěziza ká ɖo fí e Izlayɛ́li ví lɛ́ɛ nɔ́ nɔ lɛ́ɛ bǐ.

²⁴Bɔ axɔ́sú Ejípu tɔn ɔ́ ylɔ́ Mɔyízi bó ɖɔ n'i ɖɔ: “Mi yi sɛn Mawu Mavɔmavɔ; mi sixú kplá vǐ mitɔn lɛ́ɛ yi. Lɛ̌ngbɔ́ mitɔn lɛ́ɛ kpó nyibú mitɔn lɛ́ɛ kpó jɛ́n mi ná jó dó.”

²⁵Mɔyízi ɖɔ n'i ɖɔ: “Nǔ e mǐ ná dó yi sá kɔnɖókpɔ́ sín vɔ̌ lɛ́ɛ kpó vɔ̌ e è nɔ dó zo lɛ́ɛ kpó ná nú Mawu Mavɔmavɔ, Mawu mǐtɔn ɔ́, hwi ɖésúnɔ wɛ ná zé dó alɔ mitɔn mɛ nɛ́ hǔn?

²⁶Nǔ sixú nyí mɔ̌ ǎ. Mǐ ná kplá kanlin mǐtɔn lɛ́ɛ yi, é ná kpo kwín ɖokpó ǎ, ɖó yě mɛ wɛ mǐ ná sɔ́ ɖě ɖe dó sɛn Mawu Mavɔmavɔ, Mawu mǐtɔn ná. Dɔ̌n jɛ́n mǐ ka ná jɛ hwɛ̌ cóbó ná tunwun ée mǐ ná sɔ́ xwlé Mawu Mavɔmavɔ lɛ́ɛ é.”

²⁷Mawu Mavɔmavɔ bló bɔ axɔ́sú ɔ́ lɛ́ tlí tó bó sɔ́ ba ná jó yě dó nú yě ná yi ǎ.

²⁸Axɔ́sú ɔ́ ɖɔ nú Mɔyízi ɖɔ: “Tɔ́n sín xwé ce gbe! Ma sɔ́ tɛ afɔ xwé ce gbe ɖě ó; ɖó a sɔ́ wá gɔ̌n ce gbeɖé ɔ́, a nǎ kú gbe énɛ́ gbe.”

²⁹Mɔyízi ka ɖɔ n'i ɖɔ: “É nyɔ́, a ɖɔ nǔgbó. Lě e a ko ɖɔ gbɔn ɔ́, un sɔ́ ná wá gɔ̌n towe ɖě ǎ.”