Read fon Tíntɔ́n 12 Bible Online

Tíntɔ́n 12 - fon bible

Tíntɔ́n 12

¹ Mawu Mavɔmavɔ ɖɔ nú Mɔyízi kpó Aalɔ́ɔn kpó ɖo Ejípu ɖɔ:

²“Sun e mɛ mi ɖe ɔ́ ná nyí sun e jɛ nukɔn ɖo sun lɛ́ɛ mɛ ɔ́ nú mi; sun e jɛ nukɔn ɖo sun lɛ́ɛ mɛ ɖo xwe ɔ́ mɛ ɔ́ wɛ é ná nyí nú mi.

³Mi yi ɖɔ nú Izlayɛ́li ví lɛ́ɛ bǐ ɖɔ: ɖo sun élɔ́ ɔ́ sín azǎn wǒgɔ́ ɔ́ gbe ɔ́, hɛ̌nnu ɖokpó ɖokpó abǐ xwédo ɖokpó ɖokpó ná ná gbɔ̌ví ɖokpó.

⁴Ényí gbɛtɔ́ má sukpɔ́ ɖo hɛ̌nnu ɖé mɛ, bó ná sixú ɖu kanlin ɖokpó ɔ́ bǐ ǎ ɔ́, è nǎ kpɔ́n xwé e yá xwé énɛ́ ɔ́ gbe, bó ná ba mɛ gɔ́ nú yě. Nǔ e mɛ ɖokpó ɖokpó ná sixú ɖu ɔ́ wɛ è nǎ kpɔ́n dó zé kanlin ɔ́.

⁵Gbɔ̌ví asú e ko ɖó xwe ɖokpó bɔ blɔ̌ ɖé má ɖo wǔ tɔn ǎ ɔ́ wɛ è nǎ zé; é sixú nyí lɛ̌ngbɔ́ví abǐ gbɔ̌ví.

⁶Mi ná zé kanlin ɔ́ ɖ'ayǐ káká jɛ sun élɔ́ ɔ́ sín azǎn wǒ-ɛnɛgɔ́ ɔ́ gbe, bɔ Izlayɛ́li ví lɛ́ɛ bǐ ná hu gbe énɛ́ ɔ́ gbe gbadanu.

⁷È nǎ yǐ kanlin ɔ́ sín hun, bɔ xwé e gbe è nǎ ɖu lan tɔn ɖe lɛ́ɛ ɔ́, è nǎ sá dó xwé lɛ́ɛ ɖokpó ɖokpó sín hɔntogbó; hɔntogbó lɛ́ɛ sín hɔnkpo we lɛ́ɛ kpó agba yětɔn kpó wú wɛ è ka ná sá dó.

⁸Zǎn ɖokpó énɛ́ ɔ́ mɛ ɔ́, è nǎ mɛ lan tɔn bó ɖu; è nǎ zé wɔ̌xúxú e mɛ è ma dó tɔ́n ǎ é kpó ama e vɛ́ ɔ́ kpó dó ɖu ná.

⁹Mi ma nú é kpo ɖo mǔ, bónú mi ɖu ó; mi ma zé sin dó ɖa ná ó; lo ɔ́, mi mɛ ta tɔn kpó afɔ tɔn lɛ́ɛ kpó, kpódó xomɛnú tɔn lɛ́ɛ kpó.

¹⁰Mi ma jó ɖěbǔ dó bónú ayǐ ní hɔ́n dó ó; nú é ká kpo bɔ ayǐ ná hɔ́n dó jɛ́n wɛ hǔn, mi dó bǐ zo.

¹¹Ényí mi ja lan ɔ́ ɖu gbé hǔn, mi sɔ́ to e mɛ mi xwe ɔ́ sín nǔ: mi ná blá gǒ, afɔkpa ná ɖo afɔ mitɔn, bɔ kpo mitɔn ná ɖo alɔ mitɔn mɛ; mi ná hwlɛ́ndó bó ɖu. Nyɛ Mawu Mavɔmavɔ ɔ́ sín Dǐndínwáyi wɛ.

¹²“Zǎn énɛ́ ɔ́ mɛ ɔ́, un ná gbɔn Ejípu to ɔ́ mɛ, bó ná hu nukɔngbéví súnnu e ɖo to ɔ́ mɛ lɛ́ɛ bǐ, un ná hu gbɛtɔ́ kpó kanlin kpó sín nukɔngbéví bǐ. Un ná ɖó hwɛ nú vodún e ɖo Ejípu lɛ́ɛ bǐ. Nyɛ wɛ nyí Mawu Mavɔmavɔ.

¹³Hun ɔ́ ná nyí wuntun ɖé nú mì ɖo xwé e gbe mi ná ɖe lɛ́ɛ sín hɔntogbó wú; nú un mɔ hun ɔ́, un ná gbɔn xwé ɔ́ ta nu dín, bɔ hwenu e un ná dɔn tó nú Ejípunu lɛ́ɛ ɔ́, mǐdɛɛ lɛ́ɛ ná gló awě e ná vívá kún yětɔn é.

¹⁴ “Mi ná hɛn nǔ e ná jɛ gbe énɛ́ ɔ́ gbe ɔ́ ayi mɛ, bó ná nɔ́ ɖu xwe dó ta ce mɛ dó flín ná; é ná nyí sɛ́n nú kúnkan mitɔn lɛ́ɛ káká sɔ́yi.”

¹⁵Mawu Mavɔmavɔ lɛ́ ɖɔ: “Mi ná ɖu wɔ̌xúxú e mɛ è ma dó tɔ́n ǎ ɔ́ nú azǎn tɛ́nwe. Bɛ́ sín azǎn nukɔntɔn ɔ́ gbe ɔ́, tɔ́n ɖěbǔ ná nɔ xwé mitɔn lɛ́ɛ ɖě gbe ǎ. Bɛ́ sín azǎn nukɔntɔn ɔ́ gbe yi azǎn tɛ́nwegɔ́ ɔ́ gbe ɔ́, ényí mɛ ɖěbǔ ɖu wɔ̌xúxú e mɛ è dǒ tɔ́n ɔ́, è nǎ ɖe mɛ ɔ́ sín togun Izlayɛ́li tɔn ɔ́ mɛ.

¹⁶Mi ná bló kplé ɖaxó ɖokpó ɖo azǎn nukɔntɔn ɔ́ kpó azǎn tɛ́nwegɔ́ ɔ́ kpó gbe; è nǎ wa azɔ̌ ɖěbǔ azǎn énɛ́ lɛ́ɛ gbe ǎ, nǔɖuɖu e mɛ ɖokpó ɖokpó ná ɖu ɔ́ jɛ́n mi ná ɖa.

¹⁷“Mi ná ɖu wɔ̌xúxú e mɛ è ma dó tɔ́n ǎ ɔ́ sín xwe énɛ́ ɔ́ xwewú xwewú; ɖó gbe énɛ́ ɔ́ gbe wɛ un ɖe mi tɔ́n sín Ejípu. Mi ná nɔ́ flín azǎn énɛ́ ɔ́, bó ná nɔ́ nyi ɖo jijimɛ ɖokpó ɖokpó mɛ; é ná nyí sɛ́n nú vǐ mitɔn lɛ́ɛ.

¹⁸Bɛ́ sín sun nukɔntɔn ɔ́ sín azǎn wǒ-ɛnɛgɔ́ ɔ́ gbe gbadanu káká yi sun ɔ́ sín azǎn ko-nukún-ɖokpógɔ́ ɔ́ gbe gbadanu ɔ́, wɔ̌xúxú e mɛ è ma dó tɔ́n ǎ ɔ́ wɛ mi ná ɖu.

¹⁹Tɔ́n ɖěbǔ ná ɖo xwé mitɔn lɛ́ɛ ɖě gbe ǎ nú azǎn tɛ́nwe. Đó mɛ ɖěbǔ e ná ɖu wɔ̌xúxú e mɛ è dǒ tɔ́n ɔ́, è nǎ ɖe mɛ ɔ́ sín togun Izlayɛ́li tɔn ɔ́ mɛ, mɛ ɔ́ sixú nyí jǒnɔ, é ká sixú nyí toví.

²⁰Fí ɖěbǔ e mi ná ɖe ɔ́, wɔ̌xúxú e mɛ è ma dó tɔ́n ǎ ɔ́ wɛ mi ná nɔ́ ɖu.”

²¹Ée Mɔyízi se mɔ̌ ɔ́, é ylɔ́ tomɛxó Izlayɛ́li tɔn lɛ́ɛ bǐ, bó ɖɔ nú yě ɖɔ: “Mi mɛ ɖokpó ɖokpó ní yi wlí lɛ̌ngbɔ́ví abǐ gbɔ̌ví bó hu dó xwé mitɔn lɛ́ɛ tamɛ, bó ná dó ɖu Dǐndínwáyixwe ɔ́ ná.

²²Énɛ́ ɔ́ gúdo ɔ́, mi ná blá izɔ́puma, bó ná sɔ́ dó hun e mi yí dó gannú mɛ ɔ́ mɛ, bó ná sá d'agba ɔ́ kpó hɔntogbó ɔ́ sín hɔnkpo we lɛ́ɛ kpó wú. Mɛ ɖěbǔ ní má ká tɔ́n sín xwé tɔn gbe káká jɛ zǎnzǎn ó.

²³ Hwenu e Mawu Mavɔmavɔ ná wá tó dɔn nú Ejípu to ɔ́ gbé ɔ́, nú é mɔ hun ɖo agba ɔ́ kpó hɔnkpo we lɛ́ɛ kpó wú ɔ́, é ná dín gbɔn hɔntogbó ɔ́ ta nu; é ná lɔn bɔ nǔhɛngblétɔ́ ɔ́ ná byɔ́ xwé mitɔn lɛ́ɛ gbe bó hu mi ǎ.

²⁴Mi ná nɔ́ xwedó nǔ énɛ́ e Mawu Mavɔmavɔ ɖɔ nú mi ɔ́, bɔ é ná nyí sɛ́n nú mi kpó kúnkan mitɔn lɛ́ɛ kpó káká sɔ́yi.

²⁵Hwenu e mi ná byɔ́ to e Mawu Mavɔmavɔ dó akpá ɖɔ émí ná ná mi ɔ́ mɛ ɔ́, mi ná nɔ́ fɔ yɛsu énɛ́ lɛ́ɛ.

²⁶Ényí vǐ mitɔn lɛ́ɛ kanbyɔ́ mi ɖɔ étɛ́ wú mi nɔ fɔ yɛsu énɛ́ ɔ́ a jí ɔ́,

²⁷mi ná yí gbe nú yě ɖɔ: ‘Vɔ̌ e mǐ nɔ sá nú Mawu Mavɔmavɔ ɖo Dǐndínwáyixwe ɔ́ hwenu ɔ́ wɛ. Hwenu e mǐ mɛ Izlayɛ́li ví lɛ́ɛ ɖo Ejípu ɔ́, Mawu Mavɔmavɔ dɔn tó nú Ejípu to ɔ́; lo ɔ́, é gbɔn xwé mǐtɔn lɛ́ɛ nukɔn dín bó hwlɛ́n xwédo mǐtɔn lɛ́ɛ gán.’ ” Ée Mɔyízi ɖɔ xó fó ɔ́, Izlayɛ́li ví lɛ́ɛ jɛ kpo bó ɖe kɔ́.

²⁸Yě yi bló nǔ e Mawu Mavɔmavɔ ɖɔ nú Mɔyízi kpó Aalɔ́ɔn kpó lɛ́ɛ bǐ pɛ́pɛ́pɛ́.

²⁹ Zǎn vlɔ́ ɖó we, bɔ Mawu Mavɔmavɔ hu nukɔngbéví súnnu e ɖo Ejípu lɛ́ɛ bǐ. É bɛ́ sín axɔ́sú Ejípu tɔn ɔ́ sín nukɔngbéví e ná nɔ tɛn tɔn mɛ ɔ́ jí, káká yi gantɔ́ kpó kanlin kpó sín nukɔngbéví jí.

³⁰Axɔ́sú Ejípu tɔn ɔ́ fɔ́n zǎn énɛ́ ɔ́ mɛ, gǎn hɔn-yitɔ́ tɔn lɛ́ɛ bǐ fɔ́n, Ejípunu lɛ́ɛ bǐ fɔ́n, bɔ xósúsú mlí ɖo Ejípu to ɔ́ mɛ, ɖó xwé ɖě gbe ɖe bɔ mɛ ma kú ɖe ǎ.

³¹Axɔ́sú ɔ́ ylɔ́ Mɔyízi kpó Aalɔ́ɔn kpó zǎn ɔ́ mɛ, bó ɖɔ nú yě ɖɔ: “Mi sɔ́ nǔ bó gosín to ce mɛ; mi kpó Izlayɛ́li ví lɛ́ɛ kpó ní yi. Mi yi sɛn Mawu Mavɔmavɔ lě e mi ɖɔ gbɔn é.

³²Mi bɛ́ gbɔ̌ mitɔn lɛ́ɛ kpó nyibú mitɔn lɛ́ɛ kpó lě e mi ɖɔ gbɔn é. Mi yi bó byɔ́ ɖagbe nú mì ɖo Mawu mitɔn gɔ́n.”

³³Ée axɔ́sú ɔ́ ɖɔ mɔ̌ ɔ́, Ejípunu lɛ́ɛ jɛ cɔcɔ dó nú Izlayɛ́li ví lɛ́ɛ jí ɖɔ yě ní yá wǔ gosín to émítɔn mɛ, ɖó yě mɔ ɖɔ émí mɛ bǐ wɛ ɖo nǎ kú wɛ.

³⁴Énɛ́ ɔ́ wú wɛ Izlayɛ́li ví lɛ́ɛ má dó tɔ́n linfín e yě nya ɔ́ mɛ cóbó ɖidó ǎ. Yě bǔ avɔ dó nǔ e mɛ yě nɔ́ nya linfín ɖe lɛ́ɛ, bó zé ɖó abɔ̌ta.

³⁵ Izlayɛ́li ví lɛ́ɛ kó bló nǔ e Mɔyízi ɖɔ nú yě ɖ'ayǐ lɛ́ɛ: yě kó byɔ́ nǔ e è sɔ́ kpatágan dó bló ná lɛ́ɛ kpó sikánú lɛ́ɛ kpó, kpódó avɔ kpó Ejípunu lɛ́ɛ.

³⁶Mawu Mavɔmavɔ ko bló bɔ Ejípunu lɛ́ɛ kó nyɔ́ xomɛ dó Izlayɛ́li ví lɛ́ɛ wú, bó kó ná nǔ e yě byɔ́ lɛ́ɛ yě. Izlayɛ́li ví lɛ́ɛ vɔ Ejípunu lɛ́ɛ bǐ.

³⁷Hwenu e Izlayɛ́li ví lɛ́ɛ ɖo Ejípu ná tɔ́n sín wɛ ɔ́, yě sí te sín Hlamusɛ́si bó ɖidó Sukɔ́tu; yě yi súnnu adɔ̌kpo gban mɔ̌ (600.000), è ka xa yɔkpɔ́vú lɛ́ɛ ǎ.

³⁸Akɔta tɛnmɛ tɛnmɛ lɛ́ɛ nyi ahwan xwedó yě. Gbɔ̌ kpó nyibú kpó e yě kplá lɛ́ɛ sukpɔ́ ɖésú.

³⁹Yě zě linfín nyinya e yě hɛn sín Ejípu, bɔ è ma dó tɔ́n mɛ ǎ é dó ɖa wɔ̌xúxú ná; ɖó nya wɛ è nya yě sín Ejípu bɔ yě sɔ́ sixú nɔ te nú linfín nyinya ɔ́ ná fɔ́n ǎ, yě ká kpé wú bó hɛn nǔɖuɖu dó yěɖée jí ǎ.

⁴⁰ Xwe afɔwe gban (430) wɛ Izlayɛ́li ví lɛ́ɛ nɔ Ejípu xɔ.

⁴¹Đo xwe afɔwe gban (430) énɛ́ lɛ́ɛ sín vivɔnu e nyí Dǐndínwáyi Mawu Mavɔmavɔ tɔn sín azǎn ɔ́, togun Mawu Mavɔmavɔ tɔn ɔ́ bǐ tɔ́n sín Ejípu.

⁴²Izlayɛ́li ví lɛ́ɛ ɖó ná nɔ́ nɔ wunzɛn zǎn énɛ́ ɔ́ mɛ, jijimɛ ɖě jɛ ɖě gúdo, ɖó Mawu Mavɔmavɔ tɔn wɛ zǎn énɛ́ ɔ́ nyí. Đó zǎn énɛ́ ɔ́ mɛ wɛ Mawu Mavɔmavɔ nɔ wunzɛn, bó ɖe togun tɔn tɔ́n sín Ejípu.

⁴³Mawu Mavɔmavɔ lɛ́ ɖɔ nú Mɔyízi kpó Aalɔ́ɔn kpó ɖɔ: “Sɛ́n e kan Dǐndínwáyixwe ɔ́ lɛ́ɛ ɖíe: Mɛ e ɖo akɔta ɖěvo mɛ lɛ́ɛ ɖěbǔ ná ɖu xwe ɔ́ sín nǔɖuɖu ǎ.

⁴⁴È nǎ gbo ada nú kannumɔ e è xɔ lɛ́ɛ bǐ; énɛ́ ɔ́, yě ná ɖu xwe ɔ́ sín nǔɖuɖu.

⁴⁵Jǒnɔ e ɖo to ɔ́ mɛ nú hwenu kpɛɖé lɛ́ɛ, abǐ mɛ e wá bó ɖo azɔ̌ wa wɛ ɖo to ɔ́ mɛ kpowun lɛ́ɛ, ná ɖu xwe ɔ́ sín nǔɖuɖu ǎ.

⁴⁶ Xwé e gbe è hu kanlin ɔ́ ɖe ɔ́ jɛ́n è nǎ ɖu ɖe; mi ná zé lan ɖěbǔ tɔ́n sín xwé gbe ǎ, mi ka ná gba xú lɛ́ɛ ɖěbǔ ǎ.

⁴⁷Izlayɛ́li ví lɛ́ɛ sín togun ɔ́ bǐ wɛ ná nɔ ɖu Dǐndínwáyixwe ɔ́.

⁴⁸Ényí jǒnɔ ɖé ɖo to mitɔn mɛ, bó jló ná ɖu Dǐndínwáyixwe ɔ́ dó Mawu Mavɔmavɔ tamɛ ɔ́, é kpó súnnu e ɖo xwé tɔn gbe é bǐ kpó ɖó ná gbo ada. Énɛ́ ɔ́, é ná húzú toví, bó ná ɖu xwe ɔ́ xá mi. Lo ɔ́, atɔtɔnɔ ɖěbǔ ná ɖu xwe ɔ́ ǎ.

⁴⁹“Sɛ́n énɛ́ e ɖɔ xó dó Dǐndínwáyixwe ɔ́ wú ɔ́, ɖokpó ɔ́ wɛ mi mɛ e nyí xwénu lɛ́ɛ kpódó mɛ e nyí jǒnɔ ɖo tɛ́ntin mitɔn lɛ́ɛ kpó ná nɔ xwedó.”

⁵⁰Izlayɛ́li ví lɛ́ɛ bǐ blǒ nǔ e Mawu Mavɔmavɔ ɖɔ nú Mɔyízi kpó Aalɔ́ɔn kpó lɛ́ɛ bǐ. Yě ɖe ɖěbǔ kpo ǎ.

⁵¹Gbe énɛ́ ɔ́ gbe ɖokpó ɔ́, Mawu Mavɔmavɔ ɖe Izlayɛ́li togun ɔ́ tɔ́n sín Ejípu sonu sonu.