Read fon Tíntɔ́n 14 Bible Online

Tíntɔ́n 14 - fon bible

Tíntɔ́n 14

¹Mawu Mavɔmavɔ ɖɔ nú Mɔyízi ɖɔ:

²“Đɔ nú Izlayɛ́li ví lɛ́ɛ ɖɔ yě ní zɛ bó yi ɖó gɔnu ɖó Pi-Haxilɔ́ti nukɔn, ɖo Migidɔ́lu kpó xu ɔ́ kpó tɛ́ntin, ɖo Baalu-Cefɔ́ni nukɔn; fínɛ́ wɛ mi ná nɔ, ɖo xu ɔ́ kpá.

³Axɔ́sú Ejípu tɔn ɔ́ ná vɛdó ɖɔ mi ɖo bǔbú wɛ, bó ná dɔn cí gbětótló mɛ wɛ sín.

⁴Un ná bló bɔ axɔ́sú ɔ́ ná tlí tó; é ná jɛ mi gúdo. Lo ɔ́, un ná hu axɔ́sú ɔ́ kpó ahwangɔnu tɔn lɛ́ɛ bǐ kpó, bó ná dó ɖe susu ce xlɛ́, bɔ Ejípunu lɛ́ɛ ná tunwun ɖɔ nyɛ wɛ nyí Mawu Mavɔmavɔ.” Izlayɛ́li ví lɛ́ɛ bló nǔ e Mawu Mavɔmavɔ ɖɔ é.

⁵È wǎ ɖɔ nú axɔ́sú Ejípu tɔn ɔ́ ɖɔ Izlayɛ́li ví lɛ́ɛ hɔn. Énɛ́ ɔ́, axɔ́sú ɔ́ kpó gǎn hɔn-yitɔ́ tɔn lɛ́ɛ kpó sín ayixa húzú dó yě wú, bɔ yě ɖɔ: “Étɛ́ ɖíe mǐ wa e? Aniwú wɛ mǐ jó yě dó bɔ yě yi? Mǐ sɔ́ ná mɔ mɛɖé, bɔ é ná nɔ́ wa azɔ̌ nú mǐ din a?”

⁶Axɔ́sú ɔ́ byɔ́ ahwankɛkɛ́ví tɔn mɛ, bɔ é kpó ahwangɔnu tɔn kpó ɖidó.

⁷Ée yě xweyǐgbe ɔ́, é fɔ ahwankɛkɛ́ví e ɖo Ejípu lɛ́ɛ bǐ; nǔwɔntɔn (600) wɛ ɖo ée é bɛ́ lɛ́ɛ mɛ bó nyɔ́ hú ɖě lɛ́ɛ bǐ, bɔ sɔ́ja atɔn atɔn ɖo ahwankɛkɛ́ví lɛ́ɛ ɖokpó ɖokpó mɛ.

⁸Mawu Mavɔmavɔ bló bɔ axɔ́sú Ejípu tɔn ɔ́ tlí tó, bó jɛ Izlayɛ́li ví lɛ́ɛ gúdo. Izlayɛ́li ví lɛ́ɛ ká kó tɔ́n sín to ɔ́ mɛ, mɛ e ko jɛ yěɖée sí lɛ́ɛ ɖɔhun, bó vo bó ɖo yiyi wɛ.

⁹Ejípunu lɛ́ɛ ká jɛ yě gúdo; bɔ axɔ́sú ɔ́ sín sɔ́ lɛ́ɛ bǐ, ahwankɛkɛ́ví tɔn lɛ́ɛ, sɔ́xátɔ́ tɔn lɛ́ɛ kpódó ahwangɔnu tɔn kpó yi xwedó yě wú, bɔ yě kó ɖó gɔnu ɖó xu ɔ́ tó, ɖo Pi-Haxilɔ́ti kpáxwé, ɖo Baalu-Cefɔ́ni nukɔn.

¹⁰Izlayɛ́li ví lɛ́ɛ mɔ nǔɖé kpowun ɔ́, yě mɔ ɖɔ Ejípunu lɛ́ɛ jɛ gǔdo émítɔn bɔ axɔ́sú ɔ́ ko sɛkpɔ́ émí, énɛ́ ɔ́, xɛsi ɖaxó ɖé jɛ yě jí, bɔ yě sú xó ylɔ́ Mawu Mavɔmavɔ.

¹¹Yě kanbyɔ́ Mɔyízi ɖɔ: “Yɔdo ɖo Ejípu ǎ wú wɛ a kplá mǐ bɔ mǐ ná wá kú jɛ gbětótló mɛ fí lě a? Aniwú wɛ a kplá mǐ sín Ejípu?

¹²Hwenu e mǐ kpo ɖo dɔ̌n ɔ́, mǐ ka ɖɔ nú we ganjí mɛ. Mǐ ɖɔ nú we ɖɔ hwi ní ná agbɔ̌n mǐ; mǐ ɖɔ nú we ɖɔ mǐ ɖǒ jlǒ bó ná wa azɔ̌ nú Ejípunu lɛ́ɛ. Énɛ́ ɔ́ nyɔ́ nú mǐ hú mǐ ní kú jɛ gbětótló mɛ.”

¹³Mɔyízi ka yí gbe nú yě ɖɔ: “Mi ma ɖi xɛsi ó, mi ma hɔn ó, bó ná kpɔ́n lě e Mawu Mavɔmavɔ ná hwlɛ́n mi gán gbɔn égbé din é; Ejípunu e mɔ wɛ mi ɖe din lɛ́ɛ ɔ́, mi sɔ́ ná mɔ yě ɖě gbeɖé ǎ.

¹⁴Mawu Mavɔmavɔ ná fun ahwan ɖó tɛn mitɔn mɛ; mi nɔ xwíí kpowun.”

¹⁵Mawu Mavɔmavɔ ɖɔ nú Mɔyízi ɖɔ: “Nɛ̌ gbɔn bɔ a ɖo xó sú ylɔ́ mì wɛ? Đɔ nú Izlayɛ́li ví lɛ́ɛ ɖɔ yě ní jɛ ali.

¹⁶Zě kpo towe bó dlɛ́n ɖó xu ɔ́ jí, bó ɖe ali gbɔn xu ɔ́ mɛ, bónú Izlayɛ́li ví lɛ́ɛ ná zɔn afɔ gbɔn ayǐkúngban jí dó asá xu ɔ́.

¹⁷Bɔ nyɛ ɔ́, un ná bló bɔ Ejípunu lɛ́ɛ ná tlí tó, bó ná jɛ gǔdo mitɔn byɔ́ xu ɔ́ mɛ. Énɛ́ ɔ́, un ná sɔ́ axɔ́sú Ejípu tɔn ɔ́ kpó ahwangɔnu tɔn bǐ kpó, kpó ahwankɛkɛ́ví tɔn lɛ́ɛ kpó, kpódó sɔ́xátɔ́ tɔn lɛ́ɛ kpó dó ɖe susu ce xlɛ́.

¹⁸Hwenu e un ná ɖe susu ce xlɛ́ axɔ́sú ɔ́ gbɔn mɔ̌ ɔ́, Ejípunu lɛ́ɛ ná tunwun ɖɔ nyɛ wɛ nyí Mawu Mavɔmavɔ.”

¹⁹Énɛ́ ɔ́ gúdo ɔ́, wɛnsagun Mawu tɔn e ɖo nukɔn nú Izlayɛ́li ví lɛ́ɛ ɔ́, yi jɛ gǔdo yětɔn. Mɔ̌ ɖokpó ɔ́, akpɔ́kpɔ́ ɖaxó e ɖo nukɔn nú yě ɔ́ yi jɛ gǔdo yětɔn.

²⁰Akpɔ́kpɔ́ ɔ́ nɔ te ɖo fí e Izlayɛ́li ví lɛ́ɛ ɖó gɔnu ɖó ɔ́ kpó fí e Ejípunu lɛ́ɛ ɖe é kpó tɛ́ntin. Akpɔ́kpɔ́ énɛ́ dó ablu ɖo akpá ɖokpó bɔ akpá ɖě ɔ́ xwé ká nɔ za wě zǎn mɛ. Énɛ́ ɔ́, yě sɛkpɔ́ yěɖée ɖo zǎn ɔ́ mɛ ǎ.

²¹Mɔyízi dlɛ́n alɔ dó xu ɔ́ jí. Énɛ́ ɔ́, Mawu Mavɔmavɔ bló bɔ jɔhɔn ɖaxó zǎnzǎnhwe jí tɔn ɖé nyi zǎn ɔ́ mɛ káká bɔ ayǐ hɔ́n, bɔ xu ɔ́ má.

²² Énɛ́ ɔ́, Izlayɛ́li ví lɛ́ɛ gbɔn ayǐkúngban xúxú jí byɔ́ xu ɔ́ tɛ́ntin, bɔ xu ɔ́ cí ahohó ɖɔhun ɖo ɖisí kpó amyɔ kpó nú yě.

²³Ejípunu lɛ́ɛ kpó axɔ́sú ɔ́ sín sɔ́ lɛ́ɛ bǐ kpó ahwankɛkɛ́ví lɛ́ɛ kpó, kpódó sɔ́xátɔ́ lɛ́ɛ kpó jɛ Izlayɛ́li ví lɛ́ɛ gúdo byɔ́ xu ɔ́ tɛ́ntin.

²⁴Ayǐtéhɔ̌nnu ɔ́, Mawu Mavɔmavɔ nɔ akpɔ́kpɔ́ ɖaxó ɔ́ kpó myɔ ɔ́ kpó mɛ, bó ɖo Ejípunu lɛ́ɛ kpɔ́n wɛ, bó bló bɔ ahwangɔnu Ejípunu lɛ́ɛ tɔn wlú.

²⁵Mawu Mavɔmavɔ blá ahwankɛkɛ́ví yětɔn lɛ́ɛ sín afɔ, bɔ nukɔn yiyi vɛ́ wǔ nú yě. Énɛ́ ɔ́, Ejípunu lɛ́ɛ ɖɔ: “Mi wá mǐ ní hɔn yi zɔ nú Izlayɛ́li ví lɛ́ɛ, ɖó Mawu Mavɔmavɔ ɖo yě jí bó ɖo ahwan fun xá mǐ wɛ ɖó tɛn yětɔn mɛ.”

²⁶Mawu Mavɔmavɔ ɖɔ nú Mɔyízi ɖɔ: “Dlɛ̌n alɔ dó xu ɔ́ jí, énɛ́ ɔ́ sin ná nyɛ́sú Ejípunu lɛ́ɛ, é ná nyɛ́ sú ahwankɛkɛ́ yětɔn lɛ́ɛ kpó sɔ́xátɔ́ yětɔn lɛ́ɛ kpó.”

²⁷Bɔ Mɔyízi dlɛ́n alɔ ɖó xu ɔ́ jí. Énɛ́ ɔ́, ée ayǐ ɖo hǐnhɔ́n wɛ ɔ́, xu ɔ́ jɛ tɛn tɔn mɛ wá jí. Ée sin ɔ́ jɛ sisɛkpɔ́ Ejípunu lɛ́ɛ jí ɔ́, yě jɛ hinhɔn jí. Lo ɔ́, Mawu Mavɔmavɔ kpíkpé yě dó xu ɔ́ mɛ.

²⁸Sin ɔ́ wá tɛn tɔn mɛ, é nyɛ́sú ahwankɛkɛ́ví lɛ́ɛ kpó sɔ́xátɔ́ e byɔ́ xu ɔ́ mɛ jɛ Izlayɛ́li ví lɛ́ɛ gúdo lɛ́ɛ kpó. Mɛ ɖokpó gán ɖo yě mɛ ǎ.

²⁹Izlayɛ́li ví lɛ́ɛ ká gbɔn ayǐkúngban xúxú jí ɖo xu ɔ́ tɛ́ntin, bɔ sin ɔ́ cí ahohó ɖɔhun ɖo ɖisí kpó amyɔ kpó nú yě.

³⁰Mawu Mavɔmavɔ hwlɛ́n Izlayɛ́li ví lɛ́ɛ ɖo Ejípunu lɛ́ɛ sí gbe énɛ́ ɔ́ gbe. Bɔ Izlayɛ́li ví lɛ́ɛ mɔ Ejípunu lɛ́ɛ sín cyɔ ɖo xu ɔ́ tó.

³¹Énɛ́ ɔ́, Izlayɛ́li ví lɛ́ɛ mɔ hlɔ̌nhlɔ́n alɔkpa e Mawu Mavɔmavɔ zé dó wa nǔ xá Ejípunu lɛ́ɛ é. Énɛ́ ɔ́, yě ɖó sísí nú Mawu Mavɔmavɔ, bó ɖi nǔ n'i, lobo ɖi nǔ nú mɛsɛntɔ́ tɔn Mɔyízi.