Read fon Tíntɔ́n 16 Bible Online

Tíntɔ́n 16 - fon bible

Tíntɔ́n 16

¹Izlayɛ́li togun ɔ́ bǐ gosín Elimu; yě tɔ́n sín Ejípu ɔ́, sun tɔn wegɔ́ ɔ́ sín azǎn afɔtɔngɔ́ ɔ́ gbe wɛ yě wǎ Sínu sín gbětótló ɔ́ mɛ, ɖo Elimu kpódó Sinayíi kpó tɛ́ntin.

²Izlayɛ́li togun ɔ́ bǐ jɛ nǔ hlún ɖɔ dó Mɔyízi kpó Aalɔ́ɔn kpó wú jí.

³Izlayɛ́li ví lɛ́ɛ ɖɔ nú yě ɖɔ: “Hwenu e mǐ nɔ xá dó lanzɛ́n bó nɔ́ ɖu nǔ gɔ́ xo ɖo Ejípu ɔ́, é nyí Mawu Mavɔmavɔ ko hu mǐ hwenɛ́nu wɛ ɔ́, é nyɔ́ hú. Đó mi kplá mǐ wá gbětótló élɔ́ mɛ, bó ná jó mǐ mɛ tobutóbú élɔ́ lɛ́ɛ dó, bɔ mǐ ná kú adɔ.”

⁴ Mawu Mavɔmavɔ ká ɖɔ nú Mɔyízi ɖɔ: “Đǒtó mì. Un ná bló bɔ nǔɖuɖu ná ja kɔn nyi ayǐ nú mi sín jǐxwé. Togun ɔ́ ná nɔ tɔ́n ayǐhɔ́ngbe ayǐhɔ́ngbe, bó ná nɔ́ bɛ́ nǔɖuɖu e ná kpé gbe ɖokpó é. Un ná bló mɔ̌, bó dó tɛ́n ɛ kpɔ́n, bó ná kpɔ́n ɖɔ é ná xwedó nǔ e un ɖɔ n'i ɔ́, abǐ é ná gbɔ ají?

⁵Azǎn ayizɛ́ngɔ́ ɔ́ gbe ɔ́, mi ná bɛ́ ée mi nɔ bɛ́ ayǐhɔ́ngbe ayǐhɔ́ngbe ɔ́ donu we, bó ná ɖa gbe énɛ́ ɔ́ gbe.”

⁶Mɔyízi kpó Aalɔ́ɔn kpó ɖɔ nú Izlayɛ́li ví lɛ́ɛ ɖɔ: “Égbé gbadanu ɔ́, mi ná mɔ nukúnnú jɛ wú ɖɔ Mawu Mavɔmavɔ wɛ ɖe mi tɔ́n sín Ejípu.

⁷É jɛ zǎnzǎn ɔ́, mi ná mɔ lě e Mawu Mavɔmavɔ ná ɖe nǔwúkpíkpé tɔn xlɛ́ mi gbɔn é, ɖó é se nǔ e hlún ɖɔ dó wǔtu tɔn wɛ mi ɖe é. Étɛ́ mǐdɛɛ lɛ́ɛ nyí, bɔ mi ná nɔ hlún nǔ ɖɔ dó mǐ jí?”

⁸Mɔyízi ɖɔ: “Égbé gbadanu ɔ́, Mawu Mavɔmavɔ ná ná lan mi, bɔ mi ná ɖu; é jɛ sɔ zǎnzǎn ɔ́, é ná ná wɔ̌xúxú mi bɔ mi ná ɖu gɔ́ xo, ɖó Mawu Mavɔmavɔ se nǔ e mi hlún ɖɔ dó wǔ tɔn é; étɛ́ wɛ mǐdɛɛ lɛ́ɛ nyí? É nyí mǐdɛɛ lɛ́ɛ jí hlún nǔ ɖɔ dó wɛ mi ɖe ǎ, Mawu Mavɔmavɔ jí hlún nǔ ɖɔ dó wɛ mi ɖe.”

⁹Mɔyízi ɖɔ nú Aalɔ́ɔn ɖɔ: “Đɔ nú Izlayɛ́li togun ɔ́ bǐ ɖɔ yě ní sɛkpɔ́ Mawu Mavɔmavɔ, ɖó é se nǔ e hlún ɖɔ dó wǔ tɔn wɛ yě ɖe é.”

¹⁰Hwenu e Aalɔ́ɔn ɖo xó ɖɔ nú Izlayɛ́li ví lɛ́ɛ wɛ ɔ́, yě lílɛ́ kpan nukɔn gbětótló ɔ́, yě ná mɔ nǔɖé kpowun ɔ́, susu Mawu Mavɔmavɔ tɔn jɛ́n tɔ́n ɖo akpɔ́kpɔ́ mɛ.

¹¹Mawu Mavɔmavɔ ɖɔ nú Mɔyízi ɖɔ:

¹²“Un se nǔ e hlún ɖɔ wɛ Izlayɛ́li ví lɛ́ɛ ɖe é. Đɔ nú yě ɖɔ: ‘É jɛ égbé gbadanu ɔ́, mi ná ɖu lan, bɔ sɔ zǎnzǎn ɔ́, mi ná ɖu wɔ̌xúxú gɔ́ xo. Énɛ́ ɔ́, gbɔn nǔwiwa ce lɛ́ɛ mɛ ɔ́, mi ná tunwun ɖɔ nyɛ wɛ nyí Mawu Mavɔmavɔ mitɔn.’ ”

¹³Nǔgbó ɔ́, ée gbadanu su ɔ́, káyi lɛ́ɛ wá ɖó, bó kpé fí e yě ɖǒ gɔnu ɖó é; ée é jɛ zǎnzǎn ɔ́, ahǔn lɛ́ dó fí e yě ɖǒ gɔnu ɖó.

¹⁴Ée ahǔn ɔ́ gbadó ɔ́, nǔ atínkwín ɖɔhun cíkícíkí ɖé kpé fí bǐ, bó wé kɛ́njí ɖɔhun, bó kpé ayǐkúngban.

¹⁵ Izlayɛ́li ví lɛ́ɛ mɔ, yě ká tunwun nǔ alɔkpa e wɛ ɔ́ ǎ, bó jɛ kinkanbyɔ́ yěɖée jí ɖɔ: “Étɛ́ ká nyí énɛ́?” Mɔyízi ka yí gbe nú yě ɖɔ: “Wɔ̌xúxú e Mawu Mavɔmavɔ ná mi bɔ mi ná ɖu ɔ́ wɛ.

¹⁶Nǔ e Mawu Mavɔmavɔ ká ɖɔ è nǐ bló ɔ́ ɖíe: Mɛ ɖokpó ɖokpó ní bɛ́ ée ná kpé e ɔ́: lǐtli ɛnɛ mɔ̌ wɛ mɛ ɖokpó ɖokpó ná bɛ́; è nǎ kpɔ́n mɛ nabí e ɖo goxɔ mɛtɔn mɛ ɔ́, bó bɛ́ dó kanta yětɔn.”

¹⁷Bɔ Izlayɛ́li ví lɛ́ɛ bló lě e è ɖɔ gbɔn nú yě é: mɛ ɖé lɛ́ɛ bɛ́ gěgé, mɛɖé lɛ́ɛ ká bɛ́ kpɛɖé.

¹⁸ Énɛ́ ɔ́ gúdo ɔ́, è jlɛ̌; mɛ e bɛ́ gěgé ɔ́, é ká sɔ́ wá sukpɔ́ dín ɖo así tɔn ǎ; mɛ e ka bɛ́ kpɛɖé ɔ́, é hwe dó mɛ ɔ́ ǎ. Mɛ ɖokpó ɖokpó mɔ éé ná kpé é.

¹⁹Mɔyízi ɖɔ nú Izlayɛ́li ví lɛ́ɛ ɖɔ: “Mɛ ɖěbǔ ní má zé nǔɖuɖu ɔ́ ɖě ɖ'ayǐ nú sɔ zǎnzǎn ó.”

²⁰Lo ɔ́, mɛ ɖé lɛ́ɛ ɖo yě mɛ bó ɖótó Mɔyízi ǎ, bó zé ɖě ɖ'ayǐ jɛ zǎnzǎn. Wǎnvú ká byɔ́ ɛ mɛ, bɔ é gblé. Bɔ Mɔyízi sín xomɛ dó yě mɛ énɛ́ lɛ́ɛ.

²¹Zǎnzǎn tɛgbɛ ɔ́, mɛ ɖokpó ɖokpó nɔ́ bɛ́ nǔɖuɖu e é ná ɖu bɔ é ná kpé é ɔ́; ényí hwesivɔ́ hun bɔ yǒzo gbɛ́ ɔ́, nǔɖuɖu e kpo ɖo kɔ́ mɛ é nɔ́ sínsín.

²²Azǎn ayizɛ́ngɔ́ ɔ́ gbe ɔ́, mɛ ɖokpó ɖokpó nɔ́ bɛ́ ée é nɔ́ bɛ́ ɖ'ayǐ ɔ́ donu we. Hǔn, mɛ ɖokpó ɖokpó nɔ́ bɛ́ lǐtli tántɔn. Togun ɔ́ sín nukɔntɔ́ lɛ́ɛ wá ɖɔ nǔ e mɛ lɛ́ɛ bló ɔ́ nú Mɔyízi.

²³ Bɔ Mɔyízi ɖɔ nú yě ɖɔ: “Mɔ̌ wɛ Mawu Mavɔmavɔ ɖɔ. Sɔ wɛ nyí gbɔjɛzán, azǎn e è zě ɖó vo nú Mawu Mavɔmavɔ é; mi ná ɖa ɖě hǔn, mi ɖa; mi ka ná fyɔ́ sin ɖě hǔn, mi fyɔ́ sin, lobo zé ée ná kpo ɔ́ bǐ ɖ'ayǐ nú sɔ zǎnzǎn.”

²⁴Énɛ́ ɔ́, yě zě ɖě ɖ'ayǐ nú sɔ zǎnzǎn, lě e Mɔyízi ko ɖɔ gbɔn nú yě é. Đě gblé ǎ. Wǎnvú ká byɔ́ yě mɛ ǎ.

²⁵Mɔyízi ɖɔ nú yě ɖɔ: “Mi ɖu énɛ́ ɔ́ égbé, ɖó égbé ɔ́, gbɔjɛzán Mawu Mavɔmavɔ tɔn gbe wɛ. Mi ɖo ɖě ná mɔ bɛ́ wɛ égbé ǎ.

²⁶Azǎn ayizɛ́n wɛ mi ná nɔ́ bɛ́ xɔ. Mi ná mɔ ɖě bɛ́ azǎn tɛ́nwegɔ́ ɔ́ gbe ǎ, ɖó gbɔjɛzán wɛ azǎn énɛ́ ɔ́ nyí.”

²⁷Azǎn tɛ́nwegɔ́ ɔ́ gbe ɔ́, mɛ ɖé lɛ́ɛ ɖo togun ɔ́ mɛ, bó tɔ́n bó ná yi bɛ́, lo ɔ́, yě mɔ ɖěbǔ bɛ́ ǎ.

²⁸Énɛ́ ɔ́, Mawu Mavɔmavɔ ɖɔ nú Mɔyízi ɖɔ: “Káká jɛ hwetɛ́nu wɛ mi ná gɔn nǔ e un ɖɔ lɛ́ɛ wa dó? Káká jɛ hwetɛ́nu wɛ mi ná gɔn sɛ́n ce lɛ́ɛ nyi?

²⁹Mi ní tunwun ganjí ɖɔ mi ná gbɔjɛ́ wútu wɛ un ná gbɔjɛzán ɔ́ mi; nǔ e wútu un nɔ ná nǔ e mi ná ɖu ɔ́ azǎn we tɔn mi ɖo azǎn ayizɛ́ngɔ́ ɔ́ gbe ɔ́ nɛ́. Hǔn mɛ ɖokpó ɖokpó ní bó nɔ́ nɔ fí e é ɖe ɔ́, mɛɖé ní má nɔ́ tɔ́n ɖo azǎn tɛ́nwegɔ́ ɔ́ gbe ó.”

³⁰Énɛ́ ɔ́, togun ɔ́ gbɔjɛ́ azǎn tɛ́nwegɔ́ ɔ́ gbe.

³¹ Izlayɛ́li ví lɛ́ɛ ylɔ́ nǔɖuɖu énɛ́ ɔ́ ɖɔ mǎna; é cí atín e è nɔ ylɔ́ ɖɔ kolyandli ɔ́ sín kwín ɖɔhun: é wé bó víví wɔ̌xúxú e mɛ è dǒ wǐin ɔ́ ɖɔhun.

³²Mɔyízi ɖɔ: “Nǔ e Mawu Mavɔmavɔ ɖɔ è nǐ bló ɔ́ ɖíe: É ɖɔ: ‘Mi bɛ́ mǎna gɔ́ nǔ ɖokpó, bó zé ɖ'ayǐ nú vǐ mitɔn lɛ́ɛ; énɛ́ ɔ́, yě ná mɔ wɔ̌xúxú alɔkpa e un ná mi, bɔ mi ɖu ɖo gbětótló mɛ hwenu e un ɖe mi tɔ́n sín Ejípu é.’ ”

³³ Énɛ́ ɔ́ gúdo ɔ́, Mɔyízi ɖɔ nú Aalɔ́ɔn ɖɔ: “Zě zɛ̌n ɖokpó bó bɛ́ mǎna e mɛ ɖokpó ná ɖu ɔ́ d'é mɛ, bó zé ɖó Mawu Mavɔmavɔ nukɔn, bónú é ná sixú nɔ ayǐ nú vǐ mitɔn lɛ́ɛ.”

³⁴Đi lě e Mawu Mavɔmavɔ kó ɖɔ nú Mɔyízi gbɔn ɔ́, Aalɔ́ɔn zé zɛ̌n ɔ́ ɖó akɔjijɛgbá ɔ́ nukɔn, bónú é ná sixú nɔ ayǐ.

³⁵ Izlayɛ́li ví lɛ́ɛ ɖu mǎna xɔ xwe kanɖé (40) cóbó wá jɛ to e mɛ gbɛtɔ́ ɖe ɔ́ mɛ. Yě ɖu mǎna káká wá Kanáa to ɔ́ sín dogbó lɛ́ɛ jí.

³⁶Mǎna e nɔ kpé mɛ ɖokpó gbe ɖokpó ɔ́ yi lǐtli ɛnɛ mɔ̌ bó nyí nǔ e yě nɔ́ dó jlɛ́ nǔ ná ɔ́ sín mǎɖówǒ.