Read fon Tíntɔ́n 17 Bible Online

Tíntɔ́n 17 - fon bible

Tíntɔ́n 17

¹Mawu Mavɔmavɔ ná gbe Izlayɛ́li ví lɛ́ɛ bɔ yě bǐ gosín Sínu sín gbětótló ɔ́ mɛ, bó ɖo yiyi wɛ kpɛɖé kpɛɖé káká bó yi jɛ Hlefidímu, bó ɖó gɔnu ɖó fínɛ́. Yě ká mɔ sin nu ɖo fínɛ́ ǎ.

²Énɛ́ ɔ́, togun ɔ́ ba xó Mɔyízi. Yě ɖɔ n'i ɖɔ: “Nǎ sin mǐ, nú mǐ ná nu.” Bɔ Mɔyízi ɖɔ nú yě ɖɔ: “Aniwú mi ɖo xó ba mì wɛ? Étɛ́wú mi ɖo Mawu Mavɔmavɔ tɛ́n kpɔ́n wɛ?”

³Kɔ ɖo Izlayɛ́li ví lɛ́ɛ xú wɛ ɖésú, bɔ yě ɖo nǔ hlún ɖɔ dó Mɔyízi jí wɛ ɖɔ: “Étɛ́wú a kplá mǐ sín Ejípu, bó ná jó mǐ kpó vǐ mǐtɔn lɛ́ɛ kpó, kpódó kanlin mǐtɔn lɛ́ɛ kpó dó bɔ mǐ ná wɛ́n vɛ̌?”

⁴Énɛ́ ɔ́, Mɔyízi sú xó ylɔ́ Mawu Mavɔmavɔ bó ɖɔ: “Étɛ́ wɛ un ná wa nú togun élɔ́? É hú mɔ̌ kpɛɖé din ɔ́, yě ná nyi awǐnnya dó hu mì ná.”

⁵Bɔ Mawu Mavɔmavɔ ɖɔ nú Mɔyízi ɖɔ: “Jɛ nukɔn nú togun ɔ́, cyán tomɛxó Izlayɛ́li tɔn ɖé lɛ́ɛ bónú yě ní kplá we. A nǎ zě kpo towe e a zin dó Nilu tɔ ɔ́ mɛ ɔ́ hɛn alɔ mɛ bó ɖidó.

⁶Nyɛ ka ná nɔ te ɖo nukɔn towe ɖo Holɛ́bu só ɔ́ jí; a nǎ zin kpo ɔ́ dó só ɔ́ wú; énɛ́ ɔ́, sin ná tɔ́n, bɔ togun ɔ́ ná nu.” Mɔyízi bló nǔ e Mawu Mavɔmavɔ ɖɔ ɔ́, ɖo tomɛxó Izlayɛ́li tɔn lɛ́ɛ nukún mɛ.

⁷È ɖǒ nyǐkɔ nú fí énɛ́ ɔ́ ɖɔ Masa kpó Mɛliba kpó; tínmɛ tɔn wɛ nyí “tɛ́nkpɔ́n” kpó “xóbiba” kpó, ɖó Izlayɛ́li ví lɛ́ɛ ba xó Mɔyízi bó tɛ́n Mawu Mavɔmavɔ kpɔ́n bó ɖɔ: “Mawu Mavɔmavɔ ɖo tɛ́ntin mǐtɔn a? Abǐ é ɖo tɛ́ntin mǐtɔn ǎ?”

⁸Amalɛ́ki ví lɛ́ɛ wá tɔ́n ahwan Izlayɛ́li ví lɛ́ɛ ɖo Hlefidímu.

⁹Énɛ́ ɔ́, Mɔyízi ɖɔ nú Jozuwée ɖɔ: “Jozuwée, cyán súnnu e ná sixú fun ahwan nú mǐ lɛ́ɛ, bó yi fun ahwan xá Amalɛ́ki ví lɛ́ɛ; é jɛ sɔ ɔ́, un ná cí só ɔ́ ta bɔ Mawu sín kpo ɔ́ ná ɖo alɔ ce mɛ.”

¹⁰Jozuwée ka bló nǔ e Mɔyízi ɖɔ n'i é, bó yi fun ahwan xá Amalɛ́ki ví lɛ́ɛ. Bɔ Mɔyízi kpó Aalɔ́ɔn kpó, kpódó mɛ ɖěvo kpó yi só ɔ́ ta; è nɔ ylɔ́ mɛ ɔ́ ɖɔ Húu.

¹¹Nú alɔ Mɔyízi tɔn ɖo jǐ ɔ́, Izlayɛ́li ví lɛ́ɛ nɔ́ hú gǎn Amalɛ́ki ví lɛ́ɛ, amɔ̌, nú é zé alɔ dó do ɔ́, Amalɛ́ki ví lɛ́ɛ nɔ́ hú gǎn Izlayɛ́li ví lɛ́ɛ.

¹²Awa ka wá kú Mɔyízi, bɔ Aalɔ́ɔn kpó Húu kpó zé awǐnnya ɖokpó ɖó Mɔyízi kpá, bɔ Mɔyízi jínjɔ́n ɛ jí. Aalɔ́ɔn kpó Húu kpó hɛn awa tɔn lɛ́ɛ ɖó te; mɛ ɖokpó ɖo ɖisí, mɛ ɖokpó ɖo amyɔ, bɔ awa tɔn lɛ́ɛ nɔ dlɛ̌ndlɛ́n mɔ̌ káká bɔ hwe yi xɔ.

¹³Énɛ́ ɔ́, Jozuwée ɖu ɖo Amalɛ́ki ví lɛ́ɛ jí bǐ dégbédégbé.

¹⁴ Mawu Mavɔmavɔ ɖɔ nú Mɔyízi ɖɔ: “Wlǎn nǔ e jɛ lɛ́ɛ bǐ dó wěma mɛ, bónú è ma wɔn ó. Đɔ nú Jozuwée ɖɔ un ná sú Amalɛ́ki ví lɛ́ɛ sín kún dó, mɛ ɖěbǔ sɔ́ ná flín yě ɖo ayǐkúngban ɔ́ jí ǎ.”

¹⁵Mɔyízi mɛ vɔ̌sákpe ɖokpó bó ɖó nyǐkɔ ná ɖɔ: “Mawu Mavɔmavɔ wɛ nyí ahwansyá ce.”

¹⁶É ɖɔ: “Ée Amalɛ́ki ví lɛ́ɛ glá bó dlɛ́n alɔ dó axɔ́súzinkpo Mawu Mavɔmavɔ tɔn ɔ́, Mawu Mavɔmavɔ ná ɖo ahwan fun xá yě wɛ káká sɔ́yi.”