Read fon Tíntɔ́n 18 Bible Online

Tíntɔ́n 18 - fon bible

Tíntɔ́n 18

¹Jetlo e nyí vɔ̌sánú-xwlémawutɔ́ Madiáani tɔn, bó nyí Mɔyízi sín asitɔ́ ɔ́, se nǔ e Mawu wa nú Mɔyízi kpó togun tɔn Izlayɛ́li ɔ́ kpó é bǐ; é se lě e Mawu Mavɔmavɔ ɖe Izlayɛ́li ví lɛ́ɛ tɔ́n sín Ejípu gbɔn é.

² Mɔyízi sín asitɔ́ Jetlo yí vǐ tɔn Sipɔ́la e nyí Mɔyízi sín asi bɔ Mɔyízi nyi i sɛ́ dó e.

³ É lɛ́ yí Sipɔ́la sín vǐ súnnu we lɛ́ɛ; mɛ ɖokpó nɔ́ nyí Gɛɛcɔ́mu, ɖó Mɔyízi ko ɖɔ jǒnɔ wɛ émí nyí ɖo mɛ ɖěvo tomɛ.

⁴Mɛ wegɔ́ ɔ́ nɔ́ nyí Eliezɛ́ɛ, ɖó Mɔyízi ko ɖɔ Mawu tɔ́ émítɔn dó alɔ émí, bó hwlɛ́n émí ɖo ahwan e axɔ́sú Ejípu tɔn ɔ́ fun xá émí ɔ́ mɛ.

⁵Jetlo kpó Mɔyízi sín asi kpó, kpódó vǐ tɔn lɛ́ɛ kpó wá gbětótló mɛ fí e Mɔyízi jɛ agban nyi ɖo Mawu só ɔ́ kɔn é.

⁶É ɖɔ sɛ́ dó Mɔyízi ɖɔ: “Nyɛ asi towe tɔ́ Jetlo wɛ ja gɔ̌n towe kpó asi towe kpó, kpódó vǐ tɔn we lɛ́ɛ kpó.”

⁷Mɔyízi ka sɛ yi asi tɔn tɔ́ ɔ́ gɔ́n, bó jɛ kpo bó ɖe kɔ́ n'i lobo kí si n'i. Yě kan lě e yě ɖe gbɔn ɔ́ byɔ́ yěɖée, bó byɔ́ Mɔyízi sín goxɔ mɛ.

⁸Nǔ e Mawu Mavɔmavɔ wa xá axɔ́sú Ejípu tɔn ɔ́ kpó Ejípunu lɛ́ɛ kpó ɖó Izlayɛ́li ví lɛ́ɛ wú ɔ́, ya e yě ji ɖo alixo bɔ Mawu Mavɔmavɔ hwlɛ́n yě ɖ'é mɛ lɛ́ɛ ɔ́, Mɔyízi wlí bǐ ɖɔ nú asi tɔn tɔ́.

⁹Đagbe e Mawu Mavɔmavɔ wa nú Izlayɛ́li ví lɛ́ɛ bǐ, kpó hwlɛ̌n e é hwlɛ́n yě sín Ejípunu lɛ́ɛ sí ɔ́ kpó hun xomɛ nú Jetlo.

¹⁰Bɔ é ɖɔ: “Susu nú Mawu Mavɔmavɔ e hwlɛ́n mi sín Ejípunu lɛ́ɛ kpó axɔ́sú yětɔn ɔ́ kpó sí é, susu nú Mawu Mavɔmavɔ e ɖe togun tɔn sín Ejípunu lɛ́ɛ sín acɛ mɛ é.

¹¹Un mɔ din ɖɔ Mawu Mavɔmavɔ hú gǎn nǔmɛsɛn lɛ́ɛ bǐ. É ɖe hwenu e Ejípunu lɛ́ɛ ɖo acɛ gannaganna kpa nú Izlayɛ́li ví lɛ́ɛ wɛ é xlɛ́.”

¹²Jetlo, Mɔyízi sín asitɔ́ ɔ́ sá vɔ̌ e è nɔ dó zo ɔ́ kpódó kɔnɖókpɔ́ sín vɔ̌ lɛ́ɛ kpó nú Mawu. Aalɔ́ɔn kpódó tomɛxó lɛ́ɛ bǐ kpó wá ɖu kɔnɖókpɔ́ nǔɖuɖu ɔ́ xá Mɔyízi sín asitɔ́ ɔ́, ɖo Mawu nukɔn.

¹³Ayǐhɔ́ngbe tɔn ɔ́, Mɔyízi jínjɔ́n ayǐ bó ná ɖɔ hwɛgbe e ɖo togun ɔ́ tɛ́ntin ɔ́ gbo, bɔ togun ɔ́ wá nɔ te ɖo nukɔn tɔn sín zǎnzǎn káká jɛ gbadanu.

¹⁴Mɔyízi sín asitɔ́ mɔ nǔ e bló nú togun ɔ́ wɛ é ɖe é bǐ, bó kanbyɔ́ ɛ ɖɔ: “Étɛ́ wa wɛ a ɖe ɖo fínɛ́ kpó togun ɔ́ kpó? Nɛ̌ ká gbɔn bɔ hwi ɖokpónɔ ɖo azɔ̌ énɛ́ ɔ́ wa wɛ? Bɔ togun ɔ́ bǐ ɖo te ɖo nukɔn towe sín zǎnzǎn káká jɛ gbadanu?”

¹⁵Bɔ Mɔyízi yí gbe nú asi tɔn tɔ́ ɖɔ: “Togun ɔ́ wɛ wá gɔ̌n ce, bó ná kan nǔ byɔ́ Mawu.

¹⁶Ényí tagba ɖé ɖo tɛ́ntin yětɔn ɔ́, yě nɔ́ wá mɔ mì, bɔ un nɔ ɖɔ gbo nú yě, bó nɔ tín nǔ e Mawu zɔ́n lɛ́ɛ kpó kplɔ́n tɔn lɛ́ɛ kpó mɛ nú yě.”

¹⁷Mɔyízi sín asitɔ́ ɖɔ n'i ɖɔ: “Nǔ e wa wɛ a ɖe ɔ́ nyɔ́ ǎ.

¹⁸Nǔ ná ci kɔ nú hwi kpó togun e wá gɔ̌n towe ɔ́ kpó, ɖó azɔ̌ ɔ́ hú gǎn we, hwi ɖokpónɔ sixú bló ǎ.

¹⁹Bo ɖótó xó e ná ɖɔ nú we wɛ un ɖe é; Mawu ní ka nɔ kpɔ́ xá we. Nyǐ ɖɛ̌mɛnu togun ɔ́ tɔn ɖo Mawu nukɔn, bó zé tagba e ɖe lɛ́ɛ ɖó nukɔn tɔn.

²⁰Kplɔ́n nǔ e Mawu zɔ́n lɛ́ɛ kpó kplɔ́n tɔn lɛ́ɛ kpó yě, bó xlɛ́ ali e yě ɖó ná gbɔn lɛ́ɛ kpódó nǔ e yě ɖó ná wa lɛ́ɛ kpó yě.

²¹Kpɔ́n togun ɔ́ bǐ mɛ, bó cyán súnnu nukúnɖéjí e nɔ ɖó sísí nú Mawu, bó yí wǎn nú nǔgbó ɖiɖɔ lobo ma nɔ yí wǎn nú nǔ ɖu ɖo nǔ mɛ ǎ lɛ́ɛ; sɔ́ yě dó ɖó gǎn ɖo togun ɔ́ nu: a nǎ sɔ́ mɛɖě ɖó gbɛtɔ́ afatɔ́n (1.000) nu, bó ná sɔ́ mɛɖě ɖó gbɛtɔ́ kanwe ko (100) nu, bó ná sɔ́ mɛɖě ɖó gbɛtɔ́ kanɖé wǒ (50) nu, bó ná sɔ́ mɛɖě ɖó gbɛtɔ́ wǒ nu.

²²Yě ní nɔ́ ɖɔ hwɛ gbo nú togun ɔ́ hwebǐnu; yě ní nɔ́ zé xó e syɛ́n lɛ́ɛ wá gɔ̌n towe, bónú yě ɖésúnɔ ní nɔ́ ɖɔ xó kléwún kléwún lɛ́ɛ gbo. Đe agban kpo nú hwiɖée, nú yě ní hɛn xá we.

²³Ényí a blǒ mɔ̌ bónú Mawu ɖɔ hwi ní wa nǔɖé ɔ́, a nǎ kpé wú bó bló; énɛ́ ɔ́, togun ɔ́ bǐ ná yi xwé wǔyɛ́yɛ́ afɔyɛ́yɛ́.”

²⁴Mɔyízi se xó e asi tɔn tɔ́ ɖɔ ɔ́, bó bló nǔ e é ɖɔ lɛ́ɛ bǐ.

²⁵É cyán gbɛtɔ́ nukúnɖéjí lɛ́ɛ ɖo togun ɔ́ mɛ, bó zé yě ɖó togun ɔ́ nu: é zé mɛɖě ɖó gbɛtɔ́ afatɔ́n (1.000) nu, bó zé mɛɖě ɖó gbɛtɔ́ kanwe ko (100) nu, bó zé mɛɖě ɖó gbɛtɔ́ kanɖé wǒ (50) nu, lobo zé mɛɖě ɖó gbɛtɔ́ wǒ nu.

²⁶Bɔ yě nɔ́ ɖo hwɛ ɖɔ gbo nú togun ɔ́ wɛ hwebǐnu; yě nɔ́ zé xó e syɛ́n lɛ́ɛ wá Mɔyízi gɔ́n, bɔ yě ɖésúnɔ nɔ́ ɖɔ xó kléwún kléwún lɛ́ɛ gbo.

²⁷Mɔyízi jɛ nukɔn nú asi tɔn tɔ́, bɔ é lɛ́ kɔ yi to tɔn mɛ.