Read fon Tíntɔ́n 19 Bible Online

Tíntɔ́n 19 - fon bible

Tíntɔ́n 19

¹Izlayɛ́li ví lɛ́ɛ gosín Ejípu ɔ́, sun atɔn pɛ́pɛ́pɛ́ wɛ yě bló bó wá Sinayíi sín gbětótló ɔ́ mɛ azǎn énɛ́ ɔ́ gbe.

²Gbětótló Hlefidímu tɔn ɔ́ mɛ wɛ yě gosín bó wá gbětótló mɛ fí, ɖo Sinayíi só ɔ́ kpá, bó ɖó gɔnu ɖó fínɛ́.

³Mɔyízi fán só ɖidó Mawu gɔ̌n. Mawu Mavɔmavɔ ɖo só ɔ́ jí, bó sú xó ylɔ́ ɛ sɛ́ dó, bó ɖɔ n'i ɖɔ: “Xó e a nǎ ɖɔ nú Jakɔ́bu sín kúnkan Izlayɛ́li ví lɛ́ɛ ɔ́ ɖíe:

⁴Mi ɖésúnɔ ɔ́, mi mɔ nǔ e un wa xá Ejípunu lɛ́ɛ é; bó ká mɔ lě e un bɛ́ midɛɛ lɛ́ɛ, lě e gangan nɔ zé vǐ tɔn dó awa jí ɔ́ ɖɔhun, bó kplá mi wá fí gbɔn é.

⁵ Din ɔ́, ényí mi ɖótó mì ɔ́, ényí mi hɛn akɔ e un jɛ xá mi ɔ́, mi ná nyí togun ce vívɛ́ná ɖo togun ɖě lɛ́ɛ bǐ mɛ; nǔgbó ɔ́, ayǐkúngban ɔ́ bǐ wɛ nyí ce.

⁶Amɔ̌, midɛɛ lɛ́ɛ ɔ́, mi ná nyí vɔ̌sánú-xwlémawutɔ́ lɛ́ɛ sín axɔ́súɖuto ɖokpó, bó ná nyí akɔta ɖe ɖó vo ɖé. Xó e a nǎ ɖɔ nú Izlayɛ́li ví lɛ́ɛ ɔ́ nɛ́.”

⁷Ée Mawu Mavɔmavɔ ɖɔ xó nú Mɔyízi fó ɔ́, Mɔyízi lɛ́ kɔ wá fí e yě ɖǒ gɔnu ɖó ɔ́, bó ylɔ́ mɛxó e ɖo togun ɔ́ mɛ lɛ́ɛ, bó ɖó xó énɛ́ lɛ́ɛ bǐ te nú yě, lě e Mawu Mavɔmavɔ ɖɔ n'i gbɔn é,

⁸bɔ togun ɔ́ bǐ ɖó gbe kpɔ́, bó ɖɔ: “Mǐ ná bló nǔ e Mawu Mavɔmavɔ ɖɔ lɛ́ɛ bǐ.” Bɔ Mɔyízi ɖidó xó e togun ɔ́ ɖɔ lɛ́ɛ ɖɔ nú Mawu Mavɔmavɔ gbé.

⁹Ée é yi ɔ́, Mawu Mavɔmavɔ ɖɔ n'i ɖɔ: “Un ná zɔn akpɔ́kpɔ́ wiwi ɖé mɛ wá gɔ̌n towe, bónú Izlayɛ́li ví lɛ́ɛ ná se gbe ce hwenu e un ná ɖo xó ɖɔ xá we wɛ é, bó ná nɔ ɖeji dó wǔ towe hwebǐnu.” Mɔyízi ɖɔ xó e togun ɔ́ ɖɔ lɛ́ɛ nú Mawu Mavɔmavɔ.

¹⁰Mawu Mavɔmavɔ lɛ́ ɖɔ nú Mɔyízi ɖɔ: “Yi Izlayɛ́li ví lɛ́ɛ gɔ́n; slá wǔ nú yě égbé kpó sɔ kpó, yě ní nya avɔ yětɔn lɛ́ɛ.

¹¹Yě ní sɔ́ nǔ ɖ'ayǐ nú azǎn atɔngɔ́ ɔ́ gbe, ɖó azǎn atɔn gbe ɔ́, nyɛ Mawu Mavɔmavɔ ná jɛ te wá Sinayíi só ɔ́ jí ɖo togun ɔ́ bǐ nukún mɛ.

¹² A nǎ ɖǒ dogbó nú yě lɛ́ lɛ̌ dó só ɔ́, bó ná dó sɛ́n nú yě ɖɔ yě nǐ má xá só ɔ́ jí ó, yě nǐ má ká ɖó alɔ wú ó. Mɛ ɖěbǔ ɖó alɔ wú ɔ́, mɛ ɔ́ ná kú.

¹³È nǎ jó mɛ ɔ́ dó nyi gbɛ ǎ; é sixú nyí gbɛtɔ́, é sixú nyí kanlin; è nǎ sɛkpɔ́ mɛ ɔ́ ǎ, amɔ̌, è nǎ nyi awǐnnya dó hu i, abǐ è nǎ da gǎ dó hu i ná. Hwenu e lanzo ná ɖɔ nǔ ɔ́ jɛ́n mɛ ɖé lɛ́ɛ ná sixú xá só ɔ́ jí.”

¹⁴Énɛ́ ɔ́ gúdo ɔ́, Mɔyízi jɛ te sín só ɔ́ jí bó wá togun ɔ́ gɔ́n. È slá wǔ nú yě, bɔ yě nya avɔ yětɔn lɛ́ɛ.

¹⁵Mɔyízi ɖɔ nú Izlayɛ́li ví lɛ́ɛ ɖɔ: “Káká nú azǎn ná yi atɔn hǔn, mi sɔ́ nǔ ɖ'ayǐ, mi ma ɖó xó xá nyɔ̌nu ɖěbǔ ó.”

¹⁶ Azǎn atɔn gbe zǎnzǎn ɔ́, jǐ jɛ gbe dó jí, bó jɛ wun kɛ jí, bɔ akpɔ́kpɔ́ wiwi ɖé dó ɖo só ɔ́ jí. Lanzo ɖɔ nǔ syɛ́nsyɛ́n, bɔ ado hu Izlayɛ́li ví lɛ́ɛ bǐ, ɖo fí e yě ɖó gɔnu ɖó é.

¹⁷Mɔyízi ɖe togun ɔ́ tɔ́n sín fí e yě ɖǒ gɔnu ɖó é, bónú yě ná yi kpé Mawu. Yě wǎ cí só ɔ́ kpá.

¹⁸Sinayíi só ɔ́ bǐ ɖo azɔ tún wɛ, ɖó Mawu Mavɔmavɔ ɖo te jɛ wɛ ɖo só ɔ́ jí ɖo myɔ tɛ́ntin. Azizɔ ɔ́ ɖo jǐ yi wɛ ɖi azizɔ ɖo tíntɔ́n sín myɔkpó mɛ wɛ ɖɔhun, bɔ só ɔ́ bǐ ɖo hǔnhúnhúnhún wɛ kpó zǐngídi kpó.

¹⁹Lanzo ɔ́ sín gbe lɛ́ ɖo syɛ́nsyɛ́n d'é jí wɛ. Mɔyízi ɖo xó ɖɔ wɛ, bɔ Mawu zé gbe yi jǐ, bó ɖo gbe yí n'i wɛ.

²⁰Ée Mawu Mavɔmavɔ jɛ te wá Sinayíi só ɔ́ jí aga ɔ́, é ylɔ́ Mɔyízi, bɔ é yi só ɔ́ jí aga,

²¹bɔ Mawu Mavɔmavɔ ɖɔ n'i ɖɔ: “Jɛ te bo gbɛ́ nú Izlayɛ́li ví lɛ́ɛ ɖɔ yě ní má syɛ́n ta bo wá ba nǔ do ó; mɛ gěgé táá kú ɖo yě mɛ.

²²Vɔ̌sánú-xwlémawutɔ́ lɛ́ɛ ɖésú e kó nɔ́ sɛkpɔ́ nyɛ Mawu Mavɔmavɔ lɛ́ɛ lɔ ní slá wǔ nú yěɖée; é má nyí mɔ̌ ǎ ɔ́, nyɛ Mawu Mavɔmavɔ ɔ́, un táá wa nǔ xá yě.”

²³Énɛ́ ɔ́, Mɔyízi ɖɔ nú Mawu Mavɔmavɔ ɖɔ: “Izlayɛ́li ví lɛ́ɛ ná sixú xá Sinayíi só ɔ́ jí ǎ, ɖó a ko ɖɔ nú mì ɖɔ: ‘Đǒ dogbó lɛ́ lɛ̌ dó só ɔ́, bó dó ɖe ɖó vo nú mì.’ ”

²⁴Bɔ Mawu Mavɔmavɔ ɖɔ nú Mɔyízi ɖɔ: “Jɛ te yi fí e togun ɔ́ ɖó gɔnu ɖó ɔ́; énɛ́ ɔ́ gúdo ɔ́, hwi kpó Aalɔ́ɔn kpó ná xá só ɔ́ jí. Amɔ̌, vɔ̌sánú-xwlémawutɔ́ lɛ́ɛ kpó togun ɔ́ kpó ní má syɛ́n ta bo wá ba nǔ do ó, é má nyí mɔ̌ ǎ ɔ́, un táá wa nǔ xá yě.”

²⁵Bɔ Mɔyízi lɛ́ jɛ te yi togun ɔ́ gɔ́n, bó ɖɔ xó énɛ́ lɛ́ɛ nú yě.