Read fon Tíntɔ́n 2 Bible Online

Tíntɔ́n 2 - fon bible

Tíntɔ́n 2

¹Dǎwe ɖé ɖo Levíi sín hɛ̌nnu ɔ́ mɛ, bó da Levíi ví ɖokpó.

² Nyɔ̌nu ɔ́ mɔ xo bó ji vǐ súnnu ɖokpó. É mɔ ɖɔ vǐ ɔ́ nyɔ́ ɖɛkpɛ, bó sɔ́ ɛ hwlá nú sun atɔn.

³Ée é mɔ ɖɔ vǐ ɔ́ kún sɔ́ sixú nɔ hwlǎhwlá ó ɔ́, é sɔ́ fánxasun ɖokpó, bó sá gudlɔ́n kpó awɔn kpó dó, bó sɔ́ vǐ ɔ́ d'é mɛ, lobo sɔ́ yi ɖó fánkan mɛ ɖo Nilu tɔ ɔ́ mɛ.

⁴Vǐ ɔ́ sín dadá ká cí zɔ bó ná kpɔ́n nǔ e ná jɛ dó jǐ tɔn é.

⁵Axɔ́sú Ejípu tɔn sín vǐ nyɔ̌nu ká wá wǔ lɛ gbé; hǎgbɛ́ tɔn e kplá ɛ lɛ́ɛ ɖo sa ɖi gbɔn Nilu tɔ ɔ́ tó wɛ. Éyɛ́ ká mɔ xasun ɔ́ sɛ́ dó ɖo fánkan mɛ, bó sɛ́ mɛsɛntɔ́ tɔn dó ɖɔ é ní yi zé wá.

⁶Ée mɛsɛntɔ́ ɔ́ yi zé xasun ɔ́ wá ɔ́, axɔ́sú ɔ́ sín vǐ hun, bó mɔ vǐ ɖokpó ɖ'é mɛ. Vǐ súnnu wɛ bó ɖo avǐ ya wɛ. Nǔ tɔn blá wǔ n'i bɔ é ɖɔ: “Á! Eblée lɛ́ɛ sín vǐ ɖíe hǔn.”

⁷Énɛ́ ɔ́, vǐ ɔ́ sín dadá sɛkpɔ́ ɛ, bó ɖɔ n'i ɖɔ: “Má yi ba vǐnɔ ɖokpó wá nú we ɖo Eblée lɛ́ɛ mɛ, bónú é ná nɔ́ ná anɔ̌ vǐ ɔ́ nú we a?”

⁸Bɔ axɔ́ví nyɔ̌nu ɔ́ yí gbe n'i ɖɔ: “Bo yi ba bo wá.” Bɔ é yi kplá vǐ ɔ́ sín nɔ wá.

⁹Ée nyɔ̌nu ɔ́ wá ɔ́, axɔ́ví nyɔ̌nu ɔ́ ɖɔ n'i ɖɔ: “Kplá vǐ élɔ́ yi xwé, bó nɔ́ ná ɛ anɔ̌ nú mì; un ná nɔ́ sú axɔ́ we.” Bɔ nyɔ̌nu ɔ́ yí vǐ ɔ́, bó nɔ́ ná anɔ̌ ɛ.

¹⁰ Ée vǐ ɔ́ wá su ɔ́, é kplá ɛ wá jó nú axɔ́ví nyɔ̌nu ɔ́, bɔ é sɔ́ ɛ dó ɖó vǐ. É sun nyǐkɔ ɛ ɖɔ Mɔyízi. Đó é ɖɔ: “Tɔ mɛ wɛ un ɖe e tɔ́n sín.”

¹¹ Hwenu e Mɔyízi wá nyí mɛxó ɔ́, é wá su gbe ɖokpó, bɔ é tɔ́n bó yi kpɔ́n nɔví tɔn e kpó é kpó nyí akɔ ɖokpó ɔ́ lɛ́ɛ, bó mɔ azɔ̌ syɛ́nsyɛ́n e wa wɛ yě ɖe lɛ́ɛ. É mɔ Ejípunu ɖé ɖo nɔví tɔn Eblée lɛ́ɛ ɖokpó xo wɛ.

¹²Ée é mɔ mɔ̌ ɔ́, é kpɔ́n ɖisí bó kpɔ́n amyɔ, bó mɔ ɖɔ mɛɖé kún ɖo fínɛ́ ó. Énɛ́ ɔ́, é xo Ejípunu ɔ́ hu, bó kplé kɔ́ dó jǐ tɔn.

¹³É lɛ́ tɔ́n ayǐhɔ́ngbe tɔn, bó mɔ Eblée we ɖo hun xo wɛ. É kpácá ɛ bɔ é kanbyɔ́ mɛ e sín hwɛ ma nyɔ́ ǎ ɔ́ ɖɔ: “Aniwú a ɖo nɔzo towe xo wɛ mɔ̌?”

¹⁴Bɔ mɛ ɔ́ yí gbe n'i ɖɔ: “Mɛ̌ wɛ sɔ́ we gǎn abǐ hwɛɖɔtɔ́ ɖó mǐ nu? A jló ná hu mì lě e a hu Ejípunu ɔ́ gbɔn é wɛ a?” Ée Mɔyízi se mɔ̌ ɔ́, ado hu i, bɔ é ɖɔ: “Yě tunwun nǔ e un dó sin ɔ́ lɔ mɛ!”

¹⁵ Axɔ́sú Ejípu tɔn ɔ́ se nǔ e jɛ ɔ́, bó ɖo Mɔyízi ba ná hu wɛ. Énɛ́ ɔ́, Mɔyízi hɔn sín fínɛ́, bó ná yi nɔ Madiáani. Ée é wá Madiáani ɔ́, é jínjɔ́n dotɔ ɖé tó.

¹⁶Vɔ̌sánú-xwlémawutɔ́ ɖé ká ɖo Madiáani fínɛ́. É ɖó vǐ nyɔ̌nu tɛ́nwe. Vǐ lɛ́ɛ wá sin dun gɔ́ nǔ e mɛ gbɔ̌ lɛ́ɛ nɔ́ nu sin ɖe lɛ́ɛ gbé lě e yě kó nɔ́ bló gbɔn é, bónú tɔ́ yětɔn sín gbɔ̌ lɛ́ɛ ná wá nu.

¹⁷Gbɔ̌nyitɔ́ ɖé lɛ́ɛ ká wá bó nya yě, énɛ́ ɔ́, Mɔyízi sí te bó jɛ ahwan ɖyɔ̌vǐ lɛ́ɛ jí, bó ná sin gbɔ̌ yědɛɛ tɔn lɛ́ɛ.

¹⁸Ée yě lɛ́ kɔ yi tɔ́ yětɔn Hlewuyɛ́li gɔ́n ɔ́, é kanbyɔ́ yě ɖɔ: “Nɛ̌ ká gbɔn bɔ mi ka yá wǔ wá sɔ mɔ̌ égbé?”

¹⁹Bɔ yě yí gbe n'i ɖɔ: “Ejípunu ɖé wɛ hwlɛ́n mǐ ɖo gbɔ̌nyitɔ́ lɛ́ɛ sí; é tlɛ lɛ́ dun sin nú mǐ, bó ná sin kanlin lɛ́ɛ.”

²⁰Tɔ́ yětɔn ká kanbyɔ́ yě ɖɔ: “Fítɛ́ mɛ ɔ́ ɖe? Nɛ̌ ká gbɔn bɔ mi jó é dó? Mi yi ylɔ́ ɛ wá bónú é ná ɖu nǔ.”

²¹Ée ɖyɔ̌vǐ lɛ́ɛ yi ylɔ́ Mɔyízi ɔ́, é yí gbe bó wá nɔ nya ɔ́ gɔ́n. Nya ɔ́ ká ná ɛ vǐ tɔn Sipɔ́la bɔ é da.

²²Nyɔ̌nu ɔ́ ji vǐ súnnu ɖokpó, bɔ é sun nyǐkɔ ɛ ɖɔ Gɛɛcɔ́mu; ɖó é ɖo ɖiɖɔ wɛ ɖɔ: “Jǒnɔ wɛ un nyí ɖo mɛ ɖěvo tomɛ.”

²³Nǔ énɛ́ lɛ́ɛ jɛ ɔ́, xwe tɔn ko sɛ yi, bɔ Ejípu xɔ́sú ɔ́ wá kú. Izlayɛ́li ví lɛ́ɛ kpo ɖo azɔn wɛn wɛ ɖo kannumɔzɔ́ e wa wɛ yě ɖe ɔ́ glɔ́, bó ɖo xó sú wɛ. Xó e sú wɛ yě ɖe ɖo kannumɔgbénu ɔ́ hun káká yi Mawu gɔ́n.

²⁴ Mawu se azɔn e wɛn wɛ Izlayɛ́li ví lɛ́ɛ ɖe ɔ́, bó ka tunwun ɖɔ akɔ e émí jɛ xá Ablaxámu kpó Izáki kpó Jakɔ́bu kpó é kpo ɖo te.

²⁵É mɔ nǔ e ɖo Izlayɛ́li ví lɛ́ɛ gbo wɛ ɔ́ bɔ nǔ yětɔn blá wǔ n'i.