Read fon Tíntɔ́n 20 Bible Online

Tíntɔ́n 20 - fon bible

Tíntɔ́n 20

¹Énɛ́ ɔ́ gúdo ɔ́, Mawu ɖɔ xó élɔ́ lɛ́ɛ nú togun ɔ́; é ɖɔ:

²“Nyɛ wɛ nyí Mawu Mavɔmavɔ, Mawu towe e ɖe we tɔ́n sín Ejípu fí e a nyǐ kannumɔ ɖe é.

³Ma sɛn nǔ ɖěvo zɛ nyɛ wú ó.

⁴ Ma kpa bǒcyɔ ó; ma ka kpa nǔ e ɖo jǐnukúnsin aga lɛ́ɛ, nǔ e ɖo ayǐkúngban jí ɖo do lɛ́ɛ, nǔ e ɖo sin mɛ ɖo ayǐkúngban glɔ́ lɛ́ɛ ɖě sín akpajlɛ́ ó.

⁵ Ma jɛ kpo bo ɖe kɔ́ nú yě ó; ma sɛn yě ó, ɖó nyɛ Mawu Mavɔmavɔ, Mawu towe ɔ́, un nɔ ba gbeɖé ɖɔ a nǐ sɛn nǔ ɖěvo zɛ nyɛ wú ǎ; ényí mɛɖé gbɛ́ wǎn nú mì ɔ́, vǐ tɔn lɛ́ɛ ná sún sin tɔn, vǐvú tɔn lɛ́ɛ, vitikli tɔn lɛ́ɛ kpódó kpaba tɔn lɛ́ɛ kpó ná sún sin tɔn.

⁶Lo ɔ́, mɛ e yí wǎn nú mì bó nɔ nyi sɛ́n ce lɛ́ɛ ɔ́, un nɔ nyɔ́ xomɛ dó mɛ ɔ́ wú káká yi jijimɛ afatɔ́n.

⁷ Ma zé nyɛ Mawu Mavɔmavɔ, Mawu towe ɔ́ sín nyǐkɔ dó da ayihún ó, ɖó nyɛ Mawu Mavɔmavɔ ɔ́ nɔ́ gɔn tó dɔn nú mɛ e ná zé nyǐkɔ ce dó da ayihún ná ɔ́ ǎ.

⁸ Ma wɔn gbɔjɛzán ɔ́ ó, nɔ sɔ́ ɖó vo nú nyɛ Mawu Mavɔmavɔ.

⁹ Azǎn ayizɛ́n wɛ ɖo te nú we ɖo aklúnɔzángbla ɖokpó mɛ, bɔ a nǎ dó wa azɔ̌ towe lɛ́ɛ bǐ ná.

¹⁰Lo ɔ́, azǎn tɛ́nwegɔ́ ɔ́, gbɔjɛzán wɛ; gbɔjɛzán ɔ́, nyɛ Mawu Mavɔmavɔ, Mawu towe ɔ́ tɔn wɛ. Ma wa azɔ̌ ɖěbǔ gbe énɛ́ ɔ́ gbe ó; vǐ towe súnnu kpó nyɔ̌nu kpó ɖě ní má wa azɔ̌ ó; mɛsɛntɔ́ towe súnnu kpó nyɔ̌nu kpó ɖě ní má wa ó; jǒnɔ e ɖo xwé towe gbe lɛ́ɛ ɖě ní má wa azɔ̌ ó. Kanlin towe lɛ́ɛ lɔmɔ̌ ní má wa azɔ̌ ó.

¹¹Đó azǎn ayizɛ́n wɛ nyɛ Mawu Mavɔmavɔ ɔ́ zé ɖó te bó bló jǐnukúnsin kpó nǔ e ɖo jǐnukúnsin lɛ́ɛ bǐ kpó, ayǐkúngban kpó nǔ e ɖ'é jí lɛ́ɛ bǐ kpó, xu kpó nǔ e ɖ'é mɛ lɛ́ɛ bǐ kpó, bó gbɔjɛ́ azǎn tɛ́nwegɔ́ ɔ́ gbe. Nǔ e wú nyɛ Mawu Mavɔmavɔ ɔ́ xo ɖɛ dó gbɔjɛzán ɔ́ jí, bó sɔ́ ɖó vo ɔ́ nɛ́.

¹² Sí tɔ́ towe kpó nɔ towe kpó, énɛ́ ɔ́, a nǎ dɔ́ ji ɖo to e nyɛ Mawu Mavɔmavɔ, Mawu towe ná ná we ɔ́ mɛ.

¹³ Ma hu mɛ ó.

¹⁴ Ma lɛ aga ó.

¹⁵ Ma ja ajo ó.

¹⁶ Ma ɖe kúnnu agɔ dó nɔzo towe wú ó.

¹⁷ Nukún towe ma nɔ nɔzo towe sín xwé wú ó; nukún towe má nɔ asi tɔn wú ó; nukún towe má nɔ mɛsɛntɔ́ tɔn súnnu wú ó; nukún towe má nɔ mɛsɛntɔ́ tɔn nyɔ̌nu wú ó; nukún towe má nɔ nyibú tɔn wú ó; nukún towe má nɔ tócí tɔn wú ó; nukún towe má nɔ nǔ e nyí étɔn lɛ́ɛ ɖěbǔ wú ó.”

¹⁸ Togun Izlayɛ́li tɔn ɔ́ bǐ ɖo jǐ e ɖo gbe dó wɛ ɔ́ se wɛ bó ɖo lanzo sín gbe se wɛ. Yě mɛ bǐ mɔ jǐ e ɖo wun kɛ wɛ ɔ́ bó mɔ azɔ e tún wɛ só ɔ́ ɖe é. Ée togun ɔ́ mɔ nǔ énɛ́ lɛ́ɛ sɛ́ dó ɔ́, xɛsi jɛ jǐ tɔn, bɔ é jɛ sísɔ́sísɔ́ jí.

¹⁹Bó ɖɔ nú Mɔyízi ɖɔ: “Hwi ɖésúnɔ ní nɔ́ ɖɔ xó nú mǐ; mǐ ná ɖótó we. Mawu ɖésú ní má sɔ́ ɖɔ xó nú mǐ ɖě ó, é má nyí mɔ̌ ǎ ɔ́, mǐ táá kú.”

²⁰Mɔyízi ka ɖɔ nú yě ɖɔ: “Mi ma ɖi xɛsi ó. Mawu jló ná dó mi kpɔ́n wú wɛ é sɛkpɔ́ mi; é jló ɖɔ mi ní ɖó sísí nú émí, bó má hu hwɛ ó.”

²¹Énɛ́ ɔ́, Izlayɛ́li ví lɛ́ɛ nɔ zɔ bɔ Mɔyízi sɛkpɔ́ akpɔ́kpɔ́ wiwi e mɛ Mawu ɖe é.

²²Mawu Mavɔmavɔ ɖɔ nú Mɔyízi ɖɔ: “A nǎ ɖɔ nú Izlayɛ́li ví lɛ́ɛ ɖɔ nyɛ Mawu Mavɔmavɔ ɖɔ: ‘Mi mɔ din ɖɔ jǐxwé wɛ un nɔ bó ɖɔ xó nú mi.

²³Mi ma sɔ́ kpatágan abǐ siká dó bló nǔmɛsɛn ɖě, bó sɛn gɔ́ nú mì ó.

²⁴Mi ná nɔ sɔ́ kɔ́ dó mɛ vɔ̌sákpe ɖokpó nú mì, bó ná nɔ sá vɔ̌ e è nɔ dó zo lɛ́ɛ kpó kɔnɖókpɔ́ vɔ́ lɛ́ɛ kpó ɖ'é jí; mi ná nɔ zé gbɔ̌ mitɔn lɛ́ɛ kpó nyibú mitɔn lɛ́ɛ kpó dó sá vɔ̌ nú mì ɖ'é jí. Énɛ́ ɔ́, un sɔ́ fí ɖěbǔ ɖó vo nú mi, bónú mi ná nɔ́ sɛn mì ɖe ɔ́, un ná nɔ́ wá gɔ̌n mitɔn ɖo fínɛ́, bó ná xo ɖɛ dó mi jí.

²⁵ Amɔ̌, ényí mi ná zé awǐnnya dó mɛ vɔ̌sákpe ná nú mì hǔn, mi ma kpa awǐnnya lɛ́ɛ ó; ɖó nú alǐnnyánú jɛ awǐnnya ɔ́ wú hǔn, mi ɖu su n'i.

²⁶Mi ma mɛ vɔ̌sákpe e è ɖǒ ná fán kpekán cóbó yi jí ɔ́ nú mì ó; é má nyí mɔ̌ ǎ ɔ́, è táá mɔ mɛ e xwe jí ɔ́ sín mɛ̌.’ ”