Read fon Tíntɔ́n 21 Bible Online

Tíntɔ́n 21 - fon bible

Tíntɔ́n 21

¹Mawu Mavɔmavɔ lɛ́ ɖɔ nú Mɔyízi ɖɔ: “Sɛ́n e Izlayɛ́li ví lɛ́ɛ ná xwedó dó hɛn mɛsɛntɔ́ Eblée lɛ́ɛ, bɔ a nǎ ɖɔ nú yě ɔ́ ɖíe:

² Nú mi xɔ kannumɔ ɖé bɔ é nyí Eblée ɔ́, é ná wa azɔ̌ nú mi xɔ xwe ayizɛ́n; xwe tɛ́nwegɔ́ ɔ́, é ná jɛ éɖée sí, bó hɛn ɔ́, é ná yi. É ná sú axɔ́ ɖěbǔ ǎ.

³Nú kannumɔ ɔ́ ɖokpónɔ wɛ wá ɔ́, é ɖokpónɔ géé ná yi, nú é ká ko da asi có bó wá ɔ́, é kpódó asi tɔn kpó ná yi.

⁴Nú é ká nyí ɖɔ gǎn tɔn ɔ́ wɛ da asi n'i, bɔ asi ɔ́ ji vǐ súnnu abǐ nyɔ̌nu n'i ɔ́, asi ɔ́ kpódó vǐ lɛ́ɛ kpó ná nyí gǎn ɔ́ tɔn, bɔ éyɛ́ ɖokpónɔ ná yi.

⁵Lo ɔ́, nú kannumɔ ɔ́ ɖɔ bó tɛ ɖɛ̌ jí ɖɔ émí yí wǎn nú gǎn émítɔn, kpódó asi émítɔn kpó, kpódó vǐ émítɔn lɛ́ɛ kpó, bó má jló ná jó yě dó, bó ná jɛ yěɖée sí ǎ ɔ́,

⁶gǎn ɔ́ ná sɔ́ Mawu dó ɖó kúnnuɖetɔ́, bó ná sɔ́ nya ɔ́ ɖó hɔn tɔn wú, abǐ é ná sɔ́ ɛ ɖó hɔn tɔn sín kpo wú, bó ná sɔ́ swe dó tɔ́n tó n'i dó hɔn ɔ́ wú. Énɛ́ ɔ́, bɛ́ sín gbe énɛ́ ɔ́ gbe ɔ́, nya ɔ́ ná nyí mɛsɛntɔ́ tɔn káká sɔ́yi.

⁷“Nú súnnu ɖé ká sɔ́ vǐ tɔn nyɔ̌nu sa, bɔ é ná nyí kannumɔ ɔ́, nyɔ̌nu énɛ́ ɔ́ ná jɛ éɖée sí kannumɔ súnnu lɛ́ɛ ɖɔhun ǎ.

⁸Nú gǎn tɔn ɔ́, xɔ wɛ é xɔ ɛ, bó ná dó ɖó asi ná, bɔ nǔ tɔn má sɔ́ wá nyɔ́ nukún tɔn mɛ ǎ ɔ́, é ná lɛ́ sɔ́ ɛ sa xá nyɔ̌nu ɔ́ sín tɔ́; é ɖó acɛ bó ná sɔ́ ɛ sa xá to ɖěvo mɛ nu ǎ. Nú é wa mɔ̌ ɔ́, acɛ wɛ é gba wǔ tɔn.

⁹Nú é ká nyí vǐ tɔn ná zé jó ná wɛ é ɖe ɔ́, é ɖó ná hɛn ɛ lě e è nɔ́ hɛn vǐ mɛtɔn nyɔ̌nu gbɔn é.

¹⁰Nú gǎn ɔ́ da asi ɖěvo ɔ́, nǔ ɖěbǔ ná hwe sín nǔ e sín acɛ nyɔ̌nu nukɔntɔn ɔ́ ɖó lɛ́ɛ mɛ ǎ; é wɛ nyí: é ná nɔ́ ná ɛ nǔɖuɖu, é ná nɔ́ xɔ avɔ n'i, é ná nɔ́ ɖó xó xá ɛ.

¹¹Nú é ma nɔ bló nǔ atɔn énɛ́ lɛ́ɛ n'i ǎ ɔ́, nyɔ̌nu ɔ́ sixú lɛ́ jɛ éɖée sí, é ka ná sú axɔ́ ɖěbǔ mɛɖé ǎ.”

¹² Mawu ɖɔ: “Nú mɛɖé xo mɛ hu ɔ́, è ɖó nǎ hu mɛ ɔ́,

¹³ nú é má ká nyí é ɖésúnɔ wɛ jló bó hu mɛ ǎ, bɔ ényí nyɛ Mawu wɛ yí gbe ná bɔ é jɛ ɔ́, un ná xlɛ́ fí ɖé mi, bɔ mɛ e hu mɛ ɔ́ ná hɔn yi cí.

¹⁴Amɔ̌, nú mɛɖé tunwun, lobo sɔ́ sísɛ́ ɖó nukɔn bó hu mɛ ɔ́, nú mɛ énɛ́ ɔ́ ná bo hɔn yi cí vɔ̌sákpe ce kpá ɔ́, mi ná yi dɔn ɛ tɔ́n, bó hu i.

¹⁵“Mɛ e ná xo tɔ́ tɔn abǐ nɔ tɔn ɔ́, è ɖǒ ná hu i.

¹⁶ “Mɛ e ná fin gbɛtɔ́ ɔ́, è nǎ hu i; é sixú nyí sa wɛ è ko yi sa, é ká sixú hɛn ɛ ɖó xwé tɔn gbe, è ɖǒ ná hu i.

¹⁷ “Mɛ e dó nu tɔ́ tɔn abǐ nɔ tɔn ɔ́, è ɖǒ ná hu i.”

¹⁸Mawu ɖɔ: “Nú mɛ ɖé lɛ́ɛ ɖo jlɛ ɖɔ wɛ, bɔ mɛ ɖokpó dó awǐnnya abǐ akpotokwín mɛ ɖě ɔ́, bɔ mɛ e è dǒ nǔ ɔ́ má kú ǎ, bó ká jɛ xɔ ɔ́,

¹⁹ényí é sixú sí te bó zé kpo bo ɖi sa jɛ kɔ́xo ɔ́, è nǎ wa nǔɖé nú mɛ e dó nǔ i ɔ́ ǎ. Amɔ̌, azǎn nabí e mɛ e é dó nǔ ɔ́ ná nɔ xɔ mɛ xɔ, bó má sɔ́ ná sixú wa nǔɖé ǎ ɔ́, é ná sú xɔ e é jɛ ɔ́ sín axɔ́ ɛ, bó ná lɛ́ ná akwɛ́ ɛ, bɔ é ná dó kpé nukún dó wǔ tɔn káká bɔ azɔn tɔn ná gbɔ.

²⁰“Nú gǎn ɖé sɔ́ kpo dó xo kannumɔ tɔn súnnu abǐ nyɔ̌nu bɔ é kú ɔ́, è ɖǒ ná ba hlɔn n'i.

²¹Nú kannumɔ ɔ́ ká nɔ gbɛ gbe ɖokpó abǐ azǎn we ɔ́, è sɔ́ ɖó ná ba hlɔn n'i ǎ, ɖó étɔn wɛ é nyí.

²²“Ényí ɖɔ mɛɖé lɛ́ɛ ɖo jlɛ ɖɔ wɛ, bó xo za nú nyɔ̌nu xoxónɔ ɖé, bɔ nyɔ̌nu ɔ́ gblé xo, nú nǔ nyanya ɖé má sɔ́ wa ɛ ǎ ɔ́, yě ná yi ɖɔ xó ɔ́ ɖo hwɛɖɔtɔ́ gɔ́n, é jló asisúnɔ ɔ́, é ná byɔ́ akwɛ́ ɖé, nú hwɛɖɔtɔ́ ɔ́ yí gbe ná ɔ́, mɛ e dó nǔ ɔ́ sin ɔ́ ná sú.

²³Lo ɔ́, nú nǔ nyanya ɖé wa nyɔ̌nu ɔ́, è nǎ dɔn tó nú mɛ e dó nǔ ɔ́ sin ɔ́, lě e sɛ́n ɔ́ zɔ́n gbɔn é wɛ nyí ɖɔ: a hu mɛ ɔ́, è nǎ hu we.

²⁴ A tɔ́n nukún mɛ ɔ́, è nǎ tɔ́n nukún we. A sún aɖǔ mɛ ɔ́, è nǎ sún aɖǔ we; a wɛ̌n alɔ mɛ ɔ́, è nǎ wɛ̌n alɔ we; a wɛ̌n afɔ mɛ ɔ́, è nǎ wɛ̌n afɔ we.

²⁵A sí myɔ mɛ ɔ́, è nǎ sí myɔ we; a gblě wǔ mɛ ɔ́, è nǎ gblé wǔ we; a dǒ nǔ mɛ ɔ́, è nǎ dǒ nǔ we.

²⁶“Nú mɛɖé xo kannumɔ tɔn súnnu abǐ nyɔ̌nu, bó gba nukún i ɔ́, é ná jó kannumɔ ɔ́ dó bɔ é ná jɛ éɖée sí; nǔ énɛ́ ɔ́ e é wa ɔ́ wɛ ná nyí axɔ́ e é ná sú é.

²⁷Ényí aɖǔ wɛ é sún kannumɔ ɔ́, é ná jó kannumɔ ɔ́ dó bɔ é ná jɛ éɖée sí; nǔ énɛ́ e é ná wa ɔ́ wɛ ná nyí axɔ́ e ná sú é.

²⁸“Nú nyibú ɖé sɔ́ zo súnnu ɖé abǐ nyɔ̌nu ɖé bɔ é kú ɔ́, è ɖǒ ná nyi hwǎn dó hu nyibú ɔ́ ná, è ka ná ɖu lan tɔn ǎ, è ka ná wa nǔɖé nú nyibúnɔ ɔ́ ǎ.

²⁹Amɔ̌, nú ényí ɖɔ mɔ̌ wɛ nyibú ɔ́ kó nɔ́ bló, bɔ è ko nɔ ɖɔ nú nyibúnɔ ɔ́, bɔ éyɛ́ má ké ya ná ǎ, bɔ nyibú ɔ́ hu mɛ ɔ́, è nǎ nyi hwǎn dó hu nyibú ɔ́, bó ná hu mɛ e ɖó e ɔ́ lɔmɔ̌.

³⁰Nú è ka mɔ ɖɔ nyibúnɔ ɔ́ ná ná akwɛ́ ɖé, bó ná dó xɔ gbɛ nú éɖée ɔ́, é ná ná akwɛ́ e è byɔ́ ɛ ɔ́ bǐ dandan.

³¹Nú nyibú ɔ́ sɔ́ zo súnnuví ɖé abǐ nyɔ̌nuví ɖé bɔ é kú ɔ́, sɛ́n ɖokpó énɛ́ ɔ́ wɛ è nǎ dó wa azɔ̌ ná.

³²Nú é ká nyí ɖɔ kannumɔ súnnu abǐ nyɔ̌nu ɖé wɛ nyibú ɔ́ sɔ́ zo bɔ é kú ɔ́, nyibúnɔ ɔ́ ɖó ná sú gankwɛ́ gban (30) kannumɔ ɔ́ sín gǎn; è ka ná nyi hwǎn dó hu nyibú ɔ́.

³³“Nú mɛɖé hun tɔ tɔn nyi nuvo, abǐ è kun, bó má sɔ́ nusú ɖ'é nu ǎ, bɔ nyibú abǐ tócí ɖé jɛ mɛ ɔ́,

³⁴mɛ e tɔn nyí tɔ ɔ́ ná sú kanlin e jɛ tɔ ɔ́ mɛ ɔ́ sín axɔ́ kanlinnɔ ɔ́; kanlin kúkú ɔ́ ká ná húzú étɔn.

³⁵“Nú nyibú mɛɖé tɔn sɔ́ zo mɛ ɖě ɔ́ tɔn bɔ é kú ɔ́, è nǎ sa nyibú e ɖo gbɛ ɔ́, bɔ nyibúnɔ we lɛ́ɛ ná má akwɛ́ tɔn, bó ná lɛ́ má nyibú e kú ɔ́.

³⁶Nú é ká nyí ɖɔ mɔ̌ wɛ nyibú ɔ́ kó nɔ́ bló, bɔ nyibúnɔ ɔ́ má ká nɔ́ kpé nukún wǔ tɔn ǎ ɔ́, è nǎ zé nyibú gbɛɖe ɔ́ dó ɖyɔ́ éé kú ɔ́ ná; énɛ́ ɔ́, nyibú e kú ɔ́ ná húzú étɔn.”

³⁷Mawu ɖɔ: “Mǐ nǐ ɖɔ mɛɖé fin nyibú, abǐ lɛ̌ngbɔ́ bó hu, abǐ é sa; ényí nyibú ɖokpó wɛ é fin ɔ́, é ná ná nyibú atɔn dó sú axɔ́; é ka nyí lɛ̌ngbɔ́ ɖokpó wɛ é fin ɔ́, é ná ná lɛ̌ngbɔ́ ɛnɛ dó sú axɔ́.”